Lakbogogi Wene 19 - ALA WENE HIVIS DIRUP WATUGWA

At Paulus o Evesus dugwit, ogagagi wene

¹ At Apolos o Korindus hegek, Paulus ako o Nggalatia-Virigia ndom vaga andoma lagya lagagirik, o Evesus nonggagagi. Nunggwigya lagagirik, Ala wene wogogwa menda nin andoma avuk agu lagagwarik,

² it yugirigya dugwit, “Hit avyarat umbutu lagagupmu, Averiniki hedagagup a, dek a?” Yugirigya lagagimu, iren, “Dek o. Averiniki andi werek a, dek a? Nit ao ninunggurat agurik.”

³ Yugugu lagagwama, “Andi halok, nano wene hunggu lagagupmu, ima wombabigigugwa?” Yugirigya lagagimu, iren, “Dek o. At Yohanes yagagi wene hunggugup ako vaga ima wombabininggugwa,” yugogogwa.

⁴ Yugugu lagagwama, at Paulus en, “At Yohanes ima wombabugu lagagi andi, enasam huguselok, ima wombabugu lagagi. Aren avakwa wisane yugirigya dugwit, ‘At an nambetaga warisogon andi, henendawi ovaga vanggabaluk avyarat umbutu dogones,’ yugirigya lagagi andi, eyave Yesus aro.”

⁵ Yiluk yugeragagi ako enaruk hunggu lagagwama, Nenowa Yesus inis vaga ima wombabogogwa.

⁶ Ima wombabugu lagagwama, Paulus inggis inunggul vakbugu hegek, Averiniki enovaga wambu wagya lagagimu, it avakwa enane inggut adik-adik menda yugwi, Ala en enendawima yugirigya hegek, yugurugwi, ogagagwa.

⁷ It ap Averiniki enovaga wambu wagagi ako andi, eneyave dambulik 12.

⁸ Andi okbaluk, at Paulus en it Yakuri samban ogasagwima nunggwigya lagagirik, alon dek dugwit, Ala avema bininaup wene andi, “Avyarat yagaliga,” ombarupwak yiluk, wene mbilinogo yugeregek adigat ogagya hegek, saut henggam ogagagi.

⁹ Yugirigya lagagi ovara, it nin enendawi lakot dugwit, “Avyarat ombarup, nenanggon,” yiluk, ombokma Sup Yesus Ambetaga Lagu Dogop Wene ako, wiyiknom-weyaknom erogo bagu lagagwama, at Paulus en it hekbisiluk, Yesus ane wogogwa menda ako enadigat wogonombolok, ap Tiranus sekolah awi vanggigirikmu andoma nunggwigya lagagirik, ndugurek-ndagarek inim wene yugirigya, iren hemethugwi, ogagu lagagwa.

¹⁰ Ala wene yugirigya hegek, tahun mberen ogagagirikmu, it Yakuri menda inim, it Yunani menda inim, o Asia welagagwa ako ovok erogo Nenowa Yesus wene enaruk hunggu lagagwa.

At Sekewa aburi en ogagagwa wene

¹¹ Ala en okbagya hegek, Paulus en nggarogo ogarubuk menda mondok iya erogo ogagya lagagi.

¹² Nggarogo ogarubuk menda iya erogo ogagya lagagi andi, at adigak hothedaliga menda inim, asum mudis arugwi en yiluk yirik welagagi menda inim, wolok lagu lagagwarik, it avakwa aup edup ako, enovaga bugusigik, aup edup ako dek agwi, madis enendawima nonggagagi ako nggigilogo wibugu, ogagya lagagi.

¹³ Ogagusigik, ap Yakuri madis avakwa enendawima nggigilogo wibigik nagu lagagwa menda en, avakwa madis enendawima nonggagagi halok, Nenowa Yesus inis vaga, madis nggigilogo wibisaguluk yugurugu dugwit, “Paulus yugeraliga menda Yesus ako inis vaga wilin,” yiluk, ogagagwa.

¹⁴ Ogagagwa ako andi, it ap imam Yakuri menda enasin Sekewa aburi eneyave 7 en, anderogoat ogagagwa.

¹⁵ Anderogo ogagagwa ovara, madis akoen iri dugwit, “Yesus andi nilup, eke, Paulus ogasiga menda ogo, an nilup ovara, hit yi andi, sani?”

¹⁶ Yugirigya lagagirik, ap madis alonedok erek endawima welagagi akoen soklok erogo enovaga ndan iri lagagirik, sovalogo bisiluk, inita lagagimu, it ako umwa akoma en enagap mbedan enamuya ndek yagan, hoda sak yagagwa.

¹⁷ Ogagao yugwi ako, it avakwa o Evesus agarwik Yakuri menda inim, Yunani menda inim, ovok erogo enaruk hobaluk enalon agu lagagwarik, Nenowa Yesus inis siyabagagwa.

¹⁸ Avakwa avyarat umbutugwa menda wisane wagu lagagwarik, “Nit ogo weyak ogagu lagyo,” yiluk, ombokma enomaduk vaganggu lagagwa.

¹⁹ It madis vagago welagagwa menda nin ogo, madis inis vaga ogaruguluk mbuku vaga warek bikhegek ogagu lagagwa ako, wolok avakwa ovok inivaga hali hunggugwa. Eke, enambuku hali hunggugwa ako onggo ininggis dingginggu dugwit, yoparip wisane, satu milyar wane-wane hagagwa ovara, hegek hali hunggugwa.

²⁰ Nenowa Inis Ombok Yesus ane wokbaluk anderogo ogagu lagagwa vaga, Ala wene andi wigalit lagya halok, avakwa en wene andi, dibagwi, wugwi, ogarit lagagwa.

O Evesus en nane-hane yugu lagagwa wene

²¹ O Evesus andoma anderogo ogagu lagagwama, at Paulus ako o Makedonia inim, o Akaya inim, yanonggegek ogarit o Yerusalem lagiluk, endawi imbitigirikmu, “O andoma lagya dogomindik, o Oroma akoma ogo layogon aro,” imbitigi.

²² Imbita lagagirik, at yonggat-hegek eneyave mberen Timotius Eratus enendak o Makedonia lakbugu lagagirik, lagusigik, at o Asia ambukum dukluk lagiluk mbup yagagi.

²³ O andi hudi Sup Yesus Ambetaga Lagu Dogop Wene ako vaga nane-hane ombok yagagwa.

²⁴ Ap mbusi perak ogasiga menda ambi inis Demeterius en enomadis Aretimis awi mbusi perak agut ogasiga menda atma, onggo lugut hedaguluk aori wisane yugirigya hegek ogaguselok, onggo ombok wogirigya lagagi.

²⁵ At aori ako inim, it ap nin yavup andi menda ogagu lagagwa inim, homakbisiluk, yugirigya dugwit, “Naori, nit ogasagwi yi vaga onggo ombok hedelagwi hinilup ovara,

²⁶ ap inis Paulus akoen, ‘Huvuwak avakwa en ininggi-vaga ogarek andi, eve menda dek,’ yagaliga ako, o Evesus yoma adigat dek. Ata, o Asia yi awi ndi awi andoma ovok erogo avakwa wisane enendawima malit lagya dugwit, nomalinivit lagya hinil hugwi, henaruk hunggwis, ogasagwi.”

²⁷ “Anderogo atma, nit onggo hedelagwi yi adigat inis dek arisogonbuk ovara, nit o Asia yoma ovok agurik inim, it yi awi ndi awi ovok agarwik inim, nenomadis hwa ombok Aretimis nit ovok erogo ninisa siyabelagwi ako, at awi valek meyan umbutu dugwit, at agayuk dek, anye werek ako dek agya higyo, yugu saoen yiluk, nenalon aga o,” yiluk, yugeragagi.

²⁸ Yugeragagi ako enaruk hunggu lagagwarik, enaninis ane yagan lagu dugwit, “Nit Evesus menda nenomadis Aretimis ombok aro,” yiluk, yandyak-handyak yagagwa.

²⁹ Yandyak-handyak yugu lagagwama, o kota andoma en ovok erogo nane-hane yugu dugwit, it ap o Makedonia menda Paulus inim nagu lagagwa, Nggayus Aritakus iperen vaginiviluk, wene homarisagwima hoda vupuk bisa nonggagagwa.

³⁰ Bisa nunggugu lagagwarik, werekma, at Paulus ako, ap wisane homari lagagwa ako enanggelekma nunggwigiluk ogagagi ovara, it Yesus ane wogogwa menda akoen, “Nunggubuk,” yiluk, sovabaluk werekma,

³¹ it o Asia menda enasini ap ombok-ombok at Paulus inim hunik welagagwa akoen, wene homarisagwima akoma nunggwigya haoen, “Moga,” yugurupwak yiluk, enaori lakbisa lagagwa.

³² Yugusigik, it homagagwa nin wisane akoen, “Nggarogo yiluk homagyo,” inunggutmu, wene ambi yegek, ambi yegek, yugu dugwit, nadok-hadok yugusim,

³³ it Yakuri menda en ap inis Alesander ako vanggalogo enelokwe amot wolok ilim erogo mendek okbelagagwarikmu, it avakwa ninen, “Yukneran o,” yugugu lagagwama, wene sigam erogo yugeragiluk inggi-vaga, “Mbauk dogones,” yugeragagi ovara,

³⁴ at Alesander ako ap Yakuri menda yedok hugu lagagwarik, “Nit Evesus menda nenomadis Aretimis ombok aro,” yiluk, enane ombok vaga hunik adigat yugusigik, mo il mberen agagi.

³⁵ Mo il mberen agya lagagimu, ap sekretaris kota Evesus en, “Henane moga o,” yugirigya lagagimu, mbuverek inigik, yugirigya dugwit, “Hit ap Evesus menda yi, wene ambi yukheraliga. At nenomadis inis ombok Aretimis awi valek inim, helep mbogot vaga en wambu wagagi, “Nenomadis yi aro,” yiluk, agut vagago agurik ako inim, andok ako nit Evesus menda atma, yi avakwa ndi avakwa inunggutmu, yagalagwi?

³⁶ Dek o. Wene yi huluk dek, avyarat, hit henendawi dek ovagak akluk yi ogagek ndi ogagek ogarubuk. Mbauk dogones.

³⁷ It ap yi, nenomadis awi valekma yi menda ndi menda agarik ako wugwi, eyave wiyiknom-weyaknom erogo bagwi, ogagetek inigik, wogonombolok wagep atma,

³⁸ it wene amburup mbalisagwi menda inim, it nenasini pemerintah menda inim, agarwik atma, at Demeterius inim, aori mbusi perak agut ogasagwi menda inim, akoen, ‘Ninawene amburup mbalupwak o,’ umbutuselok, it enadema andoma yugeralapwak.

³⁹ Eke, wene ambi adik werek umbutu hiniselok, hivis nenasini inim ovok homakbaluk amburup mbalusogom.

⁴⁰ Wene yogak avok yagalagwi yi, iren ‘Nggarogo yiluk nane-hane yugu dugwit, weyak ogagep?’ yukniruguselok, adem dek hegek, ap yi wogonombolok wagyo atma, nit onggo nggarogo yugerabuk erek,” yiluk,

⁴¹ yugirigya lagagirik, it avakwa homago ako “Wilitales,” yugeragagi.