Oroma 5 - ALA WENE HIVIS DIRUP WATUGWA

Ala en, “Ap yi, mondok sek aro,” yiluk, wokninivisiga wene

¹ Anderogo atma, yogak nenendawi At ovaga vanggabaluk avyarat ombasagwi vaga At Ala en, “Ap yi, mondok sek aro,” yiluk, wokninivisiga atma, Nenowa Inis Ombok Yesus Keretus ogagagi vaga nenendawi ugun wadokdek seyalek Ala ninim hunigat agurik.

² Nit nenendawi Yesus ovaga vanggabaluk avyarat ombasagwi vaga, At Ala nenabwa en onggodek unat okbininaliga ako Yesus vaga sup hutbininggigirikmu agurik. Anderogo dugwit, Ala siyalek agarik hak, nit anderogo wane-wane siyabininaup nenape wenggelek dugwit, nenendawi adenggen wisane-at agurik.

³ Andi vaga adigat nenendawi adenggen ombasagwidek. Ata, anggin-mbanggin okbininelagwi andi, nenendawi wadokdek dugwit wugu dogopwak yiluk nenovaga asiga andi ninilup atma, okbinunggusigik, nenendawi adenggen wisane ombasagwi.

⁴ Nenendawi wadokdek dugwit, welagwi andi vaga nenavut mbanggya hegek, Ala en, “At yi endawi sagain segat higi,” nenombasiga. Nenombasiga andi vaga, nit akoen, “Ala en wokninivisogon avyarat higyo,” yiluk, nenape mondok wenggelek-at agurik.

⁵ Eke, nenape wenggelek anderogoat agurik atma, At Ala en Averiniki wokneragagi andi vaga Ala endawi hunik en mondok iya erogo nenabwa ombasiga ninilup dugwit, nenape wenggelek agurik ako hedasogom-at ombasagwi atma, nenendawi anggin agurikbuk.

⁶ Nit nenagap wendakhedaup mondok meyanat ninigik, Ala en, “Andi hudi Keretus warupwak o,” yiluk, imbitigi ako hudi atma des yi wagya lagagimu, nit weyak ogasagwi menda nenake At hombagagi.

⁷ Ap ambi avakwa enabwa en sek adigat okbigik landiga ako, waruguluk ogaguselok, at aswe ambi idi en hambup alon dek dugwit, “At waruguven, avoloma anat nares o,” yiluk, it ambitap en anderogo yup sek. Anderogo ovara, ap ambi avakwa enabwa ombasigadek un wene hobalek musek okbigik landiga menda waruguluk ogaguselok andi, “Avoloma anat nares o,” yiluk, saen idi yup erek.

⁸ Anderogo ovara, At Ala en andi, nit ao weyak ogagu ninigik, Keretus nenake hombagagi andi vaga Ala en nenabwa ombok erogo nenombasiga helagwi.

⁹ Eke, yogak At amuya vaga Ala en, “Ap yi, mondok sek aro,” yiluk, wokninipigi atma, “Hivis Ala en nenagap wendarisogonbuk, aninis okbininayogon,” yiluk, yagalagwi? Mondok dek. Nenagap wendarisogon-at umbutu dogosogom.

¹⁰ Nit Ala ninim ogorek ninigik, At Abut nenake hombagagi vaga Ala en ninim dambulogo bininggigi atma, yogak ninim hunik agurik ako, Keretus eyave iluk agagi vaga nenagap wendarisogonbuk atma yiluk, yagalagwi? Mondok dek. Ninim hunik agurik atma, nenagap wendarisogon-at umbutu dogosogom.

¹¹ Andi ogagagi vaga adigat nenadenggen umbutu dogop dek aro. Ata, ambi nit Nenowa Yesus Keretus ogagagi ako vaga Ala ninim dambulogo bininggigi atma, “Ala wa,” yiluk, nenadenggen umbutu dogosogom.

Hambisagwi adem Adam vaga ombok agya, eke, niniluk dogop adem Keretus vaga ombok agya, ogagagi wene

¹² Anderogo atma, ap ambiat weyak ogagagi vaga nit yi avakwa ndi avakwa ovok erogo weyak menda nenovaga agagi. Eke, at weyak ogagagi vaga hombagagi ako wane-wane, nit ovok erogo weyak ogagu lagagup vaga hambisagwi adem nenovaga agagirikmu, hambisagwi.

¹³ Ala en wene Musa ao yugigitek hegek, weyak ogagu lagagwa ovara, wene hobalek ako ao yugigitek welagagirikmu, it weyak ogasagwi ako, Ala en inggis dingginggitek-at welagagi.

¹⁴ Inggis dingginggitek-at welagagi ovara, at Adam welagagi hudien, Musa welagagi hudi vaga, it avakwa ovok erogo at Adam Ala yugogogi ako sagalogo baluk, weyak ogagagi ako wane-wane, irenen anderogo ogagetek ovara, hegek, it ogo, hambisagwi adem avema dugwit, hambit lagu lagagwa. At Adam ogagagi ako andi, At hivis ogari warup agut wakhegek-at ogagagi ovara,

¹⁵ Ala en un onggodek wokneragagi ako andi, at Adam en Ala ane sagalogo baluk, weyak ogagagi ako wane-wane dek. At Adam adik en weyak ogagagi vaga, nit avakwa ovok erogo hambugu lagagup andi iya. Hambugu lagagup andi iya ovara, ap adik ambi Yesus Keretus nenabwa en nenake ogagagi vaga Ala endawi hunik en nit yi avakwa ndi avakwa ovok erogo onggodek unat sek okbininggigi ako andi, eve mondok iya aro!

¹⁶ At Ala en un onggodek wokneragagi vaga sek okbininggigi inim, eke, Adam weyak ogagagi vaga weyak menda nenovaga agagi ako inim, andi wane-wane dek, ata it adik-adik ogagagwa. At Adam ako, ndugwis ambiat weyak ogagagi vaga Ala en owak dilogo weyak onggo okbagagi ovara, nit ako andi, ndugurek-ndagarek weyak ogagu ninigik ovara, nenabwa en un onggodek wokneragagi ako vaga, “Hit henovaga weyak ambi dek segat hinigis o,” yiluk, yukneraliga.

¹⁷ Ap ambien at weyak ogagagi vaga nit ovok hambisagwi adem avema dugwit, hambisagwi andi, avyarat ovara, ap ambi Yesus Keretus ogagagi vaga Ala endawi hunik en nenabwa ombok erogo imbita dugwit, onggodek unat wokninipigi ako wugu niniselok, mondok hambusogom ombasagwi? Dek. Nit At ninim hunik dugwit, mondok-mondok niniluk dogosogom.

¹⁸ Andi halok, at Adam en Ala ane sagalogo baluk, weyak ambiat ogagagi vaga nit avakwa ovok erogo weyak onggo nenovaga agagi andi wane-wane, At Yesus en sek ogagagi vaga nit avakwa ovok niniluk dogosogom yiluk, Ala en, “Ap yi, weyak dek o,” yiluk, sek erogo wokninivisiga.

¹⁹ Ap ambien Ala yugogogi wane-wane ogagetek weyak ogagagi vaga nit avakwa ovok weyak ogagu lagagup ako hak, yogak ogo, anderogoat ap adik ambien Ala ane des erogo ogagagi vaga nit avakwa ovok erogo sek ninimbita dugwit wokninivigiluk ogagya helagwi.

²⁰ Endak avakwa en weyak ogagu lagagwa ovara, weyak ogasagwi yedok hugu dogopwak yiluk, hivis Ala en Musa wene ako yugogogi. Andi ogarit lagu dugwit, weyak wisane ogarit laguselok, Ala en enabwa ombok erogo imbita dugwit, endawi hunik en sek okbisilin lagya lagagi.

²¹ Weyak ogarit lagu lagagup vaga hambisagwi adem nenovaga agagi ako wane-wane, yogak Nenowa Yesus Keretus en ogagagi vaga sek ninimbita dugwit wokniniviluk, mondok niniluk dogosogom yiluk, Ala nenabwa en okbininggigi wene ako nenovaga agagi.