Lakbogogi Wene 23 - ALA WENE HIVIS DIRUP WATUGWA

¹ At Paulus ako wolok, ilim mendok okbagya lagagimu, it wene amburup mbalisagwi menda ako il vurek dugwit, “Naswei o. An Ala avema dugwit, o muk en yogak yi hudi ogarit lagya dugwit an ogagya lagi ako ambi weyak ogagetek nendawi ugun seyalek-at agirik o.”

² Yugeragagi ako vaga, at imam inis ombok winimen agarik Ananias en it ap Paulus adema mendek welagagwa ako yugirigya dugwit, “Abis sagalogo wares,”

³ yugirigya lagagimu, Paulus akoen at yugugu dugwit, “Yo eyave weyak hegek agamut vaga adigat amburup sek erogo warek agarik hak, hagamut adigat sek agindik yi, Ala en mondok harisogon. ‘At Ala wene Musa dirup watigi ako wane-wane ogaga a, dek a?’ yiluk, nawene amburup des erogo mbaluguluk horaik agindik ovara, an narupwak yiluk ap yugeregen andi vaga haren Musa wene ako weyak erogo bagya heyagi o,” yugogogi.

⁴ Yugugu lagagimu, Paulus adema welagagwa akoen at Paulus yugugu dugwit, “Hat Ala ayeloman ap imam nenasin inis ombok yi meyan imbita dugwit, yagaliga yi?”

⁵ Yugugu lagagwama, at Paulus en, “At imam inis ombok winimen agarik ako andi, ninggutmu yigi o, naswei. ‘Avakwa enasin hinim agarik ako, henane weyak at ovaga babuk,’ yiluk, dirup warek agarik ako an nilup aro,” yugeragagi.

⁶ Yugirigya lagagirik, at Paulus akoen it wene amburup mbalisagwi menda nin andi, Saduki menda, it nin andi, Varisi menda inim, werek yedok inugu lagagirik, “Naswei. An ap Varisi menda aro. Eke, nasini ogo Varisi menda adigat. Nit hambuluk niniluk erogo mondok yup wene andi, avyarat arugwi atma yiluk, nape wenggelek neyalok, nawene amburup mbaluguluk agipik hinigis,” yiluk, ane ombok vaga yugeragagi.

⁷ Yugirigya lagagimu, it Varisi menda inim, Saduki menda inim, winimuk yugu lagagwarik, it homagagwa ako, ir-it ogot hedagagwa.

⁸ (It Saduki menda akoen, “Avakwa hambuluk iniluk erogo mondok yusogombuk. Malaikat inim, avakwa enanggela inim, andi ogo mondok degat agarwik o,” yagalagwi ovara, it Varisi menda en, “Andi ovok erogo agarwik, eke avakwa hambuluk iniluk erogo mondok yusogom,” yugu dugwit, inim ogot hedagagwa.)

⁹ Ogotbaluk, enane yandyak-handyak yugu dugwit, it Varisi menda Ala wene vagago welagagwa ninen, mendek yiluk yugurugu dugwit, “At yi, weyak ambi ogagetek higyo o. Avakwa enanggela ambien yugogogi vaga yagaliga a, malaikat ambien yugogogi vaga yagaliga a?” yiluk, enane winimuk ombok erogo yagagwa.

¹⁰ Enane winimuk yugu dugwit, it wene ombok alelo watuselok, it ap enayegen werek enasin en Paulus nggigilogo watu saoen, at aori ako yugirigya dugwit, “It homago enanggelekma wa nunggugu dogomundik, eyave wolok o nit nenamwa akoma mabelales,” yiluk, yugirigya lagagimu, ndatak ogagagwa.

¹¹ Nogo yiluk, heveret hup at Paulus akoma werekma, Nenowa Yesus at adema wagya lagagirik, mendek dugwit, “An Yesus Henowa Inis Ombok dogogiluk Ala en denogo baninggigi wene ako o Yerusalem des erogo yugirigya lagen ako wane-wane, hivis o Oroma andoma yugeregek laup atma, hendawi wadokdek dogwen,” yugogogi.

Paulus waruguluk avok mbinggugwa wene

¹² Hutun o yanggo iri lagagimu, it Yakuri menda homakbaluk wene mbauk erogo mbanggu dugwit, “At Paulus watitek dugwit, nit erom inim, is inim, mondok nasogombuk,” yiluk, Ala inis vaga hanum mbanggugwa.

¹³ It eneyave dambulik 40 nin inim homakbaluk, eyave waruguluk avok mbinggugwa.

¹⁴ Avok mbinggu lagagwarik, it ap imam-imam enasini ap ombok-ombok ako inim, it Yakuri enasini inim, werekma, enadema lagu lagagwarik, yugurugu dugwit, “At Paulus watitek dugwit, nit yi menda ndi menda mondok nasogombuk o, yiluk, Ala inis vaga mondok hanum mbanggup.

¹⁵ Andi atma, yogak hit inim, it wene amburup mbalisagwi menda inim, un huluk Paulus ambi inim des erogo aigwakma wapwak yiluk, ap enayegen werek enasin akoen wolok warupwak yiluk, yonggo lakbisamima yuguri lagusigik, nit suvaga hanjalek werekma, wolok yoma ari wagetek inigik, suvaga andenam wakbasogom,” yiluk, yugeragagwa.

¹⁶ At Paulus waruguluk suvaga hanjali laup yagagwa ako ambonggo en aruk hunggu lagagirik, at Paulus it enayegen werek enamwa werekma nunggwigya lagagirik, hurimbis yugogogi.

¹⁷ Hurimbis yugugu lagagimu, at Paulus akoen it enayegen werek enasin avema menda ambi, yanggup yugogogi wagya lagagimu, yugugu dugwit, “At apsawe yien, henasin wene ambi yugirigiluk wagarikmu, wolok elak.”

¹⁸ Yugugu lagagimu, apsawe ako wolok it enasin adema balagya lagagirik, yugugu dugwit, “At Paulus heda mago ako, neyanggup yuknugu lagama, lagya lagirik, ‘Apsawe yien, henasin wene ambi yugirigiluk wagarikmu, wolok elak,’ yuknugu lagama, yukhurupwak yiluk wolok wagi.”

¹⁹ Yugugu lagagimu, enasin akoen apsawe ako inggis vagakluk, enadikmu lagu lagagwarik, mbauk erogo yugugu dugwit, “Hat wene yuknirigiluk wagen ako iru.”

²⁰ Yugugu lagagimu, at apsawe akoen, “It ap Yakuri en Paulus waruguluk hulugat hutun hat Paulus wolok, it wene amburup mbalisagwi menda en ambi inim des erogo aigwakma waup wolok lanok yiluk yukhiri warup wene mbalogo bagarwikmu,

²¹ yukhiri waguselok, enane hulubuk. It Yakuri menda eneyave dambulik 40 nin inim, ‘At Paulus watitek dugwit, erom inim, is inim, nit nasogombuk,’ yiluk, Ala inis vaga hanum mbabaluk hanjalek dugwit, hat iri heyao-at enaruk agarwik,” yugogogi.

²² Yugugu lagagimu, enasin akoen apsawe yugugu dugwit, “Hat yuknigin andi, ap hunogo ambi mondok yugerabuk,” yiluk, aruk wakbaluk, “Elak,” yugogogi.

Paulus Gubernur Velikis adema balagagwa wene

²³ Yugugu lagagirik, it enayegen werek enasin at avema menda mberen eneyanggup yugirigya lagagirik, wagu lagagwama, yugirigya dugwit, “O hup jam 9 vaga o Kaisarea laguluk ap enayegen werek eneyave 200 inim, ap yegen werek kuda ambot-vaga horaik lendagwi menda eneyave 70 inim, eke, ap enaregowa werek eneyave 200 inim, mondok dikduk ogagu dogomundik,

²⁴ at Paulus ako, kuda ambot-vaga horabaluk, enewogogo ap nenowa Gubernur Velikis adema balapwak yiluk yugeranes,” yugirigya lagagirik,

²⁵ vipuk ogagusigik, surat-vaga dirup watya dugwit, yerogo yagagi:

²⁶ “Hinis mondok siyalek agindik nenasin Gubernur Velikis wa. An Kolaudius Lisias en wene ambi yukhisogon.

²⁷ Ap yi, it Yakuri menda en vakbaluk, mondok waruguluk ogagao ovara, ‘An Oroma menda,’ iris ako naruk hobaluk, naori enayegen werek ninim agap wendari lagu lagurik,

²⁸ ‘Adem ngga vaga warup yugu samwi?’ yiluk, wolok it wene amburup mbalisagwi menda enadema lagi.

²⁹ Enadema lagya lagima, iren yugu dugwit, ‘At ako nit Yakuri wene dirup warek yerogo-nderogo ogarup wene saganggas,’ yiluk, yugusigik ovara, ‘Mondok warup. Heda marogo lembaga mabaup,’ yagao andi, adem dek hegek yagao higi.

³⁰ Eke, ‘Warup, avok mbinggao,’ yiluk, yugwi ako naruk hunggu lagirik, mbikit hat hadema lakba wandiga, eke, it enane ovaga bagao ako, vagalogo yukhurupwak en, ‘Yuguri elales,’ yiluk, yugirigi o. An Kolaudius Lisias en yukhisiga, nasin wa,” yiluk, dirup watigi.

³¹ Dirup watya lagagirik, “Wolok elales,” yugeragagi wane-wane it enayegen werek ako o hup Paulus wolok, o Andipatiris hudi balagagwa.

³² Eke, nogo yiluk, hutun en it yegen werek kuda ambot-vaga nelagwi menda akoen Paulus balapwak yiluk, lakbugu lagagwarik, wolok lagusigik, it enayegen werek ako eneyami-vaga enamwa lagagwa.

³³ It kuda ambot-vaga lendagwi menda en Paulus wolok o Kaisarea nunggugu lagagwarik, ap enowa Gubernur ako dirup warek ako wogugu dugwit, Paulus eyave ako at inggimu bagagwa.

³⁴ Dirup warek ako bikhigya lagagirik, “Hat hawi ngga menda?” yiluk, hemethigya lagagimu, “Dek! An nawi Kilikia aro,” yugugu lagagimu,

³⁵ “Enane hovaga lobalogo bagao ako, waguselok, adem belalusogom,” yugugu lagagirik, “Herodes awi ombok valekma wolok lagu dogomundik, malogo dogones,” yiluk, aburi yugeragagi.