Kolose 4 - ALA WENE HIVIS DIRUP WATUGWA

¹ Eke, hit ap henayeloman onggo hunik menda enasini yoma wai. Hiren, “An ogo Nasin mbogot vaga agarik higi,” umbutu dugwit, it henayeloman ako henendawi sek vaga atma nggedok okbugu dogones.

It ogagu dogop yugeragagi wene

² Henovarali agetek o hutun howam samban adigat ogagu dugwit, Ala, “Wa,” yugugu dogones.

³ Samban ogagu dugwit, an Keretus awene mbauk hwilago welagagi ako yugirigya lagagis vaga heda marogo mabanunggugwa yoma dugwit, niren wene andi yugeregek nagu dogoguluk, Ala en sup hutbininggya dogopwak yiluk, Timotius niperen nenake samban ogagu dogones.

⁴ Wene andi, Ala en an yugeregek nagu dogogiluk yavup woknogogi atma, an sigam erogo yugeregek nagu dogogiluk, nake samban ogagu dogones.

⁵ It avakwa avyarat embetetek menda hinim ogarit lagu dugwit, “Ala avyarat ombarupwak yiluk, wene yugeraup nanonggal aga o,” yiluk, henendawi mondok werek dugwit, ogarit lagu dogones.

⁶ Hiren wene yugurugu dugwit, erom angga ai arupwak yiluk, garam masagwi hak, hit anderogoat henane edadek enabwa umbutu dugwit, sagain erogo yugurugu dogones. Anderogo yugurugu dugwit, it avakwa en ambi hemekhinipuselok, onggo nggarogo yugeraup andi hinilup arusogom.

Atok vaga hai wakbogogi wene

⁷ At nenaswe Tikikus nenendawi hunik ninim Nenowa Inis Ombok ayeloman dugwit, Ala ake des erogo ogasiga akoen, an Paulus yoma nggarogo agirik wene ako, ovok erogo yukhera warisogon.

⁸ Hinilup okbigigapwak yiluk henadema lakba wagya neyalok, nit ovok yoma agurik nenavok ako yukhirigya, eke, henendawi aik wakbugugu, ogari warisogon.

⁹ At nenaot Onesimus ninim nenendawi hunik des erogo ogasiga hit menda ako, iperen lakbisa warisogon atma, wagu dogomundik, nit yoma ninigik okbininelagwi ako, ovok erogo yukhirugu sagup.

¹⁰ At nenaswe Aritakus heda mago niperen yoma agurik akoen hai warogo wa yukheraliga o. Eke Mbarenabas ambonggo Markus ogo en wa yukheraliga. At Markus henadema warisogon endak avok yukheragagis ako, henadema wagya halok, hai warogo eyave womanes.

¹¹ Eke at Yustus, inis ambi Yesus akoen hai warogo wa yukheraliga. It ap Yakuri menda ninim ogasagwi andi, it ap eneyave henggam andi adigat en Ala avema bisaup wene ninim wane-wane ogarit lagu dugwit, nendawi mondok iya erogo aik wakbanunggugwarikmu, yukheraliga o.

¹² Eke, at henaswe Epaveras inim hai wakbigigas. At Keretus Yesus ayeloman atma, hit henake samban ogagya dugwit, hit avyarat umbutugup ako mondok wadokdek vagago dugwit, henendawi hoda arovovok yiluk, samban ogasiga. Eke hiren, “Ala en nit ogarup ninimbitigi ako yi aro,” yiluk, avyarat umbutu dugwit, ogarit lagu hinisapwak yiluk, abwa edok erek dugwit henake samban ogasiga.

¹³ At Epaveras akoen, hit henake inim, avakwa o Laodikia menda enake inim, Hierapolis menda enake inim, anye erogo ogasiga yiluk, anen at ogagya nilup dugwit yukheraliga.

¹⁴ Eke, at Lukas nenendawi hunik dokter ako inim, ap Demas ako inim, iperenen hai warogo wa yukherelagwi.

¹⁵ Eke, henaswei-henarupwi Ala aburi o Laodikia menda inim, hwa Nimipa inim, Ala aburi at amwa homarisagwi ako inim, “Paulus aswei inim en hai wakhinipao,” yiluk, yugerano.

¹⁶ Dirup warek yi, hit henendak bikhugu dogomundik, it Ala aburi o Laodikia homasagwi ako, bikhapwak yiluk, wogeralalo. Eke, an dirup warogo Ala aburi o Laodikia lakbugu dugwit, “Hit henendak bikhugu dogomundik, Ala aburi o Kolose agarwik ako, bikhapwak yiluk wogeralalo,” yiluk yugirigirikmu wokhera waguselok, andi inimat bikhugu dogop.

¹⁷ Eke, ap Arikipus ako, hiren yugugu dugwit, “At Paulus en, ‘Nenowa Inis Ombok en yavup wokhogogi ako, ovok atok weralogo ogarinok yiluk, dibagya dogwen o,’ yagas,” yiluk, yugeres.

¹⁸ Naswei. An heda marek yoma agirik ako, henendawi wenggelnitu dugwit, nake samban ogagu dogones. Eke, Nenasin Ala henabwa en okbugugu dugwit, hinimat dogosogon o. An henasin Paulus en, “Hit naburi ovok erogo wa yukheraliga o,” yiluk, atok vaga andiat an ninggis vaga dirup yi warogo wokheraliga o. Naburi wa.