Matius 3 - ALA WENE HIVIS DIRUP WATUGWA

Yohanes Ima Wombabisaliga Menda en yugirigya lagagi wene

¹ O andi hudi ap Yohanes Ima Wombabisaliga Menda akoen o Yudea harumu avakwa dekma lagya lagagirik, avakwa yugirigya dugwit,

² “At mbogot vaga menda avema bigigaup ako vage horok ari wagarikmu hit weyak ogasagwi ako, henasam helok, hekbas,” yiluk, yugirigya lagagi.

³ At yugirigya lagagi ako, at navi Yesaya Ala yugugu hegek yugirigya dugwit, “Ap ambi o harumu avakwa dekma yanggup iri dugwit: ‘Nenasin Inis Ombok warup sup sek erogo yagwi, eke, At lagya dogop sup amor erogo yagwi, ogagu dogones o,’ yiluk, yagan wagya hagup o,” yiluk, yugeragagi ako andi, at Yohanes-at wagagi.

⁴ At Yohanes ako, asum andi, wam unta iris vaga monggadogo yikhidigya, eke, ambolanis agamut vaga yikhidigya, ogagagi. Eke at agarom andi, idam inim, somok amburup inim, ninggya lagagi.

⁵ Andoma werekma, it avakwa o Yerusalem menda inim, o Propinsi Yudea menda ovok erogo inim, is Yorodan yivikit-elavikit ovok erogo inim, andoma en at adema wagu lagagwarik,

⁶ it enasam helok, enomaduk avyarat vagangguselok, at Yohanes en is Yorodan ima wombabugu lagagi.

⁷ Wombabuguma, ap Varisi menda inim, ap Saduki menda inim, it wisane, “Ima wombabininapwak,” yiluk, at adema wagwi ako inugu lagagirik, it yugirigya dugwit, “Mbas idup aburi endago menda hit yi aro. Ala aninis henovaga bigigya wasogon ako, hoda wolovovok yiluk, saen hurimbis yukheraga?

⁸ Hit weyak ogasagwi ako, henasam hegep halok, yo enggen sek menda yiliga andi hak, ndatak ogagu dogones.

⁹ Hit henendawima en umbutu dugwit, ‘Averakam andi, nit nenombao atma, nit sek adigat agurik o,’ ombasagwi andi, anderogo ombarubuk. At Ala en, ‘Helep yi, at Averakam ombawi ares,’ yiluk, yugirigya halok, ndagat arup hegek, hit adigat iya dekma, nggarogo yiluk yagalagwi?

¹⁰ Yaga yo murumenda ovok adema agarik atma, yigyo ndigyo enggen sek menda yigitek halok, murogo halima mabayogon.”

¹¹ “Hit weyak ogasagwi henasam helok, hekbagu hiniselok, an ima wombabigigaliga ovara, At ambi an nambetaga warisogon ako andi, Averiniki inim, hali inim, henovaga bigiga warisogon atma, At ap ombok. Eke an ap maduk atma, anen At aropato wolok laup mondok meyan.

¹² Gandum enggen ako inigiluk, walup At inggimu vagago agarik atma, inisagwima en ovok enbaluk eyave halok andi, wonggalogo handimen ba inggya, eke, iluvulu halok, hali abya nagaup yagaligadekma andoma lakbagya, ogarisogon o,” yiluk, yugeragagi.

Yohanes en Yesus ima wombabagagi wene

¹³ Yugirigya lagagirik, akoma werekma, At Yesus ako, “Yohanes en ima wombabanupwak,” imbita lagagirik, o Galilea en Yohanes is Yorodan ima werekma, adema wagagi.

¹⁴ Wagya lagagimu, Yohanes en yugugu dugwit, “Anen wombabagaup meyan. Haren an ima wombabanup sek ovara, an nadema wagen yi!”

¹⁵ Yugugu lagagimu At Yesus en, “Nit anderogo ogagu niniselok, Ala en sek adigat ogagu dogop ombasiga ako, ovok erogo atma des yupwak yiluk, ogarup atma, ‘Yu,’ iru,” yugugu lagagimu, “Yu. Arat,” yugogogi.

¹⁶ “Yu,” iri lagagirik ima wombabagya lagagimu, Yesus ima en mondok iri dugwit, mbogot heyarogo Averiniki swa suwa ovagak wigaliluk At ovaga vakba wagya il hagagi.

¹⁷ Il higya lagagimu, mbogot vaga en ane iri dugwit, “Nabut nendawi hunik ako yi atma, nendawi adenggen wisane oknitya higi o,” yiluk, iri hagagi.