Lakbogogi Wene 10 - ALA WENE HIVIS DIRUP WATUGWA

Peterus Korenelius iperen ogagagwa wene

¹ O Kaisarea ap enayegen werek ambi homago “Italia menda,” yugu lagagwa enasin inis Korenelius ako o andoma welagagi.

² At ap ako aburi inim [it weram Yakuri dek menda ovara] ovok erogo Ala enalon umbutu dugwit, Ala wene des erogo ogagu lagagwa. Aren it Yakuri menda wisane erogo ininggidek halok, yonggar-inipu, samban adigat ogagya, ogagya lagagi.

³ Ndugwis ambi vaga o howam jam 3 ari wagya hegek, nogo heda abi vaga sigam hagagi. Higya dugwit, Ala yonggo lakbisa wandiga menda malaikat ambi at adema wagya lagagirik, yugugu dugwit, “Korenelius wai.”

⁴ Yugugu lagagimu, at Korenelius anggela wunggu lagagirik, alon en il vurek dugwit, “Nasin. Nggarogo yiluk wagen?” Yugugu lagagimu, at malaikat en “Dek o. Avakwa ininggidek halok yonggar-inipu, samban ogagya, ogasiga ako vaga At Ala il heyakbagagirikmu, hat vaga ape wenggelek agarik.

^5-6 Hat vaga ape wenggelek werekma, yogak ap ambi inis Simon, inis ambi Peterus yagalagwi ako, ap ambi adik inis Simon sapi agamut bunggulogo sek ogasiga menda awi inamut yanggadek omban vaga valekma, iperen andoma werekma, warupwak yiluk, haori yonggo o Yope lakbisin,” yiluk, abi vaga yugugu hagagi.

⁷ At malaikat wene yugogogi ako lagya hegek, at Korenelius ayeloman mberen inim, at aot ayegen werek Ala wene dibaluk ogasiga ambi inim, “Warupwak,” yiluk, yanggup yugeragagi ako wagu lagagwama,

⁸ abi vaga yugogogi wene ako ovok erogo mbilinogo yugirigya lagagirik, yonggo o Yope lakbogogi.

⁹ Lakbogogi ako, nogo yiluk suvaga o Yope horok ari lagusigik, at Peterus ako, o dingga jam 12 vaga samban ogarigiluk, o helep vaga valek virimu andoma inggigi.

¹⁰ Andoma inggya lagagirik samban ogagya dugwit, erom uvup agya lagagimu, “An nano naik?” imbita lagagirik, erom isagusigik, nogo heda abi heda hagagi.

^11-12 Abi vaga higya dugwit, mbogot heyakbaluk yum obak atok venak-venak vakbagu lagagwarik, swa-bagas inim, ndimbu-nggusa inim, mindom-mbolom inim, ovok erogo yum ndalek vaga mbogarek ako wen vaga wombaba wagya hagagi.

¹³ Higyama, ane ambi at yugugu dugwit, “Peterus wai. Mondok yiluk, yi ambi warogo namin,” yiluk, yugugu ako aruk hunggigi.

¹⁴ Aruk hunggu lagagirik, “A, Nasin. Nelagwidek menda inim, nit naup moga yagalagwi menda inim, an mondok naligadekma naup nanggon.”

¹⁵ Yugugu lagagimu, ambi inim at yugugu dugwit, “Dek o. At Ala en ugun nunggu dogop bagagi hegek, haren ‘Naup moga’ yubuk,” yiluk,

¹⁶ abi henggam vaga higya lagagirik, yum obak ako mbikit mbogot vaga wolok inggya hagagi.

¹⁷ At Peterus ako, ‘Nabi higi yi, adem nggarogonggan higi,’ yiluk, ao ape wenggengguma it Korenelius lakbisa wagagi ako “Simon awi nggenam agarik?” yiluk, hemerinivit sup mbanggutmu ari wagu lagagwarik, enane ombok vaga yugu dugwit,

¹⁸ “Ap yoma. Ap huru Simon inis Peterus yagalagwi ako, o yoma werek a dek a?”

¹⁹ Yiluk, yugusim, at Peterus akoen, “Nabi andi nggarogo higi?” yiluk, ao ape wenggengguma, Ala Averiniki en at yugugu dugwit, “Simon wai, ap henggam belalhetek wagao wasim agarwik atma,

²⁰ hat mondok yiluk wambigya dogomindik, ap andi Anenat lakbisa wagi atma, [it weram Yakuri dek menda ovara,] hendawi yunggup yegetek hinim elalo.”

²¹ Yugugu lagagimu, it enadema wambigya lagagirik, yugirigya dugwit, “Belalnetek wagep ako anatma, nggarogo ogarup yiluk, nadema wagep?”

²² Yugirigya lagagimu, it akoen “Dek o. Ap enayegen werek enasin Korenelius en, lakbinina waga o. At ako endawi mot Ala alon ombasiga halok, it Yakuri menda ovok erogo at andogon sek yagalagwi atma, Ala ayonggo malaikat adik denek menda ambi wagya lagarik, at Korenelius ako yugugu dugwit, ‘Peterus en wene yukhiri warupwak yiluk yonggo lakbisin,’ yiluk, yugigas. Yugugu lagama yonggo lakbinina wagarikmu belalhetek wagyo,” yiluk, yugogogwa.

²³ Yugugu lagagwama, “Andi halok nunggumanes,” yugirigya lagagimu nunggugu lagagwarik, inim nogo yogogwa. Nogo yiluk, hutun iluk agya lagagirik, Peterus it wagagwa ako inim at aswei Yope menda eneyave maren hudi inim lagagwa.

²⁴ Lagu dugwit, suvaga nogo ambi yiluk o Kaisarea nonggagagwa. At Korenelius ako at owa-aot inim, aswei inim, it wagu saoen yiluk, homakbaluk inil werekma

²⁵ Peterus ako mbumbumu nunggu wagya lagagimu, at Korenelius akoen at eyave domatbagya dugwit avema seve yagagi.

²⁶ at Peterus akoen “An ogo eve ap atma, mondok iru,” yiluk, inggis vagago mendek okbagagi.

²⁷ Mendek okbagya lagagirik, iperen enane yagan umwa nunggugu lagagwarik, at Peterus ako avakwa wisane homago inugu lagagirik,

²⁸ aren it yugirigya dugwit, “Nit Yakuri menda hit weram Yakuri dek menda umwa nungguluk dambulik dogop moga yagalagwi ako hinilup ovara, Ala en ‘“It avakwa weram menda inim avuk arubuk,” yup andi moga,’ yiluk, yuknigarikmu,

²⁹ an belalnetek wagep ako nanggon yegetek, mbikit hit henadema wagi. Nggarogo yiluk, belalnetek wagep?”

³⁰ Yugugu lagagimu, at Korenelius akoen “Dek o. O inikak howam jam 3 yerogo vaga an namwa samban ogagya lagima, nabi hagagis ako yukhirisogon o. Nabi higyaim mbikit supuk erogo ap ambi asum mudu amumulip werek an nadema mondok yi wagya lagarik, yuknugu dugwit,

³¹ ‘Korenelius wai. Hat samban ogagen akom Ala aruk hunggu, eke, avakwa ininggidek menda yonggar-inipu lagen ako Ala il heyakbagagya lagarikmu,

³² ap Simon inis ambi Peterus ako o Yope agarik atma, warupwak yiluk, yonggo lakbisin. At ako ap Simon sapi agamut bunggulik sek ogasiga menda awi inamut ombanma valekma, inim andoma agarik o,’ yiluk,

³³ yuknugu lagama, mbikit yonggo lakbiselagirikmu hat nadema neya wagen atma, naswe wa. Neya wagen atma, yogak Hasin Ala en, ‘Anderogo yugerano’ yukhigas ako ovok erogo yukneranok yiluk, Ala ivaga homagyo,” yiluk, yugogogi.

Peterus en yugeragagi wene

³⁴ Yugugu lagagimu, at Peterus en yugirigya dugwit, “Naswei o, At Ala en, ‘Ap ambi An nanggon, eke, ap ambi An nendawi hunik,’ ombasigadek, andi an yogak avyarat ombasiga o.

³⁵ Nit yi avakwa ndi avakwa ovok erogo en At nenalon umbutu dugwit, sek adigat ogagu niniselok, At Ala endawi hunik ninombarisiga.

³⁶ ‘Yi avakwa ndi avakwa ovok Nenowa Inis Ombok ako andi, Yesus Keretus ako, At vaga Ala ninim dambulogo bininaliga o,’ yiluk, Sek Wene ako nit Iserali menda ninilup arupwak yiluk, lakba wagagi ako hinilup aro.

³⁷ At Yohanes ima wombabisaup wene yugeregek lagya lagagimu, o Galilea en Yudea yi awi ndi awi ovok oklagagi ako ogo hinilup-at.

³⁸ At Ala en Yesus Nasaret menda Averiniki ovaga wombaba wagya dugwit, denogo bagya, anye wogugu, ogagya lagagirik, Ala inim atma, sek ogarit lagya, it madis Sile avakwa enendawima malit landiga menda ako haryogo wibugu, ogarit nagu lagagi.”

³⁹ “Eke, it avakwa Yakuri enamwa andoma inim, o Yerusalem inim, oginivit lagya lagagi ako ovok erogo ninil helok, yukherelagwi o. At Yesus ako yo winik vaga lobalogo watu lagagwama hombagagi ovara,

⁴⁰ nogo mberen yikbaluk, hutun, Ala en iluk erogo mendok okbagagi ako eyave ninil hapwak yiluk inuk neragagi.

⁴¹ It avakwa nin inil hapwak yiluk, inuk eregetek. Ata, At hambuluk lendagwima en iluk akluk mendok iri lagagirik, nit endak denogo bininggigi ako ninim erom nunggwi, is nunggwi, ogagagup ako adigat ninil helok yugurugu dogopwak yiluk, inuk neragagi.

⁴² Iluk erogo mendok okbagya lagagimu, ‘It iniluk agarwik inim, hombagagwa inim, enowak dilinivup Ala en denogo mondok okbagagi ako andi Yesus aro, yiluk, des erogo vagalogo yugeregek nagu dogones,’ yukneragagi.

⁴³ It ap navi-navi Ala en yugirigya hegek yugu lagagwa ako ovok erogo At avok adigat des erogo yugurugu dugwit, ‘Henendawi At ovaga vanggabaluk avyarat umbutu hiniselok, At Yesus anye vaga henomaduk degerogo bigigayogon o,’ yiluk, yugurugu lagagwa,” yiluk, yugeragagi.

It weram Yakuri dek menda Ala Averiniki wogeragagi wene

⁴⁴ At Peterus ao anderogo yugirigya hegek, it wene hunggugwa menda ako ovok erogo Averiniki enovaga wambu wagagi.

^45-46 Averiniki enovaga agya lagagimu, it ap enagamut mbalek avyarat umbutugwa menda Peterus inim lagagwa akoen, it weram Yakuri dek menda enane inggut adik-adik menda yugwi, Ala inis siyabagwi, ogagagwa ako enaruk hobaluk, it ap weram Yakuri dek menda hegek, “Ala en it ogo Averiniki wane-wane wogeraga yi,” “Wi,” yiluk, vok yagagwa. Vok yugu lagagwarik, at Peterus akoen it yugirigya dugwit,

⁴⁷ “Ala en Averiniki nit wokneragagi ako hak it wogeragarikmu, ima wombabisaup andi, moga embetep?

⁴⁸ Dek o. Yesus Keretus inis vaga ima wombabisenes,” yiluk, yugirigya lagagimu, “Ninim ambukum dukluk lanok,” yiluk, Peterus yugogogwa.