Oroma 7 - ALA WENE HIVIS DIRUP WATUGWA

Akwa woginivisagwi vaga wakhegek yugeragagi wene

¹ Naswei. An wene yukherayogon yi, hit “Yerogo ogarup, nderogo ogarup,” wene hobalek ako hinilup atma, yukherayogon. Avakwa iniluk vaga, wene hobalek ako avema dugwit ogasagwi ovara, hambugu dugwit wene ako avema agarwikbuk, hinilup-at.

² Wene wakhegek ambi yukherayogon. Wene hobalek ogagu dogop ako musek lagu dugwit, hwa ambi agun ao iluk hegek, inim hondalek agarik ovara, agun hambigya halok andi, wene ogagu dogop ako dek agarikmu hwa ako visilek-at dogosogon.

³ Anderogo halok, at hwa ako agun iluk hegek, ap adik wigya halok andi, “Wanggis-at ogasiga,” ombarusogom ovara, agun ako hambigya halok andi, wene ogagu dogop ako dek agarikmu, ap adik wigya halok, “Wanggis wagas,” ombarusogombuk.

⁴ Naswei. Anderogo wane-wane, hit ogo, Keretus eyave watugwa andi, hinimat hombagagup atma, Musa wene ako avema agipikbuk. Eke yogak andi, hit Ala ake sek ogagu dogovovok yiluk, At Yesus hambisagwima en iluk erogo mondok okbagagi ako At angge-at wokhinipigirikmu agipik.

⁵ Nit nenendawi endak menda en yuknirigya halok, ogarit lagu dugwit, Musa wene ako hobaluk, “Nenendawi hogop ombasagwi ako ogaripim, mumoga adigat yukneraliga yi, nenanggon a,” yiluk, umbutugup. Nenanggon umbutu dugwit, nenaninis okninipu halok, weyak ugun ogarit lagu lagagup vaga hambit lagu lagagup andi aro.

⁶ Ala en Musa wene yugogogi ako ogagu dogosogom yiluk, heda marek ovagak welagagup ovara, Keretus ninim hombagagup ako vaga visilogo bininggigirikmu, Ala ake ogagu dugwit, nit endak Musa wene dirup warek halok adigat ogagu lagagup ako andi, ogasagwidek. Ata, Ala Averiniki en nenendawi swi menda okbininggya hegek, Ala ake ogasagwi.

Musa wene ako vaga weyak ogasagwi sigam asiga wene

⁷ Andi halok, nit wene nggarogo yup ombasagwi? Ala wene Musa dirup watigi ako andi, weyagat ombasagwi? Mondok dek aro. Wene Musa yugiklipuk en, weyak ogasiga andi an nilup aklibuk. Eke wene andi vaga en, “Hogop-hogop adigat umbutu dogobuk,” yilipuk en, an hogop adigat ombasiga andi, an mondok nilup aklibuk.

⁸ Wene anderogo yilipuk en, weyak ogarup okninivisiga ako andi, “Weyagat higi o,” yiluk, umbutu duklubuk. Ata, Musa wene ako vaga, “Hogop-hogop umbutu dogobuk,” yagagi andi, nilup dugwit ovara, weyak adem nendawima agarik akoen mendek iri lagagirik, “Hogop ombarup nanonggal hegek mumoga adigat yuknisiga yi, nanggon a,” yiluk, wene ako sovalogo baluk, yi menda ndi menda hogop adigat imbita lagagis.

⁹ Endak andi, Musa wene ako, an ninggut dugwit, nendawi ugun seyalek nagu lagagis ovara, ogarup moga wene ako sigam agya lagagimu, weyak ogarup okneraliga adem ako nendawima wenggelagya lagagirik,

¹⁰ narogo baninggigi. Ala en Musa wene ako niniluk dogopwak yiluk, yugogogi ovara, an andi, wene andi vaga mondok narogo baninggigi.

¹¹ Ogarup moga wene ako hobaluk, weyak adem nendawima agarik ako nambukmu mendek iri dugwit, “Wene ako sovalogo baluk weyak ogarup nanonggal aga atma, ogarisogon,” yiluk, yuknugu halok ogasiga atma, wene ako vaga enat narogo baninggigirikmu agirik.

¹² Andi halok, Musa wene andi, weyak dek mondok sek adik denek. Eke, wene Ala en, “Yerogo ogarup, nderogo ogarup,” yiluk, yagagi ako andi ogo, mondok sek, avyarat, adik denek-at agarik.

¹³ Eke, narogo baninggigi ako andi, wene sek akoen an narogo baninggigi ombasagwi? Mondok dek aro, naswei. Ata, an weyak ogarup okneraliga ako andi, weyagat yedok hagiluk, wene sek akoen, “Hit weyak ogagu hiniselok hambusogom o,” yiluk, yagagi ako vaga narogo baninggigi. Eke, “Ogarup moga,” wene ako andi vaga, “Weyak ogasagwi andi, mondok-mondok weyak,” yedok haguluk, yuknirigya helagwi.

Nendawi endak menda inim, swi menda inim, iperen ogorek agarwik wene

¹⁴ Musa wene andi, Ala Averiniki enat yugogogi ninilup ovara, an halok andi, eve avakwa aro. Ap ambi ayeloman onggo mbanggarikmu, at avema dugwit ane hobaluk adigat ogasiga ako hak, an anderogoat weyak ogagya dogogiluk weyak avema-at agirik.

¹⁵ An ogasogon ombasiga ako, ogagetek dugwit, ogarup nanggon ombasiga akoat ogasiga atma, an nggarogo ogasiga andi, an mondok dibaligadek.

¹⁶ An ogasiga andi, nanggon imbita dugwit ovara, ogasiga halok, ogasiga andi vaga, Musa wene ako andi, “Segat higi,” imbita dugwit, wene andiat anye erogo baliga.

¹⁷ Anderogo ogasiga ako andi, “Anen ogasogon,” yiluk, ogasigadek. Ata, weyak nendawima agarik ako enat, “Ogaru,” yuknugu halok, ogasiga.

¹⁸ An sek ogarup ombasiga ovara, ogarup meyan asiga. An eve avakwa atma, nendawima sek ambi ogarup okneraligadek andi nilup agirik.

¹⁹ An sek ogasogon ombasiga ovara, eyave ogasigadek. Ata, weyak ogarup nanggon ombasiga akoat ogasiga.

²⁰ Anderogo atma, an ogarup nanggon ombasiga akoat ogagya neyalok, anenen ogasigadek. Ata, weyak nendawima agarik ako enat, “Ogaru,” yuknugu halok, ogasiga atma, ai!

²¹ Ogagu dogop wene nendawima musek landiga ako yi aro. An sek ogasogon, imbita neyagek ovara, weyak ogarup oknitya halok adigat ogasiga higi.

²² Ala en, “Yerogo ogarup, nderogo ogarup,” yagagi wene andi, an nendawima en ogarup andi nendawi sek ovara,

²³ wene adik ambi nendawima agarik akoen wenggelagya dugwit, wene sek nendawima en ogarup ombasiga ako sovalogo baluk ogasiga atma, an heda marek ovagak dugwit, “Weyak ogarup,” yuknisiga wene andi adigat ogasiga, ai sts!

²⁴ Weyak ogarup okneraliga ako adigat ogarit lagya dugwit, atok vaga wotok erogo hambup-at ari landiga atma, nendawi mondok weyak dugwit, “Saen nagap wendarimi?” yiluk, nape wenggelisiga.

²⁵ Nenowa Inis Ombok Yesus Keretus ogagagi andi vaga Ala en nagap wendaknitya lagagimu, Nasin Ala “Wa,” yugisiga! Anderogo atma, nendawi venak swi vaga en Ala yagagi wene ako, “Ogasogon,” ombasiga vaga, “An Ala ayeloman-at agirik higi,” yiluk, ombasiga. Eke, nendawi endak menda venak akoen weyak ogarup okneraliga akoat ogagya vaga, “Weyak ogarup wene ako an avema-at agirik higi,” yiluk, ombasiga o!