Nggalatia 6 - ALA WENE HIVIS DIRUP WATUGWA

Ala eyavup yonggat-yonggat ogagu dogop wene

¹ Naswei wa. Hit henaswe ambi weyak ogagya hegep halok, hit ap Ala Averiniki hinim hunik agipik akoen, henane sagain erogo endawi amot okbagu dogones. Ovara, endawi amot okbagu dugwit, hit ogo ndatak weyak ogarup okhinupu haoen, henendawi suam watu dogones.

² Anggin ombok ambi henovaga agya halok, yonggat-yonggat ogagu dogones. Andi ogasagwi vaga Keretus en yukneragagi wene ako ndatak-at ogagu dogosogom.

³ Hit ap iya dek hegek, “Nit iya,” yiluk, umbutu hiniselok, hirat henambukmu dagalhedelagwi.

⁴ Hit ambien at ambi ogagya bikhegek ogagu dogobuk. Ata, henadigetap okhedelagwi ako bikhelok, sek halok andi henendawi adenggen umbutwi, eke, weyak halok andi hekbugwis, ogagu dogones.

⁵ Nit nenadik-nenadik nenovadombok okhidugu dogosogom.

⁶ Nit Ala wene nenaruk hulisagwi menda akoen, nenangge sek menda ako agako higirogo nenasini Ala wene mamulnerelagwi menda ako wogurugu dogop andi sek aro.

⁷ Ala ambukmu dagalup meyan hegek, ambukmu unggu hiniselok, hirat henambukmu dagalhedelagwi atma, dibagu dogones. Ap ambi awiangge yarisiga ako andi, enggen andi menda-at mbalhedaliga atma,

⁸ hit henendawi endak menda en ogarup okhinivisiga ako, ogarit lagu hiniselok, enggen yugup weyak menda mbalhedelagwi ako wane-wane, heneyave-at hambusogom. Eke, Ala Averiniki en yukheraliga ako adigat amusek lagu hiniselok andi, enggen yugup sek menda mbalhedelagwi andi wane-wane, hit mondok-mondok hiniluk-at dogogup.

⁹ Anderogo atma, nit yi sek ndi sek ogarit lagu dugwit, sakdida okninipu hegek, hekbagetek ogarit lagu dogosogom. Hekbagatek mondok segerogo ogarit lagu niniselok, enggen yugup sek menda mbalhedelagwi ako wane-wane, nit onggo woknerayogon ako ninilup aro.

¹⁰ It yi avakwa ndi avakwa ovogat sek okbisaup, “Nanonggal agarikmu,” yiluk, sek okbigik lagu dugwit ovara, it nenasweimuni wane-wane avyarat ombasagwi halok andi, mondok sek okbugu dogones.

Wene atok vaga enaruk watya dugwit, hai warinipigi wene

¹¹ An ninggis vaga en dirup il ombok erogo warogo wokheraliga yi hinil okhanes.

¹² It avakwa en, “An iya erogo ogasiga!” nombarupwak yiluk, wogobategek nelagwi ako andi, “Henagamut mbales,” yiluk, enane anye vaga yukherelagwi. Anderogo yukherelagwi andi, it Keretus yo winik vaga hombagagi wene yugeregek nagwis vaga anggin-mbanggin okbisaup enalon wisane umbutu dugwit, “Henagamut mbales,” yukherelagwi.

¹³ It enagamut mbalek akoen wene Musa yagagi ako wane-wane ogasagwidek. Ogasagwidek ovara, hit henagamut mbalup, yiluk, yukherelagwi ako andi, “Nit nenaburi wisane aga,” yiluk, it wogobetaugwen yiluk, yukherelagwi.

¹⁴ Eke, an ako andi, yi ogarup ndi ogarup ogasiga ako wogobetaup mondok nanggon. Ata, Nenowa Inis Ombok Yesus Keretus yo winik vaga hombagagi ako adigat wogobaup andi segat. At yo winik vaga hombagagi andi vaga en, it wen vaga menda ogasagwi ako andi, it ogasagwi ako an ambi ogaru yiluk, yuknirup mondok dek. Eke, an ogo hombagagis hak nombasagwi atma, an yugeraup ako enaruk hulup mondok enanggon aro.

¹⁵ Enagamut mbalek halok, mbalekdek halok, andi iya dek. Ata, nenendawi swi okbininggu dugwit, nenandogon swi menda okbininaliga halok andi, iya o.

¹⁶ It wene nenendawi swi okbininaliga andi vaga avyarat umbutu dugwit, ogarit lendagwi menda ako, Ala en, “An naburi Iserali menda aro,” yiluk, aigwak aberen enendawi ugun seyalek adenggen dogopwak yiluk, okbugu dogosogon.

¹⁷ An Yesus wene yugeregek lagya neyagek okbanunggugwa ako vaga omap wisane novaga hunik agirik atma, it avakwa en ambi inim anggin-mbanggin novaga banubuk.

¹⁸ Nenowa Inis Ombok Yesus Keretus henabwa en okbugugu dugwit, hinimat dogosogon. Wene andi ovogat yukhirigi o. Naswei wa.