Oroma 8 - ALA WENE HIVIS DIRUP WATUGWA

Ala Averiniki ninim hunik dugwit, ogagu dogop wene

¹ Anderogo halok, nit Keretus Yesus ninim hunik agurik atma, At Ala en weyak onggo nenovaga okbininayogon mondok dek.

² Andi, nit weyak ogasagwi halok, hambugu dogop wene ako vaga heda mago werekma, wene At Ala Averiniki niniluk okninivisiga akoen nit Keretus Yesus inim hunik dugwit, heda visilogo bininggigirikmu agurik.

³ Musa wene ogasagwi vaga nenagap wendakhedaup ako, nenendawi endak menda en, “Ogarubuk,” yukneraliga vaga ogarup meyan halok, nenagap wendakhedaup andi degat helagwi. Anderogo hegek ovara, At Ala en imbitigi ako andi, nit weyak ogasagwi ako degerogo bapwak yiluk, At Abut ako avakwa wane-wane-at lakba wagagi. Lakba wagagirikmu, o yoma nit avakwa wane-wane ninimat dugwit, weyak ogarup hegek ovara, ogagetek welagagi vaga nit weyak ogasagwi ako degerogo bagagi.

⁴ At Ala ogagagi ako andi, nenendawi endak menda en yukneraliga ako, ogasagwidek, ata, Averiniki en yukneraliga “Yerogo ogarup, nderogo ogarup,” wene mondok sek ako nit akoen wane-wane atma des erogo ogagu dogopwak yiluk, At Abut Yesus-at lakba wagagi.

⁵ It avakwa enendawi endak menda en yugeraliga ako ogagu dugwit, enendawi en ninggya halok ogarup adigat wenggelit nelagwi. It anderogo wenggelit nelagwi ovara, Ala Averiniki en yugirigya hegek, ogasagwi halok andi, “At ogarup ombasiga adigat ogagu dogosogom,” yiluk, enape wenggelisagwi.

^6-7 It avakwa enendawi endak menda en ogarup oginipu halok adigat ogarit nelagwi ako, Ala inim ogorek agarwik atma, enendawi endak menda en yugeraliga ako adigat ogasagwi halok, hambusogom. Hambusogom ovara, it avakwa nin Ala Averiniki en yugirigya halok adigat ogarit laguselok andi, iniluk mondok dogop menda hidugwi, eke, Ala inim hunik atma, enendawi ugun seyalek adenggenat hugwi, ogagu dogosogom. Enendawi endak menda en, “Weyak ogarup,” yagaliga akoen Ala wene ogarup andi, Ala avema seve yegetek atma, wene ako ogarup mondok dek.

⁸ It avakwa enendawi endak menda en ogarup oginipu halok adigat ogarit lendagwi akoen Ala endawi sek enombarupwak yiluk, ambi ogarusogom mondok dek.

⁹ Anderogo ovara, hit yi andi, henendawi endak menda en ogarup okhinipu halok ogasagwidek. Ata, Ala Averiniki henendawima agarik halok, Averiniki en yukheraliga ako adigat ogagu hinigis. Eke, Keretus en Ala Averiniki lakba wagagi ako henendawima agarikbuk halok, hit Keretus aburi dek aro.

¹⁰ Eke, Keretus henendawima agarik halok andi, weyak ogasagwi vaga heneyave avyarat hambusogom ovara, Ala en sek erogo wokhinivisiga vaga, Ala Averiniki en hiniluk okhinipu dogosogon.

¹¹ Eke, hambisagwima en Yesus iluk erogo mondok okbagagi At Ala Averiniki ako henendawima agarik halok, At Keretus iluk erogo mondok okbagagi akoen Averiniki wokheragagi henendawima agarik ako vaga hit hambisagwi menda-at ovara, hiniluk erogo mondok okbigigayogon.

¹² Anderogo atma, naswei. Nit ambi ogarup mbalegangge-at nenovaga agarik. Mbalegangge nenovaga agarik andi, nenendawi endak menda en ogarup okninipu halok, amusek labuk. Ata, Ala Averiniki en yukneraliga halok adigat ogagu dogop yiluk, mbalegangge nenovaga agarik andiat.

¹³ Henendawi endak menda en weyak ogarup okhinivisiga ako adigat musek lagu hiniselok andi, hambusogom-at ovara, weyak henendawima daga wandiga ako, Ala Averiniki anye vaga warogo bagu dogosogon halok andi, hiniluk mondok-mondok-at dogogup.

¹⁴ It avakwa At Ala Averiniki en yugirigya hegek ogasagwi ako andi, Ala aburi aro.

¹⁵ Hit Ala Averiniki wagagup andi, ap ambi ayeloman asin avema alon ombasiga hak, hit endak henalon umbutu dugwit ogagu lagagup andi wane-wane wegetek. Ata, nit Ala aburi okbininapwak yiluk, Averiniki wagagup nenendawima dugwit, yuknirigya hegek, “Ala Nasin o. Ala Nasin o,” yiluk, yagalagwi.

¹⁶ Ala Averiniki nenendawima agarik akoen, “Hit Ala aburi aro,” yiluk, yukneraliga.

¹⁷ Eke, nit At aburi halok, Ala en mavorangge At aburi wogeraup imbitigi ako nirat hedaup atma, Keretus ninim wane-wane-at hidugu dogosogom. Andi, At Keretus anggin-mbanggin ovaga bagusigik wigya lagagi ako wane-wane, nit ogo wane-wane wugu niniselok, At siyabagagi ako wane-wane, nit ogo anderogoat siyabininayogon.

Hivis siyabininaup wene

¹⁸ Yogak anggin-mbanggin nenovaga asiga andi, eke hivis siyabininggu hagup ako, iperen ndatak dek atma, wane-wane wal okhabuk ombasiga. Hivis siyabininggu hagup andi, mondok sek aro.

¹⁹ Anderogo atma, yi menda ndi menda Ala bagagi akoen avakwa yagalagwi hak yugu dugwit, “Ala aburi omera hudi sigam okbisami ai?” yiluk, enape wenggelek dugwit, abyam agarwik.

^20-21 Wen mbogot yi menda ndi menda ugun enam warogo sak yagan nelagwi yi ako andi, it eneragen en sak yegetek. Ata, At Ala endawi enat ugun enam warogo sak okbogogirikmu agarwik. Anderogo ogagagi ako, yi menda ndi menda bagagi ako ovok erogo mbuk agya, vidis agya, ogarupwak yiluk heda mago agarik atma, hivis Ala en At aburi heda visilogo siyabugu dugwit, yi menda ndi menda inim heda visilogo siyabisayogon ape wenggelek dugwit, ogagagi.

²² Ala en yi menda ndi menda bagagi ako o muk en, yogak hudi akwa avyak idup en yavul warisagwi ovagak, wane-wane-at yavul watu selagwi.

²³ Yi menda ndi menda At Ala en bagagi ako andi, it adigat, “Ai,” ombasagwidek. Ata, At Ala hivis neneyave At aburi atma yiluk, wokninipu dugwit, nenagamut nggolalogo hekbaluk, swi menda yikbininayogon ako nit ao abyam agurik atma, At endak onggodek unat Averiniki wokneragagi ako nenendawima dugwit, nit ogo “Ai,” yiluk, abyam agurik.

²⁴ Anderogo okninivisogon o, yiluk, nenape wenggenggusim, Ala en nenagap wendakninipigirikmu agurik. Nenape wenggelek ambi, “Nil haik dek, ai,” nenape wenggelek agurik ako hugu dogomindik, andien, nenape wenggelek agurik ako degat arisogon. Ap ambi, “Andi wayogon o,” yiluk, ape wenggelek welagarik, wigya halok, “Ovok wigi atma,” yiluk, ape wenggelek agarik ombasagwi? Dek.

²⁵ Ovara, ninil hegetek menda hasogom yiluk, nenape wenggelek agurik halok, nenendawi mondok hora yiluk, sok helagwi.

²⁶ Anderogo atma, nit nenanyedek niniselok, Ala Averiniki wagya lagarik, yonggat-ninivisiga. “Nit nggarogonggan samban ogaruk?” umbutu ninigik ovara, nit nenendawi ane yagalagwi ako avakwa enane yagalagwidek menda vaga Ala Averiniki akoen mbikit Nenasin Ala yugisiga.

²⁷ Averiniki akoen Ala endawi ombasiga musek At aburi adik denek enake samban ogasiga atma, avakwa enendawi dibisiliga Ala akoen Averiniki ombasiga ako ilup-at agarik.

²⁸ Nit Ala endawi ombasiga wane-wane ogagu dogoguluk, neneyanggup yukneragagi ako, At ninim nenendawi hunik niniselok, yi menda ndi menda ogasagwi inim, okbininelagwi inim, andi ovok erogo Ala en nit sek ogarup ambi haguluk, okbininggya helagwi.

²⁹ Nit ao endak lagatek ninigik, Ala en nit At Abut ovavut wane-wane aruguluk, mikninipu lagagirik, denogo bininggigi. Andi vaga, At Abut manggum Yesus ako, nit At aori wisane ninim dogoguluk, mikninipigi.

³⁰ Nit endaklagatek ninigik mikninipu lagagirik, denogo bininggigi ako At neneyanggup yukneragagi. Eke, neneyanggup yukneragagi ako Aren, “Hit mondok sek,” yiluk, wokninipigi. Eke, wokninipigi ako At ninim siyabininggigi.

Keretus ninim hunik niniselok, okbininaliga wene

³¹ Anderogo atma, wene yukhirigi andi vaga nggarogo yup ombasagwi? Ala ninim agarik atma, saen ogorogo bininayogon ombasagwi?

³² At Ala Abut ambiat ovara, idi yegetek nit ovok nenake warupwak yiluk, wombaba wagagi akoen Abut wokneragagi ako wane-wane, nenabwa en yi menda ndi menda ovok erogo woknerayogonbuk yiluk yagalagwi?

³³ Nit mikninipigi Ala akoen, “Hit weyak dek aro,” yiluk, yukneraliga atma, hivis ambi saen, “Hit andi weyak o,” yiluk, yuknerami? Mondok dek.

³⁴ Eke, Ala en, “Hit weyak o,” yiluk yukneregetek hegek, ap ambi saen, “Hit weyak ogagep atma, onggo bas,” yiluk, wene nenovaga bininaup ombasagwi? Mondok dek. At hambigya lagagimu, Ala en iluk erogo mendok okbagagi yogak Ala inggis amotkan horaik dugwit, ninidi yagaliga andi, Keretus Yesus aro.

³⁵ Keretus endawi ninim mondok hunik agarik atma, saen ogorogo bininayogon ombasagwi? Idup-mbidup nenovaga agya, anggin-mbanggin nenovaga agya, wiyiknom-weyaknom erogo bininggwis, erom uvup okninipu, nenangge-nenangge dek agya dugwit, nenagap mbedan agya, nenaruguluk hurimbis yuknirugwi, it ovok erogo en ndup senggere ninitwis, andi menda ovok erogo nenovaga arisogon vaga Keretus ninim ogorogo bininayogon ombasagwi? Mondok dek.

³⁶ Wene andi ndatak, Ala wene endak dirup warek ako vaga ambi iri dugwit: “Nit Hat haburi agagup vaga, o hutun en o hup ari lagyama, nenaruguluk ogagusigik agurik. Ndomba waruguluk wolok lendagwi hak, ‘Anderogoat ogonivusogom,’ nenombasagwi o,” yiluk, dirup warek ako wane-wane okninivit wendagwi.

³⁷ Andi ovok erogo okninivit wagusigik, Keretus ninim mondok hunik agarik andi vaga, enandup-enameda sovalogo bisiluk, enayegen inis ombok asiga andi, mondok iya-at ovara, nit ako andi, ap ninil werek mondok siyalek-at agurik.

^38-39 Nit Nenowa Keretus Yesus mondok ninim hunik niniselok, Ala endawi hunik wisane okninivisiga atma, niniluk agurik vaga en, hambisagwi vaga en, it malaikat vaga en, yi madis ndi madis enanye werek agarwik vaga en, yogak vaga en, hivis ogarisogon vaga en, mbogot vaga menda vaga en, wen vaga yoma menda vaga en, yi menda ndi menda bagagi andi ovok erogo Ala ninim ogorogo bininayogon mondok dek o, yiluk, an avyarat yukheraliga.