Lakbogogi Wene 20 - ALA WENE HIVIS DIRUP WATUGWA

Paulus o Makedonia en Yunani lagagi wene

¹ Enane nadok-hadok yugu lagagwa ako dek agya lagagimu, Paulus en Yesus ane wogogwa menda ako warupwak yiluk, eneyanggup yugeragagi, wagu lagagwama, enendawi aik wakbugu lagagirik, “Yogo,” yugerelok, o Makedonia lagagi.

² Lagya lagagirik, o yi awi ndi awi andoma ya nonggegek lagya dugwit, enendawi aik wakbigik lagagi-lagagi o Yunani ari lagagi.

³ Andoma hegek saut henggam okbaluk, o Siria mburis vaga lagiluk werekma, it Yakuri menda en enendawi ambiat okbaluk, waruguluk yugu lagagwama, “Sup neyami vaga o Makedonia laup,” imbitigi.

⁴ At inim lagagwa ako andi, ap Berea menda Pirus abut Sopater inim, o Tesalonika menda Aritakus, Sekundus inim, o Derebe menda Nggayus, Timotius inim, eke, o Asia menda Tikikus, Torovimus inim, lagagwa.

⁵ It andi, ovok erogo enendak o Teroas lagu lagagwarik, nenabyam welagagwa.

⁶ Eke, nit ako isogo Roti Virisigadek Menda ako nelok, o Pilipi en mburis vaga lagu dugwit, ndugwis 5 welagagurik, o Teroas nenaswei nenabyam werekma avuk agagup. O Teroas andoma ndugwis 7 welagagup.

Apsawe nggedek wombagagi wene

⁷ O hari minggu vaga erom ugurogo naguluk homagagurikmu, at Paulus hutun lagiluk ogagya dugwit, wene adup erogo yugirigya hegek, o hup ilikis agagi.

⁸ Eke, nit homagagup o handimen eve winimen erogo en undwa wisane yevetbaluk,

⁹ at Paulus wene adup likhelok lagya dugwit, apsawe ambi inis Eyotikus jendela mbalek vaga horaik nggungguk nogo yugu lagagimu, nogo agako agya dugwit tingkat tiga en ut ngguduk nggedek wombagagi. Nggedek wombagagirikmu, hombagagi. Hambigya lagagimu, lekhugu lagagwama,

¹⁰ Paulus ako wambigya lagagirik, ambot seve yiluk, elola okbagya lagagirik, “Henendawi anggin habuk. Eyave iluk agarik,” yiluk, yugeragagi.

¹¹ Yugerelok, eyami vaga inggya lagagirik, roti ugurogo nelok, at inim wene yugusigik, o yanggo yigiluk het lagatu hegek, hekbisiluk winggigi.

¹² Wunggu hegek, it avakwa akoma en avyak ako iluk erogo wolok lagu lagagwarik, enendawi sek adenggen wisane hagagwa.

O Teroas en Miletus lagagwa wene

¹³ Eke, Paulus en, “An nisok vaga o Asos laup imbitirikmu, hit henendak o Asos andoma nabyam arilales,” yuknirigya lagagimu, at isok vaga lagya hegek, nit nenendak mburis vaga o Asos abyam dogoguluk ari lagagup.

¹⁴ O Asos andoma avuk akluk, Paulus mburis vaga nunggwigya lagagirik, ninim o Metilene wagagup.

¹⁵ Andoma en wagu lagagurik, heveret o laut is enggema inis Kios malhegek, ndogovit o Samos ari wagagup. Eke, ndogovikak o Miletus ari wagagup.

¹⁶ Ari wagu lagagurik, at Paulus en iri dugwit, “Hari Pendakota ogarup ako, an Yerusalem neyagek ogarup atma, o Asia arabu neyagek horok vanggo iri haoen, o Evesus nonggegetek mbikit o Yerusalem hodorogo lasogom,” yiluk, yugeragagi.

Paulus Ala aburi o Evesus bisiluk, lagiluk, yugeragagi wene

¹⁷ O Miletus nunggugu lagagurik, andoma en at Paulus ako, it Ala aburi enasini o Evesus welagagwa ako warupwak yiluk, enayonggo lakbogogi.

¹⁸ Enayonggo lakbugu lagagwarik, at adema wagu lagagwama, yugirigya dugwit, “An o Asia yoma henadema wagagis hudien ninim dugwit ogagya lagagis ako hinilup.

¹⁹ It Yakuri menda en an naruguluk enendawi ambiat agu lagagwarik, anggin novaga banunggusigik ovara, Nasin ayeloman dugwit, nendawi seve yiluk, henayup yagya dugwit, yonggat-hinipu lagagis.

²⁰ Sek okbigigaup wene ako, nin yukheraup nalon en hekbagya, nin yukhirigya, ogagya lagetek. Ombokma vaga inim, henamwa vaga inim, mamulheregek lagya lagagis hinilup.

²¹ Mamulhirigya lagagis ako andi, hit Yakuri menda inim, hit Yunani menda inim, henasam helok, Ala adema wagwi, henendawi Nenowa Yesus Keretus ovaga vanggabaluk avyarat umbutwi, ogarovovok yiluk, des erogo yukhirigya lagagis.”

²² “Eke, yogak andi, Averiniki en ane nggengges yuknugu halok, o Yerusalem en okbanup ninggut hegek ovara, layogon.

²³ Ndugwis ambi vaga o ambima yugirigya, ndugwis ambi vaga o ambima yugirigya, ogarit lagyama, ‘Heda makhitwis, anggin-mbanggin hovaga bagagwi, ogarusogom,’ yiluk, Averiniki en hurimbis yuknisiga nilup aro.

²⁴ Anderogo ovara, An neyave niluk dogop iya dek. Ata, Ala nenabwa en un onggodek okbininaliga menda Sek Wene yugirigya dogogiluk, Nowa Inis Ombok Yesus en yavup andok okbaninggigi ako, hekbagetek atok weralogo ogarup andi adigat iya ombasiga atma, ogarit landiga.”

²⁵ “Eke, yogak andi, an ako Ala avema bigigaup wene yukhirigya lagagis hit yi, hivis ambi yukheregek wagya hinil neyagupuk andi, an nilup.

^26-27 Ala endawi hologo bagagi wene ako nin hekbagetek, ovok erogo yukhirigya lagagis atma, hit ambi degerogo bigigaup halok andi, an novadombok dek. Hit henovadombok okhedasogom vaga degerogo bigigayogon, yiluk, o yogak yi vaga avyarat yukheraliga.”

²⁸ “At Nenowa Yesus amuya vaga Ala aburi homago enonggo bagagi ako andi, At andomba ovagak atma, malenombogo dogovovok yiluk, Averiniki en mikhinipigirikmu, hit henendawi suam wakhidugu dugwit, it inim des erogo yugurugu dogones.

²⁹ An hekbigiluk lagya neyagek, yangge do henanggelekma nunggu wagu dogomundik, hekbigigasogombuk aik hivit hinivusogom andi, an nilup aro.

³⁰ Hit menda en ogo, henanggelekma en mendok yiluk, hit Yesus ane welagwi menda henendawi nomalogo wokhinivuguluk, huluk wene ako andi Sek Wene heda yukhirugu dogosogom.

³¹ Anderogo atma, henendawi suam wakhidugu dogones! O hup dingga mbup yegetek henayup yagya dugwit, henadik-henadik hurimbis yukhirigya neyagek, tiga tahun ogagagis ako henape wenggenggu dogones.”

³² “Eke, yogak andi, At Ala henabwa en okbigigaup wene ako vaga, henendawi hoda erogo bigigiluk At aburi At ake denek halok, mavorangge hak enake enogo bogogi ako hinim andok arovovok yiluk, Ala avema bigigigis o.

³³ Hit henayoparip mbusi perak emas inim, henasum inim, an hogop imbita lagibuk o.

³⁴ Nenangge dek halok, ‘Wokneres,’ andi yukhirigya lagibuk. Ata, an nake inim, it ninim nagu lagagis enake inim, andi, an ninggis anye vaga adigat ogarogo hidigya lagagis hinilup aro.

³⁵ At Nenowa Yesus en iri dugwit, ‘Hedelagwi vaga enadenggen maduk hugwi, eke, wogorugwi vaga andi, enadenggen wisane hugwi, ogasagwi o,’ yagagi ako, imbita dugwit, an ovok erogo ogagya lagagis ako andi, yavup sakdida-mbakdida ogagu dugwit, it enanyedek menda yonggar-inipu dogop, higyo, yiluk, ombarovovok yiluk, ogagya lagagis,” yugeragagi.

³⁶ Wene andi mondok yugirigya lagagirik, it ovok erogo inim enerambo yunggubaluk hora yiluk, samban ogagagi.

³⁷ Samban okbugu lagagirik, Paulus eyave enelola okbaluk, ayup yagwi, heyaga warogo dinggik-hambuk okbagwi, ogagek adigat ogagagwa.

³⁸ At Paulus en, “An hivis ambi nelokwe neyagupuk,” yugeragagi andi vaga enendawi mondok burup yugu lagagwarik, ayup yagwi, heyaga wakbagwi, okbagu lagagwarik, wolok mburis is omban vaga werekma andenam balagagwa.