Oroma 10 - ALA WENE HIVIS DIRUP WATUGWA

¹ Naswemuni wai. “Ala en an nowa-nasin Iserali menda enagap wendarupwak ai!” imbita dugwit, enake samban adigat ogasiga.

² Irenen Ala wene enendawi adenggen wisane erogo musek lagu dugwit, ogasagwi ovara, wene eyave dibaluk ogagetek halok, yukheraliga.

³ Ala en avakwa sek inimbita dugwit woginivisiga wene dibagetek dugwit, “Ala en sek nenombarupwak yiluk nit nenadik nenanye vaga sek okhedasogom,” umbutugwa. Umbutu dugwit, Ala en avakwa woginivup wene ako, “Wasogom o,” yiluk, wegetek-at welagagwa.

⁴ Musa wene ako At Keretus en atma des erogo bagagi atma, nit avakwa ovok erogo nenendawi Keretus ovaga vanggabaluk avyarat umbutu niniselok, Ala en nit sek o, yiluk, wokninivisiga.

Avyarat ombasagwi vaga Ala en wokninivisiga wene

⁵ Ala en, “Yerogo ogarup, nderogo ogarup,” yagagi wene ako des erogo ogarit lendagwi vaga Ala en wokninivup ombasagwi halok, at Musa en dirup watya dugwit, “Ogagu dogop wene ako andi mondok vagago dugwit, des erogo ogarit lendagwi vaga iniluk-at dogosogom o,” yiluk, dirup watigi.

⁶ Ovara, nit avyarat ombasagwi vaga sek erogo wokninivup wene ako andi, Ala wene endak dirup watugwa ako vaga Ala en iri dugwit, “Henape wenggenggu dugwit, ‘Keretus wolok wambu warupwak yiluk, mbogot vaga andoma sa dagami?’ yiluk, ombarubuk.

⁷ Eke ambi, ‘Keretus wolok daga warupwak yiluk, avakwa hambisagwima andoma sa wambimi?’ yiluk, henendawi ombarubuk,” yiluk, dirup warek ako agarik.

⁸ Anderogo yagagi ako, adem ngga vaga yagagi ombasagwi? Dek. Yagagi eyave ako yi aro: “Wene ako andi, henendawima inim, henelagapma inim, horogat agarik o,” yiluk, yagagi dirup warek ako andi, avyarat ombasagwi wene nit yukherelagwi ako aro, yiluk, yagagi.

⁹ Andi, hit henelagapma en, “Yesus andi, Nenowa Inis Ombok aro,” yiluk, vaganggwis, eke, henendawima, “At Ala hambuluk lendagwima en Yesus avyarat iluk erogo mondok okbagagi o,” yiluk, avyarat umbutwi, ogagu hiniselok, Ala en henagap wendarisogon.

¹⁰ Nenendawima en avyarat ombasagwi vaga, Ala en, “Ap yi, weyak dek atma, segat higi,” yiluk, wokninupu, eke, “Yesus andi, Nenowa Inis Ombok aro,” yiluk, nenelagapma en vagalisagwi vaga Ala en nenagap wendatya, ogasiga.

¹¹ Ala wene dirup warek ambi iri dugwit: “Ap ambi endawi At ovaga vanggabaluk avyarat imbita halok, anggadi arisogonbuk,” yiluk, yagagi dirup warek ako andi,

¹² it avakwa weram Yakuri dek menda enadik, eke, nit Yakuri menda nenadik, anderogo dek. Neneyave wane-wane atma, nit ovok erogo Nenasin Inis Ombok andi, Ala ambiat. Nit ovok erogo, “Ala wai,” yugugu niniselok, At angge wisane atma ovaga dambuk erogo wokneraliga.

¹³ Andi, Ala wene dirup warek ambi iri dugwit: “Ap ambi saen, ‘Nenasin Inis Ombok o,’ yiluk, An neyanggup iri halok, agap wendarisogon,” yiluk, dirup warek ako agarik.

^14-15 Eke Ala wene ambi iri dugwit: “It avakwa Sek Wene yugeregek nelagwi andi, mondok sek aro,” yiluk, dirup warek agarik ovara, Sek Wene yugerapwak yiluk lakbigitek halok, Sek Wene andi nggarogonggan en yugeralaup ombasagwi? Eke, Sek Wene yugeralagatek halok, it avakwa nggarogonggan en enaruk hulup ombasagwi? Eke, enaruk hunggitek halok, nggarogonggan en Keretus andi avyarat ombarup? Avyarat embetetek halok andi, “Nasin wai,” andi nggarogonggan en yugurup, ombasagwi? Mondok degat.

¹⁶ Anderogo ovara, at navi Yesaya en iri dugwit: “Nasin o. Wene nit yagan wagyo ako it ap sanien avyarat ombasagwi o?” yiluk, yagagi ako wane-wane, it ap Iserali menda wisane Sek Wene yugerelagwi ako wegetek-at agarwik.

¹⁷ Andi halok, Keretus nenake ogagagi wene andi, yugerelagwi vaga enaruk hunggwis, eke, enaruk hobaluk, avyarat umbutu dugwit, wugwi, ogasagwi.

¹⁸ Anderogo ovara, it Iserali menda ovok erogo Sek Wene ao hunggitek-at welagagwa halok, yukheraliga ombasagwi? Dek. “It enane ako o wen vaga yoma ovogat wigaliluk lagya, wene yugerelagwi ako, o venak-venak atokma ari lagya, ogagagi o,” yiluk, dirup warek andi vaga it ovok hunggugwarikmu yukheraliga o.

¹⁹ Eke, an wene ambi hemethinisayogon. It avakwa Iserali menda Sek Wene dibagetek-at welagagwa halok, yukheraliga ombasagwi? Andi mondok dek. At Musa en iri dugwit: “Ala en, ‘It avakwa ininis dek menda sek okbugu vaga naburi Yakuri menda en uwa mbanggwis, eke, avakwa ininis unggul we-wa menda sek okbugu vaga naburi Yakuri menda en enaninis agwi, ogarugup yiluk, okbisayogon o,’” yiluk, yagagi.

²⁰ Andien, hivis, at navi Yesaya en alon dek Ala ane yugirigya dugwit: “It ap An havetnetek laup embetetek ako, ninim avuk agwi, it ap en, ‘Hat Ala nggarogo agindik o,’ yiluk, yuknigitek ako, neyave inuk irigya, ogagagis o,” yiluk, yugeragagi.

²¹ Anderogo ovara, it Iserali menda halok andi, Ala en yugirigya dugwit, “It avakwa enendawi helep ovagak dugwit, nane ogarup enanggon ombasagwi yi, nadoma warupwak yiluk, o hutun en mbikit, o hup, ‘Omanes o,’ yiluk, An ninggis yamok yukheraliga ovara, mondok dek aro,” yiluk, yugeragagirikmu, Yesaya en yugeragagi.