Lakbogogi Wene 28 - ALA WENE HIVIS DIRUP WATUGWA

Paulus o Malata welagagi wene

¹ Is ombanma segat wunggu lagagurik, “Is enggema yi inis Malata-at higyo,” yiluk, ninilup agagup.

² Wunggugurik werekma, musu wagya dugwit, soges wisane okninipigirikmu, it avakwa enawerek andoma menda en nenabwa wisane hugu lagagwarik, hali monggabaluk, hai warogo soges werakninipugwa.

³ Eke, Paulus hali erasak havedogo wolok wagya lagagirik, hubagyama, edumbas hali edup en wulu wagya dugwit, Paulus inggis mbas en aik hivitigi.

⁴ It avakwa enawerek andoma menda akoen, Paulus inggis mbas hivitigi ako ao aik hunik inil hugu lagagwarik, ambi yugigik yugu dugwit, “Ap yi, ima en segat wulu waga ovara, edumbas hivitas yi vaga ap yi enasiga menda yedok higyo atma, madis inis ‘Enowak Dilisiga menda’ ako at iluk dogop dek imbitirikmu, avyarat hambisogon o,” yagagwa ovara,

⁵ mbas ako inggis weralogo hali hunikmu mabagagi. Hali ninggya hegek, eduven yagan watitek sek welagagi.

⁶ It akoen, “Inggis virimi a, ata mbikit ndun iri dugwit hambigya hamwi a,” yiluk, inil adigat welagagwa ovara, ugun segat halok, “Ap yi, madis higyo,” yiluk, yagagwa.

⁷ Is enggema andok enasin Gubernur inis Pubilius ako eyavup adumu dek horok atma, helagu lagagumu, heyaga wakninipu lagagirik, endawi adenggen vaga erom menaknerelok, ninim sek ninigik, ndugwis henggam welagagup.

⁸ Ako hudi at Pubilius asin amwa dugwit, sogeroges ogagya, irut inim ogagya lagagimu, Paulus ako adema nunggwigya lagagirik, unggul inggis vakbaluk ake samban ogagya lagagimu, sek agagi.

⁹ Sek agya lagagimu, it avakwa is enggema edup welagagwa menda Paulus adema wagu lagagwama, sek okbogogi.

¹⁰ Okbugu lagagimu, it avakwa akomaen, “Sek okbininggas,” yiluk, enadenggen en, yi menda ndi menda woknera wagek yagagwa, eke hivis nit mburis vaga laguluk ogagu lagagumu, yi menda ndi menda dek menda, wolok woknera wagagwa.

O Malata en Oroma lagagwa wene

¹¹ Mburis Alesandiria menda enomadis embeklabwa ininis Diosikuri mburis abi vaga agur-amolok mendarogo bagagwarikmu, wagya lagagirik, o soges ogagya halok, wen is enggema andoma abyam werekma, nit ako saut henggam welagagup. Welagagurik, mburis ako vaga nungguluk, lagu lagagurik,

¹² o Sirakusa ari lagagurik, andoma ndugwis henggam welagagup.

¹³ Ndugwis henggam welagagurik, mburis vaga nunggugu lagagurik, o kota Eregium ari lagagup. Lagu lagagurik, hutun o selatan vikit en havut lavuliluk ogagya halok, nogo ambi yiluk, o Putioli ari lagagup.

¹⁴ Ari lagu lagagurik, nenaswei it Ala aburi andoma menda ninim avuk agu lagagurik, “Ninim dogosogom,” yiluk, yuknirugu lagagwama, ninim samban ambiat welagagup. Anderogo ogarit o Oroma nonggagagup.

¹⁵ It nenaswei Ala aburi Oroma menda ako nit wendagwi enaruk hunggu lagagwarik, o pasar Apius, suvaga lagu dugwit nogo yilagwima inis O Henggam Valek, andenam en wokninivi wagu lagagwama, Paulus il inugu lagagirik, “Nasin Ala wa,” yiluk, endawi adenggen agagi.

O Oroma dugwit, ogagagi wene

¹⁶ Oroma nunggugu lagagumu, at Paulus ako o adikmu dogop sek yagagwa ovara ap ayegen werek ambi malogo dogopwak yiluk bagagwa.

¹⁷ Ndugwis henggam nogo yiluk, Paulus en it Yakuri enasini ap ombok-ombok andoma menda enayonggo bogogi homari wagu lagagwama, yugirigya dugwit, “Nowa-nasin. An nowa-nasin Yakuri menda sovalogo bugu, nenasini-nenombawi ogagu lagagwa ninitok hunik ogasagwi ako, sali-vali erogo bagya, ogagya lagagibuk ovara, o Yerusalem andoma en neyave vagago heda maknitu lagagwarik, it ap Oroma menda en nawene mbalupwak yiluk, neyave wogeragagwa.

¹⁸ An ogagagis adem belanggu lagagwarik, weyak ogaguselok, enasagwi ako menda ambi novaga agetek halok, visilogo banup yiluk ogagagwa ovara,

¹⁹ it Yakuri akoen, ‘Heda visilogo hekbaup moga,’ yiluk, hunik adigat yugu lagagwama, ‘Kaisar en adigat nawene mbalupwak,’ yugeragagis. Yugeragagis ako andi, it nowa-nasin en weyak okbanunggugwa, yiluk, yugirigiluk, yugeregetek. Ata un nawene amburup mbalupwak yiluk, yugeragagis.

²⁰ Wene andi yukheragiluk, wagya lagirik, ‘Warupwak,’ yiluk, henayonggo bagi. Eke, nit Iserali nenape wenggelek agurik nenagap wendarisiga menda ako vaga mbusi heda maknitugwa wene yukheragiluk henayonggo bagi,” yiluk, yugeragagi.

²¹ Yugirigya lagagimu, it akoen, “Hat ogagagin wene Yudea en dirup warogo lakba waga ambi hegetek. Eke, nit nenaswei andoma en wagu lagarwik, Paulus weyak anderogo ogaga, yiluk, yuknera wagetek ovara,

²² avakwa yi awi ndi awi ovok en hit wene musek lendagwi menda andi enanggon henombasagwi ninilup atma, hat hendawi nggarogo yiluk yagaliga ako, iri heyaguluk wagyo,” yiluk, yugogogwa.

²³ Eke, “O andi vaga ambi inim yuknerapwak,” yiluk, yagagwa ako amor ari wagya lagagimu, Paulus werekma eneyave wisane homari wagu lagagwama, Paulus ako o hutun en Nenowa Inis Ombok Ala en denogo bagagi avema dogop wene ako sigam erogo yugirigya, eke, Yesus wene ako des erogo inilup arupwak yiluk, Ala wene Musa dirup watigi wene inim, navi-navi wene inim, mbilinogo yugirigya, wisane ogagya hegek, o hup agagi.

²⁴ Yugeragagi ako it ninen, “Avyarat ai?” umbutugwa ovara, it ninen andi, avyarat embetetek dugwit,

²⁵ wene visibaik-danggabaik yugu lagagwarik, wuluguluk ogagusigik, Paulus en atok vaga yugeragagi ako yi: “Averiniki en navi Yesaya yugugu hegek hit henombawi yugeragagi ako andi, avyarat yugogogi. Andi:

^26-27 ‘It avakwa yi inil hugwi, enaruk hunggwis, enendawi dibetaluk nadema wagwi, ogaguselok, Anen sek oginipu neyaoen, iren “Nenendawi anye helep ovagak agwi, ninaruk nggulup agwi, ninil huvulagwi, ogarusogom o,” yiluk, mikhedagagwarikmu, “Henaruk hunggik adigat ogarusogom ovara, dibasogombuk, eke, hinil hegek adigat ogarusogom ovara, yedok hasogombuk,” yiluk, yugeregek elak,’” yiluk, Yesaya wene ako yugirigya lagagirik, ambi inim yugirigya dugwit,

²⁸ “Anderogoma, Ala en nenagap wendarup wene yi ako andi, it weram Yakuri dek menda hulupwak yiluk yugeregek lasogom atma, it andi, hulusogom hinilup arovovok yiluk yukheraliga,” yiluk, yugeragagi. [

²⁹ Wene andi, yugirigya lagagimu, it Yakuri menda ako wenemuk yagan wunggugwa.]

³⁰ Tahun mberen elola en, o sidok dogop onggo bagek ogagya akoma werekma, at adema waguselok, ovok erogo endawi sek vaga woginipu lagagirik,

³¹ alon dek dugwit Nenowa Inis Ombok Ala en denogo bagagi avema dogop wene ako yugirigya, Nenowa Inis Ombok Yesus Keretus wene mamulirigya, vagalogo yugirigya hegek, yeok-teok okbagetek welagagwa.