Oroma 2 - ALA WENE HIVIS DIRUP WATUGWA

Ala en avakwa enowak dilogo anggin enovaga bisaup wene

¹ Anderogo atma, naswei. Hiren it nin enowak dilogo wene anggin enovaga biselagwi? Hit ogo weyak ogasagwidek andi dek. Hit ogo weyak ogasagwi menda atma, hiren it weyak ogasagwi ako anderogoat ogagu dugwit ovara, it enowak dilogo wene anggin enovaga bugu hiniselok andi, hirat wene anggin henovaga betelagwi.

² At Ala andi, avakwa weyak anderogo ogasagwi halok, dibisiluk avyarat halok andi, Arenen anggin enovaga bisaliga andi ninilup-at.

³ Ninilup atma, avyak! Hit ogo weyak anderogoat ogagu dugwit ovara, it nin ogasagwi halok adigat enowak dilogo wene anggin enovaga biselagwi andi, hit ogo, Ala en henowak dilogo anggin henovaga bigigayogonbuk yiluk yagalagwi yi?

⁴ At Ala en henowak dilogo anggin henovaga bigigitek henabwa en endawi sagain vaga dugwit, mbauk-at agarik atma, “At ane andi degat ai,” yiluk, yagalagwi? Hit weyak ogasagwi ako, henasam helok, hekbavovok yiluk, henabwa imbita dugwit wokhenombolok naliga yi, hit hegetekma yagalagwi yi?

⁵ Ala endawi anderogo ombasiga ovara, henendawi anye dugwit henasam haup henanggon ombasagwi halok, Ala en nenowak dilogo nit ogasagwi ndatak anggin nenovaga bininggu hagup o hivis andi vaga anggin evenuk ombok erogo okbigigapwak yiluk, okhedegek adigat lagu hinisaliga.

⁶ Andi, At Ala en avakwa enadik-enadik ogasagwi wane-wane-at onggo okbininagwi.

⁷ It avakwa ninen sek umbutu dugwit, “Ala en At abinak menda woknirigya, nenagayuk wutu, iniluk mondok dogop menda woknirigya, ogarupwak ai,” yiluk, enendawi sagain vaga hora yiluk, mbup yegetek sek adigat ogarit lendagwi. It avakwa anderogo ogasagwi ako, Ala en iniluk mondok dogop menda wogerayogon.

⁸ Anderogo ovara, it ninen it okhedaup adigat enendawi wenggebaluk ogarit lagu dugwit, avyarat wene ako andi hekbaluk, weyak adigat ogaguselok andi, Ala en, “Ap yi, mondok weyak aro,” yiluk, aninis en anggin enovaga bisagwi.

⁹ It yi ap ndi ap weyak ogasagwi ovok erogo idup-mbidup oginipu, anggin-mbanggin okbugu, ogarugwi ako, it Yakuri menda okbugu dugwit, avakwa weram Yakuri dek menda inim wane-wane okbisagwi.

¹⁰ Ovara, it avakwa sek ogasagwi menda halok ako andi, Ala en abinak enovaga bugu dugwit, enagayuk werek erogo enendawi ugun seyalek dogopwak yiluk, it Yakuri menda okbugu dugwit, avakwa weram Yakuri dek menda inim ovok erogo wane-wane okbisagwi.

¹¹ At Ala andi, avakwa eneyave dibugu dugwit, ambi yi sek, ambi yi weyak enombasigadek atma, anderogoat okbisagwi.

¹² It avakwa weram Yakuri dek menda andi, Musa wene ako inunggut dugwit, weyak ogasagwi vaga anggin enovaga bisagwi ovara, Musa wene ako vaga anggin enovaga bisagwibuk. Eke, it Yakuri menda andi, at Musa wene ako inilup dugwit ovara, weyak ogasagwi atma, Musa wene adem andi vaga enowak dibisiluk, anggin enovaga bisagwi.

¹³ At Ala en Musa wene ako, un enaruk adigat hulisagwi vaga dek. Ata, enendawima en des erogo wokbaluk eyave-at ogarit lendagwi vaga Ala en, “Ap andi segat higi o,” yiluk, yugisiga.

¹⁴ It avakwa weram Yakuri dek menda akoen at Musa, “Yerogo ogarup, nderogo ogarup,” wene ako inunggut agaruk. It inunggut dugwit ovara, it enendawi en, wene ako wane-wane ogasagwi halok, inunggut dugwit ovara Musa wene akoat ogasagwi atma,

¹⁵ Musa wene andi ovok enendawima werek dugwit ogagu selagwi. It ogasagwi andi, enendawima wenggelagya dugwit, ambi, “Weyak ogagi higi,” eke, ambi, “Sek ogagi higi,” yiluk, enendawima wenggelandiga andi vaga Ala en wene ogarup yiluk, yugeregetek ovara, wene ako enendawima dirup warek agarik yedok helagwi.

¹⁶ Anderogo oklarugwi andi, an Sek Wene yugeraliga wane-wane, it avakwa enagose enendawima mbauk hwilago agarik ako, At Ala en enowak dilinivup ako vaga, At Yesus Keretus en enowak dilinipu hagup.

It avakwa enawerek Yakuri menda andi, sani?

¹⁷ Hit Yakuri menda andi, nggarogo umbutu dugwit yagalagwi? “Nit Yakuri menda andi, iya,” yiluk, yagalagwi, eke, Musa wene ako vaga, henendawi vanggabaluk, “Ala andi, nit nenadigat Nenasin,” yiluk, yugu dugwit wogobetelagwi.

¹⁸ Hiren, “Ala endawi ombasiga ako ninilup aro,” yiluk, yugwi, eke, Musa wene mamulik ako vaga, “Yi sek. Yi weyak, nit yedok helagwi o,” yiluk, yugwi, ogasagwi.

¹⁹ Hiren, “Avakwa inil mbuk menda sup vaginiviluk lagwi, it ap o hwiserekma lendagwi ako awiya vaga lapwak yiluk awiya okbugwis, ogasagwi andi, nit yiat,” ombasagwi.

²⁰ Eke, hiren, “Musa wene ako niren vagago agurik atma, yi wene ndi wene ninilup dugwit wene avyarat menda adigat mamulerelagwi andien, avakwa enendawi apik menda mamulirugwi, enendawi hoda agetek menda ako, enendawi hoda erogo bugwis, ogasagwi andi nit aro,” yiluk, yugu hinisaliga.

²¹ Anderogo ogagu dugwit ovara, hit mamulhedegetek dugwit, it nin adigat mamulerelagwi andi, nggarogo yiluk ogasagwi? Hiren, “Enonggop welagwi andi moga o,” yiluk, mamulirugu dugwit ovara, hirenat henonggop welagwi.

²² Hirenat, “Wanggis waup moga,” yugu dugwit ovara, nggarogo yiluk hirat wanggis welagwi? “Huvuwak agoda,” yagalagwi ovara, hirat madis awi valekma nunggugu lagipik, huvuwak akoat henonggop hwilakhedelok wilisagwi akora?

²³ Hiren, “Musa wene ako, andok nit aro,” yiluk, wogobatugu dugwit ovara, wene andi, sagalogo baluk, Ala inis weyak erogo belagwi andi, nggarogo yiluk ogasagwi?

²⁴ Ala wene ambi iri dugwit, “Hit ogasagwi vaga it weram Yakuri dek menda en Ala inis wiyiknom-weyaknom erogo belagwi,” yiluk, dirup warek agarik ako hit Yakuri menda enat ogagu hinisaliga.

²⁵ Henagamut mbalisagwi andi, Musa wene wugu dugwit, mbalogo wikhaup segat ovara, wene ako sek erogo ogagetek dugwit, henagamut mbalisagwi halok andi, enam warogo-at mbalisagwi atma, henagamut mbalek agipik ovara, mbalekdek ovagak okhidugu hinisaliga.

²⁶ Eke, it enagamut mbalekdek menda akoen, “Yerogo ogarup, nderogo ogarup,” Musa wene ako wugu lagarwik, wane-wane ogarit laguselok, Ala en, “It ap yi, enagamut mbalekdek ovara, mbalek ovagak agarwik,” yiluk, woginivisogonbuk ombasagwi?

²⁷ Anderogo atma, hit ap Yakuri menda andi, Musa wene dirup warek andok dugwit, henagamut mbalisagwi ovara, eyave ogagetek weyak ogasagwi atma, it enagamut mbalekdek agarwik akoen wene eyave-at ogasagwi atma, irenen hit henanggadi wakbigigasogombuk ombasagwi?

²⁸ It avakwa enawerek Yakuri menda andi, sani? Eneyave endago un enagamut mbalek andi vaga adigat, “Yakuri menda aro,” yiluk, anderogo yubuk.

²⁹ “It Yakuri menda aro,” yagalagwi ako andi, Musa wene welagwi vaga dek. Ata, enagamut mbalisagwi ovagak, At Ala Averiniki en enendawi swi okbisaliga andi vaga, eneyave Yakuri menda andi aro. It avakwa enendawi anderogo Ala en okbisaliga andi, it avakwa en wogobisasogombuk. At Ala enat wogobisayogon.