Lakbogogi Wene 21 - ALA WENE HIVIS DIRUP WATUGWA

At Paulus o Yerusalem lagagi wene

¹ Nenendawi it vaga ngges iri hegek, hekbisiluk, mburis vaga nunggugu lagagurik, andoma en mbikit o is enggema Kos lagu lagagurik, hutun en o Orodos nunggugwi, andi okbaluk, o Patara nunggugwi, ogagagup.

² O Patara akoma werekma, mburis adik o Venisia laguluk ogagu lagagwama, ninim nunggugu lagagurik, lagagup.

³ Lagu lagagurik, o Sipurus neneyave hwarenggan ninil malhegek lagu dugwit, yi menda ndi menda mburis vaga yidik ako o Tirus hudilogo wombabagek laguluk, o Siria nonggagagup.

⁴ Andoma nunggugu lagagurik, Yesus ane wogogwa menda andoma haverinipu lagagurik, ninim dugwit, ndugwis 7 welagagup. It andoma menda ako Averiniki en yugirigya hegek Paulus yugugu dugwit, “Hat Yerusalem labuk,” yugogogwa ovara,

⁵ andoma dukluk laup ako ndatak agya lagagimu, it Yesus ane wogogwa menda ako enabur-enogwa inim ovok erogo o kota en woknenombolok is omban vaga binanilagu lagagwama, nenerambo yunggubaluk samban ogagagup.

⁶ Samban okbaluk, it ninim deden war-wat yugu lagagurik, enamwa lagusigik, nit mburis vaga nonggagagup.

⁷ O Tirus andoma en wagu lagagurik, o Votolemais nunggu wakluk, andoma nenaswei Ala aburi heyaga wakbisiluk, ninim ndugwis ambi welagagup.

⁸ Ndugwis ambi welagagurik, heveret wunggu lagagurik o Kaisarea nonggagagup. Nunggugu lagagurik, o Yerusalem en it ap 7 erom wogirugu dogopwak yiluk mondok okbogogwa menda ako ambi Sek Wene yugeregek landiga menda Pilipus ako amwa nunggu lagagurik, ninim welagagup.

⁹ At aburi hwa ndugum eneyave 4 Ala en enendawima yugirigya hegek, yugurugu lagagwa.

¹⁰ Ninim dugwit, ndugwis maren hudi welagagurikmu, ap navi Ala en yugugu hegek yugirigya lagagi menda ambi inis Agabus o Yudea en nenadema wambu wagagi.

¹¹ Nenadema wambu wagya lagagirik, at Paulus amboranis visilogo inggis-isok heda makhidigya lagagirik, iri dugwit, “‘An hat hamboranis vaga makhidigi yi hak, it Yakuri o Yerusalem menda en ap amboranis werek ako, anderogoat heda marogo it weram Yakuri dek menda wogerasogom,’ yiluk, At Averiniki en yuknugu halok, yukheraliga o,” yukneragagi.

¹² Yukneragagi ako nenaruk hobaluk, it andoma menda ninim en Paulus yugugu dugwit, “O Yerusalem andoma dagabuk,” yiluk, nenabwa edok erogo dugwit, yugugu lagagumu,

¹³ at Paulus en, “Hit an nayup yasagwi vaga nendawi anggin arupwak yiluk, nggarogo yiluk yuknisagwi? An Yerusalem dagasogon atma, andoma neyagek Nowa Inis Ombok Yesus ake heda maknituselok andi, sek aro ombasiga. Eke, narusogom halok ogo, sek atma, hit nggarogo yiluk yuknisagwi?” yukneragagi.

¹⁴ Yuknirigya lagagimu, yugigik adigat ogagagup ovara, hunggitek welagagimu, “Nenasin Ala endawi ombasiga adigat arupwak,” yiluk, mbup yagagup.

¹⁵ Andoma welagagurik, nenayum ndakaup mbalogo hedelok Yerusalem unggugup.

¹⁶ It Kaisarea menda Yesus ane wogogwa menda nin akoen ap Sipurus menda ambi o endak Yesus ane wogogi inis Manason amwa akoma ninim dogoguluk, woknenombolok binina unggugwa.

At Paulus en Yakobus adema lagagi wene

¹⁷ O Yerusalem nunggu wagu lagagumu, nenaswei Ala aburi akoen enendawi adenggen vaga wokninipugwa.

¹⁸ Wokninipu lagagwama, nogo yiluk, hutun at Paulus ninim it Ala aburi enasini ovok erogo werekma Yakobus bikha lagagup.

¹⁹ Bikhugu lagagurik, at Paulus akoen heyaga wakbisiluk, Ala en okbagya hegek, it weram Yakuri dek menda oginivit lagya lagagi ako ovok erogo mbilinogo yugeragagi.

²⁰ Mbilinogo yugeragagi ako enaruk hunggu lagagwarik, Ala siyabagagwa. Siyabagu lagagwarik, it Ala aburi enasini ako Paulus yugugu dugwit, “Nenaswe, Paulus wai. It Yakuri menda yi ap ndi ap wisane Yesus avyarat umbutugwa ovara, it ovok Ala wene Musa dirup watigi ako enendawi andi adigat wenggelek dugwit, ogarit lagwi yi, inisaliga?

²¹ Ap en yugurugu dugwit, ‘At Paulus en, it Yakuri menda avakwa weram menda enanggelekma agarwik ako mamulirigya dugwit, “Ala wene Musa dirup watigi ako mbobas,” iri dugwit, “Hit henaburi enagamut mbalubuk, eke it ap Yakuri enandogon ogasagwi menda ako ogarubuk,” yugeraliga,’ yiluk, yugeregek nagwis ako it enaruk hunggao.

²² Eke, hat wagen enaruk hulusogom atma, nit nggarogo ogaruk?

²³ yiluk, wene mbanggup yukhisagwi yiat ogaru.” “Ap eneyave 4 en ambi ogarup Ala inis vaga yugigao ninim werekma,

²⁴ yogak hat hinim lagya dogomindik, nit Yakuri nenandogon it ap imam menda en neneyave ‘horek’ hak arupwak yiluk is ndilisagwi andi, it eneyave is ndibugwis, hat ogo heyave anderogo is ndibagagwi, ogagu dogomundik, it iniris mbalupwak yiluk, Ala ake belagwi ako haren belalo. Andi ogarimi vaga Ala wene Musa dirup watigi ako hat ogo ogagya heyalok, wene Paulus ogasiga hunggup ako, adem dek hegek yagalagwi ombarusogom atma, anderogo ogarilalo.

²⁵ Eke, it weram Yakuri dek menda en Yesus ane avyarat ombasagwi ako andi, nit un surat vaga watu dugwit: Wam madis anggom warek naup moga. Amuya naup moga. Yi menda ndi menda honak warek amuya winggitek hegek naup moga. Wanggis waup moga, yiluk, wene nggatuk erogo mbanggugup ako vage dirup warogo lakbogogup,” yiluk, yugogogwa.

²⁶ Yugugu lagagwama, nogo yiluk, hutun, Paulus en ap eneyave 4 ako wogonombolok lagya lagagirik, it eneyave horek hak arupwak yiluk, it inim is enovaga ndibogogwa. Ndibugu lagagwama, Ala awi valekma nunggugu lagagwarik, it is enovaga ndibisiluk dogop andi, o ngga vaga atma akluk enadik-enadik Ala ake baup ako yugeragagi.

At Paulus vagatugwa wene

²⁷ Ndugwis 7 ari wagya hegek, it Yakuri o Asia menda Paulus eyave Ala awi valekma andoma inil hugu lagagwarik, it avakwa ombok homago ovok enendawima manggu dugwit, eyave vakbaluk,

²⁸ “Ap Iserali menda wai! Hodorogo vagarimanes! Ap yien, yi awi ndi awi mamuleregek lagya dugwit, nit nenavok mbalit lagya, Ala wene Musa dirup watigi ako inim, Ala awi valek yi inim, weyak erogo baik lagya, ogasiga menda yi vakneranes. Eke at akoen ap weram Yakuri dek menda wogonombolok, Ala awi valekma nunggu wagu lagarwik, o mogama weyak erogo bagas,” yiluk, enane yandyak-handyak yugeragagwa.

²⁹ (At Torovimus o Evesus menda Paulus iperen o kota Yerusalem nagwis inigu lagagwarik, “Paulus en wolok, Ala awi valekma nonggagao ai,” umbutu dugwit, yagagwa.)

³⁰ Yugurugu lagagwama, o kota akoma avakwa ovok mendok yiluk, vupuk homari wagu lagagwarik, Paulus ininggis vakbaluk, Ala awi valekma en nggigilogo wibaluk, sup lakbagagwa.

³¹ Nggigilogo wibagu lagagwarik, waruguluk ogagusigik, “O kota Yerusalem ovok nadok-hadok ogasagwi,” yiluk, it yegen werek Oroma menda enasin ako yugiri lagu lagagwama,

³² at akoen aori enayegen werek inim, it enowai malenombogo agarwik inim, wogonombolok, vupuk it avakwa homago ako enadema lagagwa. Avakwa en it enayegen werek enasin inim wagwi inil inigu lagagwarik, it Paulus watwis ako hekbagagwa.

³³ Hekbagu lagagwama, it enayegen werek enasin ako wagya lagagirik, Paulus inggis vakbaluk, “Mbusi heda mberen vaga mares,” yiluk, yugirigya lagagirik, “Ap yi sa? Eke, at nano ogagya halok yagalagwi? Eres,” yiluk, hemerinipigi.

³⁴ Hemerinipu lagagimu, it avakwa wisane homago ako enane ombok vaga ambi yegek, ambi yegek, yugu dugwit, enane nadok-hadok yuguselok, adem belalup meyan agya lagagimu, “Wolok o nit yegen werek menda nenamwa akoma elales,” yugeragagi.

³⁵ Yugirigya lagagimu, wolok ndanggi vaga ari wagusim, it avakwa wisane homago ako waruguluk linggililuk lagu lagagwama, it enayegen werek akoen Paulus eyave legogo o it enamwa mabalaguluk, wolok lagusigik,

³⁶ it avakwa wisane homago ako musek yandyak-handyak yagan wagu dugwit, “Mondok elese degerogo basogom!” yiluk, yagan lagagwa.

Paulus en wene at ovaga bagagwa ako adem mbilinogo yugeragagi wene

³⁷ O it enayegen werek enamwa mabaguluk ogagusigik, Paulus en it ap enayegen werek enasin ako yugugu dugwit, “Nasin o. An wene ambi yukhisogon.” Yugugu lagagimu, Paulus yugugu dugwit, “Hat Yunani enane hilup ai?”

³⁸ Yugugu lagagirik, “O endak, ap Mesir menda ambi en, ‘Nenadik dogop,’ yiluk, avakwa enendawi nomalinipu dugwit, sali-vali oginivit lagya lagagirik, ap enedup enayegen werek menda wisane 4.000 wogonombolok, harumu avakwa dekma bisa lagagin ako andi, hat a, hunogo a?”

³⁹ Yugugu lagagimu, Paulus en, “Andi an dek o. An ap Yakuri menda aro. Eke, o Kilikia kota Tarusus akoma, ‘Ai, andoma dukli ale,’ ombasagwima endaklagagis nawerek atma, it avakwa yi an wene ambi yugeraup sek a?”

⁴⁰ Yugugu lagagimu, it enayegen werek enasin akoen, “Segat. Yugeran,” yugugu lagagimu, Paulus ndanggi vaga mendek dugwit, inggi-vaga, “Mbauk dogones,” yugirigya lagagirik, enane mbup yugu lagagwama, Iberani enane vaga yugirigya dugwit: