Markus 10 - ALA WENE HIVIS DIRUP WATUGWA

Ap hwa hekbiselagwi wene

¹ Yugirigya lagagirik, o andoma hekbaluk, sup o Yudea vaga en is Yorodan mbalogo elavikit lagagi. Lagya lagagirik, avakwa iya erogo At adema homari wagagwarikmu, At wene mamuleraliga ako wane-wane, mamuleragagi.

² Mamulirigyaim, it ap Varisi menda ako At adema wagu lagagwarik, avut mbaluguluk yugugu dugwit, “Ap ambi ogwa wogoma ‘Nanggon o,’ yiluk, hekbaup andi moga a, dek a?”

³ Yugugu lagagwama, At Yesus en iri dugwit, “Musa en wene nggarogo yukheragagi?” yiluk, yugeragagi.

⁴ Yugirigya lagagimu, it akoen yugugu dugwit, “At Musa en, ‘Ap en at ogwa hekbaguluk, “Hat hwa yi an nanggon, yiluk, hekbagaliga,” wene dirup warogo wogirup halok andi, ndak hekbaup,’ yiluk, yagagi.”

⁵ Yugugu lagagwama, At Yesus en, “Henendawi lakot hiniselok, wene andi dirup warogo yukheragagi ovara,

⁶ ‘At Ala en o endak yi menda ndi menda ogagya dugwit, ap ogagya, hwa ogagya,’ ogagagirikmu,

⁷ andi halok, ‘Ap en asin-isa hekbisiluk ogwa iperen eneyave ambiat akluk,

⁸ it eneyave mberen ovara ambiat arusogom o,’ Ala wene dirup warek atma, it eneyave mberen dek, ambiat dogosogom.

⁹ Andi halok, At Ala en mondok-mondok hondabigigirikmu, avakwa en weralogo bisaup andi, mondok moga o,” yugeragagi.

¹⁰ Yugirigya lagagirik, umwa nunggwigya lagagimu, At ane welagwi menda akoen wene yugeragagi ako, ambi inim hemetugwa.

¹¹ Hemetu lagagwama, Yesus en yugirigya dugwit, “Ap en ogwa hekbaluk, hwa adik ambi hidigya halok, ap en hwa endak ako alyak waliga.

¹² Eke, hwa en agun hekbaluk ap adik ambi hidigya halok andi, hwa en agun endak ako alyak waliga,” yiluk, yugeragagi.

Yesus en avyak mariduk adenggen enovaga bogogi wene

¹³ Yugirigya lagagimu, avyak mariduk At Yesus inggis inunggul vakbisiluk enadenggen enovaga bisapwak yiluk, At adema woginiviluk wagu lagagwama, At ane welagwi menda en avakwa ako mbereragagwa.

¹⁴ Mberirugu lagagwama, At Yesus en aninis wisane agya lagagirik, “Hekbisines! Ala avema dogop andi, it avyak mariduk yerogo hak atma, An nadema wagusim moga yugerabuk.

¹⁵ Dibas! It avyak mariduk Ala avema dogopwak yiluk nunggwisagwi anderogo hak, hit anderogo nunggegetek hiniselok andi, nunggusogom dek o,” yiluk, yugeragagi.

¹⁶ Anderogo yiluk yugirigya lagagirik, avyak mariduk ako elola okbugu lagagirik, inggis inunggul vakbisiluk, adenggen enovaga bogogi.

Ap inggis werek wene

¹⁷ Enovaga bugu lagagirik, sup ambi inim lagiluk ogagya lagagimu, ap ambi At adema vupuk wagya lagagirik, erambo yunggubaluk Yesus yugugu dugwit, “Ngguru. Hat sek adigat agindik yi, Hat sek adigat agindik yi, an mondok-mondok niluk dogogiluk, nggarogo ogarik?” yiluk, yugogogi.

¹⁸ Yugugu lagagimu, At Yesus akoen, “Nano yiluk An sek adigat agirik yiluk yuknigin? Ap ambi sek adigat agarik andi dek, Ala adigat sek agarik,” yugugu lagagirik,

¹⁹ “At Ala en wene yagagi ako hat ovok hilup. ‘Ap warup moga. Ap ogwa werek hegek, hwa agun werek hegek, ogarup moga. Ap enangge enonggop waup moga. Henane huluk avakwa enovaga bisaup andi moga. Ap enangge nomalup moga. Hinisa-henasin enagayuk wutu dugwit, enane des erogo hunggu dogwes o,’

²⁰ yugugu lagagimu, at akoen, “Dek o, Nasin Ngguru. Wene andi an madukma en des erogo ogagya lagagis,” yiluk, yugogogi.

²¹ Yugugu lagagimu, At Yesus il vu erogo yokhigya lagagirik, abwa imbita dugwit, “Wene ambiat andi ao ogagetek heyagi. Hat hangge ovok erogo onggo hunogo it ap ininggidek menda ako wogerelak. Wogirigya heyalok, hat hangge eve sek menda andi hivis mbogot vaga en ombogat hedayogon. Anderogo ovok wogirigya dogomindik, ninim nagu dogoguluk, omano,”

²² yugogogi ovara, at angge-angge wisane ako vaga endawi hunik atma, wogeraup anggon imbita dugwit, endawi mondok wakhedegek amwa lagagi.

²³ Lagya hegek, At Yesus ako il ambukmu dagalogo, At ane welagwi menda ako yoginipu dugwit, “It ap ininggis werek menda ako, At Ala avema bisaligama andi nggarogo nunggup erek higi o,” yugeragagi.

²⁴ Yugirigya lagagimu At ane welagwi menda en vok yugu lagagwama, At Yesus en yugirigya dugwit, “Naburi. At Ala avema bisaligama andi nggarogo nunggup erek higi o.”

²⁵ Yugirigya lagagirik, “Wam unta eyave ombok hegek, yarum elo maduk vodalek andi nunggup ndagat ovara, ap ininggis werek halok andi, Ala avema bisaligama nggarogo nunggup erek higi o,” yugeragagi.

²⁶ Yesus ane yagagi ako enaruk hunggu lagagwarik, vok yugu dugwit, “Andi halok, it sani enagap wendarimi?” yiluk, yugogogwa.

²⁷ Yugugu lagagwama, At Yesus en il yoginugu dugwit, “Anderogo ogarup ako, it avakwa en ogarup mondok meyanat ovara, At Ala en andi, yi menda ndi menda ovok erogo sek adigat ogarup haliga.”

²⁸ Yugirigya lagagimu, at Peterus en iri dugwit, “Nita, yi menda ndi menda ovok erogo hekbaluk, Hat hinim nagu dogoguluk wagyo atma,” yiluk, yugogogi.

²⁹ Yugugu lagagimu, At Yesus en, “An wene avyarat ambi yukherayogon o. An ninis inim, Sek Wene ako inim, ombok arupwak yiluk, henawi valek inim, henowa-henaot inim, henasin-hinisa inim, henaburi inim, heneyavup ogarek inim, ovok erogo hekbisiluk wagu hiniselok,

³⁰ yogak avoloma henawi valek inim, henowai-henaori inim, hinisai inim, heneyavup ogarek inim, 100 hudi hedasogom ovara, hegek, avakwa en anggin henovaga bigigasogom. Eke, hivis atok vaga mondok-mondok hiniluk dogosogom o,”

³¹ yugirigya lagagirik, “Ap wisane enendak lendagwi ako andi, hivis arusogom. Eke, hivis lendagwi ako andi, enendak arusogom,” yiluk, yugeragagi.

Yesus ambi inim “An narusogom o,” yugeragagi wene

³² Yesus At ane welagwi menda ako inim o Yerusalem suvaga lagu dugwit, At Yesus endak lagyaim, it At eyaganggom ako enendawi anggin agya, it avakwa nin enambetaga lagagwa ako enalon agya, agya lagagimu At Yesus en ambi inim it ap 12 ako enadikmu wogonombolok lagya lagagirik, At hivis nano arup wene akoat yugeragagi.

³³ Yugirigya dugwit, “Avyak. Nit ako vage Yerusalem dagasagwi atma, An Ap-At Endaklagagis ako, neyave vagarogo, it ap imam-imam enasini inim, it Ala wene vagago agarwik menda inim, woguruguselok, it ap akoen narupwak yiluk, wene yusogom o. Wene yugu dogomundik, it ap weram Yakuri dek menda wogerasogom.

³⁴ Wogurugu dogomwima nanggadi wakbanunggwi, enowaris novaga suvurogo banunggwi, nabirok nggotalogo natwis, okbaniluk, mondok narusogom. Natu dogomwima, ndugwis mberen dukluk ndugwis ambi vaga niluk akluk mendek yisogon o,” yiluk, yugeragagi.

Yakobus Yohanes mbereragagwa wene

³⁵ Yugirigya lagagimu, at Sevedius aburi, Yakobus Yohanes iperen At Yesus adema wagu lagagwarik, “Ngguru wai. Nit nenendawi wenggebaluk, yukhurusogom andi okbininanok yiluk, wagyo,” yugogogwa.

³⁶ Yugugu lagagwama, At Yesus en, “An nggarogo okbigigapwak yiluk wagep?”

³⁷ Yugirigya lagagimu, it akoen “Hat hivis hiris hovagangge yikhedelok wagya heyalok, nit Hat hinggis venak-venak vaga horakbininanok yiluk, yukhiri wagyo,” yiluk, yugogogwa.

³⁸ Yugugu lagagwama, At Yesus en, “Hit nggino yuknisagwi andi, hinunggut dugwit nggino yuknisagwi. An nagas nudik nayogon andi, hit hinim naup sek embetep? An anggin-mbanggin okbanusogom ako andi, hit hinim okbigigaup sek embetep?”

³⁹ Yugirigya lagagimu, it akoen, “E o. Ninim naup andi sek aro,” yugugu lagagwama, At Yesus en iri dugwit, “An nagas nudik naup hit ninim naup-at. Eke, An anggin-mbanggin okbanusogom andi, hit hinim okbigigaup ovara,

⁴⁰ neyave venak-venak bigigaup andi, Anen okbigigayogonbuk. An neyave venak-venak horakbisaup ako, Nasin en o muk erogo enogo bogogi ako adigat Aren okbisayogon o,” yiluk, yugeragagi.

⁴¹ Yugirigya lagagimu, it eneyave 10 ako enaruk hunggu lagagwarik, it Yakobus Yohanes mbereragagwa.

⁴² Mbereragagwa ovara, At Yesus en it ovok erogo yanggup yugeragagi, wagu lagagwama, yugirigya dugwit, “It avakwa weram menda enasini vagenombogo agarwik andi, avakwa enavema sovabugwis, eke, it enasini ap ombok en yerogo ogarup, nderogo ogarup enane anye vaga yugurugwi, ogasagwi hinilup ovara,

^43-45 hit andi anderogo ogarup moga. An Ap-At Endaklagagis yi, hiren An nake ogagu dogovovok yiluk, wagatek. Ata, Anen hit henake ogagya dugwit, hit avakwa wisane An henake hambisogon vaga henonggo mbabaluk, heda visilogo bigigagiluk wagagis ako wane-wane, hit ap yi ambi ombok arup ombasagwi halok, enayelomanat arupwak. Hit ambi en, ‘An nendak ap ombok dogosogon o,’ imbita halok andi, at henavema dugwit, henake ogagya dogopwak,” yiluk, yugeragagi.

Yesus en Batimeus il sek ogagagi wene

⁴⁶ Andoma en, it ako o kota Yeriko ari lagagwa. Hivis, Yesus At eyaganggom inim, avakwa wisane inim, o andoma en wunggusim ap ambi il mbuk ambenggino yagaliga menda suvaga horaik welagagi. Ap ako inis Batimeus, at asin inis andi Timeus.

⁴⁷ At Yesus Nasaret menda wandiga, aruk hunggu lagagirik, “Yesus wai. Daut ombao wagen yi, an nabwa hanen,” yiluk, ane ombok erogo yugogogi.

⁴⁸ Yugugu lagagimu, it avakwa en mbup yupwak yiluk, mberogogwa ovara, hegek, aren iri dugwit, “Daut ombao wai. Nabwa nombaru o,” yiluk, ane ombok vaga ambi inim yugigik adigat ogagya lagagimu,

⁴⁹ At Yesus ako mbup iri dugwit, “Eyanggup eres,” iri lagagimu, iren ap il mbuk ako eyanggup yugugu dugwit, “Heyanggup yukhisigama, hendawi sek vaga mendek iru,” yiluk, yugogogwa.

⁵⁰ Yugugu lagagwama, asum sogwesum menda nggolalogo hekbaluk, yiluguluk mondok iri lagagirik, Yesus adema wagagi.

⁵¹ At adema wagya lagagimu, At Yesus en, “An hat nggarogo okbanupwak yiluk, embeten?” Yugugu lagagimu, at il mbuk akoen, “Nasin ngguru, nil sek okbaninok yiluk, yukhisiga,”

⁵² yugugu lagagimu, At Yesus en, “Hat hendawi avyarat nembeten ako vaga, hil sek agindikmu, hamwa elak.” Yugugu lagagimu, il mbuk welagagi ako sek agya lagagirik, At Yesus inim suvaga lagagwa.