Nggalatia 1 - ALA WENE HIVIS DIRUP WATUGWA

^1-2 Hit Ala aburi o propinsi Nggalatia homasagwi menda, naswei narupwi wa. An Paulus naswei narupwi o yoma ninim agurik menda nit ovok erogo en wene yi dirup warogo henadema wokhera wendagwi. An lakbigik menda mondok okbaninggigirikmu lakbani wagagi andi, adem avakwa en dek. Eke, ap ambien ane vaga an lakbani wagagibuk. Ata, At Yesus hambuluk lendagwima en iluk erogo mondok okbagagi Nenasin Ala, Nenowa Inis Ombok Yesus Keretus iperen en, an lakbigik menda dogogiluk, mondok okbanunggugwa.

³ Nenasin Ala, Nenowa Inis Ombok Yesus Keretus iperen henabwa en okbugugwis, henendawi ugun seyalek adenggen dogovovok yiluk, okhinipwis, ogagu dogopwak o.

⁴ O yogak yi vaga, it avakwa wen vaga menda weyak ogarup enendawi wenggebaluk ogasagwi ako, ninim ogagu ninisaoen, haurogo wokninivigiluk, Nenowa Yesus Keretus en, “It weyak ogasagwi ako, enonggo bagiluk enake hambisogon o,” yiluk, nenake hombagagi. At nenake hombagagi ako, At Nenasin Ala imbitigi wane-wane hombagagi atma,

⁵ “Ala inis mondok-mondok siyabagu dogosogom o,” yiluk, “Avyarat amin,” yagalagwi.

“Sek wene andi, ambiat agarik,” yugeragagi wene

⁶ At Keretus henabwa imbita lagagirik, henake hombagagi ako vaga, Ala en sek erogo bigigagiluk heneyanggup yukheragagi. Ovara hegek, hit hekbaluk, wene adik menda ambi vage henendawi nomalogo wokhinivuluk wuluguluk ogasagwi andi hinugu lagirik, “Wi,” yiluk hinimbita dugwit, yukheraliga.

⁷ Sek wene andi adik ambi inim agarikbuk ovara, it ap ninen Sek Wene Keretus avok ako, “Avut dagalusogom o,” yiluk, wene adik ambi inim lobalogo yagan nelagwi andi vaga, hit henendawi nadok-hadok erogo bigigelagwi atma yiluk, yukheraliga.

⁸ Anderogo atma, nit Sek Wene yagalagwi menda ambien a, ata it malaikat mbogot vaga menda ambien a, Sek Wene endak yukheragagup wagagup ako hegek, wene adik ambi yukhera waguselok, Ala en anggin ombok erogo vudilogo bisapwak.

⁹ Hit endak Sek Wene wagagup ako hegek, ap saen wene adik hunogo menda ambi wolok yukhera wagya halok, “Ala en anggin ombok erogo vudilogo bisapwak,” yiluk, yukhirugu lagagup ako wane-wane yogak ambi yi inim yukheraliga.

¹⁰ An yukheraliga andi, avakwa en “Hat sek yegen,” yiluk, yuknirupwak yiluk yagaliga a? Ata, Ala en, “Hat sek yegen,” yuknirupwak yiluk yagaliga a? Eke, an avakwa en sek nombarupwak yiluk yagaliga ombasagwi? Dek o. An endak avakwa enendawi sek nombarupwak yiluk iri lagagis ako wane-wane iri duklimu en, yogak an Keretus ayeloman aklibuk.

Paulus nggarogonggan en lakbigik menda agagi wene

¹¹ An Sek Wene yugeregek naliga ako andi, it avakwa en enendawi wenggebaluk yagan nelagwi ako menda wigya lagagirik, yugeregek naligadek, yiluk, hinilup arovovok yiluk yukheraliga o, naswei.

¹² An yukheraliga yi ako andi, avakwa enane menda wegetek. Eke, it ap adik en mamulnogogwa vaga yagaligadek. Ata, At Ala en wene Yesus Keretus avok ako sigam erogo yuknugu lagagimu, yugeregek naliga.

¹³ An it ap Yakuri menda enane musek lagya dugwit, ogarit nagu lagagis ako, hit endak hunggu lagagup. Andi, an it ap Yakuri menda enane musek lagya dugwit, Ala aburi Yesus wene welagwi menda ako, ambi hekbisaup embetetek, ata ovok degerogo bisaigen yiluk, mondok naninis en enamusek enarit lagya lagagis ako hit hinilup aro.

¹⁴ Wene nit Yakuri menda nenombawi ogagu lagagwa mamulik menda ako, musek lagu dugwit, an naswei nin un horogat ogagusigik, an andi nendawi mondok hunik vaga amusek lagya dugwit mondok wane-wane-at ogarit nagu lagagis ako andi, hinilup aro.

¹⁵ Anderogo wisane-at ogarit lagya neyagek ovara, hinya agaum elola en ao endaklagatek neyagek, At nabwa imbita dugwit, miknitya lagagirik, neyanggup yuknogogi Ala akoen

¹⁶ it avakwa weram Yakuri dek menda an Sek Wene yugeregek lagya dogogiluk, At Abut Yesus nadema sigam ari warup endawi sek nimbita lagagirik, nadema sigam ari wagagi. Nadema sigam agya lagagimu, “Yi nggarogo yiluk yuknigas?” it avakwa adik ambien wene mbilape yuknirupwak yiluk, enadema yugeralagatek.

¹⁷ Eke, an lakbigik menda ao mondok okbanenggetek hegek, it enendak lakbigik menda o Yerusalem welagagwa ako, enadema yugeralagatek. Ata, an mbikit avakwa Arap menda enadoma lagagis andoma welagagirik, hivis neyami vaga o Ndamasik andoma-at wagagis.

¹⁸ Eke, o Ndamasik en, tahun henggam okbaluk, ap Kepas ilup erogo o Yerusalem lagya lagagirik, an Kepas ninim dugwit ndugwis 15 hudi inim welagagis ovara,

¹⁹ it lakbigik nin andi, an nil mondok inigitek. At Nenowa Inis Ombok Yesus aot Yakobus ako, adigat nil hagagis.

²⁰ An dirup warogo wokheraliga yi ako andi, huluk dek, Ala ivaga mondok avyarat warogo wokheraliga.

²¹ An ap Kepas ninim welagagirik, andi okbaluk, o Siria inim, Kilikia inim, wagya lagagirik, o akoma avilis ambot nagu lagagis.

²² O andi hudi it Ala aburi Keretus inim hunik dugwit, o Yudea homasagwi menda akoen, an neyave inil neyagetek ovara,

²³ it avakwa en yugu dugwit, “Wene Yesus avok avyarat ombasagwi ako, endak arenen mondok degerogo baigen yiluk, at aninis en nenarigiluk nenamusek nagu lagagi ako ovara, yogak andi wene ako at wigya lagagirik, yugeregek naliga o,” yiluk, yugwi ako enaruk hunggugwa.

²⁴ Hunggu lagagwarik, an ogasiga ako vaga vok yugu dugwit, Ala inis siyabagu lagagwa.