Lukas 21 - ALA WENE HIVIS DIRUP WATUGWA

Hwa sogwa inggidek en Ala ake bagagi wene

¹ Andi yugirigya lagagirik, Yesus en avakwa il yoginugu dugwit, avakwa ininggi werek menda en enangge Ala awi valekma yoparip belagwima enayoparip Ala ake bawagu sogogi.

² Bagusim, hwa sogwa inggidek ambi wagya lagagirik, yoparip mbusi enggen mariduk mberen Ala ake belagwima bawagya il hagagi.

^3-4 Bawagya il higya lagagirik, it avakwa yugirigya dugwit, “Dibas! It avakwa enangge wisane hegek bawagao ovara, hwa sogwa inggidek menda yi, at agarom hunogo naup dek hegek ovok erogo betagarikmu, it avakwa ininggis werek menda un horok madugat bagao ovara, at hwa sogwa inggidek dugwit bawaga yi andi, eve ombogat bagas o,” yiluk, yugeragagi.

“Ala awi valek masalarugwi,” yugeragagi wene

⁵ Yugirigya lagagimu, At ane welagwi menda ninen yugu dugwit, “Ala awi valek andi, helep mondok sek inim, yi menda ndi menda mondok segedok menda Ala ake bago inim, ako vaga, mondok sek valek agarik,” yiluk, yagan lagusim,

⁶ Yesus en it yugirigya dugwit, “Hit hinil helagwi yi ako andi, helep ovaga dambuk ogarek iligik andi ambiat ogo dogosogonbuk. Ovok erogo masalarugwi hudi vanggo yi warugwi,” yiluk, yugeragagi.

Anggin-mbanggin erogo bisaup wene

⁷ Yugirigya lagagimu, iren At hemethugu dugwit, “Ngguru wai. Hat yukneregen ako o mera oklarimi? Eke, ‘Anderogo ogarup’ yukneregen ako atma des yup hudi horok ari wagya halok, ninilup arup menda nenendawi dibaguluk nano ogagya hagup?”

⁸ Yugugu lagagwama, At Yesus en yugirigya dugwit, “Avakwa henendawi wokhinipu saoen henova hwalogo dogones. It ap wisane [huluk at] An ninis vaga wagu dugwit, at ambi en, ‘At Keretus ako andi, an aro,’ iris, eke, at ambi en, ‘Hivis oklarup ako vage vanggo yi waga o,’ iris, yagan warusogom atma, enane hobaluk, enamusek labuk.

⁹ Ndup silis bagwi, haryogo wibisapwak yiluk ndup ogagwi, ogasagwi ovok henaruk hulumwi ovara, henalon habuk. Ogarup ako, endak oklarisogon ovara, o hivis oklarup ako mbikit oklarisogonbuk o,” yiluk, yugeragagi.

¹⁰ Yugirigya lagagirik, ambi yugirigya dugwit, “Ap ininis unggul adik-adik ndup sumbutwis, ap inis ombok ambi aori en ap inis ombok ambi aori inim ndup ombok ogagwi, ogarugup.

¹¹ Ogagusigik, o wadok mondok ombok wisane ogagya, yi awi ndi awi erom uvup agya, o yi awi ndi awi adwanggak wisane oklagya, eke, mbogot vaga mondok enalon werek menda ogagya, hinilup arup elose adik menda ogagya, ogagya hagup.

¹² Anderogo ovara, ogagetek hegek, ap en hit vakbigigiluk, edup-mbedup okbugugwis, it ap Yakuri samban ogasagwima bigiga lagwi, lembaga mabugugwis, eke, An nane wagagup vaga it ap ininis werek inim, it ap ombok-ombok inim, enadema wokhiniviluk lagwi, ogarusogom.”

¹³ “Anderogo okbuguguselok, ‘Yugeraup nanonggal aga o,’ yiluk, ogagya neyagu lagagup ako, yugurugu dogogup.

¹⁴ Henagap wendakhedaup yiluk, wene onggo ngga yugeraup ako henendawi anggin habuk.

¹⁵ Anen henendawi werek okbugugu dugwit, wene ngga yugeraup yukheramima, yugurugu hiniselok, it hinim ogorek ako onggo yukhirugwi, henane sovalogo bagwis, okbigigasogombuk.

¹⁶ Hinisai-henasini inim, henowa-henaot inim, henowa-henasin inim, henaswei inim, it akoen wokhiniviluk ap enowak dilisagwima bigiga lagwi, hit nin henatwis, ogarusogom.

¹⁷ Eke, An ninis wagagup vaga avakwa ovok erogo enanggon henombarusogom ovara,

¹⁸ hinirisenggen ambiat ogo bolarugwi mondok dek atma,

¹⁹ henendawi wadokdek dogomwi vaga Ala en henagap wendarisogon,” yiluk, yugeragagi.

O Yerusalem degerogo baup wene

²⁰ “It ap enayegen werek wisane homago o Yerusalem walinggwis inigu dogogupik, ‘O Yerusalem degerogo baup ako vage vanggo yi waga higi,’ ombarugup.

^21-22 Andi hudi vanggo yi wagya halok, yi ogarup ndi ogarup Ala wene dirup warek ovok erogo atma des yupwak yiluk, avakwa Yerusalem menda weyak ogasagwi onggo wogeraup andi hudi atma, it o Yudea agarwik ako, ndom vaga andoma hoda hwilaklari wunggwis, o kota agarwik ako, o andoma hekbaluk, wunggwis, ogarupwak. Eke, o kota weram agarwik ako o kota nunggubuk.

²³ O andi hudi Ala en o wen vaga yoma anggin-mbanggin mondok eve iya erogo okbugu dugwit, it avakwa yi, aninis okbisagwirikmu, akwa enavula inim, eneyak idak wogerelagwi inim, hoda wulup meyan atma, enabwa.

²⁴ Nin mbusinggarep vaga inituselok hambugwi, nin heda marogo avakwa ininis unggul adik-adik enamwa andoma bisa lagwi, ogarugup. Eke, it avakwa weram Yakuri dek menda en o Yerusalem inisok sovalogo bigik lagu dogogup. At Ala en, ‘It avakwa weram Yakuri dek menda andok dugwit, tahun anderogo o Yerusalem vagago dogosogom,’ imbitigi ako atma des yegetek hegek, sovalogo bigik lagu dogogup,” yiluk, yugeragagi.

“An Ap-At Endaklagagis warugwis,” yugeragagi wene

²⁵ Yugirigya lagagirik, ambi yugirigya dugwit, “Hinilup arovovok yiluk, mo il inim, saut inim, dadiwap inim, andi mondok elokwe adik ogagya hagup. Eke, o wen vaga yoma is laut yanggadek ane ombok iri dugwit, mondok mogoliluk ogagya halok, it avakwa ininis unggul adik-adik ovok erogo, ‘Yi nggarogo ogarit wandiga wi!’ yiluk, enendawi mondok obak arugup.

²⁶ It mbogot vaga enanye werek menda ako yukul-wadok ogagya halok, it ap ovok erogo en yi menda ndi menda o wen vaga oklarit warup ako, ‘Yiat oklarit wagya higyo,’ yiluk, enalon en enendawi mondok obak arugup.

²⁷ Andi ogagya halok, An Ap-At Endaklagagis ako mondok nabinak werek niris novagangge yikhedelok nagayuk werek dugwit, hena anggelekma en wagya neyagup.

²⁸ Yi menda ndi menda oklarup ako asinggu halok andi, ‘Nenagap wender erogo bininaup ako vage sigam ari wagya higyo,’ yiluk, henut leklakluk, hinil iligik dogop,” yugeragagi.

Yo widis vaga wakhegek yugeragagi wene

²⁹ Yugirigya lagagirik, wene yi, wakhegek yugirigya dugwit, “Yigyo ndigyo inim, yo widis inim, o Iserali yoma ogasiga ako dibas.

³⁰ Yo anggup savuligiluk, ogagya hinil hugu lagipik, ‘O vage hivi bagiluk ogasiga higi o,’ yiluk, yagalagwi.

³¹ Ako yagalagwi ndatak, mo il inim, saut inim, dadiwap inim, mondok elokwe adik oklarup endak yukhirigi ako, oklagya hinil hugu dogogupik, ‘Ala avema bininaup ako vage ari wagya higi,’ yiluk, ombarugup.”

³² “Hit avakwa yogak agipik yi, ao dek agetek hinigik, hivis ogarup avok yukhirigi ako ovok erogo atma des iri hagup yiluk, avyarat yukheraliga.

³³ Wen inim, mbogot inim, dek arugwi ovara, An nane andi, dek arisogonbuk mondok-at dogosogon o,” yiluk, yugeragagi.

Suam watu dogop wene

^34-35 Yesus en wene ambi yugirigya dugwit, “Bagas sakno bagoma mbikit sopalandiga hak, ‘Ndugwis andi vaga anderogo okhinivisogon,’ yiluk, wene yukhirigi ako, hit avakwa o wen vaga yoma ovok erogo ndugwis ambi vaga mbikit supuk erogo okbigiga wasogon atma, henendawi suam wakhidugu dogones. Yi menda ndi menda henagaum dek heda nenggek nagwis, amburup nenek oginivisiga menda nenggek nagwis, ‘Nangge nggarogo okhedaik o,’ yiluk, henendawi anggin wisane wenggelit nagwis, ogagu dugwit, henendawi ugun obak hinisaoen, henendawi suam wakhidugu dogones.

³⁶ Samban adigat ogagu dugwit, henendawi suam wakhidugu dogones. Andi ogagu hiniselok, anggin-mbanggin okhinivup ako henendawi wadokdek dugwit, henanye erogo wugu dogomundik, An Ap-At Endaklagagis nivaga henanggadidek dugwit mendek yugup,” yiluk, yugeragagi.

³⁷ At Yesus en o dingga Ala awi valekma wene mamulirigya, eke, o hup agya halok, wunggu lagagirik, ndom inis Saitun akoma nogo yi lagya, ogagya lagagi.

³⁸ Anderogo ogagyaim, o hutun hetlagatya vaga avakwa ovok At ane huluguluk, adema Ala awi valekma wonggalari wagu lagagwa.