Markus 16 - ALA WENE HIVIS DIRUP WATUGWA

Yesus iluk agya lagagirik, mendok yagagi wene

¹ It Yakuri samban okbaluk, o hup agya lagagimu, hwa Maria awi Makdalena menda ako inim, Maria Yakobus isa ako inim, hwa Salome inim, it akoen yoangga-hedangga amburup amben sek menda Yesus eyave eralogo bamunda onggo huni lagagwa.

² Onggo huni lagu lagagwarik, nogo yiluk, hari minggu vaga hutun erogo mo il henogo daga wagya helan, wimu akoma lagagwa.

³ Ir-it enane yagan lagu dugwit, “Saen helep larik ako hurogo bininayogon embetep?” yiluk,

⁴ inil yokhugu lagagwarik, helep ombok sup larik ako sigilogo lagagi inil hagagwa.

⁵ Hugu lagagwarik, wimu akoma nunggugu dugwit, ininggis amot vikit apsawe ambi yum mudu yirik horaik werekma, inil hugu lagagwarik, enanggela wunggu dugwit, “Ap yi sava agarik?” umbutusim,

⁶ at akoen “Hit henanggela wulubuk. Hit Yesus awi Nasaret menda yo vaga lobalogo bagao ako hinil yokhaguluk wagep ovara, eyave yoma dek. At vage iluk akluk mendok yagas. Henowa eyave nggik okbagarwikmu avela hinil havovok yiluk, omanes.

⁷ ‘An endak Galilea andoma lamindikmu neyalasogom,’ yiluk, wene yukheragagi ako ndatak-at ogagarikmu, At ane welagwi menda nin inim, Peterus inim, yugerelales,” yugeragagi.

⁸ Yugirigya lagagimu, “Wi,” yiluk, enowak wuruk-wuruk yagan wimu en lagu lagagwarik, hoda wunggu dugwit, enalon en avakwa ambi yugeregetek, mbauk enanedek lagagwa. [

Yesus sigam agagi wene

⁹ Hari minggu o hutun hup en At Yesus ako iluk akluk mendok iri lagagirik, at hwa Maria awi Makdalena menda madis 7 endawima welagagi wibagagi ako, Yesus eyave il neyapwak yiluk, sigam agya lagagimu,

¹⁰ At Yesus aswei inim, arupwi inim welagagwa ako, yup yagwi, de wene yugwi, ogagusim, at hwa ako yonggo yugeralagagi.

¹¹ Yesus iluk akluk, mendok yagas il higya lagagirik, yugeralagagi ako enaruk hunggugwa ovara, enendawi avyarat embetetek welagagwa.

¹² Anderogo ogagu lagagwarik, werekma, Yesus aswei menda mberen o umwa en wunggu lagagwarik, suvaga lagusim, At Yesus eyave adik hunogo heda okbaluk, sigam agya lagagimu,

¹³ eneyami vaga wagu lagagwarik, enaswei nin yugera wagagwa ovara, it ako ogo avyarat embetetek adigat welagagwa.

¹⁴ Andi okbaluk, hivis At ane welagwi menda eneyave 11 ako erom nunggusim, neyapwak yiluk, enadema sigam ari wagagi. Sigam ari wagya lagagirik, avyarat embetetek enendawi lakot atma, At iluk akluk mendok yagagi inil helok yugera wagagwa ako, enendawi avyarat embetetek iniselok, enanggadi watigi.

¹⁵ Enanggadi watya lagagirik, it ako yugirigya dugwit, “Hit yi awi ndi awi lagu dogomundik, it yi avakwa ndi avakwa ininis unggul adik-adik ovok erogo Sek Wene yugeregek nagu dogop.

¹⁶ Sek wene yugeregek lamwi ako vaga enendawima en avyarat umbutu dogomundik, ima wombabuguselok, enagap wendarisogon. Eke, wene andi enendawima avyarat embetetek iniselok andi, Ala en enowak dibaluk anggin enovaga bisayogon.

¹⁷ An nane enendawima avyarat umbutuselok, it nggarogo ogarubuk menda yerogo ogarusogom: it madis enendawima nonggagagi ako An ninis vaga nggigilogo wibugwis, it enane adik-adik inunggut menda yugurugwi,

¹⁸ mbas huli ininggis vagatwis, heda nalis amburup nungguselok, hambegetek inugwis, aup edup iniselok, enovaga ininggis vakbisiluk, sek okbugwis, ogarit lagu dogosogom o,” yiluk, yugeragagi.

Yesus mbogot vaga wolok inggigi wene

¹⁹ Yugirigya lagagimu, Nenowa Inis Ombok Yesus ako, At Ala en wolok mbogot vaga ba inggya lagagimu, At inggis amotkan hora yagagi.

²⁰ Ba inggya lagagimu, it Yesus ane welagwi menda ako yi awi ndi awi Sek Wene yugeregek nagusim, nggarogo ogarubuk menda ogarit nagwis vaga, it avakwa ovok erogo, “Wene yi avyarat o,” ombarupwak yiluk, Nenowa Inis Ombok yonggar-inipu hegek, ogarit nagu lagagwa.]