Lukas 14 - ALA WENE HIVIS DIRUP WATUGWA

Ap inggis-isok virik sek okbagagi wene

¹ Hivis it Yakuri samban ogasagwi ambi vaga At Yesus erom naguluk ap Varisi enasin ambi amwa nonggagagirikmu, avakwa en At inil vurek welagagwa.

² Inil vurek inigik, ap ambi edup inggis-isok virik Yesus adema wagya lagagimu,

³ At Yesus en Ala wene vagago agarwik menda inim, it Varisi menda inim, yugirigya dugwit, “Yakuri samban ogasagwi vaga avakwa sek oginivup andi, sek a, weyak a? Ala wene Musa dirup watigi ako vaga bikhugu dugwit nggarek helagwi?”

⁴ Yugirigya lagagimu, it ovok erogo enane mondok dek mbup yagagwa. Mbup yugu lagagwama, At Yesus en ap ako inggis vagago sek okbagya lagagirik, lakbagagi.

⁵ Lakbagya lagagirik, lagya hegek, At Yesus en it yugirigya dugwit, “Hit samban ogasagwi vaga hit ambi henabut a, henanggom sapi a, wen bavulikmu is yanggadekma nggedek wambigya halok, hit mbikit vagago badaga warup sek a, weyak a?”

⁶ Yugirigya lagagimu, enane onggo yugurup meyan agya lagagimu, mbup yagagwa.

Enendawi sovalek dugwit, enagania isagu dogop wene

⁷ At Yesus ap Varisi amwa erom nunggu dugwit, it avakwa erom naup enayonggo bagagi ako, At Yesus en it ap ombok-ombok hora yagalagwima adigat hora yi wagwi ako inugu lagagirik, wene wakhegek vaga yugirigya dugwit,

⁸ “Ap hwa hidigya dugwit, isogo naguluk, henayonggo bagya halok, ako lagu dogomundik, it ap ombok hora yagalagwima andoma hora yubuk. Hit ap horok atma, eke, ap ambi mondok ombok ayonggo bamindikmu wagya halok,

⁹ at hinim henayonggo bamindikmu akoen hit yukhera wagya dugwit, ‘Avyak! Ap yi, hit henavoloma hora yipim hit witlares,’ yukhirigya halok, henanggadi embetek ap ugun hora yagalagwima hora yi laup agya haoen, it ap ombok-ombok hora yagalagwima hora yubuk.

¹⁰ Henayonggo bagya halok, ako lagu dogomundik, ap ugun hora yagalagwima andoma hora yup. Horaik werekma, at henayonggo bami akoen hit yukhera wagya dugwit, ‘Nowa-nasin. Hit ap ombok-ombok hora yagalagwima yoma hora yimanes,’ yukhirigya halok, it avakwa ovok erogo erom naup hinim agarwik ako inivaga hit siyalek-at hinisapwak, ap ugun hora yagalagwima andoma hora yugu dogop.

¹¹ Hit henendawi siyabatugu hiniselok, sovabugugu, eke, henendawi sovabatugu hiniselok, siyabugugu, ogagya hagup o,” yiluk, yugeragagi.

¹² Yugirigya lagagirik, Yesus en ap at ayonggo bagagi ako yugugu dugwit, “Hat isogo isagya dugwit halok, hinim hendawi hunik agindik inim, haswei inim, howa-haot inim, ininggis werek hat hinim agindik inim, it enadigat enayonggo bagya dogobuk. It enadigat enayonggo bagya heyalok, hivis it anderogo isogo isagu dugwit, onggo hat hayonggo bagagu saoen, it enadigat enayonggo bagya dogobuk.

¹³ Ata, isogo isagya dugwit, ininggidek halok, inisok venak-venak weyak halok, enerambo weyak halok, inil mbuk halok, enayonggo bagya dogop.

¹⁴ Enayonggo bagya heyalok andi, hendawi adenggen wisane hayogon. Eke, iren onggo wokhirup meyan atma, hivis, it avakwa sek menda hombagagwa ako iniluk okbisagwi hudi ako vaga onggo wokhugu hagup,” yiluk, yugogogi.

Isogo ombok isasagwi wakhegek yugeragagi wene

¹⁵ Ap erom naup inim horaik welagagwa ako ambien Yesus yugogogi ako aruk hunggu lagagirik, Yesus yugugu dugwit, “It Ala avema bisaligama dugwit, isogo namwi ako enadenggen umbutu dogosogom.”

¹⁶ Yugugu lagagimu, Yesus en wakhegek yugirigya dugwit, “Ap ambi isogo ombok isarup imbita lagagirik, avakwa wisane enayonggo bagagi.

¹⁷ Enayonggo bagya lagagirik, isakbaluk, ayeloman ambi yugugu dugwit, ‘Isogo isago yi, vage vedarup atma, naup ap enayonggo bagi ako warupwak yiluk, yugerelak,’ yiluk, lakbagagi.”

¹⁸ “Lakbagagi akoen yugeregek lagagi ovara, it enadik-enadigat enanggin-enanggon yugugu dugwit, at ambi en, ‘An yavup ogarek ambi onggo bagirikmu bikha laup atma, isogo isago nalaup andi, meyan o, nasin,’ yugugu,

¹⁹ eke, ambi en, ‘An sapi 10 hudi onggo hunggis ako wen ndililit wal okha lagek yipim, isogo isago nalaup andi, meyan o, nasin,’ yugugu,

²⁰ eke, ambi en, ‘An nogwa swiat hidigirikmu, isogo nalaup meyan o,’ yugugu, ogagagwa.”

²¹ “Ogagagwa ako ayeloman en asin mbilinogo yuguri wagya lagagimu, asin aninis en ayeloman yugugu dugwit, ‘O kota yoma sup andogon-andogon ovok erogo lagya dogomindik, ap ininggidek halok, ininggis-inisok weyak halok, inil mbuk halok, enerambo weyak halok, hodorogo woginiviluk omano.’”

²² “Yugugu lagagimu, woginiviluk wagya lagagirik, asin yugugu dugwit, ‘Nasin. Yuknigin ako woginiviluk wagi ovara, hora yup nggolo wisane agarik.’”

²³ “Yugugu lagagimu, asin akoen ayeloman yugugu dugwit, ‘Andi halok, avakwa o weram sup nandogon-handogonma ugun agarwik ako an namwa hobo-hobo ogari nunggu warupwak yiluk, hane anye vaga eneyanggup erogo bisa wagya dogwen.

²⁴ Isogo naguluk, endak enayonggo bagi ako ovok erogo an nagasogo isago na nunggu warup mondok dek,’ yugogogi,” yiluk, yugeragagi.

Yi menda ndi menda nggelabisiluk, An ninim laup wene

²⁵ Avakwa wisane Yesus inim nagusim, Yesus en elese ambukmu endenogo it biginigu lagagirik, yugirigya dugwit,

²⁶ “Hit hinisai-henasini inim, henabut-henogwa inim, henowai-henaori inim, eke, hit henadik heneyave inim, henendawi inim hunik ombok erogo dugwit, An ninim henendawi hunik horogat dugwit, An nadema wagu hiniselok, An nane welagwi menda arusogom mondok dek o.

²⁷ Henagyo winik hedelok An ninim warup embetetek hiniselok andi, An nane welagwi menda arusogom mondok dek o.”

²⁸ “Hit An nane waup umbutu hiniselok, endak ogarup andi wakhegek ambi yukherayogon. Hit o adup valit dagaup ombasagwi halok, ‘Valup onggo baup ovok werek a, dek a?’ yiluk, hininggis dingginggitek hegek, valisagwi ombasagwi? Dek.

^29-30 Yoparip hininggis dingginggitek hegek vanggu hiniselok, wen bavulogo owak wombabaluk, wake ao sambunggitek hegek yoparip dek agya halok, ap ninen inil hugu dogomundik, ‘Ap yi, o valup yiluk ogaga ovara, atok dek agya halok, hekbagas yi o,’ yiluk, henaganda yarusogom ako dek?”

³¹ “Eke, ap ndugandok ambien ndup ogari laup yiluk, ndup ako avok wililisiga halok, aori endak dibisiluk, ‘An naori eneyave 10.000 en it ninim ndup ogorek eneyave 20.000 werekma, ndak enari laup a, meyan a?’ yiluk, wal okhegetek hegek, yamburi landiga ombasagwi?

³² Wal okhelok meyan agya halok, it inim ndup ogorek ako ao wagusigik, ‘Ndup vage moga erogo yo ngguvunggup o,’ yiluk, yonggo lakbisa landiga ako dek a?

³³ Anderogo ogasagwi ovagak, hit ambi henangge-henangge ovok erogo hekbaup henendawi wal okhegetek hegek, An nane welagwi menda arusogom mondok dek,” yiluk, yugeragagi.

Garam edudek halok, mbobelagwi wene

³⁴ Wene ambi yugirigya dugwit, “Garam sek ovara, aitek agya halok, edup andi nggarogonggan en edup werek ogarup?

³⁵ Garam aitek ako andi, wen mudis arupwak yiluk, yavup yagoma a, wen weyakma a, balip ovara, ambi ogarup dekma, mondok mbobelagwi. Henaruk werek halok andi, des erogoat hunggu dogwes,” yiluk, yugeragagi.