Markus 8 - ALA WENE HIVIS DIRUP WATUGWA

Yesus en ap eneyave 4.000 erom wogeragagi wene

¹ Andi ogarit naguma, avakwa wisane At adema homari wagagwa. Homari wagagwa ako, enagarom naup dek atma, At ane welagwi menda ako yanggup yugeragagi. Yanggup yugirigya lagagimu, wagu lagagwama, it ako yugirigya dugwit,

² “It avakwa wisane yi, ninim nogo henggam yugu dugwit, enagarom ovok dek agarikmu, enabwa o.

³ It nin enawi adumu en wagarwikmu, enamwa lakbugu neyalok, lagu dugwit, erom uvup en inivuput basogom ombasiga.”

⁴ Yugirigya lagagimu, At ane welagwi menda akoen, “O harumu yoma avakwa enawi valek ambi mondok dek atma, enagarom ndatak napwak yiluk, erom nggoma belali lamwi?”

⁵ Yugugu lagagwama At Yesus en iri dugwit, “Hit erom roti werago maren vagago agipik?” Yugirigya lagagimu, “Nit nininggimu erom roti 7 adigat vagago agurik,” yugogogwa.

⁶ Yugugu lagagwama, At Yesus akoen avakwa wisane homago ako wema hora yupwak yiluk, yugirigya lagagirik, erom roti 7 inggimu dugwit, “Ala Nasin wa,” yiluk, erom ugurogo avakwa menagerapwak yiluk, At ane welagwi menda ako wogirigya lagagimu, menageragagwa.

⁷ Menagurugu dugwit, ikan mariduk mberenat werekma, “Ala Nasin wa,” yiluk, samban ogagya lagagirik, “Ikan yi inim menageranes,” yiluk, wogeragagi.

⁸ Menageragagwa ako nunggu lagagwarik, enagaum agya lagagimu, roti inim, ikan inim, nin higitlagagi ako andi, mburiyum 7-at elagapaga erogo yedogo bagagwa.

⁹ It erom nunggugwa ako ap eneyave 4.000 hudi nunggugwarikmu, enamwa lakbugu lagagarik,

¹⁰ Yesus At ane welagwi menda ako inim, mburis vaga nunggugu lagagwarik, o Dalamanuta lagagwa.

It Varisi menda en “Ninilup arup menda ogagya heyasogom o,” yugogogwa wene

¹¹ O Dalamanuta lagu lagagwama, it Varisi menda Yesus adema wagu lagagwarik, inim wene yugu dugwit, “Ninilup arup mbogot vaga menda ambi ogagya heyasogom o,” yiluk, At ogagya avut mbaluguluk yugogogwa.

¹² Yugugu lagagwama, At Yesus en, “Ai,” yiluk, yugirigya dugwit, “Hit avakwa yi, nggarogo yiluk, ninilup arup mbogot vaga menda ambi ogagya heyasogom adigat yuknisagwi? Hinilup arup menda ambi ogagya neyasogom mondok dek o, An avyarat yukheraliga.”

¹³ Yugirigya lagagirik, it ako hekbisiluk, mburis vaga nunggwigya lagagirik, is ambo elavikit lagagwa.

Ragi roti virisiga menda avok wene

¹⁴ It mburis vaga lagu dugwit, Yesus ane welagwi menda ako erom roti inunggut akluk, ambiat wolok lagu lagagwama,

¹⁵ Yesus en yugirigya dugwit, “Avyak wai. It ap Varisi menda inim, at Herodes inim, enane andi, ragi roti virisiga menda ako hak atma, henendawima nunggwigya haoen, henova hwalogo dogop,” yiluk, enaruk watigi.

¹⁶ Enaruk watya dugwit yugeragagi ako, it ako ambi yugigik ambi yugigik ogagu dugwit, “Nenagarom dek halok, yagas ai,”

¹⁷ it yugwi ako Yesus inugu lagagirik, “Hit nggarogo yiluk erom roti dek andi yagalagwi? An yukhirigi ako ao dibagetek hinunggut dugwit, yagalagwi? Hit henendawi obak ugun dugwit, yagalagwi?

^18-19 Hit hinil werek ovara, hegetek dugwit, yagalagwi? Henaruk werek ovara, henaruk hunggitek dugwit, yagalagwi? Erom roti 5 vaga avakwa 5.000 homago ako ugurogo wogeragagis ako, henendawi moma akluk, yagalagwi? Erom roti ugurik higitlagagi ako, wonggalogo mburiyum maren hudi yedogo bagagup? Yugirigya lagagimu, it ako, “Dek o. Mburiyum 12 hudi yedogo bagagup.”

²⁰ Yugu lagagwama, “Hivis andi, it avakwa 4.000 homago ako roti 7 ugurogo wokhirigya lagagimu, ugurik higitlaga ako, hiren mburiyum maren hudi yedogo bagep? Yugirigya lagagimu, it akoen, “Mburiyum 7-at bagyo.”

²¹ Yugugu lagagwama, Aren yugirigya dugwit, “Yogak ogo hit henendawi An ao dibanenggetek agipik?” yiluk, yugeragagi.

Yesus en ap il mbuk sek ogagagi wene

²² Hivis, andi okbaluk, it ako o Mbesaida andoma wagagwa. Wagu lagagwama, it avakwa andoma en ap il mbuk werekma At adema wolok wagu lagagwarik, At Yesus en at eyave inggis vagarupwak yiluk, enabwa edok erogo Yesus yugogogwa.

²³ Yugugu lagagwama, At Yesus o andoma en inggis vagakluk wolok, werama winggigi. Wunggu lagagirik, Yesus en waris ap il vaga suvutbagya, eyave inggis vakbagya, okbagya lagagirik, “Yogak yi menda ndi menda vage hil haliga a dek a?” yiluk,

²⁴ yugugu lagagimu, at il venggenlagya dugwit, “Avakwa inisaliga ovara, yo ovagak nagu siliga o,” yiluk, yagagi.

²⁵ Iri lagagimu, At inggis il vaga lombabagya lagagimu, ap ako il yokhigya dugwit, avyarat il venggenligya lagagirik, yi menda ndi menda ovok erogo sigamat hagagi.

²⁶ Il sek okbagya lagagirik, “Henamwa andoma nunggubuk, hamwa elak,” yiluk, yugogogi.

Peterus en “Hat Keretus aro,” vagalogo yugogogi wene

²⁷ Yesus At ane welagwi menda inim o andoma en o Kaisarea Pilipi yi awi ndi awi andoma nagu lagagwa. Suvaga lagu dugwit, Aren “It avakwa yi An sa numbutu dugwit, yagalagwi?” yiluk, At ane welagwi menda ako yugirigya lagagimu,

²⁸ irenen yugugu dugwit, “It ninen, ‘Hat Yohanes avakwa ima wombabugu lagagi akoat,’ yugwi, eke it ninen, ‘Hat Elia aro,’ yugwi, eke, it ninen, ‘Ap ambi Ala yugirigya hegek yugurugu lagagwa menda navi-navi ako menda ai,’ yugwi, yagalagwi o,” yugogogwa.

²⁹ Yugugu lagagwama, Aren it yugirigya dugwit, “Eke, hit andi, An sa numbutu dugwit, yagalagwi?” Yugirigya lagagimu, at Peterus en, “Dek. Ala en avakwa enagap wendarupwak yiluk enogo lakba wagagi Keretus ako andi, Harat,” yiluk, yugogogi.

³⁰ Yugugu lagagimu, “An navok andi avakwa enadema mondok yugerabuk!” yiluk, enaruk watigi.

Yesus en “An narusogom o,” yugeragagi wene

³¹ Enaruk watya lagagirik, wene ambi yugirigya dugwit, “An Ap-At Endaklagagis ako, mondok nova anggin-mbanggin erogo banusogom. It ap ombok-ombok inim, it imam-imam enasini inim, it Ala wene vagago agarwik menda inim, An it enanggon numbutu dugwit natu dogomwima, hambigya dogomindik ndugwis mberen dukluk ndugwis ambi vaga niluk arisogon o,” yiluk,

³² wene sigam erogo yugeragagi. Sigam erogo yugirigya lagagimu, at Peterus en Yesus inggis lirogo wolok lagya lagagirik, yugugu dugwit “Anderogo yubuk,” anggadi warigiluk ogagyaim,

³³ At Yesus en At ane welagwi menda ako il ambukmu dagalogo yoginugu lagagirik, Peterus mbet yugugu dugwit, “Hat Sile yi, Ala endawi ombasiga ako ndatak ombasigadek, ovara, avakwa enendawi ombasagwi ndatak ombasiga atma, mondok-mondok wilin,” yiluk, mbet yugogogi.

³⁴ Mbet yugugu lagagimu, it avakwa homago ako inim, At ane welagwi menda ako inim, eneyanggup yugeragagi, wagu lagagwama yugirigya dugwit, “Hit An ninim nagu dogop umbutu dugwit halok, yi menda ndi menda ogarup ombasagwi ako hekbisiluk, yo winik vaga lobalogo bigigaup ako hedelok, An ninim nagu dogosogom.

³⁵ Heneyave idi okhedasogom halok, heneyave yelemele-at yusogom. An ninis inim Sek Wene inim, ombok arupwak yiluk, heneyave hinididek okhedamwi halok, hinidi ogarek-at dogosogom.

³⁶ Hit yi awi ndi awi ovok erogo andok okhidugu dogomundik, heneyave yelemele yusogom halok, nggayoklarup embetep?

³⁷ Heneyave yelemele yusogom halok, avoloma nano betaup ombasagwi?

³⁸ It avakwa ovok erogo Ala mbobaluk, weyak adigat ogarit lendagwi ako enanggelekma dugwit, ap ambi saen An ninis inim, An nane inim, alon en yegetek dogosogon halok, An Ap-At Endaklagagis yi An Nasin mondok abinak werek iris ovagangge yikhedelok it Ala ake enek menda malaikat inim wagu dugwit, An ap ako inis yisogonbuk o,” yiluk, yugeragagi.