Oroma 1 - ALA WENE HIVIS DIRUP WATUGWA

¹ At Ala en an Paulus Keretus Yesus ayeloman ako, lakbigik menda dogogiluk, yanggup yuknugu, At ane Sek Wene yugeregek lagya dogogiluk, denogo baninggya, ogagagi atma, an wene ambi yukherayogon.

² O muk erogo Ala en, “Sek Wene andi, hivis sigam arisogon o,” yiluk, avok it ap navi-navi yugirigya hegek, Ala Wene Endak dirup warek adik denek ako, dirup watu dugwit, Sek Wene andi inimat dirup watu lagagwa.

^3-4 Sek Wene andi, Ala Abut Nenowa Inis Ombok Yesus Keretus ogagagi wene akoat. At eyave andi, Daut ombao avakwa-at endaklagagi ovara, At Ala Averiniki anye vaga hambuluk lendagwima en iluk erogo mondok okbagagi andi vaga, At Ala Abut aro, yiluk, sigam agagi.

⁵ Nenowa Yesus Keretus ogagagi vaga, Ala nabwa en okbaninggya hegek, an neyavup lakbigik menda woknogogi. It yi avakwa ndi avakwa ovok erogo enendawi avyarat umbutu dugwit, Sek Wene des erogo wokbaluk, ogagu dogopwak yiluk yugeregek lagya, eke Yesus Keretus Inis Ombok arupwak yiluk, yugeregek lagya, ogagya dogopwak yiluk yavup lakbigik menda andi woknogogi.

⁶ Hit Oroma menda ogo At Yesus Keretus aburi arovovok yiluk, heneyanggup yukheragagi.

⁷ Hit Oroma menda At Ala en endawi hunik okhinipu, At aburi adik denek dogovovok yiluk, heneyanggup yukhirigya, ogagagi ako, hit ovok erogo, Nenasin Ala Nenowa Inis Ombok Yesus Keretus iperen henabwa en okbugugwis, henendawi ugun seyalek sek dogovovok yiluk, okbugugwis, ogagu dogosogom.

Paulus o Oroma laup imbitigi wene

⁸ Wene endak yukheraup imbiti ako eyave yi: Hit ovok erogo henendawi Yesus avyarat embetep ako, henavok yi awi ndi awi inilup arit lagya halok, Yesus Keretus ogagagi vaga, “Nasin Ala wa,” yugisiga.

⁹ An samban ogagya dugwit, heneyave ninggut asigadek ndugurek-ndagarek henake samban ogasiga andi, Ala ilup aro. An Sek Wene At Abut ogagagi avok ako yugeregek lagya dugwit, nendawi neyave ovok nggatuk erogo Ala wogokluk musek landiga.

¹⁰ An bikhinisa warup hogop ombasiga atma, Ala en, “Yogak-at bigisalapwak,” imbita halok, sup hurogo banupwak yiluk, samban adigat ogasiga.

¹¹ Henendawi mondok modo arovovok yiluk, Ala Averiniki en an okbaninggigi ndatak hit ogo ambi okbigigagiluk bikhinisa warup hogop wisane ombasiga.

¹² Eke, wagya dogomindik, ninim andoma dugwit, hit hinim, an ninim, avyarat ombasagwi ako, nenendawi aik war-wat yugu dogosogom yiluk, bikhinisa warup ombasiga.

¹³ It weram Yakuri dek menda nin yi awi ndi awi andoma yugeregek nagu lagagis wogogwa hak, hit anderogoat wugu hinisaigen yiluk, yukhera warup hogop wisane ombasiga ovara, “Ambi ovaga yidilaga ai,” nombarovovok yiluk, yukheraliga, naswei.

¹⁴ It ap Yunani menda inim, Yunani dek menda inim, eke, it dirup inilup menda inim, inunggut menda inim, ovok erogo Sek Wene yugeregek lagya dogop novaga baninggigi ako mbalegangge-at novaga agarik atma, seyalogo yugeregek lagya dogosogon.

¹⁵ Anderogo atma, hit o Oroma menda ogo, anen Wene Sek menda ako wolok, hodorogo yukhera warup hogop ombasiga.

Sek Wene andi Ala anye-at

¹⁶ Sek wene andi Ala anye atma, endak avakwa Yakuri menda inim, eke hivis avakwa Yunani menda inim, enendawi Yesus avyarat ombasagwi ako ovok erogo enagap wendarisiga andien, an nalon dek dugwit Sek Wene andi yugeregek naliga.

¹⁷ Ala wene dirup warek ambi: “It avakwa enendawi An segat isaliga ako andi, An novaga vanggabaluk avyarat nombasagwi andi vaga, iniluk-at dogosogom o,” yagagi dirup warek ako wane-wane, Ala en nggarogonggan en avakwa segat yiluk woginivisiga ako, Sek Wene andi vaga-at ninilup asiga. Ala en avakwa sek yiluk woginivisiga ako andi, avyarat ombasagwi andi vaga adigat.

Weyak ogaguselok, Ala aninis enovaga bisaliga wene

¹⁸ It avakwa Ala enanggon umbutu dugwit, weyak adigat ogarit lendagwi akoen, avyarat wene Ala avok ako, avakwa nin inilup aruguven yiluk, wene ako sup monggalogo biselagwi atma, Ala aninis mbogot vaga en wombabisa wandiga andi sigam asiga.

¹⁹ At Ala en, “An anderogo agirik yedok neyapwak o,” yiluk, eyave sigam okbaliga ovara, eyave sigam yedok hegek weyak adigat ogaguselok, Ala aninis enovaga wombaba wandiga.

²⁰ Ala eyave andogon nggarogonggan agarik andi, o muk o yi werek ogagagi hudi en, yi menda ndi menda werek ogagagi ako vaga, At eyave anye wisane mondok itok agarik ako, Ala-at yedok haup agarik. At Ala yedok haup agarik atma, it avakwa en, “Nit Ala ninunggut o,” yiluk, nggarogo yubuk erek.

²¹ It Ala inilup-at dugwit ovara, “Andi At Ala aro,” yiluk, inis siyabagetek, “Ala Nasin wa,” yiluk, hai watitek, enendawi dek dugwit enam warogo wenggelisagwi atma, enendawi apik o hup-at agaruk.

²² It akoen, “Nit nenendawi werek ovok ninilup aro,” yiluk, yagan nagu lagagwa ovara, inunggut ap wes ovagak akluk, yagan nagu dugwit,

²³ At Ala iluk itok mondok agarik inis siyabagu dogop ako hekbaluk, avoloma hambisagwi menda avakwa inim, swa-bagas inim, mindom-mbolom inim, enagut-enagut wane-wane okbaluk, ininis siyabugu lagagwa.

²⁴ Anderogo ogagu lagagwa vaga, enendawi en hogop umbutu dugwit, mondok weyak ogasagwidek menda hegek enanggadidek ogarit nagu dugwit, irirat weyak okhedegek nagu dogopwak yiluk, Ala en hekbogogi.

²⁵ Avyarat wene Ala avok ako, hekbaluk, hulugat, “Ala anderogo agarik o,” yiluk, musek lagu dugwit, At avyarat mondok-mondok inis siyabagu dogop yi menda ndi menda werek ogasiga menda ako andi, hekbaluk, avoloma yi menda ndi menda ogarek ako menda adigat agayuk wutwis, ininis siyabagwi, ogagu lagagwa andi avyarat atma, yiluk yukheraliga.

²⁶ Anderogo ogagu lagagwa vaga, it ako hekbigigirikmu dugwit, it enogwai akoen it ap en oginivup inigik ovara, hekbaluk, enanggadidek heda ogasagwidek menda ogagwi,

²⁷ ako andi wane-wane enaguni akoen akwa oginivup ako hekbaluk, enendawi adenggen oginipu halok, enanggadidek heda ogasagwidek menda ogagu dugwit, ap-ap-at wanggis wugwi, ogagu lagagwa. Ogarup hegek adik menda ogagu lagagwa vaga At Ala en onggo wane-wane weyagat okbogogi.

²⁸ Eke, iren, “Ala eyave ninilup dogop andi, ambi okbininaligadek atma, nenanggon,” umbutu lagagwa vaga, enanggadidek enendawi weyak adigat dugwit, ogarubuk menda hegek, ogagu dogopwak yiluk, Ala en hekbigigi.

²⁹ Hekbigigirikmu, yi weyak ndi weyak adik-adik wisane erogo ogagu lagagwa. Ogagu dugwit, weyak adigat ogarit nagwis, hogop umbutwi, avakwa enanggon umbutwi, haterek-anderek yugwi, ap watwis, war-wat yugwi, enambukmu unggwi, naninis-haninis yugwi, navok-havok yugwi,

³⁰ ap nin inim bidar-bidar yugwi, “Ala mondok nenanggon,” yugwi, an iya hat iya yugwi, enendawi adup dugwit wogobetugwi, weyak ogarup adigat enendawi mondok wenggelit nagwis, enasini-inisai enane saganggwis,

³¹ enendawi dek dugwit, wene yagalagwi ako des erogo ogagetek nggelabugwis, enendawima enabwa embetetek avakwa weyak okbugwis, ogasagwi.

³² It anderogo ogasagwi ako, At Ala en “It avakwa andi menda ogaguselok, onggo enovaga bugu dugwit mondok inirup segat inirisogon o,” yagagi ako inilup dugwit ovara, hegek ogarit nelagwi. It anderogo ogagu dugwit, it ninen anderogo ogasagwi andi, “Segat ogasagwi,” yiluk, yugerelagwi atma, Ala en inirup segat.