Markus 9 - ALA WENE HIVIS DIRUP WATUGWA

¹ Yugirigya lagagirik, “Dibas! Hit avakwa yoma agipik ako, nin ao hambegetek hinigik At Ala anye iya atma, avakwa At avema bisagiluk warisogon ako hinil hasogom o,” yiluk, yugeragagi.

At Yesus ndom vaga en elose adik agagi wene

² Nogo 6 yikbaluk, At Yesus en it Peterus o, Yakobus Yohanes inim, wogonombolok ndom adup vaga unggu lagagwarik, it enadik andoma werekma, inivaga At elose adik agagi.

³ Elose adik agya lagagirik, asum mudu amumulip digavok ovagak ogagagi. It yum mudu arupwak yiluk, hurisagwi ako hak dek. Mondok mudu amumulip agya lagagimu,

⁴ at Elia o, Musa o, Yesus inim avuk agu lagagwarik, wene mbanggu sogogwa.

⁵ Wene mbanggwis ako inugu lagagwarik, at Peterus en Yesus yugugu dugwit, “Nasin Ngguru wai! Nit yoma agurik yi sek atma, eravo henggam ambi Hat, ambi Musa, ambi Elia valogo bigigasogom,” yugogogi.

⁶ At ako, “Wi,” yiluk, enalon iya agya lagagimu, endawi apik agya dugwit, nggarogo yubuk halok, anderogo yagagi.

⁷ Yugugu lagagimu, hena wambu wagya dugwit, lovarogo bugu lagagirik, hena anggelekma akoma en ane ambi iri dugwit, “An Nabut nendawi hunik yi atma, At ane henaruk des erogo hunggu dogwes o,” yiluk, iri hagagwa.

⁸ Iri lagagimu, inil bigya baga erogo bikhugu lagagwama, iperen ako dek Yesus adigat inil hagagwa.

⁹ Ndom vaga akoma en wambu wagu dugwit, At Yesus en, “An Ap-At Endaklagagis yi, hambuluk lendagwima akoma en ao niluk akluk mendok yegetek neyagek, ogagya hinil neyagep ako, avakwa mondok yugerabuk.”

¹⁰ Yugirigya lagagimu, ogagya hagagwa ako avakwa yugeregetek ovara, enadik dugwit, “‘An hambuluk lendagwima en niluk akluk mendok yisogon o,’ yiluk, yukneraga ako, nggarogo yiluk yagas embetep?” yiluk, wene mbanggu lagagwarik,

¹¹ Yesus yugugu dugwit, “It Ala wene vagago agarwik menda en, ‘Mesias ako ao wagatek hegek, Navi Elia endak warisogon o,’ yagalagwi ako, nggarogo yiluk warisogon yagalagwi?” yiluk, Yesus aigwakma wogogwa.

¹² Aigwakma wugu lagagwama, Yesus en yugirigya dugwit, “navi Elia endak warisogon yagalagwi andi, yi ogagwi ndi ogagwi nggeraligiluk warisogon ovara, An Ap-At Endaklagagis ako neyave anggin-mbanggin ogarogo banunggwi, wiyiknom-weyaknom erogo banunggwi, okbanup dirup warek ako andi, nggarogo yiluk watugwa embetep?”

¹³ Iri lagagirik, “At navi Elia vage wagagi. Ninim hegek, navi-navi o endak dirup watugwa ako ndatak, avakwa en it enendawi umbutu dugwit at weyak okbalin nagu lagagwa, An yukheraliga o,” yugeragagi.

Madis avyak endawima werekma wibagagi wene

¹⁴ Wene anderogoat yugeregek wambu wagusim, At ane welagwi menda nin bisiluk lagagwa ako inim, it Ala wene vagago welagagwa menda inim, avakwa iya erogo homago inigik, winimuk yugu sogogwa.

¹⁵ Inil inugu lagagwama, it avakwa ako, Yesus-at wagya heyakbagu lagagwarik, “Wi,” yiluk enendawi adenggen umbutu dugwit, vupuk At adema “Wa” yugiri lagu lagagwama,

¹⁶ Yesus en “Hit ap yi hinim nano avok yagalagwi?” yiluk, yugeragagi.

¹⁷ Yugirigya lagagimu, avakwa wisane homago welagagwa ako, ap ambien At yugugu dugwit, “Nasin Ngguru wai! An nabut madis endawima nunggwigya lagagirik, anedek okbagagirikmu, Hat hadema wolok wagi o.

¹⁸ Madis endawima dugwit, eyave yagavek-kodek ogagya, elagapma owarilagap ogagya, aik hambunggu, endawi anyedek agya dugwit, eyave habop ogagya, anderogo ogagya halok, Hat hane welagwi menda ako madis nggigilogo wibapwak yiluk, yugirigi ovara, iren wibaup meyan inigis,” yugogogi.

¹⁹ Yugugu lagagimu, At Yesus en, “Avyak! Hit avakwa yogak agipik yi henendawi novaga vanggabaluk, avyarat nembetetek weyak adigat ogarup ombasagwi yi, An hit hinim ndugwis maren dogop, eke An ndugwis maren hit hinim nendawi sagain akluk dogop? Avyak andi, wolok omanes, yiluk, yugeragagi.

²⁰ Yugirigya lagagimu, avyak ako At adema wolok wagu lagagwama, madis at endawima welagagi akoen, Yesus il higya lagagirik, avyak ako inggis isok irup-wadok ogagya dugwit, legogo wen vaga wombabagya lagagirik, ena enden-vanden ogagya dugwit, elagapma owarilagap ogagagi.

²¹ Anderogo ogagyaim, At Yesus en avyak asin ako yugugu dugwit, “Hat habut yi o mera hudi yerogo ogagya lagagi?” yiluk, yugugu lagagimu, asin akoen, “At madukma en, itok arerogo ogasiga.

²² Madis ako ovaga agya dugwit, ndugwis ambi vaga halima mabagya, ndugwis ambi vaga ima wombabagya, ogasigama, Hat yi ogagek ndi ogagek ogasiga menda halok, nenabwa imbita dugwit, okbininin o.”

²³ Yugugu lagagimu, At Yesus en, “Hat nggarogo yiluk ‘Hat yi ogagek ndi ogagek ogasiga menda halok,’ yuknigin? Avyarat ombasagwi vaga yi menda ndi menda hogop ombasagwi ako andi atma asiga,” yugogogi.

²⁴ Yugugu lagagimu, avyak asin akoen ane ombok vaga yugugu dugwit, “Avyarat ombasiga ovara, nendawi ambi inim avyarat ombarigiluk okbanin o,” yiluk, yugogogi.

²⁵ Yugugu lagagimu, andena en avakwa wisane vupuk wagwi ako il inugu lagagirik, Yesus en madis ako mbet yugugu dugwit, “Madis enaruk nggulup enanedek oginivisiga menda yi wilitak! Okbaluk, hivis heyami vaga nunggu warubuk mondok wilitalo!”

²⁶ yiluk, mbet yugugu lagagimu, madis ako na iri lagagirik, avyak ako inggis isok irup-wadok ogagya lagagirik, winggigi. Wunggu hegek, avyak ako nggorak ovagak werekma, it avakwa wisane akoma en yugu dugwit “Wi! Avyak yi ako hombagas,” yagagwa ovara,

²⁷ At Yesus en inggis vagago mondok okbagya lagagimu, avyak ako mondok yagagi.

²⁸ Mondok iri lagagimu, At Yesus umwa nonggagagirik werekma, At ane welagwi menda wagu lagagwarik, enadik dugwit, “Nit nggarogo yiluk madis nggigilogo wibaup meyan welagyo, embeten?”

²⁹ Yugugu lagagwama, At Yesus en yugirigya dugwit, “Madis anderogo menda andi nano vaga wibaup erek ovara, samban ogagu dugwit halok, ndak wibaup,” yugeragagi.

Yesus ambi inim “Narusogom o,” yugeragagi wene

^30-31 O andoma en hekbaluk, sup Galileanggan nonggagagwa. Nunggugu lagagwarik, At ane welagwi menda ako mamulirigya dugwit, “An Ap-At Endaklagagis yi, it avakwa en narupwak yiluk, An neyave vagago wogirigya halok, natu dogomima, ndugwis mberen dukluk, ndugwis ambi vaga niluk arisogon o,” yiluk, wene andi yugerapim atma, At Galilea nonggagagi ako avakwa inilup arup anggon imbitigi.

³² Yugeragagi ako it dibagetek dugwit At aigwakma waup enalon en mbup yagagwa.

“Ap ombok dogop andi sa,” yagagwa wene

³³ O andoma en o Kapernaum lagagwa. Lagu lagagwarik, umwa dugwit, At Yesus en it yugirigya dugwit, “Hit suvaga wagu dugwit, nano wene yagan wagu hinigis?” yugirigya lagagimu,

³⁴ it suvaga wagu dugwit, “An iya, hat iya?” wene alelo warit wagagwarikmu, enanedek mbup yagagwa.

³⁵ Mbup yugu lagagwama, At ako hora yiluk, At eyaganggom 12 menda ako yanggup yugeragagi. Wagu lagagwama, yugirigya dugwit, “Ap ambi saen ‘An nendak ap ombok dogosogon o,’ imbita halok, avakwa ovok enavema dugwit, enayeloman-at dogop.”

³⁶ Yugirigya lagagirik, avyak ambi wolok it enanggelekma bawagya lagagirik, elola okbaluk, it yugirigya dugwit,

³⁷ “Hit saen at avyak yi hak, An ninis vaga wugu hiniselok, Anat woknerelagwi. An nadik woknerelagwi dek ovara, An lakbani wagagi ako inimat welagwi o,” yiluk, yugeragagi.

Ap ambi Yesus inis vaga madis wibagagi wene

³⁸ Yugirigya lagagimu, at Yohanes en iri dugwit, “Nasin Ngguru wai. Ap ambi nit ninim nagu lagatek ovara, aren Hat hinis vaga madis nggigilogo wibagya ninil hugu lagurik, ‘Moga,’ yugugup,” yugogogi.

³⁹ Yugugu lagagimu, At Yesus en, “‘Moga,’ yugurubuk. At saen An ninis vaga nggarogo ogarubuk menda ogagya halok, andi okbaluk, An wiyiknom-weyaknom ogarogo banup meyan.

⁴⁰ It ninim ogorekdek halok andi, nit menda aro.

⁴¹ It avakwa en, hit Keretus aburi-at yiluk, is nudik wokhiruguselok, Ala en onggo wogerayogon menda andi, hedasogombuk andi dek. Hedasogom-at, An avyarat yukheraliga o,” yiluk, yugeragagi.

Weyak wene enendawima asiga wene

⁴² Yugirigya lagagirik, “It avakwa saen avyak mariduk ambi endawi novaga vanggabaluk avyarat nombasagwi menda yi, weyak ogarupwak yiluk, enendawi nomalinivisagwi vaga it avyak ako weyak ogaguselok, helep ombok gandum yanggalisagwi menda vaga ap andi avup heda yidibaluk, inamut agurukmu wombabiselapmu en, andi sek aro.”

⁴³ “Hininggis vaga en weyak ogarup okhinipu halok, venak mbalogo lakbas. Hininggis mberen hegek, hali wuluk-herek adigat yagaligama nagaup yagaligadekma akoma nunggup andi weyak. Ata, mbalogo lakbaluk, venak mbalek hegek mondok iniluk oginivisigama andoma nunggup andi sek o.

⁴⁴ O hali wuluk-herek adigat yagaligama akoma, ‘Nggorenggen logovik-logovek adigat yagaligama, hali nagaup yagaligadekma,’ lakbisaup meyan o.”

⁴⁵ “Hinisok vaga en weyak ogarup okhinipu halok, venak mbalogo lakbas. Hinisok mberen hegek, hali wuluk-herek adigat yagaligama akoma mbo lakbigigaup andi weyak. Ata, mbalogo lakbaluk, venak mbalek sidakduk yagan mondok iniluk oginivisigama akoma nunggup andi sek.

⁴⁶ O hali wuluk-herek adigat yagaligama akoma, ‘Nggorenggen logovik-logovek adigat yagaligama, hali nagaup yagaligadekma,’ lakbisaup meyan o.”

⁴⁷ “Hinil vaga en weyak ogarup okhinipu halok, venak hulirogo bas. Hinil mberen hegek, hali wuluk-herek adigat yagaligama mbo lakbigigaup andi weyak. Ata, hinil ambi hurilogo baluk, venak vaga adigat Ala avema nunggup andi sek.

⁴⁸ O hali wuluk-herek adigat yagaligama akoma, ‘Nggorenggen logovik-logovek adigat yagaligama, hali nagaup yagaligadekma,’ lakbisaup meyan o.”

⁴⁹ “Ikan vidis arugwi en yiluk, garam ilivuli erogo belagwi ako hak, anderogo At Ala en hali vaga wal okhinisayogon o.

⁵⁰ Garam sek ovara, aitek agya halok, edup andi nggarogonggan en edup werek ogarup? Garam edup werek henendawima dugwit, hinim henendawi dambulik-at dogwes o,” yiluk, yugeragagi.