Nggalatia 4 - ALA WENE HIVIS DIRUP WATUGWA

¹ Wene yukhirigi ako ambi inim yukherayogon o. Ap ambi en, “An hambigya neyalok, nangge yi, nabut sawe agya halok, mavorangge hedapwak,” ombarisiga ako, hambigya dugwit, at mavorangge ako, abut angge-at ovara, abut ako sawe agetek abyam hegek ao wogigitek, at avakwa enavema enayeloman ovagak agarik.

² Asin en, “O andi hudi inggimu okbaup,” imbitigi ako, ao ari wagatek hegek, avyak ako andi, eyave inim, angge inim, asin ambi ako avema dugwit, ane des erogo hulisiga.

³ Anderogo wane-wane, nit ogo sawe agetek avyak mariduk ovagak ugunat dugwit, wene wen vaga menda avema heda mago welagagup.

⁴ Anderogo werekma, At Ala en At Abut o wema yoma lakba warup imbitigi ako ovok vanggo yi wagya lagagimu, hwa ambien eyak At Abut endagagi. Endagya lagagimu, it Yakuri menda en Musa wene ogasagwi ako, At Abut ako ogo ogarit lagya lagagi.

⁵ At Abut lakba wagagi ako andi, nit Ala aburi okninivigiluk, Musa wene ako avema werekma, nenonggo mbabaluk, heda visilogo bininapwak yiluk, lakba wagagi.

⁶ Anderogo heda visilogo bininggigirikmu, neneyave Ala aburi agurik andien, At Abut Averiniki nenendawima mabininggigirikmu dugwit, At Ala andi niren, “Ai, Nasin, ai Nasin o,” yugu dogopwak yiluk, Averiniki en yukneraliga.

⁷ Anderogo atma naswei o. Hit it nin enavema heda mago welagagup hak, yogak agipikbuk. Hit Ala aburi-at agipik. Eke Ala aburi agipik atma, mavorangge hedaup imbitigi ako, hit aro.

It Nggalatia menda ako Paulus endawi anggin agagi wene

⁸ Hit endak Ala hinunggut dugwit, it madis andi, Ala eyave dek hegek, enayeloman akluk enavema heda mago welagagup.

⁹ Ovara, yogak andi, Ala hinilup agwi, eke, Ala en hit ogo heneyave ilup agya, anderogo oklagagi atma, hit nggarogo yiluk, Sek Wene ako hekbaluk, sek okbigigaup dek hegek enam warogo ogagu lagagup wene ako, “Ambi inimat avema seve yiluk dogosogom,” umbutu dugwit, heneyami vaga suguliluk walendagwi?

¹⁰ “Ndugwis yi vaga yerogo ogarup moga o. Saut andi vaga anderogo ogarup moga o. O hivi vaga hegek, o musu vaga hegek, anderogo ogarup moga o. Tahun andi vaga anderogo ogarup moga o,” yiluk, yi ogagu dugwit ndi ogagu dugwit ovogat moga erogo bagek lendagwi ako, hit ogo wane-wane dibaluk, heda mago dugwit ogarit nagwis ako hinigu lagirik,

¹¹ an henake ogagya lagagis ako andi, “Un enam warogo ogagya lagagis ai?” imbita lagirik, nendawi anggin okneraliga o, naswei.

¹² Hiren ambi an weyak okbanunggugup halok, yukheraligadek. Ovara, Musa wene dirup warek ako, hinunggut dugwit, avyarat umbutu lagagupik Ala aburi agagup ako hak, an ogo, Musa wene andi hekbaluk, avyarat imbita lagagirik Ala abut agagis atma, yogak an ogasiga ako hit wane-wane ogagu dogovovok yiluk, nane anye erogo yukheraliga.

¹³ Endak an idup oknitya halok henanggelekma dugwit Sek Wene yukhirigya lagagis ako hinilup aro.

¹⁴ Idup oknitigi vaga neyave mondok weyakma, “Aburuk wisane erogo eyagan warup yi, nenanggon o,” yiluk, nagoda en hekbanup segat ovara hegek, “Yi Ala en lakbisaliga menda malaikat hak a, ata, yi Keretus Yesus hak a,” yiluk, numbutu dugwit, neyave woknumbutu lagagupik, segerogo vaknerogo welagagup ako.

¹⁵ Henendawi adenggen wisane ogagu hinigigis ovara, yogak henendawi adenggen dek aga ako, nggarogo yiluk, naswei? Nabwa wisane numbutu dugwit, “Hinil ogo hulirogo woknirup mondok sek, ai,” numbutu hinigigis ovara,

¹⁶ yogak hit ogasagwi an sigam yukheraliga vaga ninim ndup-at ogagu hinigis o.

¹⁷ It ap nin ako andi, enendawi adenggen vaga henendawi nomalhinuvugen yiluk, henadema wendagwi ovara, it sek okbigigaugen yiluk, ogasagwidek. Ata, “Nenane hobaluk, enendawi adenggen wisane erogo Paulus hekbaluk, nenamusek wagu dogopwak,” umbutu dugwit, henadema wendagwi.

¹⁸ Adem sek halok, henendawi adenggen vaga des erogo ogagu dogop andi segat ovara, an neyave hinim neyagek adigat des erogo ogarup andi weyak. Ata, an neyave dek neyagek ogo ndugurek-ndagarek des erogo ogarup andi, mondok sek.

¹⁹ Ai, naburi, hit an nendawi hunik atma, akwa avyak idup en yagan warisagwi andi hak, hit Ala aburi arovovok en yiluk, an hit henake yagan watya lagagis ovara, yogak hit Keretus musek lendagwi ako henendawi hoda arovovok yiluk, ambi inim heneyagan warisiga.

²⁰ An henanggelekma dugwit, hit ogarit nelagwi hinigu dogomindik, nane sagain erogo yukheraup, “Ai,” ombasiga ovara, hit ogasagwi an hisaligadek atma, nendawi anggin dugwit, nane iya erogo yukheraliga yi avyarat o, naburi.

Hagat o, Sara o, iperen ogagagwa wene

²¹ Hit Musa wene ogagu dogop ombasagwi ako, Musa wene dirup warek ambi yukherayogon imbiti atma, henaruk holek dogwes.

²² At Averakam aburi eneyave mberen endaginipigi ako andi, ambi hwa at ayeloman Hagat akoen endagya, eke, ambi at ayeloman dek at ogwa adenggwa wogo Sara akoen endagya, ogagagwa dirup warek helagwi ako aro.

²³ Hwa at ayeloman akoen eyak endagagi ako andi, avakwa en eneyagi endaginivisagwi hak, eyak endagagi. Eke, at ogwa adenggwa en eyak endagagi ako andi, wene Ala en avok yugogogi ako vaga wane-wane-at eyak endagagi.

²⁴ Wene yi ako andi, wakhegek atma. Akwa mberen ako andi wene mberen Ala en avakwa nggatuk erogo yugeragagi ako wane-wane aro. Ambi andi, ndom Sinai vaga en yugeragagi wene ako andi, hwa Hagat wane-wane-at. Hwa Hagat Averakam ayeloman dugwit, eyagi endaginipigi ako inim Averakam ayelomani-at welagagwa ako wane-wane, it wene ndom Sinai vaga yugeragagi ako welagwi halok, it ogo ayeloman wane-wane-at agarwik o.

²⁵ Eke, ndom Sinai andi o Arap agarik ako hwa Hagat wane-wane atma, wakhegek yugu dugwit, hwa Hagat eyagi inim Averakam ayeloman heda mago welagagwa ako wane-wane, ndom Sinai vaga, “Yerogo ogarup, nderogo ogarup,” Musa wene ako, it o Yerusalem menda en ao ogasagwi atma, avakwa enayeloman hak, wene andi avema heda magoat iniselagwi.

²⁶ Anderogo ovara, o Yerusalem mbogot vaga eloma ako andi, hwa at ayeloman dek at ogwa adenggwa wogo Sara ako wane-wane agarik. Eke at andi, nit ninisa aro.

²⁷ Ala wene dirup warek vaga en iri dugwit: “Hwa agun en hekbagagi ako eyagi wisane-at endagya, eke, hwa agun werek eyagi horogat endagya, ogasagwi atma, at eyak endagetek hwa wimbu andi, endawi adenggen imbita, hwa idup en yagan watitek andi, endawima adenggen ombok erogo imbita dugwit, heyaga watya, ogagya dogopwak o,” yiluk, yagagi dirup warek ako andi, nit avyarat ombasagwi menda ninisa hwa Sara aro.

²⁸ Hwa Sara en wene Ala avok yugogogi ako vaga eyak Isak endagagi ako wane-wane, hit ogo Ala avok yukheraliga ako vaga At aburi swi endago-at agipik.

²⁹ O andi hudi it akwa en eneyagi endaginivisagwi hak Hagat eyak endagagi akoen, Sara eyak Ala Averiniki imbitigi vaga endago ako, anggin-mbanggin ovaga bagya lagagi. Ako wane-wane, yogak andi it ndom Sinai vaga yugeragagi ogasagwi akoen, nit avyarat ombasagwi menda ako anggin-mbanggin nenovaga bininelagwi.

³⁰ Anderogo ovara, Ala wene dirup warek ako adem nggarogo warek agarik ombasagwi? Andi, at Sara en Averakam yugugu dugwit, “Hat heyase mavorangge ako an hogwa adenggwa an neyak avyak Isak ako hidigya dugwit, at hwa nayeloman Hagat eyak Isimael yi, inim wogurubuk. Eke, hwa andi, eyak iperen hodorogo haryogo wibisin,” yiluk, Averakam yugogogi dirup warek agarik.

³¹ Anderogo atma, naswei. Nit hwa ayeloman ako eyagi agurikbuk. Nit hwa at ogwa adenggwa wogo ako eyagi nirat agurik.