Matius 4 - ALA WENE HIVIS DIRUP WATUGWA

Sile akoen Yesus avut mbanggigi wene

¹ Ima wombabagya lagagimu, Sile en Yesus avut mbalupwak yiluk, Ala Averiniki en Yesus o harumu avakwa mondok dekma wolok lagagi.

² Wolok lagya lagagirik andoma dugwit, ndugwis 40 hudi hegek o hup o dingga erom nenggetek-at welagagirikmu, erom uvup ogagagi.

³ Erom uvup ogagya lagagimu, at avakwa enendawima nomalivisiga menda Sile akoen wagya lagagirik, Yesus adoma yugugu dugwit, “Hat avyarat Ala Abut heyalok, helep yi, erom arupwak yiluk, yuguru!”

⁴ Yugugu lagagimu, Yesus en, “Ala en iri dugwit, ‘Avakwa erom adigat nungguselok, iniluk dogosogombuk. Ala yagaliga wene ako ovok erogo welagwi halok andi, mondok iniluk-at dogosogom o,’ yiluk, yagagi ako dirup warek agarik.”

⁵ Yugugu lagagimu, Sile akoen Yesus wolok o kota Ala ake adik enek agarikmu akoma lagya lagagirik, Ala awi valek o virimu ba inggya lagagirik,

⁶ yugugu dugwit, “ ‘At Ala ayonggo lakbisa wandiga malaikat ako, yugeramindikmu wagu dogomundik, helep vaga hisok hado yi wambigya heyaoen, ininggisena ndalek vaga enewogogo ari wambisogon o,’ yiluk, yagagi dirup warek agarik atma, hat Ala Abut avyarat heyalok, winimen en soklok wambuma.”

⁷ Yugugu lagagimu, Yesus en, “At Ala en iri dugwit, ‘Henasin Ala An navut mbalubuk,’ yiluk, yagagi dirup warek ako andi ogo weregat!”

⁸ Yugugu lagagimu, at Sile akoen Yesus wolok ndom mondok adup vaga inggya lagagirik, wen vaga yoma yi avakwa ndi avakwa ininis werek enavema biselagwima inim, it enangge mondok widao menda inim, ovok erogo inuk ogogi.

⁹ Inuk ugu lagagirik, yugugu dugwit, “Hat navema seve yiluk, siyabaninggya heyalok, yi ovok erogo wokhisogon o.”

¹⁰ Yugugu lagagimu, Yesus en, “Hat Sile yi, heve elak. Ala en, ‘Henasin Ala avema seve yiluk, At adigat siyabagwi, At yagaliga halok adigat dibaluk ogarit lagwi, ogagu dogones,’ yiluk, yagagi dirup warek agarik.”

¹¹ Yugugu lagagimu, Sile akoen Yesus hekbaluk wunggu hegek, it malaikat wagu lagagwarik, Yesus inim dugwit endawi aik wakbagwi, yonggat-hugwi, ogagagwa.

At Yesus o Galilea lagagi wene

¹² At Yohanes heda magago lembaga mabagagwa ako Yesus aruk hunggu lagagirik, o Propinsi Galilea lagagi.

¹³ Lagya lagagirik, o kota Nasaret akoma hekbaluk, o kota Kapernaum is Galilea yanggadek omban vaga ap ininis unggul Sebulon, Naftali, enamwa akoma-at mbup yi lagagi.

¹⁴ Anderogo lagagi ako, Ala yugugu hegek yugeraliga menda navi Yesaya yagagi ambi atma des yupwak yiluk, lagagi. At navi Yesaya en iri dugwit:

¹⁵ “It avakwa Sebulon, Naftali, enamwa sup is ombok yanggadek lendagwima is Yorodan elavikit akoma, it weram Yakuri dek menda enamwa o Galilea andoma agarwik ako andi,

¹⁶ o hwiserekma welagagwa ovara, o awiya ombogat inil hagagwa. Eke, it hambisagwi avema hwiserekma welagagwa ako, awiya adigat enovaga okbogogi,” yiluk, yagagi ako atma des yupwak yiluk, o andoma-at lagagi.

¹⁷ Lagya lagagirik, Yesus en yugirigya dugwit, “At mbogot vaga menda avema bigigaup ako vage horok ari wagarikmu, hit weyak ogasagwi ako, henasam helok, hekbas,” yiluk, wene yugeregek laup ako, o andi hudi asinggigi.

Ap ikan welagwi menda eneyave 4 miginipigi wene

¹⁸ At Yesus is yanggadek Galilea omban vaga lagya dugwit, ap owa-aot Simon inis ambi Peterus salek ako, aot Andereas iperen ikan wasagwi menda atma, ikan waruguluk yum yarin ima wombabagusim il enogogi.

¹⁹ Inugu lagagirik, “Avyak yoma wai. Hit ikan belalogo wasagwi andi hak, avakwa belalinivit nagu dogop mamulheragiluk, ninim lasogom en omanes.”

²⁰ Yugirigya lagagimu, mbikit yum yarin ikan wasagwi menda ako, hekbaluk, Yesus inim lagagwa.

²¹ Inim lagu dugwit, ap eneyave mberen Sevedius aburi Yakobus aot Yohanes iperen enasin inim mburis vaga dugwit, yum yarin ikan wasagwi menda ako sek erogo manggatwis il inugu lagagirik, “Ninim lasogom en, omanes,” yugeragagi.

²² Yugirigya lagagimu, mbikit mburis inim, enasin Sevedius inim, hekbaluk, Yesus inim lagagwa.

Wene mamulirigya, Sek Wene yugirigya, avakwa sek oginipu, ogagya lagagi wene

²³ At Yesus o Galilea avilis-ambot ovok erogo nagu dugwit, it Yakuri samban ogasagwima wene mamulirigya, Sek Wene Ala avema bisaup wene ako, avakwa yugirigya, aup adem adik-adik menda inim, idup-mbidup menda inim, sek oginipu, ogarit nagu lagagi.

²⁴ Ogarit nagu lagagi wene ako, o Propinsi Siria andoma ovok erogo inilup agya lagagimu, aup adem enovaga hunik adik-adik menda inim, idup-mbidup enovaga agarwik menda inim, madis enendawima nonggagagi menda inim, aup adem ambi ininggis-ndogom inisok-ndogom wasagwi menda inim, ininggis-inisok yidugup agarwik menda inim, ovok erogo woginiviluk At adema wagu lagagwama, At Yesus en sek oginipu lagagi.

²⁵ Sek oginipu lagagimu, avakwa wisane o Galilea en, Dekapolis en, Yerusalem en, Yudea en, is Yorodan elavikit en, eneyave wisane At Yesus inim lagagwa.