Lakbogogi Wene 18 - ALA WENE HIVIS DIRUP WATUGWA

O Korindus dugwit, ogagagi wene

¹ Andi ogagya lagagirik, at Paulus ako o Atena hekbaluk, o Korindus lagagi.

² Korindus lagya lagagirik, andoma dugwit, ap Yakuri menda ambi o Pondus endaklagagi inis Akwila, eke, ogwa inis Pirikila iperen inim avuk agagwa. Ap inis ombok Kaisar Kolaudius en, “It Yakuri menda o Oroma yoma dogobuk,” yiluk, wene yugeragagi vaga, ap andi ogwaim ao swiat o Italia hekbaluk, o Korindus wagagwa. Wagu lagagwarik, andoma inigik, Paulus biginisa lagagi.

³ It yum tenda eravo valuguluk monggadisagwi menda halok, at Paulus ogo ilup atma, inim dugwit, inim yum tenda eravo valumenda monggatu lagagwa.

⁴ Ogagu dugwit, at Paulus ako ndugurek-ndagarek it Yakuri samban ogasagwi vaga it samban ogasagwima nonggegek iri dugwit, it Yakuri menda inim, it Yunani menda inim, it enendawi Yesus avyarat ombarupwak yiluk, it inim hemethugwi, onggo yugirigya, ogagu lagagwa.

⁵ Andenam werekma, Silas, Timotius inim, o Makedonia en wagu lagagwarik, inim dugwit, at Paulus ako yavup adik ambi ogagya lagetek, Ala wene andi adigat yugirigya lagagi. Yugirigya dugwit, “Nenowa Inis Ombok Ala en denogo bagagi Keretus ako andi, Yesus aro,” yiluk, it Yakuri menda yugirigya lagagi.

⁶ Yugirigyama, it ako inim ogot hudugu dugwit, wiyiknom-weyaknom erogo bagu lagagwama, Paulus en, “Hit degerogo bigigaup andi, an novavut vaga dek o. Hit henovadombok okhedasogom vaga degerogo bigigayogon. Eke, an yogak en it ap weram Yakuri dek menda yugeregek nagu dogosogon,” yiluk, it dibapwak yiluk, yum mupwak davulagagi ako yumbulogo enovaga lakbalagagi.

⁷ Andi ogagya lagagirik, it Yakuri samban ogasagwima akoma en wulukluk, ap Ala inis siyabaliga menda inis Titius Yustus amwa it Yakuri samban ogasagwima horok andenam werekma adema lagagi.

⁸ It Yakuri samban ogasagwima enasin Kiripus ako inim, at abut ogwa at amwa agarwik menda ovok erogo inim, enendawi Nenowa Yesus ovaga vanggabaluk avyarat umbutugwa. Eke, it Korindus menda wisane at Paulus en yugeragagi ako hobaluk, avyarat umbutu lagagwama, ima wombabogogwa.

^9-10 Andi okbaluk, ndugwis ambi vaga o hup Nenowa Yesus en at Paulus abi vaga yugugu dugwit, “An hinim werekma, avakwa en vakbagaluk harusogombuk atma, halon en mbauk dogobuk. O kota yoma An naburi wisane agarwikmu, yugirigya dogwen,” yiluk,

¹¹ yugogogirikmu, Ala wene mamulirigya hegek saut 18 hudi ogagagi.

¹² Ala wene mamulirigyaim, ap inis Nggalio avakwa Akaya menda enowa Gubernur mendek hegek, it Yakuri menda ovok dambubaluk ambi vaga mendek yugu lagagwarik, Paulus vakbaluk eyave wolok, wene amburup mbalisagwima balagagwa.

¹³ Balagu lagagwarik, “At ap yi, Musa wene ako hegek, Ala siyabagu dogop adik ogagu dogopwak yiluk, avakwa enendawi nomalinivit lagya halok, wolok wagyo.”

¹⁴ Yugurugu lagagwama, Paulus ako yugeragiluk ogagya hegek, Nggalio en it Yakuri ako yugirigya dugwit, “At weyak ambi ombok ogagya, ata it o Oroma menda en wene hobalek hegek, mondok adik ogagya, ogaklipmu en, hit ap Yakuri en yuknisagwi andi, naruk des erogo hulili ovara,

¹⁵ hit Yakuri wene ogagu dugwit maduk-maduk ogasagwi ako vaga yidibaluk wene wasagwima, anen wene amburup mbalogo yukheraup nanggon. Hit henadik henovadombok hologo bugu dogones,” yiluk,

¹⁶ wene amburup mbalisagwima andoma en haryogo wibisapwak yiluk yugeragagi.

¹⁷ Yugirigya lagagimu, wibugu lagagwama, it ovok en it Yakuri samban ogasagwima enasin at Sotenes ako, vagago, wene amburup mbalisagwima andenam en watusigik, at Nggalio en, “It inovadombok,” iri lagagirik, asuk-at, mbup yagagi.

Paulus eyami vaga o Andiyokia lagagi wene

¹⁸ At Paulus o Korindus andoma dugwit, ndugwis wisane welagagirik, nenaswei Ala aburi andoma inigik, at Akwila ogwa Pirikila iperen inim mburis vaga o Siria laguluk, ogagu dugwit, at Paulus en ambi ogarup Ala inis vaga yugogogi atma, ovok ogagya lagagirik, o Henggereya andenam en iris mbanggigi.

¹⁹ Iris mbanggya lagagirik, o Evesus lagagwa. Lagu lagagwarik, Paulus en Pirikila Akwila iperen andoma bisiluk, at adigat it Yakuri samban ogasagwima nunggwigya lagagirik, it Yakuri menda andoma en hemethugwi, onggo yugirigya, ogagagwa.

²⁰ Yugirigya lagagimu, “Ninim yoma ambi inimat dogosogom o,” yugogogwa ovara, “Dogosogonbuk,” yugirigya lagagirik,

²¹ lagiluk ogagya dugwit, “Ala en, ‘Warup,’ imbita halok, hivis henadema warugwis,” yiluk, heyaga wakbisiluk, o Evesus andoma en mburis vaga

²² o Kaisarea lagagi. Lagya lagagirik, akoma en at Paulus o Yerusalem wagya lagagirik, it Ala aburi andoma homasagwi ako heyaga wakbisiluk, o Andiyokia lagagi.

²³ Andoma ndugwis wisane welagagirik, hivis o andoma hekbaluk, yi awi ndi awi o Nggalatia, o Virigia inim, yanonggegek lagya dugwit, Yesus ane wogogwa menda ako enendawi wadokdek dogopwak yiluk, yugeregek lagya lagagi.

Apolos en o Evesus, Korindus ogagagi wene

²⁴ Andi yugeregek lagya hegek, ap Yakuri menda ambi awi adem Alesandiria menda inis Apolos akoen, Ala wene dirup warek ovok ilup dugwit, wene enendawi ndin yagaliga menda o Evesus lagagi.

²⁵ Endak At Nenowa Yesus wene ako, at yuguguselok, des erogo wogogirikmu, o Evesus lagya lagagirik, Yesus wene avyarat mamulirigya, endawi adenggen vaga yugirigya, ogagya lagagi ovara, Averiniki wambu wagagi inggut atma, un Yohanes ima wombabugu lagagi wene ako adigat ilup atma yugirigya lagagi.

²⁶ At alon dek dugwit, it Yakuri samban ogasagwima akoma wene yugirigya lagagi. Yugirigyama, it Pirikila Akwila iperen enaruk hunggu lagagwarik, at Apolos wolok, enamwa lagu lagagwarik, Ala avakwa enapwa en enagap wendarinivisiga wene ako des erogo mbilinogo yugogogwa.

²⁷ Hivis at Apolos o Akaya lagiluk ogagya lagagimu, it nenaswei Ala aburi o Evesus menda andoma en, at laup sek yiluk, Yesus ane wogogwa menda o Akaya agarwik en at heyaga warogo wapwak yiluk, dirup warogo lakbagagwa. Lakbagu lagagwama, wolok lagya lagagirik, Ala enabwa en okbogogi vaga Yesus avyarat umbutugwa ako inim dugwit, mondok iya erogo yonggar-inipu lagagi.

²⁸ It Yakuri menda at inim ombokma wene onggo-onggo yugu dugwit, at Apolos en Ala wene dirup warek vaga, “Nenowa Inis Ombok Ala en denogo bagagi Keretus ako andi, Yesus aro,” yiluk, onggo yugurup mondok dek ane mbup yegetek-at yugirigya lagagi.