Nggalatia 3 - ALA WENE HIVIS DIRUP WATUGWA

Nenendawi avyarat umbutu niniselok, Ala en wokninivisiga wene

¹ Aga! Hit avakwa Nggalatia menda yi! Yesus Keretus yo winik vaga hombagagi wene ako, hwilago dek mondok sigam erogo mbilinogo yukhirigya lagagis hunggu lagagup ovara, ai! Yogak andi, henendawi apik erogo saen nomalhinivuluk wilisiga?

² Hit wene onggo ambi yuknerovovok yiluk, yukheraup imbiti ako yi: Musa wene ako, hit ogarit nagu lagagup vaga Ala Averiniki wagagup a, ata Sek Wene Yesus avok hobaluk, avyarat umbutugup vaga wagagup a? Hodorogo yukneres!

³ Hit henendawi swi okhinipigi ako andi, Ala Averiniki enat ovara, yogak Musa wene ako henadik henanye vaga ogarit lagu dugwit, “Nenendawi hoda okhedasogom o,” yiluk, ogasagwi? Hit henendawi mondok dek ap wes ovagak dugwit ogagu hinigis.

⁴ Hit wene wagagup ako vaga mondok anggin eve iya erogo okbugugusigik, henendawi sagain vaga dugwit wugu lagagup ako andi, un enam warogo wugu lagagup yi? An anderogo ombasigadek, naswei.

⁵ At Ala en Averiniki wokhirigya, eke, henanggelekma nggarogo ogarubuk menda ogagya, ogasiga ako andi, hit Musa wene ako wane-wane ogasagwi vaga ogasiga a, ata Sek Wene Yesus avok hobaluk avyarat umbutugup ako vaga ogasiga a? Hit eres!

⁶ Ala wene endak dirup warek ako vaga ambien iri dugwit, “At Averakam endawi Ala ovaga vanggabaluk, avyarat imbita lagagimu, Ala en, ‘Ap yi, endawi sagain mondok segat higi o,’ yiluk, yagagi” dirup warek ako dibas.

⁷ Dirup warek andi wane-wane, it avakwa avyarat ombasagwi menda ako adigat Averakam ombawi mondok avyarat agarwik ombarop.

⁸ Eve Sek Wene ao sigam ari wagetek hegek, At Ala en, “Yi avakwa ndi avakwa o wen vaga yoma ovok erogo hat vaga enadenggen hugu dogosogom o,” yiluk, Sek Wene andi Averakam yugogogi. Wene yugogogi dirup warek ako vaga, Ala en, “Avakwa weram Yakuri dek menda enendawi novaga vanggabaluk avyarat umbutuselok, Anen, it yi, weyak dek, segat inisaliga,” imbitigi ako atma arisogon yedok hapwak yiluk, dirup warek ako agarik.

⁹ Anderogo atma, at Averakam endawi Ala ovaga vanggabaluk avyarat imbita lagagimu, Ala adenggen at ovaga bagagi ako wane-wane, nit ogo Ala ovaga vanggabaluk avyarat umbutu niniselok, Ala en adenggen ombok erogo nit nenovaga bininayogon andi mondok avyarat.

¹⁰ Ala en iri dugwit, “Ap ambi ogagya dogop wene dirup warek yi, vagago dugwit, ovogat des erogo ogagetek halok, at vudilek-at dogopwak o,” yiluk, yagagi dirup warek agarik. Anderogo wane-wane it avakwa en, “Ala woknenombapwak yiluk, Musa wene ako ndatak-at ogarit lagu dogosogom o,” yiluk, wene andi vaga enendawi vanggabaluk ogarusogom ovara, wane-wane ogarup meyan halok, vudilek-at iniselagwi o.

¹¹ Ala en, “It avakwa enendawi An segat inisaliga ako andi, An novaga vanggabaluk avyarat nombasagwi andi vaga, iniluk-at dogosogom o,” yiluk, yagagi dirup warek agarik. Wene dirup warek andien, Musa wene wane-wane ogasagwi vaga Ala en, “At yi, segat higi,” yiluk, woginivisogonbuk andi, ninilup aro.

¹² Musa wene ogasagwi inim, eke nenendawi Ala ovaga vanggabaluk avyarat ombasagwi inim, mberen andi adem ndatak dek. Musa wene ogasagwi adem andi, enadik enanye vaga vanggabaluk ogasagwi atma, Ala wene endak dirup warek ambi iri dugwit, “Ogagu dogop wene ako andi mondok vagago dugwit, des erogo ogarit lendagwi vaga iniluk-at dogosogom o,” yiluk, dirup warek agarik atma, ap ambi Musa wene ako vaga vanggabaluk ogagya halok, andi ovok erogo mondok des erogo adigat ogarit lagya dogopwak.

¹³ Eke, Ala wene dirup warek vaga en iri dugwit, “Ap ambi warogo eyave yo vaga sivinogo baguselok andi, Ala en vudilogo baliga o,” yiluk, yagagi dirup warek agarik. Dirup warek andi wane-wane, Musa wene hobalek hegek adik ogagu lagagup andi vaga, nit ogo vudilek nenovaga welagagup ovara, dek arupwak yiluk, Keretus nenavoloma vudilogo bagya lagagimu, yo winik vaga sivinogo bagagwa andi vaga, nenonggo mbabaluk, visilogo bininggigirikmu agurik o.

¹⁴ At Yesus Keretus ogagagi ako andi, Ala en Averakam adenggen ovaga bagagi ako, it avakwa weram Yakuri dek menda inim enendawi adenggen ombarupwak yiluk, ogagagi higyo. Eke, At nenavoloma hombagagi ako andi, At Ala en “Ala Averiniki wokherayogon,” avok yukneragagi ako, nit At ovaga vanggabaluk avyarat ombasagwi vaga, wokneraliga.

Wene Musa Averakam iperen wakhegek yugeragagi wene

¹⁵ Naswei o. Nit ogasagwi menda ambi wakhegek yukherayogon. Ap mberen wene mbanggu dugwit, “Mondok anderogoat ogarusogom o,” yiluk, nggatuk erogo mbangguselok, ap adik ambien wene andi, degerogo hekbagya, ata wene adik ambi inim hondalogo bagya, ogarup mondok meyanat helagwi.

¹⁶ Anderogo wane-wane, at Averakam ombao inim hivis ogarup wene Ala en Averakam nggatuk erogo yugugu dugwit, ombawi wigalek eneyave wisane halok, “Hombawi o,” yiluk, andi yugeregetek. Ata, eyave ambiat Keretus atma, “Hombao o,” yiluk, yugogogi.

¹⁷ At Ala en Averakam iperen wene mondok nggatuk erogo yagagwa hegek, 430 tahun hudi okbaluk, wene Ala en Musa yugogogirikmu, hivis wene yugogogi ako vaga, endak nggatuk erogo yugogogi ako ao ogagetek hegek, degerogo hekbisaup sek embetep? Mondok meyan atma yiluk, avyarat yukheraliga o, naswei.

¹⁸ Ala en okbininaup Averakam nggatuk erogo yugogogi ako, hivis Musa wene hobalek ogasagwi vaga okbininaup ombaklipmu en, endak at Averakam andi, yugiklipuk ovara, endawi hunik ogagya dugwit, nggatuk erogo yugogogirikmu, avyarat umbutu niniselok waup yiluk, yugogogi higyo.

¹⁹ Andi halok, Ala en wene Musa yugogogi ako andi, nggarogo yiluk yugogogi embetep? Dek o. At Averakam ombawi wigalek menda ambi nggatuk erogo yagagi ako, eyave ao sigam ari wagatek hegek, weyak endak sigam hugu dogopwak yiluk, wene Musa yugogogi andi, inim lobalogo yugogogi. Wene Musa yugogogi ako andi, Ala en mbikit avakwa Iserali yugeregetek. Ata, it malaikat yugirigya lagagirik, iren ap Musa yugugu lagagwama, Musa en serak enake wene avakwa yugeragagi.

²⁰ Avakwa mberen wene ogarup ambi werek halok serak enake ako iperen enavikit yugeraliga ovara, Averakam yugogogi ako andi, Ala eyave ambiat ma, At adik en endawi wenggebaluk nggatuk erogo, “Ogasogon,” imbitigi atma, mbikit Averakam yugogogi.

Adem ngga vaga Ala en yerogo ogarup, nderogo ogarup Musa wene yugogogi

²¹ Andi halok, wene hobalek Musa yugogogi inim, eke, Averakam nggatuk erogo yugogogi wene inim, andi adem adik-adik ombasagwi? Mondok dek o, naswei. Nit niniluk dogop yiluk, “Yerogo ogarup, nderogo ogarup,” wene hobalek ambi duklipmu en, wene andi wokbaluk ogasagwi vaga Ala en, “At yi, endawi mondok sek o,” yiluk, yuknirigya duklip.

²² Ovara, anderogo dek atma, Ala en okbininaup yugogogi ako, nit nenendawi Yesus Keretus avyarat ombasagwi vaga okbininapwak yiluk, abyam dugwit, “It yi avakwa ndi avakwa ovok erogo weyak ogasagwi vaga wam davoma larik ovagak agarwik,” ombarupwak yiluk, Ala en yagagi dirup warek agarik.

²³ Nit Yesus Keretus ovaga vanggabaluk avyarat ombasagwi wene ako ao wagatek hegek, wene Musa yugogogi ako vaga heda mago welagagup. Keretus ovaga vanggabaluk avyarat umbutu dogop wene ako ao sigam ari wagetekma, wam davoma lakbiselagwi hak larogo bininiluk welagagi.

²⁴ Anderogo atma, nit Keretus avyarat ombasagwi vaga, Ala en “Hit yi sek aro,” yiluk, woknenombapwak yiluk, Keretus ao wagatek hegek, Musa wene akoen un sidogat nenabyam welagagi.

²⁵ Musa wene akoen un sidok nenabyam welagagi ovara, Keretus ovaga vanggabaluk avyarat ombasagwi ako vage sigam ari wagagirikmu, yogak Musa wene ako nenabyam agarikbuk.

²⁶ Hit ovok Keretus Yesus avyarat ombakluk, henendawi At ovaga vanggabagagupikmu, hit Ala aburi-at agipik.

²⁷ Hit ovok Keretus inis vaga ima wombagagup atma, Keretus andogon wane-wane-at yikhedagagup o.

²⁸ Henandogon ambiat Keretus menda yikhedagagup atma, yi Yakuri menda yi Yunani menda, yi ap enayeloman agarwik menda, yi ap enayeloman agarwikbuk menda, yi ap yi hwa, anderogo yup mondok dek aro. Nit ovok Keretus Yesus ninim hunik atma, neneyave ambiat agurik.

²⁹ Eke, nit Keretus aburi avyarat agurik halok, Averakam ombawi atma, wene Ala en nggatuk erogo yugogogi ako, mavorangge nirat hedaugen yiluk agurik o.