Lukas 3 - ALA WENE HIVIS DIRUP WATUGWA

Yohanes en ima wombabugu dugwit yugirigya lagagi wene

¹ Ap Kaisar Tiberius inis ombok dugwit, yi awi ndi awi Oroma menda ovok erogo at avema vagago welagagi. Vagago werekma, tahun 15 andi vaga at avema welagagwa menda ako, ap ambi Pondius Pilatus o Yudea Gubernur vagago welagagi. Eke, ambi, ap Herodes o Galilea vagago welagagi. At aot Pilipus o Itureya Serakonitis vagago welagagi. Eke, ambi, ap Lisanias o Abilene vagago welagagi.

² Anderogo vagago werekma, it ap Hanas Kayapas iperen imam-imam ininis ombok winimen inigik, Sakaria abut Yohanes ako o harumu avakwa dekma andoma hegek, Ala en wene ambi at endawima yugogogi.

³ Yugugu hegek, Yohanes en avakwa yugirigya dugwit, “At Ala en hit weyak ogasagwi ako degerogo bigigapwak en, henasam helok, weyak ako nggelabisines. Nggelabugu hiniselok ima wombabigigayogon,” yiluk, wene andi, is Yorodan liris ambut ovok erogo yugeregek nagu lagagi.

⁴ Ap navi Yesaya en o endak dirup watigi ako Yohanes en ndatak ogagagi. Yesaya en Yohanes avok yagagi andi, yi: “Ap ambi harumu avakwa dekma yanggup iri dugwit: Nenasin Inis Ombok warup sup sek erogo yagwi, eke, At lagya dogop sup amor erogo yagwi, ogagu dogones o.

⁵ Huris halok, lekbagwi, ndom inim, hulik inim, sovabagwi, sup mbironggodo halok, amot okbagwi, sup enggek-wambegek halok, leyanggwis, ogagu dogones o.

⁶ Ala en henagap wendarisiga menda lakbigiga wasogon ako, avakwa ovok erogo inil hagup o,’ yiluk, yagan wasogon,” yugeragagi dirup watigi ako ndatak Yohanes en yugeregek lagya lagagi.

⁷ Yugirigyama, it avakwa wisane ima wombabininapwak yiluk at adema homari wagagwa ako, yugirigya dugwit, “Mbas edup aburi endago menda hit yi aro. Ala aninis henovaga bigigya wasogon ako, hoda wolovovok yiluk, saen hurimbis yukheraga?

⁸ Hit weyak ogasagwi ako, henasam hegep halok, yo enggen sek menda yiliga andi hak, ndatak ogagu dogones. Hit henendawima en umbutu dugwit, ‘Averakam andi, nit nenombao atma, nit sek adigat agurik o,’ ombasagwi andi, anderogo ombarubuk. At Ala en, ‘Helep yi, at Averakam ombawi aru,’ yiluk, yugirigya halok, ndagat arup hegek, hit adigat iya dekma, nggarogo yiluk yagalagwi?

⁹ Yaga yo murumenda ovok adema agarik atma, yigyo ndigyo enggen sek menda yigitek halok, murogo halima mabayogon o,” yiluk, yugeragagi.

¹⁰ Yugirigya lagagimu, it avakwa wisane akoen, “Anderogo halok, nit nggarogo ogaruk?”

¹¹ Yugugu lagagwama, Yohanes en, “Hit henasum yikhedelagwi mberen halok, ap ambi asum dek halok, ambi wogugwis, eke, henagarom werek halok andi, anderogo wogirugwi, ogagu dogones,” yiluk, yugeragagi.

¹² Yugirigya lagagirik, werekma, it pemerintah enake yoparip wonggalisagwi menda akoen ogo, “Ima wombabininapwak o,” yiluk, at adema wagu lagagwarik, “Ngguru wai. Nit nggarogo ogaruk o?”

¹³ Yugugu lagagwama, Yohanes en yugirigya dugwit, “Henasini en, ‘Yoparip anderogo hudi wongganggu dogones,’ yukherelagwi ako, adigat wongganggu dogones,” yugeragagi.

¹⁴ Yugirigya lagagimu, it ap enayegen werek akoen at yugugu dugwit, “Eke, nit ogo, nggarogo ogaruk?” yugugu lagagwama, at Yohanes en, “It avakwa enangge woknerapwak yiluk, henane anye vaga yugeraup andi moga. Eke huluk wene avakwa enovaga bisaup andi moga. Ata, yavup ogasagwi onggo wokhiruguselok, ‘Yi segat wokneragao,’ yiluk, andi adigat hidugu dogones,” yugeragagi.

¹⁵ Anderogo yugeragagi ako, it avakwa ovok erogo enendawi adenggen umbutu dugwit, “Avyak! At Ala en Nenowa Inis Ombok denogo mendok okbayogon Keretus yagagi ako, at Yohanes yi ai?” umbutusim,

¹⁶ Yohanes en it ovok yugirigya dugwit, “An un is vaga adigat wombabigigaliga. Eke, At ambi wasogon ako andi, At mondok ombok aro. An maduk atma, At aropato nggolalup mondok meyan. At Averiniki inim, hali inim, henovaga bigiga warisogon.

¹⁷ Gandum inisagwima en ovok enbaluk, eyave halok, wonggalogo winimen ba inggya, eke, iluvulu halok, hali abya nagaup yagaligadekma lakbagya, ogarupwak yiluk, At walup inggimu vagago agarik,” yiluk, yugeragagi.

¹⁸ Sek Wene ako it avakwa yugirigya dugwit, Yohanes en anderogo wene wisane enaruk watigi.

¹⁹ Enaruk watya lagagimu, ap inis ombok Herodes akoen at aot ogwa Herodiana ndiyalogo hidigya, eke, yi weyak ndi weyak wisane ogarit lagya, ogagya lagagimu, Yohanes en “Hat ogo weyak,” yiluk mberogogi.

²⁰ Mberugu lagagimu, Herodes en yi weyak ndi weyak ogarit lagya dugwit, Yohanes eyave vagago lembaga mabagagi andi, weyak ambi labok wisane ogagagi.

Yesus ima wombagagi wene

²¹ Yohanes en avakwa ovok ima wombabugu lagagirik, Yesus inim ima wombabagya lagagimu, Yesus samban ogagyama, mbogot heyarogo,

²² Averiniki eyave swa suwa ovagak wigak yagan Yesus ovaga wambu wagagi. Ovaga wambu wagya lagagimu, mbogot vaga en ane iri dugwit, “Hat Nabut nendawi hunik atma, nendawi adenggen ogagya heyagi o,” yiluk, yugugu hagagi.

Yesus ombawi endaklarit wagagwa wene

²³ Yesus ogarigiluk wagagi ako 30 tahun okbaluk asinggigi. It avakwa en Yesus andi, Yusup abut umbutu lagagwa. Eke, Yusup andi, Eli abut.

²⁴ Eli andi, Matat abut. Matat andi, Lewi abut. Lewi andi, Maliki abut. Maliki andi, Yanai abut. Yanai andi, Yusup abut.

²⁵ Yusup andi, Matika abut. Matika andi, Amos abut. Amos andi, Nahum abut. Nahum andi, Heseli abut. Heseli andi, Nagai abut.

²⁶ Nagai andi, Mat abut. Mat andi, Matika abut. Matika andi, Simei abut. Simei andi, Yosek abut. Yosek andi, Yoda abut.

²⁷ Yoda andi, Yohanan abut. Yohanan andi, Eresa abut. Eresa andi, Serubavel abut. Serubavel andi, Selatiel abut. Selatiel andi, Neri abut.

²⁸ Neri andi, Maliki abut. Maliki andi, Adi abut. Adi andi, Kosam abut. Kosam andi, Emadam abut. Emadam andi, Er abut.

²⁹ Er andi, Yosua abut. Yosua andi, Elieser abut. Elieser andi, Yorim abut. Yorim andi, Matat abut. Matat andi, Lewi abut.

³⁰ Lewi andi, Simeon abut. Simeon andi, Yakura abut. Yakura andi, Yusup abut. Yusup andi, Yonam abut. Yonam andi, Eliakim abut.

³¹ Eliakim andi, Meleya abut. Meleya andi, Mina abut. Mina andi, Matata abut. Matata andi, Natan abut. Natan andi, Daut abut. Daut andi, Isai abut.

³² Isai andi, Ovet abut. Ovet andi, Boas abut. Boas andi, Salomon abut. Salomon andi, Nahason abut.

³³ Nahason andi, Aminadap abut. Aminadap andi, Adimin abut. Adimin andi, Arini abut. Arini andi, Hesron abut. Hesron andi, Veres abut. Veres andi, Yakura abut.

³⁴ Yakura andi, Yakup abut. Yakup andi, Isak abut. Isak andi, Averakam abut. Averakam andi, Tera abut. Tera andi, Nahor abut.

³⁵ Nahor andi, Seruk abut. Seruk andi, Erehu abut. Erehu andi, Velek abut. Velek andi, Eber abut. Eber andi, Sela abut.

³⁶ Sela andi, Kenan abut. Kenan andi, Arapakasat abut. Arapakasat andi, Sem abut. Sem andi, Nuh abut. Nuh andi, Lamek abut.

³⁷ Lamek andi, Metusala abut. Metusala andi, Henok abut. Henok andi, Yaret abut. Yaret andi, Mahalalel abut. Mahalalel andi, Kenan abut.

³⁸ Kenan andi, Enos abut. Enos andi, Set abut. Set andi, Adam abut. Eke, Adam andi, Ala abut-at.