Oroma 15 - ALA WENE HIVIS DIRUP WATUGWA

It nin enendawi sek arupwak yiluk, okbugu dogop wene

¹ Hit endak henendawi hoda agagup akoen, “Nit adigat sek okhedegek nagu dogosogom,” yiluk, umbutu dogobuk. Ata, enendawi ao hoda agetek ako anggin enovaga agya halok, enendawi hoda arupwak yiluk enendawi aik wakbugu dogones.

^2-3 Ala wene endak dirup warek ambi iri dugwit: “Weyak Hat hovaga bagalyagwi ako an novaga-at agagi o,” yiluk, dirup warek agarik ako wane-wane, Keretus en, At adigat endawi adenggen ombarigiluk, okhedegetek atma, nit ogo, ninim agurik ako enendawi hoda arupwak yiluk, sek okbisilin lagu dogosogom.

⁴ O muk endak Ala wene yagagi dirup watugwa ako andi, nit bikhugu dugwit, nenendawi horaik welagwi, nenendawi adenggen umbutwi, ogasagwi andien, “Nenape wenggelek agurik ako, avyarat hedasogom,” yiluk, dirup watugwa.

⁵ Hit avyarat umbutugup ako, hekbagatek henendawi horaik dugwit vagago dogovovok yiluk okhinipu, eke, adenggen havovok yiluk henendawi aik wakbugugu, ogasiga adem andok Ala akoen, Keretus Yesus ogagya lagagi wakhegek hit anderogoat henendawi ambiat okbaluk, dambulik dogovovok yiluk, okbigigayogon.

⁶ Henendawi henane ambiat okbaluk dugwit, Nenowa Yesus Keretus Asin Ala siyabagu dogovovok yiluk, yukheraliga.

It weram Yakuri dek menda Sek Wene hunggu dogop wene

⁷ Nit Ala inis siyabagu dogopwak yiluk, Keretus en nit wokninipigi ako wane-wane, hit ogo anderogoat henendawi adenggen vaga dugwit, henaswei woginupu dogones.

⁸ Wene andi ambi inim yukheraliga. At Keretus wagagi ako, it Yakuri menda At Ala en enombawi avok yugeragagi ako, “Atma-at ogasiga,” ombarupwak yiluk, At Keretus ako, it Yakuri enanggelekma wagya lagagirik, enake ogagya lagagi.

⁹ Eke, ambi, it weram Yakuri dek menda en, “Nit ogo, Ala aigwak aberen okbininggu helagwi,” yiluk, Ala inis siyabagu dogopwak yiluk, At Keretus ako it Yakuri enake ogagya lagagi. Wene andi, Ala wene endak dirup warek ako vaga, ap ambien iri dugwit: “Anderogo atma, an it avakwa weram Yakuri dek menda enanggelekma dugwit hinis siyabagagya, ndawi vaga habin iri dugwit, hinis siyabagagya, ogarisogon o,” yiluk, yagagi ako dirup watigi.

¹⁰ Eke, ndugwis ambi vaga at ambien iri dugwit: “Hit avakwa weram Yakuri dek menda yi wai, henendawi adenggen en At aburi hinim hai watu dogones o,” yiluk, yagagi ako dirup watigi.

¹¹ Eke ap ambien iri dugwit: “Hit weram Yakuri dek menda yi wai, Henasin Ala inis siyabagwi, hit avakwa hininis unggul adik-adik menda yi wai, ndawi vaga At inis adup ogagwi, ogagu dogones o,” yiluk, yagagi ako dirup watigi.

¹² Eke, at Yesaya en yugirigya dugwit: “Yo omanggen vaga aruknuk mban yagaliga hak, ap Isai ombawi endago vaga ambi mondok iri dogomindik, avakwa ininis unggul adik-adik enowa akluk, avema bisayogon. It weram Yakuri dek menda en, ‘Arenenat okbinini warisogon o,’ yiluk, enape wenggelek dogosogom,” yiluk, yugeragagi ako dirup watigi.

¹³ “Hivis sek arisogon,” yiluk, nenendawi adenggen ombarupwak yiluk okninivisiga Ala akoen, henendawi At ovaga vanggabaluk, avyarat umbutugup vaga henadenggen wisane dogovovok yiluk, okbugugu, eke, henendawi ugun adenggen seyalek dogovovok yiluk, okbugugu, ogagya dogopwak. Andien, Ala Averiniki anye vaga henendawi hoda okhinipu dugwit, “Nenape wenggelek agurik ako heda lasogom-at,” ombok erogo ombarovovok yiluk, okbugugu dogosogon.

Wene adem andi vaga, dirup watigi wene

¹⁴ Naswei. Hit henendawi mondok sek yi menda ndi menda ovok erogo hinilup dugwit, hikit henaruk war-wat yup sek hinimbita dugwit, yukheraliga.

^15-16 An Keretus Yesus ayeloman agya lagagirik, it avakwa weram Yakuri dek menda Sek Wene ako, yugirigya dogogiluk, Ala endawi hunik en andok okbaninggigi atma, wene nin yukhirigi ako hit wenggenggu dogovovok yiluk, nalon dek dugwit, dirup warogo wokheraliga. O endak it ap imam akoen Ala ake warogo wogugu halok, wigya lagagi ako hak, an anderogoat it avakwa weram Yakuri dek menda Sek Wene yugirigya neyagek, Averiniki en denogo bugu halok, Ala en woginivupwak yiluk, yugirigya dogop andok okbaninggigi.

¹⁷ Anderogo atma, Keretus Yesus niperen hunik dugwit, Ala ake ogarit landiga atma, nendawi adenggen ombasiga.

¹⁸ An wene adik ambi yukherayogonbuk. Ata, Keretus en okbaninggya hegek, it ap weram menda Ala wene avyarat umbutu dugwit, wapwak yiluk, Ala wene yugirigya, enanggelekma dugwit ogarit lagya,

¹⁹ Ala Averiniki en nanye okbaninggya hegek, inilup arup enalon werek menda ogagya, nggarogo ogarubuk menda ogagya, ogarit lagya lagagis ako, andi adigat mbilinogo yukheraliga. Anderogo ogarit lagya dugwit, Yerusalem avilis ambot andoma en Ilirikum hudi Sek Wene Keretus avok ako ovok erogo yugeregek lagya lagagis.

²⁰ Ap ambien o owak wombabalukmu, ap adik ambi hunogo en o eyave valisiga ako wane-wane, Sek Wene Keretus avok ako, it ap adik en yugeragagwa hunggugwarikmu ambi inim yugeregek laup andi, an ombasigadek. Ata, o owak wombalisagwi hak, an it avakwa Sek Wene Keretus avok ako mondok inunggut agarwikmu andoma-at yugeregek nagu dogop an hogop ombasiga.

²¹ Andi, Ala wene dirup warek ambi iri dugwit: “Wene At avok it yugeregetek ako dibagwi, eke, it enaruk hunggitek ako, enaruk hobaluk, inilup agwi, ogarusogom,” yiluk, dirup warek ako wane-wane, an ogarup ombasiga.

Paulus o Oroma laup imbitigi wene

²² An ap Ala wene ao enaruk hunggitek menda adigat yugeregek laup imbitigis ako, yugeregek lagya neyagek, ambi yidup iri lagagimu, bikhinisa wagetek welagagis.

²³ Ovara, yogak andi, o an yugeregek landigama yoma ovogat yugeregek lagya, eke, bikhinisa warup imbita neyagek, tahun wisane erogo ogagya, ogagya lagagis atma,

²⁴ yogak Sepanyol lagya dugwit, yokhinigik warup ombasiga. Eke, wagya dogomindik, andoma ninim nenendawi adenggen vaga dukluk, lakbanovovok yiluk, henadema warisogon.

^25-26 Henadema warisogon ovara, endak, it avakwa Makedonia menda inim, Akaya menda inim, iren adigat enendawi wenggebaluk, adenggen vaga enangge wonggalogo it Ala aburi ininggidek menda o Yerusalem agarwik enake bagao ako an wolok Yerusalem endak wogera lagya dogomindik, henadema warisogon.

²⁷ It Yakuri menda en Ala wene mbogot vaga menda andok okbogogi ako, it weram Yakuri dek menda yuguruguselok, it weram Yakuri dek menda en enangge wen vaga menda nin it Yakuri menda wogeraup sek. Wogeraup sek atma, “Ala wene yukneragagwa mbalegangge ovagak nenovaga binunggugwa ako, enake wonggalogo bugu dogosogom o,” yiluk, enendawi adenggen vaga wonggalogo bagagwa andi sek aro.

²⁸ It wonggalogo bagagwa ako, ovok erogo wolok wogera lagya dogomindik, “An ogarup novaga banunggugwa ako mondok atok weralogo ogagi o,” yiluk, andoma en o Sepanyol lagya dugwit, hit yokhinigik warisogon.

²⁹ Keretus adenggen ombok erogo okbininggu hegek, an henadema warisogon ombasiga.

³⁰ Naswei. Nit Nenowa Inis Ombok Yesus Keretus avyarat ombasagwi vaga, Ala Averiniki en okbininggu hegek nendawi-hendawi hunik agurik atma, hit an nake samban ogagu dogovovok yiluk, an, “Ai,” imbita dugwit, yukheraliga.

³¹ It avakwa Yudea menda enendawi avyarat embetetek menda akoen an natu saoen, sup hurikmu laigen yiluk, nake samban ogagu dogones. Eke, it Ala aburi adik denek o Yerusalem agarwik enake wonggalek wogonombolok landiga ako, enendawi adenggen vaga hedapwak yiluk, enake samban ogagu dogones.

³² Eke ambi, Ala endawi imbita halok, an nendawi sek vaga henadema wagya dogomindik, ninim dugwit, nenendawi adenggen haguluk, nenake samban ogagu dogones.

³³ At nenendawi ugun adenggen seyalek dogosogom yiluk, okbininaliga Ala akoen hit ovok erogo hinim dogosogon. Amin.