Lakbogogi Wene 26 - ALA WENE HIVIS DIRUP WATUGWA

Paulus en Agiripa adema yugeragagi wene

¹ Yugirigya lagagimu, at Agiripa en Paulus yugugu dugwit, “Hat ogagagin ako iru,” yiluk, yugugu lagagimu, Paulus agap wendakhedagiluk wene adem sigam erogo avyarat yugeragiluk, inggi-vaga, “Mbauk dogones,” yugirigya lagagirik,

² “Ai, nasin hinis ombok Agiripa wa. It Yakuri en, ‘Yerogo ogagagi, nderogo ogagagi,’ novaga banilagwi andi, o yogak hat hivaga vagalogo yukhirisogon andi, nendawi adenggen agirik.

³ Nit Yakuri ogasagwi menda inim, wene ngga menda yidibaluk yagalagwi inim, hat ovok hilup atma, yegek lagya neyagek, hendawi sagain vaga haruk holek dogonyok yiluk, yukhisiga, nasin.”

⁴ “O muk avyak madukma nawi adem vaga dugwit, ogarit lagya, andi okbaluk, o Yerusalem dugwit ogagya, ogagya lagagis ako, it Yakuri menda ovok inilup.

⁵ Nit Yakuri wene wokbaluk ogasagwi menda andi, it nin enane anye vaga yagan nagu lagagwa Varisi menda ako, an ogo it ninim yagan nagu lagagis ako, o muk erogo inilup atma, vagalogo yukneraup embetao halok andi, yukherapwak.”

⁶ “Eke, yogak Ala en nenasini avyarat nggatuk erogo yugeragagi ako wene nape wenggelek agirik andi vaga woknombolok nawene diluguluk, bani wagao inigis.

⁷ Avyarat nggatuk erogo yugeragagi ako nit Yakup aburi nininis unggul 12 akoen, ‘Atma arisogon, ai!’ yiluk, umbutu dugwit, o hup-dingga, nenendawi enggen vaga, Ala siyabelagwi. An ogo wene andi, nape wenggelek agirik andi vaga it Yakuri en naruguluk, wene novaga belagwi atma, nasin!

⁸ Anderogo atma, hit nggarogo yiluk At Ala en avakwa hambisagwima en iniluk erogo mondok okbisaup andi meyan ombasagwi?”

⁹ “Eke an ogo endak At Yesus Nasaret menda andi, inis wiyiknom-weyaknom erogo baup sek imbita lagagirik,

¹⁰ o Yerusalem dugwit, anderogo ogagya lagagis. Ogagya dugwit, it ap imam-imam enasini akoen yuknogogwa vaga it Ala aburi adik denek eneyave wisane heda marogo lembaga mabisa lagya, eke, ‘Enarup a, dek a?’ yuguselok, anen, ‘Enarup-at,’ yugirigya, ogagya lagagis.

¹¹ It Yakuri samban ogasagwima enadik-enadik edup-mbedup okbugu, eke, ‘At Yesus inis wiyiknom-weyaknom erogo bas,’ yiluk, nane anye vaga yugirigya, ogagya lagagis. It avyarat ombasagwi andi, mondok nanggon inimbita dugwit, naninis ane yagan lagya neyalok, avakwa nin wisane enamwa o adumu andoma-at enarigiluk, enamusek-enamusek nagu lagagis,” yiluk, yugeragagi.

¹² Yugirigya lagagirik, “Anderogo ogarit lagyama, ndugwis ambi vaga it imam-imam enasini en, ‘Anderogo ogarup o,’ yiluk, lakbanunggu lagagwama, o Ndamasik suvaga lagya dugwit,

¹³ dingga naswei ninim lagusim, mbogot vaga en abinak yevedogo nit nenadema wambu wagagi. Mo il abya andi horok maduk, nasin. Eke, andi ogagagi ako, abya mondok eve iya erogo ogagya higya lagagirik,

¹⁴ nit ovok wen vaga ndun yugu lagagumu, Iberani enane vaga yuknugu dugwit, ‘Saulus wai. Saulus wai. Hat nggarogo yiluk An anggin-mbanggin erogo nasiga? Hat ninim ogorek dogosogon halok, hat hivis hilup arisogon atma, hat nggarogo yiluk anderogo ogarit landiga?’ yiluk, iris naruk hunggu lagagirik,

¹⁵ ‘Ai, Nasin. Hat sa?’” “Yugugu lagagimu, ‘Dek. Haren anggin-mbanggin erogo narit landiga ako An Yesus aro.

¹⁶ Hat nayeloman akluk, yogak ogagya neyagen inim, hivis ogarit lagya dogop yukhirisogon ako inim, wene andi menda yugeregek lagya dogop denogo bagagiluk, yukhiri wagi atma, mendek iru.

¹⁷ It ap Yakuri inim, it weram Yakuri dek menda inim, enadema lakbagamima, it andoma en weyak okbagaguselok, hagap wendatya dogosogon.

¹⁸ It o hup ovagak agarwik ako, inil venggenogo bisiluk, awiyama nunggu wagwi, eke, at Sile avema bogogirikmu en wulukluk, Ala avema nunggu wagwi, ogarupwak yiluk, lakbagasogon. It ako enendawi novaga vanggabaluk avyarat numbutuselok, enomaduk Ala en degerogo bisiluk, At aburi denogo bogogirikmu inim lobalogo bisapwak yiluk, lakbagasogon,’ yuknogogi,” yiluk, yugeragagi.

Paulus ogagya lagagi ako mbilinogo yugeragagi wene

¹⁹ Yugirigya lagagirik, Paulus en ambi inim yugirigya dugwit, “Nasin Agiripa. Mbogot vaga en an nogo heda nabi heda sigam yuknugu hagagis ako, an ogagetek agirikbuk.

²⁰ Yuknogogi ako endak erogo it o Ndamasik agarwik ako yugirigya, o Yerusalem agarwik ako yugirigya, andi okbaluk, o Yudea avilis ambot inim, it weram Yakuri dek menda inim, yugeregek lagya, ogagya dugwit, ‘Hit ovok henasam helok, henomaduk vagalogo mbobagu dogones. Eke, henomaduk mbobaluk, Ala amusek lagwi avyarat henombarupwak yiluk, yi ogagek ndi ogagek sek adigat ogarit lagu dogones,’ yiluk, yugirigya lagagis.”

²¹ “Anderogo yugeregek lagya lagagis andi vaga it Yakuri en Ala awi valekma andoma vakbaniluk, naruguluk ogagagwa ovara,

²² o endak en yogak hudi, Ala en yonggat-nitya hegek niluk dugwit, it ap ininis werek inim, ininis dek inim, yugeraliga. Yugeraliga andi, wene adik menda ambi yugeregetek. Ata, ap Ala en yugirigya hegek yugurugu lagagwa navi-navi ako inim, at Musa inim, ‘Anderogo ogarisogon o,’ yiluk, avok yugurugu lagagwa wene akoat vagalogo yugeraliga.

²³ ‘At Ala en denogo mondok okbagagi Keretus ako, nit Yakuri menda inim, it weram Yakuri dek menda inim, o awiya erogo bugu dogogiluk, yagan warogo hambigya dogomindik, hambuluk lendagwima en endak iluk akluk mendok yisogon o,’ yiluk, yugu lagagwa ako yugeraliga,” yiluk, yugeragagi.

²⁴ Paulus en wene andi ao yugirigya hegek, at Vetus ako ane ombok vaga iri dugwit, “Paulus wai. Hat nenek heyaliga! Yi wene ndi wene mamulhedegek lagya vaga nenek ovagak yagan lagya heyaliga.”

²⁵ Yugugu lagagimu, Paulus en, “Hinis mondok siyalek agindik nasin Vetus wai. An nenek dek. An nendawi sek vaga avyarat yukhisiga.

²⁶ Nasin Agiripa wai. An wene yugeraliga ako, mbauk hwilago yugirigya lagibuk. Wene an yugeraliga ako andi, hat nasin Agiripa ogo, hinggut agindikbuk, ovok hilup ombasiga. Wene andi ovok hilup atma, nalon dek dugwit, yukhisiga.

²⁷ Nenasin Agiripa. It ap navi-navi Ala en yugirigya hegek yugurugu lagagwa wene ako, hat avyarat ombasiga a, dek a? Avyarat ombasiga andi an nilup.”

²⁸ Yugugu lagagimu, at Agiripa en Paulus yugugu dugwit, “O yogak yi vaga-at un mbikit an ap Kerisen menda okbanup embeten?”

²⁹ Yugugu lagagimu, at Paulus en, “Nasin o. Hat hadigat wanok yiluk yukhisigadek. Hat inim, it yogak hulisagwi ovok erogo inim, an heda maknetao hak makhinivup dek ovara, an Keretus wene wagagis hak, hit waup sek. Yogak waup halok, yogak-at wugwi, eke, hivis waup halok, hivis-at wugwi, ogarovovok yiluk, an henake Ala yugisiga,” yiluk, yugogogi.

³⁰ Yugugu lagagimu, enasin inis ombok Agiripa ako inim, enasin Gubernur ako inim, hwa Berenike inim, it avakwa horaik welagagwa ako inim, ovok mendok yiluk,

³¹ wunggu lagagwarik, “Weyak ogaguselok, lembaga mabugwis, initwis, ogasagwi menda anderogo ambi ogagetek higyo,” yiluk, ambi yugigik ogagu lagagwarik,

³² at Agiripa en Vetus ako yugugu dugwit, “At ap andi, ‘Nasin Kaisar nawene amburup mbalupwak o,’ yilipuk en, yogak heda mago agarik ako visilogo balip,” yiluk, yugogogi.