Oroma 4 - ALA WENE HIVIS DIRUP WATUGWA

Averakam avyarat imbitigi vaga Ala en “Hat sek o,” yiluk, yugogogi wene

¹ Anderogo atma, wene yi, nit avakwa nenombao Averakam ogagagi ako nggarogo yuk?

^2-3 At ogagagi vaga Ala en, “Ap yi, sek aro,” yiluk, welapmu en, andi vaga avyarat “An iya aro,” yiluk, ombaklip ovara, dek. Ata, Ala wene dirup warek ambi iri dugwit, “At Averakam endawi At Ala ovaga vanggabaluk avyarat imbitigi vaga, Ala en ‘Hat hendawi sagain mondok segat,’ yiluk, wogogi o,” yiluk, Ala wene dirup warek agarik andi vaga, Ala enat okbagagi helagwi atma, Ala ivaga at wogobetaup andi mondok dek aro.

⁴ Ap ambi yavup ogaga vaga onggo wogugu dugwit, “Yi un wokhisiga o,” yiluk, yugisigadek. Ata, “Yi yavup ogagen onggo-at wokhisiga o,” yiluk, yugisiga.

⁵ Hit, “Ala en an sek neyalok woknerapwak yiluk, yavup ambi nggarogo ogarik?” yiluk, embetetek dugwit, it weyak ogasagwi menda sek inimbita dugwit woginivisiga Ala ako, henendawi At ovaga vanggabaluk avyarat umbutu hiniselok, hit avyarat ombasagwi andi vaga Ala en, “Hit segat hinigis o,” yiluk, wokhinivisogon.

⁶ At Ala en anderogo wokninivisiga ako, At Daut en ambi iri dugwit, “Ap ambi en, ‘Ala sek nombarupwak yiluk, an sek okhedayogon,’ yiluk, embetetek hegek, Ala en adigat ‘An segat heyaliga o,’ iri halok, at ako adenggenat imbita dogosogon o,” yiluk, at Daut en yagagi ako wane-wane-at yukheraliga.

⁷ At Daut en iri dugwit: “It ap Ala wene sagalogo baguselok andi, it weyak ogasagwi ako degerogo bugu, eke, “Weyak ako dek o,” yiluk, horogo bugu, okbogogi ako andi, enadenggen wisane-at umbutu dogosogom.

⁸ It ap enomaduk At Ala en inggis dingginggitek halok, enadenggenat umbutu dogosogom,” yiluk, yagagi dirup warek andi agarik.

⁹ Enendawi adenggen umbutu dogop wene yagagi ako andi, enagamut mbalek andi adigat enake yagagi a, ata mbalekdek inim ovok erogo enake yagagi a? “At Averakam endawi Ala ovaga vanggabaluk avyarat imbitigi andi vaga, At Ala en ‘Hat hendawi sagain mondok segat heyagi,’ yiluk, wogogi o,” yiluk, Ala wene dirup warek endak yukhirigi ako atma,

¹⁰ Averakam nggarogo hegek Ala en sek imbitigi embetep? At agamut mbanggitek hegek sek imbitigi a, ata mbalek hegek sek imbitigi a? Mbalek hegek dek o. Ata, mbalekdek hegek endak sek imbitigi.

¹¹ Eke, at avyarat imbitigi vaga Ala en avyarat, “Hat segat heyagi o,” yiluk, wogogi ako avakwa inilup arupwak yiluk, enagamut mbalup wene yugogogi ako, agamut ao mbalekdek hegek at yugogogi. Anderogo atma, enagamut mbanggitek hegek, Ala avyarat ombasagwi vaga, At Ala en, “Hit segat hinigis o,” yiluk, woginivisiga ako andi, it enombao Averakam aro.

¹² Eke, enagamut mbalek andi ogo, enombao andi Averakam aro. Eke un enagamut mbalek andi vaga adigat enombao dek. Ata, at Averakam andi agamut mbalekdek hegek endawi Ala ovaga vanggabaluk avyarat imbita lagagirik, ogagya lagagi ako, nit ogo wane-wane avyarat umbutu dugwit ogagu niniselok andi, nenombao Averakam-at.

Nit Ala en wokninivup avok yagagi ako avyarat ombasagwi vaga hedaup wene

¹³ At Ala en, “Hat Averakam hombawi hinim yi awi ndi awi wen andok arusogom o,” yiluk, avok yugogogi ako andi, Musa wene ako vaga wokbaluk, ogarit lagya vaga yugigitek. Ata, at Averakam Ala avyarat imbitigi vaga, At Ala en “Hat segat heyagi o,” yiluk, wigya dugwit, wen avok ako yugogogi.

¹⁴ Ala en Averakam avok yugogogi wene ako, Ala en it avakwa Musa wene ogasagwi ako, andok okbiselapma en, it avyarat ombasagwi vaga andok arup ombasagwi ako andi, un enam warogo-at umbutu duklip. Eke, At Ala en avok yugogogi wene ako, andi ogo un enam warogo-at yugogogi umbutu duklip.

¹⁵ Musa wene andi vaga en, Ala aninis nenovaga bininggu helagwi ovara, wene hobalek ambi dek duklip en, “Weyak ogagagin o,” yiluk yukneregetek-at duklip.

¹⁶ Anderogo atma, At Ala en Averakam avok yugogogi andi, avakwa avyarat ombasagwi vaga Ala enabwa en onggodek unat andok okbisaliga. Andi, it avakwa Musa wene ogasagwi menda inim, eke it avakwa Averakam endawi avyarat imbitigi wane-wane enendawi avyarat ombasagwi inim, nit ovok erogo Averakam ombawi agurik atma, At Ala en andok okbininaliga. At Averakam ako nit ovok erogo nenombao agarik.

¹⁷ Endak At Ala en Averakam yugugu dugwit, “Yi avakwa ndi avakwa ininis unggul adik-adik menda wisane erogo enombao harat denogo bagagi o,” yiluk, yugogogi dirup warek agarik ako wane-wane Averakam andi nit ovok erogo nenombao agarik. Eke, wene Ala en Averakam yugogogi ako, At Averakam en, “Ala ako avakwa hambisagwima en iniluk erogo mondok okbugu, yi menda ndi menda dek menda andi werek ogagya, ogasiga Ala ako, avyarat yagas,” yiluk, ovaga vanggabaluk, avyarat imbitigi.

¹⁸ At Ala en Averakam yugugu dugwit, “Hat habut endaklarisogon vaga dadiwap anderogo wane-wane-at wisane arugup o,” yiluk, yugogogi ako, ogarup meyanat hegek ovara, yugogogi avyarat imbita dugwit, “Avyarat okbanisogon o,” yiluk ape wenggelek welagagi. “Avyarat okbanisogon,” ape wenggelek welagagi atma, yugogogi dirup warek agarik ako wane-wane, yi avakwa ndi avakwa ininis unggul adik-adik wisane enasin arat agagi.

¹⁹ At Averakam en at eyave yokhidigya dugwit, “An endago neyagek, 100 tahun ari wandiga atma, neyave vage hambup-at okneraliga, eke, nogwa Sara ako, eyak endarup ogo meyanat agya, oklagya higi,” imbita dugwit ovara, endawi mberen agetek, endawi mondok avyarat imbitigi.

²⁰ At wene avok yugogogi ako, “Arisogon a, dek a?” endawi mberen agetek. Ata, endawi en, “Mondok avyarat arisogon higi,” imbita dugwit, avyarat imbitigi akoen wene andi vaga, endawi modo agya dugwit, Ala inis siyabagya lagagi.

²¹ “At Ala anye wisane atma, yuknigas ako andi avyarat ogarisogon,” imbita dugwit, wene andi vaga endawi mondok vanggabaluk welagagi andi vaga,

²² At Ala en, “Hat yi, hendawi sagain mondok segat heyagi o,” yiluk, yugogogi.

²³ “Hat hendawi sagain mondok segat heyagi o,” yiluk, yugogogi dirup warek agarik ako andi, at Averakam ake adigat yugigitek.

²⁴ Ata, nit ovok nenake-at yagagi. Nenowa Yesus hambisagwima en iluk erogo mondok okbagagi Ala ako, nit avyarat umbutu dugwit nenendawi At ovaga vanggabelagwi ako, ovok nenake-at yagagi. Arenen nit ogo segat ninimbita dugwit, wokninivisogon.

²⁵ At Yesus ako andi, nit yi weyak ndi weyak ogagu niniselok, Ala en warupwak yiluk wogirigya, eke, “Hit ap yi, weyak dek segat hinigis o,” yiluk, wokninivigiluk, iluk erogo mondok okbagya, ogagagi.