Oroma 12 - ALA WENE HIVIS DIRUP WATUGWA

Ala avema dugwit, At ake ogarit lagu dogop wene

¹ Andi halok, ai, nowa-nasin. At Nenasin Ala aigwak aberen ombok erogo okbininggigi. Anderogo atma, Ala ake warogo belagwi hak, hit heneyave hiniluk dugwit, Ala ake adigat ogarit nagu dogoguluk, heneyave ovok erogo Ala ake denogo betavovok yiluk, an nendawi “Ai,” imbita dugwit, yukheraliga. Andi ogarusogom vaga Ala en, “It yi avyarat ninis siyabanunggu hinigis,” yiluk, adenggen hinimbita dogosogon.

² It avakwa wen vaga menda en enendawi ombakluk ogarit lendagwi ndatak, hit anderogo ogarit lagu dogobuk. Ata, hit adik swi menda ogarit lagu dogovovok yiluk, “An nendawi swi adik menda okbaninggya dogwen o,” yiluk, Ala yugugu dogones. Anderogo yugurup okhinipu halok, At Ala ogarup ombasiga ako andi, segat hugwi, ogarit lagu hiniselok, Ala endawi adenggen nenombasiga hugwi, eke, “Mondok sek adigat ombasiga atma, adik ambi ogarup dek,” umbutwi, ogagu dogop hinilup arugup.

³ Ala en, “At yi, An nane yugeregek lagya dogopwak o,” yiluk, endawi hunik en onggodek unat andok okbaninggigi ako vaga hit ovok erogo wene ambi yukherayogon. Hit Sek Wene avyarat umbutu lagagupmu, Ala eyavup ogagu dogovovok yiluk, henadigetap-at andok okbigigi. Henadigetap andok okbigigi ako, dibaluk, “An yiat andok okbaninggigi higi,” yiluk, wane-wane ogarit lagu dugwit, hat horok madugat andok okbagagigi hegek, “An iya erogo andok okbaninggigi higi,” yiluk, wogobatugu dogobuk. Ata, “An yiat woknigigi atma,” yiluk, henendawi sovalek dugwit, ogarit lagu dogones.

⁴ Neneyave ambiat ovara, nininggis ninisok wisane bagagi ako ovok adik-adigat ogasiga. Andi wane-wane,

⁵ nit neneyave ogo adik-adik agurik ovara, nininggis ninisok bagagi ovok erogo neneyave ambiat vaga hunik agarik hak, Keretus eyave vaga hunogo bininggigi atma, neneyave mondok ambiat agurik.

⁶ Anderogo atma, Ala endawi hunik en sek okbininggu dugwit, nit ogagu dogoguluk, nenadigetap andok okbininggigi andi wane-wane-at des erogo ogarit lagu dogosogom. At Ala ane yugurugu dogop andok okbigigi halok, henendawi Ala ovaga vanggabaluk dugwit, yugurugwi,

⁷ yonggar-inipu dogop andok okbigigi halok, yonggar-inupwis, mamulirugu dogop andok okbigigi halok, mamulirugwi,

⁸ enendawi aik wakbugu dogop andok okbigigi halok, enendawi aik wakbugwis, avakwa enangge dek wogurugu dogop andok okbigigi halok, “Onggo woknirup,” embetetek un wogorugwi, avakwa enasin dogop mondok okbigigi halok, henanggon embetetek musek-musek ogagwi, eke, avakwa enabwa umbutu dugwit sek okbisaup andok okbigigi halok, henendawi adenggen vaga okbugwis, ogagu dogones.

⁹ Henanggon umbutu dugwit, henendawi hunik oginipu dogobuk. Ata, enabwa umbutu dugwit, henendawi hunik oginipu dogones. Yi weyak ndi weyak ogasagwi andi, henanggon umbutu dugwit, sek ogarup halok adigat henendawi hunik umbutu dogones.

¹⁰ Henowa-henasin henendawi hunik oginivisagwi hak, henaswei Yesus inim hunik agarwik menda hinim nendawi-hendawi hunik oginupu dogones. Navema-havema dugwit, at ambi inis siyabagek ogagu dogones.

¹¹ Ala eyavup ogarit lagu dugwit, henanggon embetek ogagu dogobuk. Ata, henendawi adenggen wisane erogoat ogarit lagu dogones.

¹² “Ala sek ogarisogon,” henape wenggelek dugwit, adenggen umbutwi, anggin-mbanggin henovaga agya hegek henendawi wadokdek dugwit wugwi, samban ogarup hekbagetek ndugurek-ndagarek ogagwi, ogagu dogones.

¹³ It Ala aburi enangge dek halok wogorugwi, eke, ap huru henadema waguselok woginipwis, ogagu dogones.

¹⁴ Avakwa nin en anggin-mbanggin okhinipuselok, homan enovaga bisabuk. Ata, Ala en adenggen enovaga bisapwak yiluk, yugugu dogones.

¹⁵ It adenggen yuguselok, hinim adenggenat yugwi, eke it yup yaguselok, hinimat yup yagwi, ogagu dogones.

¹⁶ Henaswei hinim henendawi ambiat okbaluk, ogarit lagu dogones. “An ap iya,” yiluk, “It ap sovalek meyan ninim ogarup nenanggon,” yiluk, yup andi moga. Ata, henendawi adenggen vaga hinimat ogarit lagu dogones. “An ap ovok nilup atma, an andi ap mondok iya yiluk,” umbutu dogobuk.

¹⁷ Weyak onggo-onggo ogagu dogobuk. Ata, avakwa en sek ogarup ombasagwi ako adigat ogagu dogones.

¹⁸ Avakwa ovok erogo hinim henendawi sek dambulik dogoguluk, sek ogarup ambi werek halok, sek ogarup andiat wal okhugu dogones.

¹⁹ Naswei. Nit Nenasin Inis Ombok en iri dugwit: “Ap unggumu wasagwi inim, weyak onggo okbiselagwi inim, Anenat okbisayogon o,” yiluk, yagagi dirup warek agarik atma, weyak okbigigelagwi onggo okbugu dogobuk. Ata, Ala aninis en it onggo okbisayogon atma, hekbugu dogones.

²⁰ Ap ambien Ala yugugu hegek iri dugwit: “Ap hinim ndup ako erom uvup halok, erom napwak yiluk, wogugwis, is uvup halok, is napwak yiluk, wogugwis, ogagu dogones. Andi ogagu hiniselok, halinggen unggul vaga baguselok yagan warisiga hak, anggadi arisogon o,” yiluk, yagagi dirup warek ako wane-wane-at ogarit lagu dogones.

²¹ Weyak wene sigam agya dugwit, hit sovalogo bugugu haoen, mbuverek dogobuk. Ata, mondok yugu dogomundik, sek ogarit nagwis vaga weyak ako sovalogo bagu dogones.