Matius 22 - ALA WENE HIVIS DIRUP WATUGWA

Ap hwa hidigyaim isogo isago naup wakhegek yugeragagi wene

¹ Andi okbaluk, At Yesus en wene wakhegek ambi inim yugirigya dugwit,

² “At mbogot vaga menda avema bisaligama ako andi, ap ombok inis werek ambi abut ogwa hidigyaim isogo isagagi ako hak.

³ Isogo ako vedagogo baluk, it isago naup yugeragagi ako, nawarupwak yiluk, ayelomani enayonggo lakbogogi ovara, it ap isogo naup ako, ‘Nenanggon o,’ yiluk, mbup yagagwa.”

⁴ “Mbup yugu lagagwama, at ap akoen, ‘Nanggom sapi nggulok inim, nanggom sapi eyak amok werek inim, warogo isagirikmu, naguluk yi menda ndi menda ovok erogo okbagirikmu, ninim naup yugirigi ako, yiluguluk warupwak yiluk, yugerelales o,’ yiluk, ayelomani adik ambi inim yonggo lakbogogi.”

⁵ “Yonggo yugeralagu lagagwama, it ap ako lakit-lakot yugu dugwit, it nin yavup ogari lagwi, it nin enaroko valisup akoma okhedaguluk lagwi, ogagagwa.

⁶ Eke, it ninen, at ayelomani yonggo lakbogogi ako, eneyave vakbisiluk, enanggadi warinipu dugwit, initugwa.

⁷ Initao yugwi ako, at ap inis ombok ako aruk hunggu lagagirik, aninis wisane en aori enayegen werek lakbugu lagagimu, ayelomani initugwa ako enarogo bugwis, enawi hali bagwi, ogarit lagagwa.”

⁸ “Ogagusigik, at ap akoen ayelomani yugirigya dugwit, ‘Nabut ogwa hidigyaim, isogo ovok isagago bagi ovara, it enayonggo bigis ako, “Nenanggon,” yagao vaga it nawarup mondok degat imbitirikmu,

⁹ hiren sup andoganma lagu dogomundik, avakwa waguselok, isogo isago nawarupwak yiluk, yugerano.

¹⁰ Yugirigya lagagimu, at ayelomani akoen sup ombok vaga yi ap ndi ap sek-weyak ovogat wendagwi inil inigu lagagwarik, wonggabisiluk, eneyave wisane woginiviluk wagu lagagwarik, isogo isagagirikmu akoma o hobo yagagi.”

¹¹ “O hobo iri lagagimu, ap inis ombok akoen il yambeninivit nunggwigya dugwit, ap hwa hidigyaim, isogo naguluk, enasum yikhedelagwi menda ako ap ambi yirikdek higya lagagirik,

¹² yugugu dugwit, ‘Avyak. Ap hwa hidigyaim, isogo naguluk, enasum yikhedelagwi menda ako hat yikhedegetek nggarogonggan nunggu wagen?’ Yugugu lagagimu, ap ako anedek mbup yagagi.”

¹³ “Ane dek mbup iri lagagimu, ap inis ombok akoen aori yugirigya dugwit, ‘Ap yi, inggis-isok heda marogo baluk weram o hwiserekma yup yagwi, idup en wakhidugwi, ogasagwima andoma wiba wilitales,’ yugeragagi.”

¹⁴ “Anderogo hak, Ala en avakwa eneyave wisane enayonggo bisaliga ovara, ambukumat miginivisiga o,” yiluk, yugeragagi.

Ap Kaisar ake baup yugogogwa wene

¹⁵ Andi okbaluk, it ap Varisi menda en Yesus ane ambi yimi vaga yidilogo baluk, anggadi warusogom yiluk, irirat wene mbali lagagwa.

¹⁶ Wene mbanggu lagagwarik, it Varisi enane welagwi menda nin inim, it Herodes menda inim, lakbisa wagagwa ako wagu lagagwarik, Yesus yugugu dugwit, “Ngguru wai. Hat andi avyarat adigat ogagya dugwit, Ala endawi ombasiga menda avyarat des erogo yuknirigya heyalagwi. Haren ap enelose dombabigitek dugwit, ambi iya ambi meyan ombasigadek atma,

¹⁷ ap inis ombok Pemerintah Oroma enasin Kaisar ake yoparip pajak baup sek a, weyak a? Hat hendawi nggarogo ombasiga?”

¹⁸ Yugugu lagagwama, At Yesus en it wene weyak adigat ombasagwi yedok inigu lagagirik, yugirigya dugwit, “Hit henagavoval yagalagwi humwis yi! Nggarogo yiluk, ‘At yagaliga vaga yidilogo basogom,’ umbutu dugwit, yuknisagwi?

¹⁹ Pemerintah Kaisar ake pajak belagwi menda yoparip mbusi ambi, inuk neres.” Yugirigya lagagimu, yoparip mbusi ako wogori wagu lagagwama,

²⁰ At Yesus en, “Elese ovagak ogarek inim, inis dirup warek inim, sa helagwi?”

²¹ Yugirigya lagagimu, iren yugu dugwit, “Andi Kaisar aro.” Yugugu lagagwama, “Andi halok, Kaisar angge halok andi, Kaisar-at wogugwis, eke, Ala angge halok andi, Ala-at wogugwis, ogagu dogones.”

²² Yugirigya lagagimu, enaruk hobaluk, “Wi!” yiluk, vok yugu lagagwarik, Yesus hekbaluk wunggugwa.

“Hambisagwi ovara, hivis iniluk arumwi a, dek a?” yugogogwa wene

²³ It ap Varisi menda ako Yesus hekbaluk, wunggu lagagwama, o andi vaga ap Saduki menda Yesus adema wagagwa. It ap Saduki menda ako, “Avakwa hambisagwi andi, iniluk erogo mendek yusogombuk,” yugu lagagwa. It ako Yesus adema wagu lagagwarik, hemethugu dugwit,

²⁴ “Ngguru wai. At Musa en, ‘Ap ambi ogwa hedagagirikmu, abut endagetek dugwit hambigya halok, owa avoloma aburi endarupwak yiluk, aot en at owa sogwa akoat hedapwak o,’ yiluk, yukneragagi.

²⁵ Anderogo atma, nit nenamwa yoma ap ambi aburi eneyave 7 endago welagagwa ovara, at manggum akoen hwa hidigya lagagirik, abut dek hegek hambigya lagagimu, aot manggum ambetaga menda-at wogogi.

²⁶ Wigya lagagirik, anderogoat abut endagetek-at hambigya lagagimu, at aot ambukmu menda inim, andien, it eneyave 7 endago ovok erogo anderogo adigat hwa ako wugwi, enaburi dek hegek adigat hambugwi, ogagu lagagwama,

²⁷ hivis enambetaga hwa akoat hombagagi.

²⁸ It ap eneyave 7 en hwa ambiat wogogwarikmu, avakwa hambuluk iniluk erogo mendok okbisaup hudi vaga hwa ako ap sa ogwa arisogon ombasiga?”

²⁹ Yugugu lagagwama, At Yesus en, “Ala wene dirup warek inim, Ala anye inim, hit dibagetek dugwit, wene andi, adik hunogo yugu hinisaliga.

³⁰ Avakwa hambuluk iniluk erogo mendok okbugu dugwit, ap en akwa woginipwis, akwa en ap woginipwis, ogagetek it malaikat mbogot vaga agarwik ovagak dogogup o.

^31-32 Eke, it avakwa hambuluk iniluk erogo mondok okbisagwi ako andi, Ala en iri dugwit, ‘Hat hombawi Averakam inim, Isak inim, Yakup inim Enasin Inis Ombok Ala An aro,’ yiluk, yagagi dirup warek ako, bikhegetek agipik yi? At Ala andi, avakwa hambuluk dek asagwi menda Enasin Ala dek. Ata, avakwa iniluk agarwik menda Enasin Ala aro,” yiluk, yugeragagi.

³³ Yugirigya lagagimu, it avakwa wisane wonggalek welagagwa ako, At mamuleragagi ako enaruk hunggu lagagwarik, “Wi,” yiluk, vok yagagwa.

“Wene adem ombok ako eyave yi,” yiluk yugeragagi wene

³⁴ It ap Varisi menda en Yesus ap Saduki enane sovanggigi enaruk hunggu lagagwarik, homakbaluk,

³⁵ ap it menda ambi Ala wene vagago welagagi menda en Yesus avut mbaligiluk, hemetu dugwit,

³⁶ “Ngguru wai. Ala en, ‘Yerogo ogarup, nderogo ogarup,’ yagagi Musa dirup watigi ako, wene ombok iya erogo agarik andi, ngga haliga?”

³⁷ Yugugu lagagimu, Yesus en, “‘Henendawi inim, heneyave inim, henanggela inim, ovok erogo Henasin Ala adigat henendawi hunik ogagu dogones.’

³⁸ Wene adem ombok iya erogo ako, andiat.

³⁹ Eke, wene aswe ambetaga andi, anderogoat. ‘Hit heneyave henendawi hunik okhedelagwi ako hak, it hinim agipik ogo anderogoat henendawi hunik oginipu dogones.’

⁴⁰ Ala en, ‘Yerogo ogarup, nderogo ogarup,’ yiluk, yagagi dirup warek wene inim, eke, it ap navi Ala en yugirigya hegek yugurugu lagagwa wene inim, wene andi ovok dambup erogo wene mberen yigi andi vaga ut hunik agarik o,” yiluk, yugeragagi.

“Keretus andi, sa ombao?” yugeragagi wene

⁴¹ Yugirigya lagagimu, it ap Varisi ako wonggalek werekma, Yesus en hemerinipu dugwit,

⁴² “Ala en enogo mondok okbagagi Mesias ako, hirenen nggarogo ombasagwi? At sa ombao ombasagwi?” Yugirigya lagagimu, irenen, “Mesias andi, Daut ombao-at ombasagwi o.”

⁴³ Yugugu lagagwama, At Yesus en, “Eke, andi halok, nggarogo yiluk at Daut ako Ala Averiniki endawima des iri lagagimu, Mesias avok iri dugwit, ‘Nasin Inis Ombok o,’ yiluk, yagagi? Andi, aren iri dugwit:

⁴⁴ ‘At Nenasin Inis Ombok Ala en an Nasin Inis Ombok yugugu dugwit, “It hinim ndup ogorek menda ako, An sovalogo havema bigitek neyagek, Ninggis amotkan hora yima,”’ yiluk, yagagi.

⁴⁵ At Daut adik en iri dugwit, ‘An Nasin Inis Ombok,’ yagagi ako halok andi, nggarogo yiluk hiren Mesias andi Daut ombao menda yagalagwi? Anderogo yup meyan,” yiluk, yugeragagi.

⁴⁶ Yugirigya lagagimu, wene onggo ambi nggarogo yubuk erek agya lagagimu, o ndugwis andi hudien At hivis wene ambi inim hemekhaup enalon en mbup yagagwa.