Oroma 11 - ALA WENE HIVIS DIRUP WATUGWA

Iserali hekbogogi ovara hivis woginivisogon wene

¹ Anderogo atma, an wene ambi hemethinisayogon. Ala en At aburi endak miginipigi ako, mondok-mondok hekbogogi ombasagwi? Mondok dek. An ogo Iserali menda aro. An nombao Averakam atma, ninis unggul andi, Mbenyamin menda aro.

² Ala en At aburi endaklagatek inigik miginipigi andi, mondok hekbigitek. Avakwa Iserali menda weyak ogagu lagagwama, anggin enovaga bisapwak yiluk, at navi Elia en Ala yugogogi dirup warek ako hinunggut agipik yi?

³ At navi Elia en iri dugwit, “Nasin. Hat haburi navi-navi ako initwis, hake belagwima werogarek agarikmu akoma masok-danggok erogo bagwi, ogagu dugwit, an nadigat hekbenanggarwikmu, yogak it ovok naruguluk, agarwik.”

⁴ Yugugu lagagimu, Ala en at nggarogo yugogogi? Ala en at yugugu dugwit, “Ap eneyave wisane 7.000 at madis Baal inis siyabagetek iniselok, inidi iri lagirik enagap wendarogo bigis,” yiluk, yugogogi.

⁵ Andi ogagagi wane-wane, yogak Ala enabwa ombasiga atma, nin agako higirek-at miginipigi agarwik.

⁶ Ala en miginipigi ako, it sek ogaguselok, miginipitek. Ata, enabwa en miginipigi. At Ala en miginipigi ako andi, it sek ogagagwa vaga miginivilipmu en, enabwa en miginipigi ako ogo, hulugat ombaklip.

⁷ Andi halok, it Iserali andi, nggarogo? It Iserali menda en, “Ala en nit sek erogo woknenombapwak yiluk, nggarogo ogaruk wi?” yiluk, ogagagwa ovara, atma agetek atma, Ala en it woginipitek welagagi. It nin miginipigi ako adigat wogonupu lagagirik, it nin wisane enendawi anye erogo bogogi.

⁸ Ala wene endak ako ambi iri dugwit: “Ala en enendawi apik erogo bugu, inil hugu dogoguven yiluk, inil mbuk erogo bugu, enaruk hunggu dogoguven yiluk, enaruk nggulup erogo bugu, ogagagi hudien, yogak anderogoat agarwik,” yiluk, yagagi dirup warek agarik.

⁹ Eke ambi, at Daut en iri dugwit: “Erom nunggusim, enaruguluk inil yonggonogo enane sagain vaga yugerelagwi ako, heda belagwi hak okbugu, anggin onggo enovaga bisiluk, dukhedelok nggedek wombabiselagya,

¹⁰ yi menda ndi menda inil haguven yiluk, inil hwis erogo bugu, inambot sombalek dugwit nagu dogopwak yiluk, okbugu, ogagu dogopwak o,” yiluk, wene yagagi ako wane-wane enendawi anye erogo okbogogirikmu agarwik.

¹¹ Anderogo atma, an ambi inim hemethinisayogon. It Iserali menda en inisogavit himbit nggwis erogo ndun yagagwa ako Ala en hivis woginivup dek mondok ambukmu hekbogogi ombasagwi? Andi dek. It Iserali menda Ala wene saganggugwa vaga Ala en it weram Yakuri dek menda enagap wendatya halok, iren, “Nit ogo nenagap wendarup ovara, it adigat wendarinivisiga, ai!” ombarupwak yiluk, okbogogi.

¹² It Iserali menda en weyak ogagagwa vaga yi avakwa ndi avakwa adik menda ovok erogo sek okbogogi. Eke, It Iserali menda Ala wene weyak ogagu lagagwama, Ala en hekbugu lagagirik, it weram Yakuri dek menda sek okbogogi. At ogagagi ako andi iya-at ovara, hivis it Iserali ovok erogo eneyami vaga Ala avema ari waguselok, it sek erogo bugu dugwit, nit ogo ninimat okbininup andi, mondok avyarat iya erogo okbininayogon.

It weram Yakuri dek menda enagap wendarup wene

¹³ Eke, yogak hit weram Yakuri dek menda wene ambi yukherayogon. An hit weram Yakuri dek menda henake-at lakbani wagagi atma, an neyavup Nasin en andok okbaninggigi ako andi, “Mondok iya erogo andok okbaninggigi o,” yiluk, ombasiga.

¹⁴ Hit an wene yukheraliga ako wugu hiniselok, it an nowa-nasin Iserali menda akoen, “Nit ogo avyarat ombaruk ai, it adigat yugeraliga andi, nenanggon a,” umbutu dugwit, it nin enendawi avyarat umbutu dogomwima, “Ala en enagap wendarupwak ai,” yiluk, nape wenggelek agirik.

¹⁵ At Ala en Iserali menda hekbugu lagagirik, yi avakwa ndi avakwa weram Yakuri dek menda ovok erogo, “Ninim dambulik dogosogom o,” yiluk, dambulogo bogogi andi, iya ovara, it hekbogogi ako woginipu halok andi, mondok iya erogoat okbisayogon ombarusogom. Avakwa hambisagwi ovagak yelemele yagagwarikmu, haverinipu lagarwik, enendawi adenggen vaga deden waginivisagwi hak, hivis ogo anderogoat wogonivisogon.

¹⁶ Roti endak mbalek Ala wogugu halok andi, “Ala ake denek agarik,” yup sek halok, atok ombok bago ako andi ogo, “Ala ake denek agarik,” yup sek o. Eke, yo omanggen adem hudi eyave denek halok, abwak andi ogo, “Eyave denek-at,” yup sek o.

¹⁷ Yo saitun sek avakwa en yago ako menda abwak nin vendarogo hekbaluk, avoloma yo saitun weram harumu menda mbalogo adem vaga huba wakluk, akwi omanggenma en daga wagya dugwit, mondok mudi-mudis ombok arit dagasiga. Anderogo hak, hit weram Yakuri dek menda ovara, anderogoat hubigiga wagya halok,

¹⁸ “Abwak vendarek avoloma nit weram menda dambubininggigi atma, nit iya o,” yiluk, wogobetabuk. Wogobetaup okhinipu halok, wene dibaup ako yi aro: “Nit adem atma, abwak vendarogo hubinini waga,” ombarubuk. Ata, “Nit un abwak atma, adem vaga hubinina waga,” umbutu dogones.

¹⁹ Andiat yukheraliga ovara, hiren yugu dugwit, “Anderogoat ovara, avoloma nirat hunogo bininupwak yiluk, abwak vendarogo lakbalagagi hegek yukneraliga yi a!” umbutu hinigis, avyak!

²⁰ Hit ombasagwi andi avyarat ovara, it avyarat embetetek iniselok, vendarogo lakbogogi. Eke, hit ako andi, avyarat ombasagwi vaga hunik agipik atma, henendawi wogobetabuk. Wogobetamwi vaga vendarogo wibigigu haoen, mondok henalon umbutu dogones.

²¹ Abwak endak winggigi ako, Ala enabwa dek dugwit vendarogo lakbogogi wane-wane, hit ogo vendarogo lakbigigayogonbuk atma yiluk yagalagwi?

²² At Ala endawi enabwa en sek oginipu, aninis enovaga bugu, ogasiga ako dibas. Avakwa weyak ogasagwi halok, aninis enovaga bisaliga ovara, “Ala endawi nenabwa en sek okbininaliga atma, At ovaga vanggabaluk ogarit lagya dogosogon,” yiluk, ogarit lagu hiniselok andi, At henabwa en sek okbugugu dogosogon. Eke, dek halok, hit ogo Ala en vendarogo lakbigigayogon.

²³ It Iserali menda vendarogo lakbogogi ako Ala en enavoloma hubisa warup sek atma, it avyarat embetetek menda avyarat umbutuselok andi, enavoloma hubisa warisogon.

²⁴ Hit weram menda ako andi, yo saitun weram harumu menda abwak vendarek wane-wane-at ovara, yo avakwa en yago atma weram menda inim hubaup mondok meyan ovara, hegek, hubigigi. Eke, it Yakuri menda andi, yo sek avakwa en yago wane-wane atma, abwak vendarogo lakbogogi andi, At menda atma, enavoloma hubisa warup andi, anggin atma yiluk yagalagwi? It ogo ndagat hubisa warisogon.

It Iserali ovok enagap wendarup wene

²⁵ Nowa-nasin. Wene ambi mbauk hwilago agarik yi, hit hinilup arovovok yiluk, yukherayogon. Ala en it Iserali menda enendawi anye arupwak yiluk, okbogogi ako andi, mondok-mondok okbogogibuk. Ata, it avakwa weram menda, “Ap anderogo hudi namik avema bisayogon o,” yiluk, imbitigi ako, hudi ovogat ari wagya halok, it Iserali enendawi anye agarwik ako yonggonogo bisayogon. Wene mbauk hwilago agarik ako andi atma, “An iya,” yiluk, wogobetabuk.

²⁶ Anderogo yiluk, At Ala en it Iserali menda ovok erogo enagap wendarisogon. Ala wene dirup warek ambi iri dugwit: “Nenagap Wendarisiga menda ako, o Sion en wulu wagya dogomindik, it Yakup aburi menda en Ala wene des erogo ogarup embetetek ako, dibaluk, ogarit lagu dogopwak yiluk, okbisayogon.

²⁷ Enomaduk degerogo bayogon yiluk, wagya dogomindik, it ninim wene ovok nggatuk erogo hologo ba warisogon ako, andi aro,” yiluk, yugeragagi dirup warek wane-wane it Iserali menda ovok erogo enagap wendarisogon helagwi.

²⁸ It avakwa Iserali akoen “Sek wene waup, nenanggon o,” yiluk, umbutu lagagwama, Ala inim ogorek agarwik vaga hit weram Yakuri dek menda Sek Weneat welagwi. Ovara, Ala en Iserali miginipu lagagirik, it ap Averakam inim, Isak inim, Yakup inim, okbisaup wene avok yugeragagi ako vaga, inim endawi hunik agarik.

²⁹ At Ala en denogo sek okbisaup imbitigi ako andi, hivis endawi adik ambi wenggelisigadek.

³⁰ Hit weram Yakuri dek menda endak Ala wene dirup warek hegek adik ogagu lagagup ovara, yogak it avakwa Yakuri menda Ala wene sagalogo mbobagagwa vaga Ala aigwak aberen hit okbogogogi. Andi wane-wane,

³¹ yogak it Yakuri menda ogo, Ala wene sagalogo baluk adik ogasagwi ovara, Ala aigwak aberen hit weram menda okbogogogi andi vaga it ogo aigwak aberen okbisayogon helagwi.

³² At Ala aigwak aberen okbininaliga ninilup arugen yiluk, nit avakwa ovok erogo, “At ane waup nenanggon,” umbutu dugwit, adik ogagu dogosogom yiluk, heda mago ovagak bininggigi.

Ala inis siyabagu dogop wene

³³ “Ala endawi werek en yi wene ndi wene ilup agarik atma, mondok nenabwa dugwit sek okbinilin wandiga atma, ayai! At endawi wenggebaluk ogasiga niren hivilit nunggup sek ombasagwi? Eke, At ogasiga nit dibaup sek ombasagwi?”

³⁴ “Saen Nenasin Ala endawi ombasiga ako, “Nilup,” imbita, saen Nenasin Ala mbilape yugugu,

³⁵ eke, o muk en yogak yi hudi, saen yi menda ndi menda Ala wogukluk, ‘Onggo wokniru,’ yugugu, ogasiga ombasagwi? Mondok dek aro.”

³⁶ Arenenat yi menda ndi menda ovogat werek ogagagirikmu, yi menda ndi menda At andok agarik, eke, yi menda ndi menda At ake agarik, atma, At inis mondok-mondok siyalek-at dogopwak o. Amin!