Lakbogogi Wene 17 - ALA WENE HIVIS DIRUP WATUGWA

O Tesalonika dugwit, ogagagwa wene

¹ Lagu lagagwarik, o Ambipolis nunggugwi, Apolonia nunggugwi, ogarit o Tesalonika nonggagagwa. Nunggugu lagagwarik, it Yakuri samban ogasagwima andoma werekma,

² at Paulus itok atma it Yakuri samban ogasagwi vaga inim samban ogarigiluk nonggagagi. Ndugwis henggam it samban ogasagwi vaga aren Ala wene dirup warek vaga it inim hemethugwi, onggo yugirigya, ogagu lagagwa.

³ Yugirigya dugwit, “At Ala en Nenowa Inis Ombok denogo bagagi Keretus ako, edup yagan wakbaluk, hambuluk lendagwima en iluk akluk mendok yup denek welagagirikmu, mondok yagagi o,” yiluk, yedok hapwak yiluk des erogo yugirigya lagagirik, “An Paulus en Yesus avok yukheraliga yi, Nenowa Inis Ombok Ala en denogo bagagi Mesias ako, Arat,” yiluk, mbilinogo yugeragagi.

⁴ Wene yugeragagi ako, wene andi avyarat enendawima ndun yi nunggwigya lagagirik, it Yakuri menda nin inim, it Yunani menda Ala enalon umbutu lagagwa nin wisane inim, akwa ininis werek eneyave wisane inim, Paulus Silas inim hondo yi lagagwa.

⁵ Hondo yi lagu lagagwama, it ap Yakuri menda en, “Nit hekbininiluk it inim hondo yi lagao andi, nit nenanggon!” yiluk, enendawi weyak umbutu dugwit, ap enandogon weyak pasar ugun agarwik menda homakbisiluk, it avakwa o kota andoma nadok-hadok okbisapwak yiluk, enendawima manggugwa. Manggu lagagwama, iren avakwa andoma agarwik ako enendawima malit lagu lagagwama, avakwa wisane nadok-hadok yagan, at Paulus Silas iperen ombokma enawene mbaluguluk, ap Yason awi enda mbanggugwa ovara,

⁶ iperen eneyave dek iniselok, at Yason inim, nenaswei nin inim, nggigilenombolok enasini ap ombok-ombok o kota vagago agarwik menda enadema bisa lagagwa. Bisa lagu lagagwarik, it enane ombok vaga yugurugu dugwit, “O yi awi ndi awi ovok erogo weyak okbisilin lendagwi menda ako, eneyave yoma wagarukmu,

⁷ at Yason en wogonipas. It ap andi, at Kaisar wene hobalek ako weyak erogo bagu dugwit, ‘Nenasin Inis Ombok adik ambi Kaisar ovagak agarik ako andi, inis Yesus aro,’ yiluk, yagalagwi,” yugeragagwa.

⁸ Yugeragagwa ako it enasini ap ombok-ombok o kota vagago agarwik menda inim, avakwa homagagwa ako inim, enaruk hunggu lagagwarik, nane-hane yagagwa.

⁹ Eke, at Yason aswei inim en heda marek onggo bagu lagagwama, visilogo hekbogogwa.

O Berea dugwit, ogagagwa wene

¹⁰ O hup agya lagagimu, it nenaswei Ala aburi andoma en Paulus Silas iperen o Berea lakbogogwa. Lakbugu lagagwama, o hup lagu lagagwarik, it Yakuri samban ogasagwima nonggagagwa.

¹¹ It avakwa Tesalonika menda andi, enendawi lakot ovara, it Berea menda andi, enendawi mondok sekma, Ala wene yugeragagwa ako, enendawi adenggen vaga wugu lagagwarik, “At Paulus en wene yukneraliga yi, avyarat a, dek a,” yiluk, hutun-howam Ala wene dirup warek bikhugu lagagwa.

¹² Bikhugu dugwit, it Yakuri menda wisane avyarat umbutugwa. It Yunani menda ogo, akwa ininis werek inim, ap inim, it wisane-at avyarat umbutugwa.

¹³ Avyarat umbutu lagagwama, it Yakuri menda o Tesalonika akoen at Paulus o Berea Ala wene yugeraliga yagagwa ako enaruk hunggu lagagwarik, avakwa o Berea menda nane-hane yupwak yiluk wene enendawima mali wagu lagagwama,

¹⁴ it nenaswei Ala aburi o Berea menda akoen Silas Timotius iperen andoma inigik, mbikit Paulus wolok inamut ombok yanggadek embet vaga balagagwa.

¹⁵ It ap Paulus wolok balagagwa akoen o Atena balagu lagagwama, Paulus en, “Timotius Silas iperen hodorogo warupwak yiluk, lakbisa omano,” yiluk, wene sadi erogo lakbogogi.

Paulus o Atena dugwit, ogagagi wene

¹⁶ At Paulus ako it Timotius Silas iperen wagu saoen, o Atena enabyam dugwit, o kota andoma huvuwak moga-moga ap ininggi-vaga ogarek menda wisane umwa-wasim higya lagagirik, endawima mondok anggon imbitigi.

¹⁷ Anggon imbita lagagirik, it Yakuri menda inim, it avakwa Yunani Ala enalon ombasagwi menda inim, it Yakuri samban ogasagwima andoma, “Wene yi avyarat higi,” ombarupwak yiluk, wene mbanggwis, hutun-howam o pasar ogasagwima andoma inim avuk agya lagagirik, wene yugirigya, ogagya lagagi.

¹⁸ Ogagyama, o akoma it ap yi wene ndi wene adem hivilisagwi menda ap Epikuros wene vagago welagagwa inim, ap Setoa wene vagago welagagwa inim, yagan nagu lagagwa ako, o andoma werekma, iren, Paulus inim wene onggo-onggo yugu lagagwarik, “Wene at yagaliga ako eke hambok yagan landiga menda yi, nggarogonggan wokbaluk yagan landiga embetep?” yagagwa. Eke, at Paulus en At Yesus avok Sek Wene ako inim, At iluk akluk mendok yagagi wene inim, yugirigya halok, it ninen, “Dek o. Avakwa adik enomadis awene wolok wagya lagarik, iri higyo,” yiluk, yagagwa.

¹⁹ Yugu lagagwarik, Paulus wolok, o Areopagus wene amburup mbalisagwi menda enadema bawagu lagagwarik, yugugu dugwit, “Hat wene adik swi menda mamuleraliga andi, nit ninilup aruguluk yukneran.

²⁰ Hat wene adik hunogo hak yagan landiga nenaruk hunggurikmu, ‘Wene eyave adem yiat yagaliga,’ ombaruguluk, iru,” yugogogwa.

²¹ (Anderogo yugogogwa ako, it enawerek Atena menda inim, huru inisa wagagwa welagagwa inim, it akoen wene adik swi menda adigat hunggwis, yugwi, ogagu dugwit, yi ogagek ndi ogagek ogagetek-at welagagwa.)

²² “Iru,” yugugu lagagwama, Paulus akoen o Areopagus it wene amburup mbalisagwi menda enanggelekma mendek yiluk, yugirigya dugwit, “Hit naswei o Atena menda yi wai. Hit huvuwak amuli hubaluk, henendawi andi vaga adigat vanggabaluk musek lagu hinigis.

²³ O kota yoma hit huvuwak awi valek nil hegek lagya dugwit, huvuwak awi valek ambi, inis ‘Nenasin Inis Ninunggut’ salek dirup warek nil higi. Hit hinunggut dugwit, inis siyabelagwi ako andi anen yukheraliga o.”

²⁴ Yugirigya lagagirik, “At wen inim, yi menda ndi menda wen vaga menda ovok erogo inim, ogagagi Ala ako andi, wen-mbogot vagago Aratma, At huvuwak awi ap en vanggugwarikmu akoma agarikbuk o.

²⁵ At adigat en yi avakwa ndi avakwa iniluk oginipu, enelagap agarero wogirigya, yi menda ndi menda wogirigya, ogasigama, At angge ambi dek halok, avakwa enangge ambi At wogorup andi mondok dek.

²⁶ Ala en adem ap ambiat vaga yi avakwa ndi avakwa ininis unggul adik-adik yi awi ndi awi wigalarupwak yiluk ogagya, o ndugurek-ndagarek ogarit nagu dogopwak yiluk, hologo bagya, eke o yi awi ndi awi dogop vaup mbalogo bugu, ogagagi.

²⁷ At ogagagi ako andi, At Ala adumu dek horok-horok ninimat agarik hegek, belalit lagu dogomundik, ‘Avyarat ai,’ yiluk enendawima yedok hugu dogopwak yiluk ogagagi.

²⁸ Eke, ap hit menda ambi ndawi bagya dugwit, ‘Nit ogo At vaga wigalek aro,’ yiluk, yagagi ako wane-wane, niniluk agurik inim, o wen vaga nagwis inim, nit agurik inim, andi, At vanggabaluk dugwit ogasagwi o.”

²⁹ “Andi halok, nit Ala vaga wigalek agurik atma, At eyave adem andi, avakwa enendawi hologo baluk mbusi emas vaga, mbusi perak vaga, helep vaga, huvuwak ogarek andi hak, ombarubuk.

³⁰ O muk erogo ninunggut dugwit ogagu ninigik, Ala en ugun welagagi ovara, yogak andi, nit yi avakwa ndi avakwa ovok erogo nenomaduk nenasam helok mondok mbobaluk Yesus ambetaga lagu dogop yiluk yukneraliga.”

³¹ “Ap ambi denogo mondok okbagagi en avakwa ovok ogasagwi wane-wane enowak dilinivup ndugwis ambi adik denogo bagagi o. Eke, nenowak dilninivisogon ako, nit avakwa ovok ninilup dogoguluk, At ako andi, hambuluk lendagwima en iluk erogo mendok okbagagi o,” yiluk, yugeragagi.

³² At Paulus en hambuluk iniluk arup wene ako iri hugu lagagwarik, it nin akoen Paulus wiyiknom-weyaknom erogo agonda yagagwa ovara, it ninen andi, “Wene andi, hivis ambi inim yukneranok,” yiluk, yugugu lagagwama,

³³ at Paulus ako it wene amburup mbalisagwi menda enanggelekma en winggigi.

³⁴ Wunggu lagagimu, ap ambitap andoma Paulus inim dambunggu lagagwarik, avyarat umbutugwa. Ambi andi ap wene amburup mbalisiga menda inis Dionisius. Ambi andi hwa ambi inis Damaris, eke it nin inim, avyarat umbutugwa.