Lakbogogi Wene 24 - ALA WENE HIVIS DIRUP WATUGWA

It Yakuri menda enane Paulus ovaga bagagwa wene

¹ Nogo 5 yikbaluk, ap imam inis ombok Ananias inim, it Yakuri enasini ap ombok-ombok inim, ap Oroma wene hobalek ilup it Yakuri enavikit agagi menda inis Terutulus inim, akoen enowa Gubernur adema lagu lagagwarik, “Paulus weyak ogagagi ako yi o,” yiluk, wene yugogogwa.

² Yugugu lagagwama, Paulus warupwak yiluk ayonggo bagagi ako wagya lagagimu, at Terutulus en, “Paulus ogagagi ako yi,” yiluk, Gubernur yugugu dugwit: “Ai wa! Nenasin Velikis hat o muk en yogak yi hudi nenengge heyagek nenendawi ugun adenggen vaga agurik. Hat wene sek adigat hulisiga vaga, o yoma ovok nenake sek erogo bininggigin.

³ Yi awi ndi awi yi ogagek ndi ogagek mot-mot adigat ogagya heyalok, Nenasin Velikis, wa! yukhisagwi.

⁴ An wene adup yagan lagya neyalok, hanggon okhitya haoen, dul erogo iri neyagek, hendawi sagain vaga haruk hunggu dogonyok yiluk, yukhisiga o.”

^5-7 Iri lagagirik, “Ap yi, avakwa nadok-hadok oginivit lagya dugwit, it Yakuri yi awi ndi awi ovok erogo enendawima malit lagya helagwi. Ap Nasaret menda ane welagwi ako enasin arat. Eke, Ala awi valekma weyak erogo bagiluk ogagyama vagatup.

⁸ At yerogo ogaga, nderogo ogaga, yiluk, wene ovaga bagyo ako, ovok erogo hat des erogo adem senggu dogomindik, ‘Avyarat weyak ogaga,’ ombarisogon.”

⁹ Yugugu lagagimu, it Yakuri homagagwa akoen ogo, “At wene ovaga bagas andi, avyarat higyo,” yiluk, yugogogwa.

Paulus en Velikis yugogogi wene

¹⁰ Yugugu lagagwama, it enasin Gubernur ako inggis wene vaga, “Hat iru,” yugugu lagagimu, Paulus akoen yugugu dugwit, “Nit avakwa Yakuri menda ovok haren ninawene amburup mbanggya heyagek, yi tahun ndi tahun oklaga an nilup atma, nalon dek dugwit, an wene novaga bagao ako vagalogo yukhisogon.”

¹¹ Yugugu lagagirik, “An ndugwis 12 hudi endak vaga o Yerusalem samban ogarigiluk lagagis andi, haren, ‘Yi avyarat yuknigas,’ embetetek halok, it avakwa hemerinisaup sek aro.

¹² An andoma dugwit, Ala awi valekma ninim wene watya, eke, it Yakuri samban ogasagwima inim, o kota Yerusalem inim, andoma ap homago nane-hane yagan lagu dogopwak yiluk enendawima manggu, anderogo ambi ogagya neyagetek.

¹³ Eke, yogak wene an novaga banilagwi andi ogo, adem dek hegek yagalagwi atma, hat avyarat ombarinyok yiluk yukhisagwi andi, adem degat hayogon o, nasin.”

¹⁴ “Ala wene Musa dirup watigi inim, mbuku navi-navi vaga dirup warek ako inim, ovok erogo avyarat ombasigama, Sup Yesus Ambetaga Lagu Dogop Wene ako musek landiga andi, it Yakuri menda akoen, ‘Wene andi huluk wene aro,’ yiluk, yagalagwi ovara, an wene andi ndatak musek lagya dugwit, nenombawi Enasin Ala siyabaliga, andi avyarat vagalogo yukhisiga, nasin.

¹⁵ It weyak ogasagwi menda inim, sek ogasagwi menda inim, hambuluk lendagwima Ala en iniluk erogo mondok okbisaup, nape wenggelek agirik andi, it ogo enape wenggelek agarwik.

¹⁶ Anderogo atma, Ala inim, avakwa inim, inivaga an okbisayogon vaga nendawi ugun seyalek ogagya dogogiluk dibaluk ogasiga.”

¹⁷ “Eke, tahun maren hudi o hunogoma welagagirik, an naswei Yakuri menda enabwa en un wogeraup inim, Ala ake bago inim, wolok neyami vaga o Yerusalem wogera lagagis.

¹⁸ Wogera lagya lagagirik, Ala awi valekma avakwa wisane ninim homagetek, nadok-hadok ogagetek, an adat vaga hotbaluk neyagek,

¹⁹ it ap Yakuri Asia menda nin andenam inigis akoen, an ambi ogagya neyaguselok, iren hat hivaga enane novaga banup sek ovara, nanggadi wakbani wagaobuk!

^20-21 Yi wene ndi wene yugirigi vaga dek. Ata, it wisane inivaga, ‘Nit hambuluk niniluk erogo mondok yup andi, nenape wenggelek halok, nawene mbaluguluk wagu hinigis,’ yiluk, wene maduk andi nane ombok vaga yugirigi andi nilup ovara, weyak ambi inim ogagya neyaguselok, iren adigat vagalogo yukhurupwak,” yugeragagi.

²² Yugirigya lagagimu, Velikis akoen Sup Yesus Ambetaga Lagu Dogop Wene yagalagwi ako, des erogo ilup werekma, “Hivis it enayegen werek wisane homago enasin Lisias ako wagya halok, awene an amburup mbalisogon atma, wilitales.”

²³ Yugirigya lagagirik, at enayegen werek enowa ako yugugu dugwit, “Paulus andi, heda mago hak enewogogo vagago werekma, aswei en ake wogori waguselok andi, sek, yugerano,” yiluk, yugogogi.

Ap Velikis ogwa inigik, yugeragagi wene

²⁴ Ndugwis maren hudi welagagwarikmu, Velikis ogwa Durusila hwa Yakuri menda iperen wagagwa. Wagu lagagwarik, Paulus warupwak yiluk ayonggo bagya lagagimu, wagya lagagirik, Yesus Keretus avyarat ombasagwi wene iris enaruk hunggugwa.

²⁵ Eke, Paulus en sek adigat ogagu dogop wene inim, enendawi en ogarup oginivisiga ovara, sovalogo baup wene inim, hivis enowak dilinivup wene ako inim, yugirigya lagagimu, at Velikis ako alon agya lagagirik, “Ovok yugurikmu, elak. Ndugwis ambi vaga yup nanonggal werek agya halok, warinok yiluk yanggup yukhisogon,” yiluk, yugogogi.

²⁶ Andi yugogogi ako, “Heda mago ako visilup onggo woknirupwak,” yiluk, ape wenggelek dugwit, Paulus eyanggup yugugu dogomima, wagya halok, iperen wene mbanggwis ogagu lagagwa.

²⁷ Anderogo ogagya lagagimu, tahun mberen okbaluk, at Velikis avoloma Perikius Vetus mondok okbagagwa. Eke, at Velikis en, “It Yakuri enendawi hunik nombarupwak o,” yiluk, Paulus heda mago ako visilogo wibagetek hegek winggigi.