Oroma 16 - ALA WENE HIVIS DIRUP WATUGWA

“Wa,” yugeragagi wene

¹ Nit nenarup hwa Peve akoen, Ala aburi homakbaluk samban ogasagwima Henggereya andoma mondok iya erogo yonggar-inivisiga atma, hit sek erogo wavovok yiluk, hinilup erogo yukheraliga.

² At hwa andien avakwa wisane yonggar-inipu dugwit, an ogo yonggat-nugu lagagi atma, arenen, “Yerogo okbanup o,” iri halok, yonggat-hugwi, eke, it Ala aburi adik denek en enaswei avyarat ombasagwi ako hai warogo woginivisagwi hak, “Hwa andi Nenowa Inis Ombok avyarat ombasiga atma, nit menda-at,” yiluk, hai warogo wugwi, ogagu dogones.

³ “At hwa Pirikila agun Akwila iperen an ninim wane-wane Keretus Yesus eyavup ogagu lagyo ako wa yugeraliga.

⁴ Iren, an ninim nenaklip ovara, enalon dek dugwit nagap wendatugwarikmu, ‘Wa,’ yiluk, yugeraliga. An nadigat en yugeraligadek. Ata, it weram Yakuri dek menda Ala aburi homasagwi menda ako ovok erogo ninim en, “Wa,” yiluk, yugerelagwi.

⁵ Eke, it Ala aburi Pirikila Akwila enamwa homasagwi ako inim wa yugeraliga. Eke ambi, naswe nendawi hunik Epenetus ako wa yugisiga. At andi, o Asia yi awi ndi awi andoma it nin Keretus wene ao avyarat embetetek inigik, at endak avyarat imbitigi.

⁶ Hwa Maria hit henake sat yangganggitek ogagya laga ako, wa yugisiga.

⁷ It Andoronikus Yunias iperen an naswei Yakuri menda, an ninim heda marogo mabininggugwarikmu welagagup ako, wa yugeraliga. It mberen lakbigik menda andi, avakwa ovok inilup. Eke an Keretus ao avyarat embetetek neyagek, it endak avyarat umbutugwa.

⁸ Eke ambi, naswe Ambilatus niperen Nenowa Inis Ombok ninim hunik agurik ako, wa yugisiga.

⁹ At Urubanus andi ninimat Keretus eyavup ogasagwi ako inim, Setakis nendawi hunik ako inim, iperen wa yugeraliga.

¹⁰ At Apeles avut mbanggya hegek Keretus inim hunik dugwit ogagya higirikmu wa yugisiga. Eke, at Arisobulus aburi inim wa yugeraliga.

¹¹ An naswe Yakuri menda at Herodion ako wa yugisiga. Eke, at Narikisus aburi inim, Nenowa Inis Ombok inim hunik atma, wa yugeraliga.

¹² It akwa Seripena Seriposa iperen Nenowa Inis Ombok inim hunik dugwit, eyavup ogasagwi ako inim, narup Perisis ogo Nenowa inim hunik dugwit, ake musek-hasek ogasiga ako inim, wa yugeraliga.

¹³ Ap Uruvus Nenowa en ake denogo bagagi ako inim, at isa andi an ogo hinya ovagak agarik ako inim, iperen wa yugeraliga.

¹⁴ At Asinggiritus ogo, Velegon ogo, Heremes ogo, Patarobas ogo, Heremas ogo, it enaswei enarupwi inim agarwik Ala aburi ako inim ovok erogo wa yugeraliga.

¹⁵ It Vilologus ogo, Yulia ogo, Nereus ogo, at aot hwavyak Olimbas ogo, eke, it Ala aburi adik denek inim ako ovok erogo inim wa yukheraliga, Paulus en yagas, yiluk, yugeranes.

¹⁶ Hiren deden war-wat yugu dugwit, “Nit Ala aburi o,” yiluk, dinggik-hambuk yugu dogones. Eke, it Keretus ane wogogwa menda yoma wonggalek agarwik ako ovok erogo wa yukheragao.

Hivis atok vaga enaruk watigi wene

¹⁷ Naswei-narupwi wa. Hit wene mamulhiruguselok wagagup ako it nin waup enanggon en hekbaluk, avakwa enendawi ogorogo bilin nagwis, it avakwa avyarat umbutugwa ako enendawi avut endenogo bigik nagwis, anderogo okhinivit wagu saoen, henova hwalogo dogovovok yiluk, yukheraliga. It ap andi, hinim dambunggitek henadigat dogones.

¹⁸ It ap anderogo ogarit nelagwi menda ako andi, Nenowa Inis Ombok Keretus eyavup ogarit nelagwidek. Ata, enagaum ake adigat belalit nagu dugwit, “Yerogo ogarusogom o, nderogo ogarusogom o,” yiluk, enane hulugat agil-amok vaga it ap enendawi ugun weyak ogarup embetetek menda ako enendawi nomalivisagwi atma, hinim dambulubuk.

¹⁹ Hit Sek Wene wokbaluk, mondok wane-wane ogarit lendagwi ako it avakwa ovok erogo enaruk hunggugwarikmu, hit ogasagwi andi vaga nendawi adenggen wisane okneraliga. Ovara, “It enendawi werek akluk, weyak ogarup wene ako inunggut dugwit, sek ogarup wene halok adigat ogarit lagu dogopwak,” hinimbita dugwit, yukheraliga.

²⁰ At nenendawi ugun adenggen seyalek dogosogom yiluk, okbininaliga Ala akoen, Sile henavema sovalek dogopwak yiluk, vage sopalogo bayogon. Nenowa Inis Ombok Yesus henabwa en okbugugu dugwit, hinimat dogosogon o.

²¹ At niperen Ala eyavup ogasagwi Timotius akoen wa yukheraliga, eke, an naswei Yakuri menda Lukius inim, Yason inim, Sosipatet inim, it ogo wa yukherelagwi.

²² At Paulus en, “Yerogo dirup waru o,” yiluk, yuknugu hegek, dirup yi wasiga an Tertius akoen, Nenowa Inis Ombok niperen hunik dugwit, wa yukheraliga.

²³ At Nggayus en an neve woknitya, Ala aburi ovok erogo at amwa homagu dogopwak yiluk woginipu, ogasiga akoen wa yukheraliga. At ap Eratus o kota yoma bendahara yoparip vagago agarik ako, nit nenaswe Kuwatus iperen en wa yukherelagwi. [

²⁴ Nenowa Inis Ombok Yesus Keretus henabwa en okbugugu dugwit, hinimat dogopwak o. Amin.]

Ala iya imbita dugwit, atok vaga samban ogagagi wene

²⁵ Wene Ala agose o muk mbauk hwilago welagagi yogak sigam agagi ako wane-wane, an Sek Wene Yesus Keretus avok yukheraliga ako wugu hiniselok, henendawi modo okbigigaup Ala ako inis siyabagu dogones.

²⁶ Wene ako o muk mbauk hwilago welagagi ovara, yogak it ap navi-navi Ala en yugirigya hegek dirup watu lagagwa vaga, wene andi ovok sigam agagi. Yi avakwa ndi avakwa ininis unggul adik-adik ovok erogo wene andi enaruk hobaluk enendawi Yesus ovaga vanggabaluk avyarat umbutu dogomundik, des erogo ogarit lagu dogopwak yiluk, At Ala iluk itok agarik akoen “Wene yi, avakwa inilup arupwak o,” yiluk, yagagi.

²⁷ At Yesus Keretus ogagagi vaga At adik endawi werek agarik Ala ako inis mondok-mondok siyalek-at dogopwak o. Amin.