Markus 15 - ALA WENE HIVIS DIRUP WATUGWA

Yesus ako Pilatus adema wolok lagagwa wene

¹ Hutun erogo it imam-imam enasini inim, it ap ombok-ombok inim, it Ala wene vagago welagagwa menda inim, it wene amburup mbalisagwi menda ovok erogo inim homagu lagagwarik, wene mbanggugwa. Wene mbanggu lagagwarik, At Yesus ako heda makluk, wolok at Gubernur Pilatus adema balagu lagagwama,

² at Pilatus akoen, “It Yakuri enasin hinis ombok Harat ai?” yugugu lagagimu, Yesus en, “Hat yegen andiat,” yugogogi.

³ Yugugu lagagimu, it imam-imam enasini en yi wene ndi wene ovaga bagagwa.

⁴ Ovaga bagu lagagwama, at Pilatus akoen “Hil okhanen. Yi wene ndi wene hovaga bagalyagwi yi, wene onggo yugeraup andi hanggon a?” yiluk, yugogogi.

⁵ Yugogogi ovara, At Yesus anedek mbup iri lagagimu, at Pilatus ako, “Wi, nalon yi,” vok yagagi.

“Yesus mondok warusogom o,” yagagwa wene

⁶ Eke, it ap Yakuri isogo Vasika isagu dugwit adigat, “Ap heda mago ambi andi visilogo woknerano,” yuguselok, at Pilatus akoen visilogo wogeregek ogagya lagagirikmu,

⁷ akoma dugwit, it nin, “Pemerintah enane hulup nenanggon,” yiluk, ndup ogagu dugwit, ap watu lagagwama, heda magago lembaga mabogogwa ako, ambi inis Barabas inim welagagi.

⁸ Ap Barabas heda mago werekma, ap ombok homago Pilatus adema homari wagu lagagwarik, isogo ombok isagu dugwit, “Ap heda visilogo wokneraliga ako hak, yogak ambi visilogo wokneran.”

⁹ Yugugu lagagwama, at Pilatus en, “Hit Yakuri henowa inis ombok ako visilogo wokheraup umbutu dugwit yagalagwi yi?” yiluk, yugeragagi.

¹⁰ Yugeragagi ako, it ap imam-imam enasini en Yesus enanggon umbutu dugwit wolok wagwi yedok inugu lagagirik, anderogoat yugeragagi ovara,

¹¹ it imam-imam enasini akoen “Yesus avoloma Barabas heda visilogo woknerapwak yiluk, yugeres,” yiluk, it avakwa homago welagagwa ako enendawima manggu lagagwama,

¹² andi en, at Pilatus en ambi inim iri dugwit, “Andi halok, hiren, ap Yakuri henowa inis ombok yagalagwi yi, an nggarogo ogarik? Yukneres.”

¹³ Yugirigya lagagimu, it akoen, “Yo winik vaga lobalogo wakbas!” yiluk, enane ombok vaga yugugu lagagwama,

¹⁴ at Pilatus akoen, “At weyak ambi ngga ogagamu yagalagwi?” yugeragagi ovara, “Dek, yo winik vaga lobalogo bain!” yiluk, evenuk enane ombok vaga yandyak-handyak yugogogwa.

¹⁵ Enane ombok vaga yugugu lagagwama, at Pilatus akoen it avakwa homagagwa ako, enendawi sek arupwak yiluk, Barabas ako heda visilogo wogirigya lagagirik, At Yesus andi, nabirok-at wakbaluk, yo vaga lobalogo bapwak yiluk, ap enayegen werek wogeragagi.

It ap enayegen werek en Yesus wiyiknom-weyaknom erogo bagagwa wene

¹⁶ Wogirigya lagagimu, it ap enayegen werek akoen Yesus wolok Gubernur amwa wene amburup mbalisagwima nunggugu lagagwarik, it enayegen werek ako ovok homari warupwak yiluk, enayonggo bagagwa.

¹⁷ Enayonggo bagagwa ako homari wagu lagagwarik, At Yesus ako yum mudu elokwe ndimbup-ndimbup agare hak yikbagwi, waren-waren adok werek menda unggul vaga walinbagwi,

¹⁸ bagu lagagwarik, aganda yagu dugwit, “Wa. It ap Yakuri enowa inis ombok Harat heyagyo,” yiluk,

¹⁹ wanggun ndup mbalek mbalogo unggul vuluk-velak watwis, enowaris ovaga suvurogo bagwi, okbagu lagagwarik, enerambo yunggubaluk, enendawi lakot dugwit, agayuk wutugwa.

²⁰ Anderogoat agenda yugu lagagwarik, yum mudu ako nggolalogo baluk, avoloma At asum yikbagagwa. Ayum yikbagu lagagwarik, eyave yo vaga lobalogo baguluk, wolok wulu wagagwa.

At Yesus yo winik vaga lobalogo bagagwa wene

²¹ Wolok wulu wagu lagagwarik, ap ambi inis Simon awi Kirene menda Alesander Uruvus enasin ako andi, weram en endawi ugun o kota akoma nunggu wagyama, avuk agu lagagwarik, enane anye vaga, “Yo winik yi wolok lau,” yiluk, vanggorogo yugugu lagagwarik,

²² Yesus wolok, o inis it enane vaga, “Nggologota,” yagalagwi akoma ari lagagwa. Eke, o andi, nit nenane vaga, Unggul Owakma o, yagalagwi.

²³ Wolok unggu lagagwarik, anggur agas inim, nggami inim, nanggibuk-hanggibuk erogo baluk, napwak yiluk, wogogogwa ovara, hekbagagi.

²⁴ Hekbagya lagagimu, it akoen yo winik vaga lobalogo paku warogo bagagwa. Lobalogo bagu lagagwarik, “At ayum, sa hidigya hamwi?” yiluk, helep enggen vaga wakhegek ogagu dugwit, yum ako sumbukhedagagwa.

²⁵ At Yesus yo winik vaga lobalogo bagagwa ako, o hutun jam 9 vaga-at lobalogo bagagwa.

²⁶ Lobalogo bagu lagagwarik, “Yakuri Enowa Inis Ombok ako yi aro,” yiluk, wene At ovaga bagagwa ako dirup warogo bagagwa.

²⁷ Bagu lagagwarik, ap enonggop agodem menda mberen Yesus inim yo winik vaga lobalogo bugu dugwit, ambi Yesus inggis amot vikit bagwi, ambi inggis hware vikit bagwi, okbogogwa.

²⁸ [Anderogo okbogogwa ako, Ala en wene endak ambi iri dugwit, “At okbagagwa ako, it ap weyak menda inim ininggis dingginggugwa,” yiluk, yagagi dirup warek ako, At Yesus it ap weyak menda inim yo vaga lobalogo bugu lagagwama, atma des yagagi o.]

^29-30 Venak-venak At inim bugu lagagwama, it avakwa nin lagek-wagek yugu dugwit, inil heyakbaluk inut wadok yugu dugwit, “Inyagot! Nabirok ale! Hat ‘Ala awi valek masalogo baluk, hivis avoloma ndugwis henggam vaga valugwis,’ yegen yi, yo winik vaga en hagap wendakhedelok, soklok wambuma,” yiluk, wiyiknom-weyaknom erogo ovaga bagagwa.

³¹ Wiyiknom-weyaknom erogo ovaga bagu lagagwama, it imam-imam enasini inim, it Ala wene vagago welagagwa menda inim, it ako ogo ambi yugigik, ambi yugigik, Yesus wiyiknom-weyaknom erogo aganda yagu dugwit, “Avakwa enagap wendaginivit nagu laga ovara, At agap wendakhedaup meyan yi helagwi a?

³² At Keretus nit avakwa Iserali menda Nenowa Inis Ombok yi, nit avyarat ombarugen yiluk, ninivaga yogak-at yo winik vaga en wambu wagya hasogom,” yiluk, aganda yugu lagagwama, it ap mberen At inim yo vaga lobalogo bogogwa ako inim, anderogoat Yesus anggadi watugwa.

Yesus hombagagi wene

³³ Anggadi wakbagu lagagwama, o dingga jam 12 vaga yi awi ndi awi andoma, o hup agagi hegek, mbikit jam 3 howam vaga o awiya agagi.

³⁴ O howam agya hegek, jam 3 vaga At Yesus na iri dugwit, “Eloi, Eloi, lama savatani!” yagagi. Yagagi andi nit nenane vaga, “Nasin Ala o! Nasin Ala o! An nano yiluk hekbaniliga?” yiluk, yagagi.

³⁵ Iri lagagimu, it nin andoma welagagwa menda ako en Yesus ane iris ako enaruk hunggu lagagwarik, “Ap yi, Elia eyanggup yagaliga,” yiluk, yugu lagagwama,

³⁶ ap ambien vupuk lagya lagagirik, suk wambamok ambi anggur agas eda menda yomakbaluk, napwak yiluk, yo atok sapok erogo Yesus elagapma wogugu dugwit, “Yogak hekbas. At Elia en visilogo wombaba wagya haoen, sok hugu dogosogom o,” yiluk, yagagi.

³⁷ Iri lagagirik, At Yesus akoen na iri dugwit, endawi weralhidigya lagarik, hombagagi.

³⁸ Endawi weralhedelok hambigya lagagimu, yum Ala awi valekma ilim sivinik welagagi ako, winimenggan en o ilim agako wane erogo mbetlarit wambu wagagi.

³⁹ Eke, at ap enayegen werek enowa ako Yesus elesema mendek dugwit, Yesus anderogo endawi weranggu il higya lagagirik, “Ap yi Ala Abut avyarat higi o,” yiluk, yagagi.

^40-41 Eke it akwa nin Yesus yonggat-hugu lagagwa menda inim o Galilea en wagagwa ako, Yesus yo winik vaga lobanggugwa ako o adumu en inil lakhagagwa. It akwa ako enanggelekma hwa Maria awi Makdalena menda inim, hwa Salome inim, hwa Maria Yoses Yakobus ao sawe iperen inisa inim, inil lakhagagwa.

Yesus wimu mabagagwa wene

⁴² At Yesus ako hambigya lagagimu, heveret hutun samban ogaruguluk vipuk-vapuk erogo bagwi vaga, o hup agya lagagimu,

⁴³ it wene amburup mbalisagwi menda ako, ap ambi inis Yusup awi Arimateya menda agayuk werek atma, at “Ala avema bininapwak o” yiluk, sok higyaim, alon dek akluk, at Pilatus adema lagya lagagirik, Yesus eyave warek woknirupwak yiluk, “Wokniru o,” yugiri lagagi.

⁴⁴ “Wokniru o,” iri lagagimu, at Pilatus akoen, “Mondok hombagas,” yagagwa ako aruk hunggu lagagirik, “Ayai?” yiluk, it yegen werek enowa yonggo lakbagagi ako wagya lagagimu, “Yesus ovok hombagas a dek a?” yiluk, hemekhagagi.

⁴⁵ Hemekhagagi ovara at akoen, “Mondok hombagas o,” yugugu lagagimu, eyave warek ako walapwak yiluk, at Pilatus en Yusup yugogogi.

⁴⁶ Yugugu lagagimu, yum mudu obak ambi onggo hunggu lagagirik, wolok eyave warek ako visilogo wombaba wagya lagagirik, yum mudu obak ako vaga dinggilogo wis mendagoma mabaluk, helep sigilogo sup lakbagagwa.

⁴⁷ Sup lakbagagwa ako, at hwa Maria awi Makdalena menda ako inim, Maria Yoses isa inim, inil hagagwa.