Nggalatia 2 - ALA WENE HIVIS DIRUP WATUGWA

It lakbigik menda ninen Paulus nenaswe aro, yiluk, wagagwa wene

¹ Andien, tahun 14 okbaluk, an ap Mbarenabas niperen o Yerusalem lagu dugwit, at Titus ako wegek-wegek lagagup.

² Nit o Yerusalem lagagup ako, Ala en, “Hat o Yerusalem lanok,” yiluk, nendawima yuknugu lagagimu, lagagup. Lagu lagagurik, it Ala aburi o Yerusalem enasini enadigat inim homagu dugwit, Sek Wene Yesus Avok it weram Yakuri dek menda an yugeraliga ako, enadigat mbilinogo yugeragagis. Andi, an Sek Wene it weram Yakuri dek menda yugeraliga ako, iren, “Hat wene adik menda it weram Yakuri dek menda yugirigya heyalagwi,” yuknugu saoen, an yugeregek nagu lagagis inim, ao yugeraliga inim, un enam warogo ogagya neyaoen, nalon imbita dugwit, it enasini ako enadigat mbilinogo yugeragagis.

³ Ako yugirigya lagagirik, at nenaswe ninim lagagup Titus ako, ap Yakuri menda dek Yunani menda atma, it Ala aburi enasini o Yerusalem akoen, “‘Agamut mbalup,’ yiluk, yukneramwi ai?” enumbutugup ovara, dek, “Agamut mbalup,” yukneregetek-at welagagwa.

⁴ Andi, it ap nin hulugat “Nit henaswemuni aro,” yiluk, mbauk nenanggelekma nunggu wagagwa. It nenanggelekma nunggu wagagwa akoen, nit Keretus Yesus ninim hunik dugwit, visilogo bininggigi wene hedagagup ovara, it ap ako nit Yakuri wene hobalek ambi inim ogagu dogop yidilogo bininupwak yiluk, nunggu wagagwa.

⁵ Anderogo yiluk nunggu wagagwa ovara, hit avyarat Sek Wene wagagup ako adigat sek erogo vagago dugwit, ogarit lagu dogovovok yiluk, iren anderogo yugusim, niren it enane hulup mondok nenanggon yiluk, “E o,” yugeregetek, hekbogogup.

⁶ Eke, it enasini ininis werek yagagwa ako en, “Hat yugeraliga andi, wene yi inim ogagu dogopwak yiluk yugirigya dogwen,” yiluk, an yuknigitek welagagwa. Ala en enelose dombabugu dugwit, ambi yi iya, ambi andi meyan, anderogo mondok nenombarisigadek atma, an ogo ininis werek andi vaga wi iya yiluk enombasigadek.

⁷ It enasini ininis werek akoen, “Ala en at Peterus andi it Yakuri menda Sek Wene yugirigya dogopwak yiluk yavup inggimu bagagi anderogo hak, at Paulus ogo, it avakwa weram Yakuri dek menda yugirigya dogopwak yiluk Ala en yavup inggimu bagagirikmu ogasiga,” yedok hagagwa.

⁸ Eke At Ala en at Peterus Sek Wene andi it Yakuri menda yugeregek lagya dogopwak yiluk, yavup inggimu bagagi ako, Aren an ogo wane-wane Sek Wene it ap weram Yakuri dek menda yugeregek lagya dogogiluk ninggimu baninggigi.

⁹ It Ala aburi o Yerusalem homasagwi enasini ininis ombok Yakobus o, Peterus o, Yohanes o, akoen Mbarenabas niperen yuknirugu dugwit, “Ala endawi hunik en andok okbagagagi atma, sek aro. Hiren andi, avakwa weram Yakuri dek menda yugeregek lagwi, eke, niren andi Yakuri menda yugurugwi, ogagu dogosogom o,” yiluk, nininggi wa-wa yugu lagagurik, lakbinunggugwa.

¹⁰ Lakbinini wagu dugwit, “It avakwa ininggidek sovalek agarwik ako, enabwa wisane umbutu dugwit yonggar-inupu dogones,” yiluk, andi adigat yuknirugu lagagwama, an ogo andi, anderogoat nendawi wenggelek dugwit, ogarit landiga atma, “Segat yukneragao,” yiluk, embetek lagagup.

Paulus en Peterus anggadi watigi wene

¹¹ Anderogo ovara, at Peterus ako o Andiyokia wagya lagagirik, weyak ogagya lagagimu, an ombokma sigamat anggadi watigis.

¹² At Peterus weyak ogagagi ako yerogo: Endak, at Yakobus en aori lakbisa wagagi ako, ao wagetek inigik, at Peterus akoen o Andiyokia wagya lagagirik, ap weram Yakuri dek menda inim erom ugunat nunggugwa. Inim nunggugwa ovara, it ap Yakobus en lakbisa wagagi ako, wagwi il inugu lagagirik, Peterus en, “It yi andi, enagamut mbalinivisagwi menda atma, nggarogo nombarumwi?” yiluk, alon en it weram Yakuri dek menda inim erom nenggetek higilogo ari winggigi.

¹³ Eke, it ap Yakuri menda nin Ala aburi agagwa akoen, Peterus endawi mberen agavoval agya hugu lagagwarik, it ogo wane-wane enendawi mberen enagavoval ovagak higithedagagwa. Higithiduguselok, ap Mbarenabas ogo, it Yakuri menda enendawi mberen agwi inugu lagagirik, “Wi! An nggarogo ogarik?” imbita lagagirik, Peterus inimat hondo yagagi.

¹⁴ Andi halok, an andi avyarat Sek Wene ako adik ogagwi inugu lagagirik, it ovok inivaga Peterus yugugu dugwit, “Hat ap Yakuri menda-at ovara, it Yakuri menda ogasagwi wane-wane ogagetek dugwit, it weram Yakuri dek menda ogasagwi ako segat ogagya lagen. Anderogo ovara, yogak it weram menda en it Yakuri menda ogasagwi hak ogagu dogopwak yiluk, nggarogo yiluk yugeraliga?” yiluk, anggadi watigis.

Ala en Yakuri menda inim Yakuri dek menda inim avyarat ombasagwi vaga woginivisiga wene

¹⁵ Avakwa Yakuri menda en, “It ap weram Yakuri dek menda andi weyak ogasagwi menda,” yiluk, yagalagwi ovara, nit ap Yakuri anderogo menda dek. Nit ap Yakuri menda avyarat endaklagagup ovara,

¹⁶ niren Musa wene ako wane-wane ogagu niniselok, Ala en, “At yi, mondok segat,” yiluk, wokninivisogonbuk. Ata, nenendawi Keretus Yesus ovaga vanggabaluk avyarat ombasagwi ako vaga, “Ap yi, mondok segat,” yiluk, wokninivisiga ninilup atma, nit ogo nenendawi Keretus Yesus ovaga vanggabaluk avyarat umbutugup. Musa wene ako ogasagwi vaga, Ala en, “Ap yi, mondok segat,” yiluk, wokninivisigadek atma, nit Yakuri menda ogo, Ala en sek wokninivupwak en yiluk, Musa wene ako vaga vanggabaluk ogasagwidek o. Nit ogo, Keretus ovaga vanggabaluk avyarat umbutugup menda aro.

¹⁷ Nit Keretus inim hunik dugwit, avyarat ombasagwi vaga Ala en “At yi, segat higi,” yiluk, woknenombapwak en umbutu dugwit ogasagwi. Anderogo ovara, nit ogagu dugwit, it avakwa weram Yakuri dek menda weyak ogasagwi wane-wane, nit ogo weyak ogasagwi menda sigam agya halok, “Adem Keretus vaga it weyak ogasagwi,” yup sek a? Mondok dek o.

¹⁸ An Musa wene hekbagagis ako neyami vaga hedelagya dogomindik ogagya neyalok, it avakwa en, “Sek ogarup hegek hekbagagi ako andi, weyagat ogagagi o,” yiluk, nombarusogombuk embetep? Anderogoat nombarusogom atma,

¹⁹ Musa wene ako hegek adik ogagagis vaga narogo baninggya lagagimu hombagagis ovagak atma, yogak, “Yerogo ogarup, nderogo ogarup,” yuknisiga ako, an hulup mondok meyan. An niluk Ala ake denek agirik. At Keretus eyave yo winik vaga lobalogo bagagwa andi, an ninimat yo winik vaga natugwa.

²⁰ Eke, yogak an niluk agirik yi, an nanye vaga niluk agirikbuk. Ata, Keretus nendawima mondok iluk agarik. Eke yogak an neyave yi vaga ogarit lagya neyagek, At Ala Abut nabwa imbita lagagirik, nake hombagagi atma, an avyarat imbita dugwit, nendawi At ovaga vanggabaluk, ogarit landiga.

²¹ Musa wene ako, nit ogasagwi vaga, At Ala en “At yi, mondok segat,” yiluk, wokninivilipmu en, At Keretus un enam warogo nenake hambilip. Ala nenabwa en okbininaliga wene ako andi anen sovalogo hekbaligadek o, naswei.