Lakbogogi Wene 27 - ALA WENE HIVIS DIRUP WATUGWA

Mburis vaga lagagwa wene

¹ O Italia woknenombolok laup yiluk wene mbabaluk, Paulus inim, ap nin heda mago inim, at Kaisar avema menda yegen werek enowa inis Yulius en wogonombolok lapwak yiluk, yugogogwa.

² Yugugu lagagwama, mburis ombok o Adaramitium en wagya lagagirik, andoma werekma, o Asia inamut ombok yanggadek laut omban vaga kota andoma ya nonggegek ogagyama, nonggagagup. Ap Aritakus o Makedonia awi Tesalonika menda ninim nunggugu lagagurik, lagu dugwit,

³ hutun en nogo yiluk, o Sidon ari lagagup. Ari lagu lagagurik, at Yulius akoen Paulus abwa imbita dugwit, “Haswei yi menda ndi menda wokhirupwak yiluk biginigik lagya dogomindik, warup sek aro,” yugogogi.

⁴ Mburis vaga nungguluk, andoma en lagusim havut en mburis abi nomalhegek iri dugwit, nomaliluk lagya lagagimu, o Sipurus ninil malhegek alilis o havut dekma, andoma lagagup.

⁵ Lagu lagagurik, o Kilikia, Pambilia inim, ninil malhegek lagu dugwit, o Likia kota Mira andoma ari lagagup.

⁶ Andoma ari lagagurik, werekma, ap enayegen werek enowa akoen mburis Alesandiria menda ambi, o Italia lagiluk ogagya higya lagagirik, mburis andi vaga mabininggu lagagimu, lagagup.

⁷ Lagu dugwit, mburis ako havut en nomaliluk lagek-wagek ogagya dugwit, mondok meyan okninipu hegek, nogo wisane yigik, o Kinidus vanggo yi lagagup. O havut ako hunik anderogo adigat ogagya halok, dilwarit lagu dugwit, o Kereta alilis andoma o Salomone ninil malhegek lagagup.

⁸ Lagu lagagurik, mondok meyan okninipu hegek, o inis Mburis Wadokdek Adigat Agarikmu o, yagalagwima o kota Lasea horok andoma ari lagagup.

⁹ Suvaga ya nogo yigik lagu ninigik, it Yakuri Hari Puasa adenggen ogagu lagagwarikmu o havut endengga ogasigama, mburis vaga laup alonedok werek agya halok, Paulus en inilup arupwak yiluk yugirigya dugwit,

¹⁰ “Naswei o. Nit lasogom halok, mondok weyak okninivisogon higi. Nenangge inim, mburis inim, ako adigat dek arisogonbuk. Ata, neneyave inim dek okninivisogon higi,” yugeragagi ovara,

¹¹ at yegen werek Yulius akoen Paulus iris ako meyan imbita lagagirik, at mburis eyave wolok naliga menda ako inim, at amburis werek inim, it yugwi adigat musek lagagi.

¹² Lagya lagagimu, o soges ogagyama, mburis andoma dogop meyan agya lagagimu, it nin wisane mbikit andoma en lakluk o Venikis dogop, umbutugwa. O is enggema Kereta o Venikis mburis nunggwisigama andi, mo huruk yagaligama amot vikit inim, hware vikit inim, ogarekma o soges hegek dogop sek o, umbutugwa.

¹³ Anderogo umbutugwa ovara, o selatan vikit en havut anyedek mbauk-mbauk wagya lagagimu, “Nit yerogo ogagya hegek laup imbitoma, lauk en,” yiluk, mburis is wolok lagwi en yiluk mbusi wombalek agarik ako nggolalogo mburis vaga baluk lagu lagagurik, o Kereta horok is omban vaga andoma ninil wombalhegek lagagup.

Mburis inim sopalinivup ogagagi wene

¹⁴ Lagusim, iya erogo lagetekma, ndom is enggema mo il daga wandigama amot vikit en havut endengga lavuliluk wagya hegek,

¹⁵ laguluk ogagagup ovara, mburis ako abi nomaliluk lagek adigat ogagya lagagimu, “Woknenombolok lapwak aro,” yiluk, yugu lagagurik mburis ako lek-yamuk ogarit wolok lagya hegek, mbauk mbup yagagup.

¹⁶ Woknenombolok, wen ilim is enggema maduk ambi inis Kauda alilimu andoma lagu lagagurik, havut en meyan okninipu hegek, mburis ombok akoen maduk ambi heda likhelok lagyama, libilogo lagya haoen,

¹⁷ viyalogo mburis ombok vaga mabagagup. Mabagu lagagurik, mburis ombok ako eyave yanggo iri haoen, heda anye erogo makbaluk, o Siritis alilimu andoma en mburis abi yinggi-vaga denggwes yilagya haoen yiluk, enalon en yum havut wasiga menda sivinik ako owatu lagagumu, havut en adigat woknenombolok lagagi.

¹⁸ Havut endengga en mburis ako mondok lek-yamuk okninipu lagagimu, ndugwis ambi nogo yiluk, hutun en yi menda ndi menda yidik ako hudilogo ima wombabagagwa.

¹⁹ Andi okbaluk, ndugwis henggam vaga, mburis sek ogasagwi ako menda nin andi bagu dugwit, nin andi anggin halok ininggi-vaga wogogo ima wombabagagwa.

²⁰ Ndugwis wisane ninigik, mo il inim, dadiwap inim, wulu wagetek hegek, havut adigat ogagya lagagimu, “Ai, nit is en ndokalninivisogon atma, nenagap wendakhedaup meyanat higyo,” yiluk, umbutugup.

²¹ It ovok erom nenggetek ndugwis wisane welagagwama, Paulus ilim mendek iri lagagirik, yugirigya dugwit, “Naswei o. O Kereta en laup dek yukheragagis ako hulilipmu en nenangge dek agya, weyak okninipu, anderogo okbininelapuk enewogo duklu ovara,

²² heneyave ambi is mondok-mondok wambusogombuk. Mburis adigat weyak arisogon atma, henendawi wadokdek dogovovok yiluk, yukheraliga.

²³ An Ala abut atma, avema dugwit, at eyavup ogasiga akoen yonggo lakbisa wandiga menda malaikat ambi hup ilikis nadoma lakba waga ako, yuknugu dugwit,

²⁴ ‘Paulus wai. Halon habuk. Hat Kaisar adema mendek yisogonma, Ala habwa en hinim mburis vaga agipik yi, hat vaga ovok enagap wendarisogon,’ yiluk, yuknigas atma,

^25-26 wen is enggema ambi vaga mburis abi denggwes yimi ovara, Ala en yuknigas andi avyarat arisogon ombasigama, henendawi wadokdek dogones, naswei,” yiluk, yugeragagi.

²⁷ Is ombok yanggadek laut inis Adiria o havut en lek-yamuk okninivit lagya hegek, ndugwis 14 welagagurikmu, eke, o hup ilikis agya hegek, it mburis wolok nelagwi menda ako, enendawi en, “Is omban vaga mondok horok ari wagyo,” yiluk, umbutu lagagwarik,

²⁸ helep heda magogo, “Is agurukmu ngga hudi hamwi?” yiluk, wakhegek ako wombabagu lagagwarik, aguruk 37 meter hudi agya hagagwa. Andi okbaluk, ambukum dukluk wakhugu lagagwarik, aguruk 27 meter hudi agya hagagwa.

²⁹ Hugu lagagwarik, helep vaga hop iri dugwit, abi denggwes iri haoen, enalon en mburis mbup yupwak yiluk, mbusi anggin werek menda 4 hudi mburis elakamu heda magogo is endawima wombabagu lagagwarik, “O hodorogo yanggo irik,” umbutugwa.

³⁰ Umbutu dugwit, it mburis wolok nelagwi menda ako enagap wendakhedaguluk hoda wulup umbutu dugwit, hulugat mbusi anggin werek menda sivinik ako mburis abima en is endawima wombabaup yagagwa ovara, wuluguluk mburis maduk ako ima wombabaguluk ogaguselok, Paulus en yedok inugu lagagirik,

³¹ “It mburis wolok nelagwi menda yi, mburis elola dogop dek halok andi, nenagap wendakhedasogombuk,” yiluk, at yegen werek aori inim yugeragagi.

³² Yugirigya lagagimu, it yegen werek akoen mburis maduk ako is wolok lapwak yiluk, heda mbalogo wombabagagwa.

³³ O yanggo yigiluk ogagya hegek, Paulus en it ako erom napwak yiluk ane ngges erogo yugirigya dugwit, “Erom nenggetek henendawi anggin hinigik, ndugwis 14 hudi nogo yigik wagipikmu, erom nanes.

³⁴ Erom nelok, henanye vaga henagap wendakhedelok wolovovok yiluk, erom yi nanes. Hiniris enggen ambiat ogo dek arisogonbuk.”

³⁵ Yugirigya lagagirik, erom ambi wokbaluk it inivaga, “Ala wa,” yiluk, ugurogo ninggya lagagimu,

³⁶ it enendawi hora yiluk, ovok erogo inim erom nunggugwa.

³⁷ Nit avakwa mburis vaga lagagup ako, neneyave dambulik 276 hudi.

³⁸ Eke, erom enagaum erogo nunggu lagagwarik, mburis seyo arupwak yiluk, erom gandum awi yidik ako hudilogo ima wombabagagwa.

Mburis yinggima dililup yi lagagi wene

³⁹ O yanggo iri lagagimu, o andoma inunggut ovara, wen is yinggi leyalek inil hugu lagagwarik, “Mburis vaga andoma nduk erogo lasogom,” yiluk,

⁴⁰ mbusi heda mago ako mbalogo hekbagwi, mburis abi amot ogasiga menda elakas vokot sivinik ako visinggwis, ogagagwa. Okbaluk, havut en woknenombolok yinggi leyalekma lapwak yiluk, yum sivinik abima ilikbagu lagagwama, lagagup ovara,

⁴¹ is anye en mburis ako yinggima aguruk dekma dililup yi lagya lagagimu, is ombak en elakamu ndino-ndano adigat ogagya dugwit, mburis elakas ako yanggalagya hegek,

⁴² it enayegen werek akoen, “It ap heda mago ako sambu vaga wunggu saoen, ovok inarusogom,” umbutugwa ovara,

⁴³ it enayegen werek enasin akoen, “Paulus agap wendarisogon,” imbita dugwit, “Enarubuk,” yugeragagi. Yugirigya lagagirik, “Hit sambu wasagwi hinilup halok, henendak is endawima andoma soklok wambuluk, sambu vaga, is ombanma andoma wilitales.

⁴⁴ Eke, hit nin sambu wasagwi hinunggut halok andi, mburis hobat masalek inim, yo masalek inim, andi vaga hininggis vakbaluk, enambukmu elales,” yiluk, yugirigya lagagimu, nit ovok sek is ombanma ari wunggugup.