Markus 6 - ALA WENE HIVIS DIRUP WATUGWA

It ap Nasaret menda en “Yesus nenanggon” umbutugwa wene

¹ O andoma en Yesus At ane welagwi menda inim, awi adem vaga lagagwa.

² Lagu lagagwarik, samban vaga it ap Yakuri menda samban ogasagwima, nunggwigya lagagirik, wene mamuleragagi. Wene ao mamulirigya hegek, it At ane enaruk hunggugwa akoen, “Ap yi wene nggoma en wigya lagarik yagaliga? Ap endawi werek en yagaliga hak yi, nano wene wigya lagarik yagaliga? Nggarogo ogarubuk menda ogasiga ako, nano vaga ogasiga ombasagwi? Wi,” yiluk, vok yagagwa.

³ Vok yugu lagagwarik, “At hwa Maria eyak o valisiga menda yi, aori Yakobus inim, Yoses inim, Yudas inim, Simon inim, At aori hwavyak inim, ovok erogo ninim agurik akora?” yiluk, At Yesus enanggon umbutugwa.

⁴ Enanggon umbutu lagagwama, At Yesus en, “It ap navi-navi Ala wene yugerelagwi menda andi yi awi ndi awi en siyabiselagwi ovara, it enawi adem vaga menda inim, enowa-enaot inim, avuk agarwik menda en enagayuk wurogo enane welagwidek o,” yugeragagi.

⁵ Yugirigya lagagirik, nggarogo ogarubuk menda andoma en ogarup meyan halok, un ambitap-at, aup idumu, inggis inunggul vakbisiluk, sek okbogogi ovara,

⁶ it enendawi At avyarat embetetek iniselok, Yesus “Wi,” imbitigi. Andi okbaluk, Yesus yi awi ndi awi yanonggegek-ndanonggegek wene mamuleregek nagu lagagi.

Yesus At ane welagwi menda lakbogogi wene

⁷ Nagu lagagirik, aori 12 menda ako warupwak yiluk, eneyanggup yugeragagi. Wagu lagagwama, madis agoda werek menda nggigilogo wibigik nagu dogopwak yiluk, At awene yugirigya lagagirik, mberen hondok lakbogogi.

⁸ Lakbugu dugwit, “Erom inim, yerek-terek wokhiruguselok yekhedaup menda yum inim, yoparip inim, wolok labuk. Un hit henowanggun adigat hedelok elales.

⁹ Henaropato yikhedaup, andi sek ovara, henasum pakian yikhedamunda mberen inim hedabuk,” yiluk, enaruk watigi.

¹⁰ Enaruk watya lagagirik, ambi yugirigya dugwit, “O ambima lamundikmu, wokhinipuselok, hinim andoma dogomundik, elalo.

¹¹ O ambima en hit wokhinapitek halok, hinane inim enaruk hulup enanggon iniselok, inivaga inilamundinek hinisok mupwak hak horogo baluk, andoma en wilitalo,” yiluk, lakbogogi.

¹² Lakbugu lagagimu, lagu lagagwarik, “Hit weyak ogasagwi ako, henasam helok, hekbas,” yiluk, yugeregek nagu lagagwa.

¹³ Nagu dugwit, yi madis ndi madis wisane nggigilogo wibugwis, aup edup enovaga amburup minyak saitun ndibisiluk sek oginipwis, oginivit nagu lagagwa.

Yohanes avup mbanggugwa wene

¹⁴ Oginivit nagu lagagwa ako vaga, At Yesus inis yi awi ndi awi inaruk hunggugwarikmu, ap inis ombok Herodes ako inim aruk hunggigi. Inaruk hobagu lagagwarik, it ninen, “At Yohanes ima wombabugu lagagi ako hambisagwima en iluk akluk, mendok yagas ako vaga, nggarogo ogarubuk menda ogarit lagya higyo,” yiluk, yagagwa.

¹⁵ It ninen, “Dek o. Ap navi endak welagagi Elia ako sigam aga ai?” yugwi, eke it ninen “It endak Ala en yugirigya hegek yugurugu lagagwa navi-navi ako hak, yogak yagaliga o,” yugwi, yugu lagagwa.

¹⁶ Yugwi ako, at Herodes aruk hobagya lagagirik, “Avyak. Yohanes avup mbanggigis ako, iluk akluk, mendok yagas higi!” yiluk, yagagi.

^17-18 Andi, hwa Herodiana at Herodes aot Pilipus ogwa hegek, at Herodes en hedagagirikmu, at Yohanes en Herodes yugugu dugwit, “Hat haot ogwa hegek, wigindikmu hinim dogop moga o,” yiluk, enanggadi wakbigik adigat iri halok, at Herodes en hwa ako endawi sek arupwak yiluk, Yohanes heda marupwak yiluk, ap enayegen werek lakbugu lagagimu, lagu lagagwarik, heda makbaluk, lembaga mabagagwa.

^19-20 Mabagu lagagwama, at Yohanes yagagi ako vaga at hwa Herodiana ako endawi aninis wisane agagi. Endawi aninis wisane agya dugwit “Yohanes wakbaup,” imbita hegek ap Herodes akoen “Yohanes ako weyak ogagetek, endawi sek atma warup dek,” imbitigi. At Yohanes en wene yugugu hegek, ap Herodes aruk hunggu dugwit endawi anggin ovara, hulup endawi sek imbita dugwit, “Watya haoen,” yiluk, Yohanes hwilakbagagi. Hwilakbagya lagagimu, wakbaup ako dek agagi.

²¹ Warup dek agagi ovara, at Herodes endaklagagi amor ari wagagirikmu, at aori, kepala-kepala mondok okbogogi inim, it enayegen werek inim, it ap Galilea menda enasini ap ombok-ombok inim, adenggen isogo isagusim, hwa Herodias akoen, “Ee! Yogak andi nanonggal homagaoma,” imbitigi.

²² Imbita lagagimu, at Herodiana eyak ako nunggwigya lagagirik, velen-velen ndawi watya halok, at Herodes aswei enayonggo lakbogogi wagagwa ako inim, “Hwa yi yagaliga a, wi,” yiluk, vok yugu lagagwama, at Herodes en hwavyak ako yugugu dugwit, “Hat nano menda nggino yuknugu heyalok, an wokhirisogon o.”

²³ Yugugu lagagirik, “Hat an nano wokhirup embeten? O yoma an nandok agirik atma, ‘Hudi mbalogo banin,’ yuknugu heyalok, anen venak higirogo bagasogon o,” yiluk, ombao inis hanum mbalogo yugogogi.

²⁴ Iri lagagimu, wunggu lagagirik, hwavyak ako isa hemethigya dugwit, “An nano menda nggino yugirik?” yugugu lagagimu, isa akoen “At Yohanes ima wombabisaliga menda unggul mbalhirupwak yiluk yugirilak,” yugogogi.

²⁵ Yugugu lagagimu, at hwavyak ako vupuk lagya lagagirik ap ombok adema, “Yogak Yohanes ima wombabisaliga menda unggul mbalogo walup vaga mbo erogo woknirimano,” yiluk, yugogogi.

²⁶ Yugugu lagagimu, ap ombok Herodes ako Yohanes abwa en endawi weyak agagi ovara, it isogo isagusim wagagwa ako inivaga At ombao inis hanum mbanggigirikmu, hekbaup anggon embetetek,

²⁷ ap ayegen werek ambi Yohanes unggul mbalogo wolok warupwak yiluk, lakbagya lagagimu, lagya lagagirik, lembaga nunggwigya lagagirik, adonggop mbalogo

²⁸ unggul walup vaga mbo erogo wolok wagagi. Wolok wagya lagagirik, hwavyak ako wogugu lagagimu, isa wogogogi.

²⁹ Andi en at Yohanes ane welagwi menda akoen, Yohanes unggul mbanggugwa inaruk hobaluk lagu lagagwarik, eyave wolok wimu balagagwa.

At Yesus en ap eneyave 5.000 erom wogeragagi wene

³⁰ At Yesus lakbogogi ako eneyami vaga At adema wagu lagagwarik, it ogarit nagu lagagwa wene inim, mamuleregek nagu lagagwa wene inim, wene mbilinogo yugiri wagagwa.

³¹ Mbilinogo yugiri wagu lagagwama, avakwa wisane erogo At adema lagwi-wagwi ogagusim, erom naup ogo meyan agya lagagimu, At Yesus akoen, “Sat yanggal hedaguluk, nenadikmu avakwa dekma lasogom en omanes,”

³² yugirigya lagagimu, it ako mburis vaga nunggugu lagagwarik, enadik avakwa dekma andoma lagagwa.

³³ Yesus aswemuni inim lagwi ako avakwa wisane yedok inugu lagagwarik, o yi awi ndi awi en it sup wen vaga vupuk enendak enabyam ari lagagwa.

³⁴ At Yesus ako mburis vaga en is embetma wulu wagya dugwit, avakwa wisane homago ako il inugu lagagirik, “It avakwa wam ndomba enasin eyave dek ovagak atma, enabwa o,” imbita dugwit, yi wene ndi wene mamulirigya lagagi.

³⁵ Wene mamulirigya hegek, o vage hup agya lagagimu, At ane welagwi menda ako At adema wagu lagagwarik, “O valek yoma ambi mondok dek, eke, mo ogo vage huruk yagaliga atma,

³⁶ it avakwa yi, o ombokma inim, o madukma inim, andoma enagarom onggo hunogombo nenggek lapwak yiluk, lakbisin,” yugogogwa.

³⁷ Yugugu lagagwama, At Yesus en, “Enagarom napwak yiluk, hirenat wogeranes,” yugirigya lagagimu, iren, “Nit erom hunogo wogeraup andi onggo ombok yoparip 200 denari baup embeten?”

³⁸ Yugugu lagagwama, At Yesus en, “Hit henagarom maren agarik? Yokhanes.” Yugirigya lagagimu, yokhugu lagagwarik, “Erom roti un 5, eke ikan mberenat agarik,” yugogogwa.

³⁹ Yugugu lagagwama, At Yesus en it yugirigya dugwit, “Ap inaori adik-adik mbeyambup vaga andena hora yi elales,” yiluk, yugeragagi.

⁴⁰ Yugirigya lagagimu, it ap homago ako, nin 100 ambima hora yugwi, nin 50 ambima hora yugwi, ogarit lagagwa.

⁴¹ Hora yi lagu lagagwama, At Yesus akoen erom roti 5, ikan mberen inim, wigya lagagirik, il mbogot vaga iligik dugwit, “Ala Nasin wa!” yiluk, samban ogagagi. Samban ogagya lagagirik, erom roti ugurogo avakwa ako menagerapwak yiluk, At ane welagwi menda wogeragagi. Wogirigya lagagirik, ikan 2 wogogo it ovok erogo napwak yiluk, menageragagi.

⁴² Menagirigya lagagimu, it ako ovok nunggu lagagwarik, enagaum agagi.

⁴³ Enagaum agya lagagimu, erom inim, ikan inim, nin higirogo bagagwa ako, mburiyum 12 hudi yedogo mbin erogo bagagwa.

⁴⁴ It ap erom roti nunggugwa ako, ap adigat eneyave dambulik andi 5.000 nunggugwa.

At Yesus is iri vaga lagagi wene

⁴⁵ Erom roti nunggu lagagwarik, At Yesus en At ane welagwi menda ako yugirigya dugwit, “Mburis vaga nunggugu dogomundik, o Mbesaida henendak lagu dogwes,” yiluk, yugirigya lagagirik, lagusigik, avakwa ako enamwa lakbigigi.

⁴⁶ Avakwa ako lakbugu lagagirik, hulikmu andoma samban ogari inggigi.

⁴⁷ Akoma samban ogagya lagagirik, o hup agagirikmu, mburis ako inamutmu ilim ari wagya lagagimu, At Yesus ako wambu wagya lagagirik, adik is omban vaga welagagi.

⁴⁸ Is omban vaga andoma dugwit, o havut elavokot en wagya dugwit, mburis ndilinggugwa ovara meyan at agagi, Yesus en il inogogi. Hup o yanggo yigiluk ogagya hegek, At Yesus inamut yanggadek iri vaga isok yabagek-ndabagek enadema lagagi. Lagya lagagirik, it mburis vaga inigik mbikit lagiluk ogagya lagagimu,

⁴⁹ iren is iri vaga isok bagek lagya inil hugu lagagwarik, enendawima en “Yi At anggela ai!” umbutu lagagwarik, na yagagwa.

⁵⁰ It ovok erogo At wagya inil hugu lagagwarik, enowak wuruk iri lagagimu, Aren, “Henanggela wulubuk. An neyave-at wandiga atma, henalon habuk,” yugeragagi.

⁵¹ Yugirigya lagagirik, mburis vaga enadema wagya lagagimu, o havut ako anye dek agagi. O havut ako dek agya lagagimu, “Wi,” yiluk, enalon iya erogo hugu lagagwarik, vok yagagwa.

⁵² It vok yagagwa andi, At erom roti menageragagi ako adem dibagetek dugwit enendawi obak ugun welagagwa.

Yesus en o Nggenesaret aup warek sek oginipigi wene

⁵³ Is elavokot o Nggenesaret wunggu lagagwarik, mburis is omban vaga andenam heda yidilogo baluk,

⁵⁴ weram wunggu lagagwama, it avakwa akoma en At Yesus wagya ako mbikit yedok hagagwa.

⁵⁵ Yedok hugu lagagwarik, yi awi ndi awi andoma yonggo vupuk lagu lagagwarik, “Yesus nggenam agarik, yugu samwi?” yiluk, it aup warek ako yo vaga enagone ndabaluk Yesus adema wogonombolok lagu lagagwa.

⁵⁶ O madukma inim, o ombokma inim, o adik-adik andoma inim, nagu haoen, it aup warek ako pasar vaga bisa wagu lagagwa. Bisa wagu lagagwarik, un Yesus ayum atok ininggis vagarupwak yiluk, nggino yugugu lagagwama, vakhuguselok, Aren ovok sek oginipu lagagi.