Oroma 13 - ALA WENE HIVIS DIRUP WATUGWA

Pemerintah enane hobaluk ogagu dogop wene

¹ It Pemerintah agarwik ako, At Ala en “It anderogo dogopwak,” yilipuk en, it anderogo duklipuk. Anderogo atma, it Pemerintah hinim agipik ako andi, Ala en “Hit anderogo dogwes,” yiluk, yugeragagi atma, wene yukhiruguselok, hit ovok erogo des erogo hunggu dogones.

² It Pemerintah enane saganggu hiniselok andi, Ala en “Hit dogwes,” yiluk, yugeragagi ako enane sagalisagwi atma, henovadombok-at weyak okhedelagwi.

^3-4 Anderogo atma, it Pemerintah agarwik ako, avakwa sek ogasagwi menda enalon ombarupwak yiluk, mondok okbigitek. Ata, it weyak ogasagwi ako, enalon umbutu dogopwak yiluk, agarwik atma, henalon dek henendawi ugun nagu dogop ombasagwi halok, sek adigat ogarit lagu dogones. It Pemerintah andi, Ala ayeloman dugwit, hit sek adigat dogovovok yiluk, ogasagwi atma, sek ogarit lagu hiniselok andi, enendawi adenggen henovaga bugu dogosogom. Eke, hit weyak ogasagwi halok, enayegen andi, un wolok nelagwidek atma, henalon umbutu dogones. Avakwa weyak ogaguselok, Ala aninis en weyak onggo okbisaup ombasiga ako, irat Ala ayeloman dugwit, okbugu dogopwak yiluk, andok okbogogi atma,

⁵ it enane des erogoat hunggu dogones. Ala aninis en hit hinitu haoen yiluk, henalon en enane hunggu dogop andi sek ovara, henendawima en, “Weyak ogarup andi moga,” yukhirigya halok ogo, hobaluk ogagu dogones.

⁶ Wene adem anderogo atma, it Ala en “Anderogo dogwes,” yugeragagi ako Ala ayeloman dugwit, yavup Pemerintah ogasagwi halok, yavup onggo pajak wogerelagwi.

⁷ Wene yukherelagwi musek, “Wokneranes,” yiluk, yukhiruguselok, wogurugu dogones. Yavup onggo pajak wogeregetek halok, wogorugwi, “Yoparip onggo anderogo bas o,” yiluk, yukhiruguselok, bagwi, “Nenagayuk wutu dogones,” yukhiruguselok, enagayuk wutwis, “Nit henasini atma, nenavema dogones,” yukhiruguselok, enavema dugwit, ogagu dogones.

Nendawi-hendawi hunik ogagu dogop wene

⁸ Avakwa enangge mbalegangge vagago dogobuk. Mbalegangge vagago dogop sek andi, nabwa-habwa dugwit, henendawi hunik oginipu dogop andi aro. Hiren henendawi hunik oginipu hiniselok, Musa wene ako atma nggedo yagaliga.

⁹ Wene “Wanggis waup moga. Ap warup moga. Enonggop waup moga. Ap enangge hogop ombarup moga,” yiluk, “Yerogo ogarup, nderogo ogarup,” wene hobalek ako, eke wene hobalek nin inim ovok erogo adem dambulik andi, wene yi vaga agarik: “Eneyave enendawi hunik okhedelagwi hak, it hinim agarwik andi, anderogoat enendawi hunik oginipu dogopwak o,” yiluk, wene ako wene yugup nin ovok dambulogo andi vaga adigat agarik.

¹⁰ It hinim agarwik henendawi hunik ogonivisagwi andi, weyak erogo bisaguluk, ogasagwidek. Anderogo atma, nendawi-hendawi hunik ogarit lendagwi andi vaga Musa wene dirup warek ako atma-at nggedo yagaliga.

¹¹ O yogak elokwe mondok iya erogo arit wagya helagwi, umbutu dugwit, nendawi-hendawi hunik oginipu dogones. Nenagap wendarup ako andi, adumu hegek avyarat umbutugup ovara, yogak andi, vage horok ari wagarikmu, hit nogo yilagwi ovagak agipik yi, hiniluk arup ako ovogat ari wagarikmu yiluk, yukheraliga.

¹² O hup dek agya hegek, o yanggo yigiluk vage ari wagarikmu, o hup vaga dugwit ogasagwi hak ogarit nagwis ako hekbaluk, o awiya vaga ndup ogaruguluk, enayegen-enaregowa ininggimu agarik hak, hit anderogo okbaluk dogones.

¹³ Amburup nunggu lagarwik, nenek-at yagan nagwis, ndawi weyaravok watu dugwit, akwa ugun ogunupwis, enendawi en ninggya halok ugun ogarit nagwis, war-wat yugwi, haterek-anderek yagan nagwis, ogarit nagu dogop moga. Ata, o dingga vaga dugwit, des erogo ogasagwi hak, nit anderogoat des erogo ogagu dogosogom.

¹⁴ Henendawi endak menda en weyak ogarup okhinipu halok, “Nendawi naliga yi, nova hogo yupwak yiluk, nggarogo ogarik?” yiluk, wenggelit nagu dogobuk. Ata, henayegen henaregowa hininggimu agipik hak, Henowa Yesus Keretus henendawima wenggelek dugwit, ogarit lagu dogones.