Lakbogogi Wene 22 - ALA WENE HIVIS DIRUP WATUGWA

¹ “Nowa-nasin o. Hit wene novaga bagep ako adem mbilinogo yukherayogon, henaruk holek dogwes,” yiluk,

² Iberani enane vaga yugirigya enaruk hunggu lagagwarik, enane ovok mbup yugu lagagwama, at Paulus en yugirigya dugwit,

³ “An yi, ap Yakuri menda. Eke, o Kilikia kota Tarusus endaklagagis ovara, o kota yoma dugwit sawe agagis. Ap Nggamaliel en wene des erogo mamulnugu dugwit, Musa wene nenasini nenombawi ogagu lagagwa ako inim yuknugu lagagi. Yuknugu lagagi andi vaga hit yogak henendawi adenggen dugwit Ala ake yiluk ogasagwi hak, an ogo anderogoat Ala ake yiluk, nendawi dugwit ogagya lagagis.”

⁴ “Ogagya dugwit, it avakwa Sup Iniluk Dogop Wene musek lendagwi ako, enarigiluk anggin-mbanggin oginipu dugwit, ap inim, akwa inim, heda magago lembaga mabugu lagagis.

⁵ An ogagya lagagis andi, at imam inis ombok winimen agarik ako inim, nenasini wene amburup mbalisagwi menda inim, inil neyagu lagagwa atma, iren yukherapwak. Eke, it akoen enaswei o Ndamasik agarwik ako inil hapwak yiluk, dirup warogo woknugu lagagwama, wolok, it ap Sup Iniluk Dogop Wene musek lendagwi ako heda magogo o Yerusalem yoma en anggin-mbanggin okbisauguluk, enamusek o Ndamasik lagagis,” yiluk, yugeragagi.

Paulus avyarat imbitigi ako yugeragagi wene

⁶ Yugirigya lagagirik ambi inim yugirigya dugwit, “O Ndamasik horok ari lagya lagagimu, o dingga supuk erogo mbogot vaga en abya yovalevet higya lagagimu nil amumwis agya dugwit nadema wombaba wagagi.

⁷ Wombaba wagya lagagimu, an wema ndun yi wombagagirik werekma, ane ambi iri dugwit, ‘Saulus. Saulus. Hat nggarogo yiluk anggin-mbanggin erogo narit landiga?’ yiluk, ane yuknugu naruk hunggigis.”

⁸ “Iris naruk hunggu lagagirik, ‘Ai, Nasin. Hat sa?’ Yugugu lagagimu, ‘Dek o. Hat anggin-mbanggin erogo narit landiga Yesus Nasaret menda An aro,’ yiluk, yuknogogi.

⁹ An ninim lagagup ako abya adigat hagagwa ovara, At ane yuknogogi ako andi, dibagetek-at welagagwa.”

¹⁰ “Yuknugu lagagimu, ‘Nasin o. An nggarogo ogarik?’ yugugu lagagimu, At Nasin en, ‘Mendok yiluk, o Ndamasik andoma elak. Andoma nunggwigya heyalok, hat yi ogagek ndi ogagek ogagya dogop Ala hombasiga ako yukhirisogon.’

¹¹ Yuknugu lagagimu, abya yevedogo mo inggis-anggangga ovagak ogagagi vaga nil mbuk agya lagagimu, an ninim wagagis akoen ninggis vaknombolok Ndamasik bani lagagwa.”

¹² “Bani lagagwarik, o Ndamasik andoma werekma ap ambi inis Ananias nadoma wagagi. Ap andi, Ala alon imbita dugwit, Ala wene Musa en dirup watigi ako des erogo ogagya lagagi, it ap Yakuri andoma ovok erogo agayuk wutu lagagwa.

¹³ At ako an nadoma mendek yi wagya lagagirik, ‘Naswe Saulus wai, hil awiya agya dogomindik, yokhanen,’ yiluk, ao yuknugu hegek nil awiya agya lagagirik, eyave hagagis.”

¹⁴ “Higya lagagimu, aren yuknugu dugwit, ‘Nenombawi Enasin Ala endawi ombasiga menda hilup agya, At Endawi Mot Sek Adigat Agarik ako hil higya, eke, At ane iris ako haruk hunggu, ogagya dogonyok yiluk denogo bagagagi o.

¹⁵ Hil higya, iris haruk hunggu, ogagen ako vagalogo yi avakwa ndi avakwa ovok yugeregek lagya dogonyok yiluk, denogo bagagagi.

¹⁶ Eke, yogak andi, hendawi yunggup yegek ogarubuk. Mendok yiluk, ima wombabagasogon. Homaduk ako Howa Inis Ombok Yesus en hotherapwak yiluk, nggino yuguru,’ yiluk, yuknogogi o,” yugeragagi.

It weram Yakuri dek menda yugerapwak yiluk Paulus ayonggo bagagi ako yugeragagi wene

¹⁷ Yugirigya lagagirik, Paulus en ambi inim yugirigya dugwit, “Andi okbaluk, neyami vaga o Yerusalem yoma wagya lagagirik, Ala awi valekma samban ogagyama nogo heda nabi heda higya dugwit,

¹⁸ Nowa Inis Ombok en yuknugu dugwit, ‘An navok vagalogo yugerami ako hulusogom dekma, o Yerusalem hekbaluk, hodorogo o adikmu hunogoma elak.’”

¹⁹ “Yuknugu lagagimu, ‘Nowa o. Avakwa Yakuri samban ogasagwima adik-adik it ap enendawi hovaga vanggabaluk avyarat umbutugwa ako, heda marogo lembaga mabugu, yawi inita, ogagya lagagis ako, inilup.

²⁰ Eke, Hat havok yugirigya lagagi Sepanus ako, watusigik, an andenam dugwit, “At ogo Warup,” nendawi imbita dugwit, sogwesum weram menda nggolalek andenam vagago welagagis,’ yiluk, yugogogis.”

²¹ “Yugugu lagagimu, Nowa Inis Ombok en an yuknugu dugwit, ‘It ap weram Yakuri dek menda agarwikmu o adumu andoma lakbagaup, imbitirikmu, elak,’ yuknugu hagagis,” yiluk, yugeragagi.

²² It avakwa homago ako at Paulus ap weram Yakuri dek menda Yesus wene ako yugeregek laup wene andi iris enaruk hobaluk, “Ap yerogo menda yi, iluk dogop dek. Mondok elese degerogo basogom,” yiluk, enane yandyak-handyak yagagwa.

²³ Enane yandyak-handyak yugu dugwit, sogwesum nggolalogo mbobagwi, mupwak dombok erogo ilik bagwi, ogagusigik,

²⁴ it ap enayegen werek enasin akoen, “Ap yi, o nit yegen werek menda nenamwa mabagu dogomundik, mbup yawi watu dugwit, adem ngga ogaga vaga warupwak yiluk yandyak-handyak yagalagwi ako, aigwakma womanes!”

²⁵ Aori yugirigya lagagimu, wolok lagu lagagwarik, yawi warupwak yiluk heda magu lagagwama, it ap enayegen werek enasin avema menda ambi o andenam werekma, Paulus en at yugugu dugwit, “Hiren ap Oroma menda sek ogaga weyak ogaga owak dibagetek dugwit, yawi initu dogop wene hobalek ambi werek a, dek a?”

²⁶ Yugugu ako aruk hobaluk, at ayegen werek ako asin adema lagya lagagirik, yugugu dugwit, “At ap andi, Oroma menda atma, hat nggarogo ogarup yiluk yagaliga?” Yugugu lagagimu,

²⁷ Paulus adema lagya lagagirik, yugugu dugwit, “Hat Oroma menda avyarat a? Yukniru.” Yiluk, hemethigya lagagimu, “Avyarat,” yugogogi.

²⁸ Yugugu lagagimu, it enayegen werek enasin akoen, “Ninis unggul Oroma menda arigiluk onggo ombok bagagis.” Yugugu lagagimu, at Paulus akoen, “Hat Oroma menda arigiluk onggo bagagin ovara, an andi, an nasin-nisa Oroma menda atma, an ogo Oroma menda endaklagagis,” yugogogi.

²⁹ It at aigwakma waguluk ogagagwa ako, yugogogi ako enaruk hunggu lagagwarik, “Avyak! Hekbasogom,” yiluk, mbup yi lagagwa. Eke, it enayegen werek enasin akoen ogo, “Paulus o Oroma menda hegek, heda magi atma, wi!” yiluk, alon wisane agagi.

It wene amburup mbalisagwi menda yugeragagi wene

³⁰ Nogo yiluk, hutun ap enayegen werek enasin akoen, “It Yakuri menda nggarogo yiluk enane ovaga lobalogo bagao des erogo nilup arisogon,” imbita dugwit, Paulus visilogo hekbagya lagagirik, it ap imam-imam enasini inim, it wene amburup mbalisagwi menda inim, homari warupwak yiluk enayonggo bagya lagagimu, homari wagagwarikmu, Paulus ako wolok, enadema ilim mendok okbagagi.