Kolose 3 - ALA WENE HIVIS DIRUP WATUGWA

¹ Keretus iluk erogo mendok okbagya dugwit, hit hinimat hiniluk erogo mendok okbogogogi atma, Keretus Ala inggis amotkan horaik agarikmu mbogot vaga andoma, ogasagwi menda wene ako adigat henendawi vanggabaluk, henape wenggenggu dogones.

^2-3 Hit hambugu lagagupmu, Ala en hiniluk erogo mendok okbugugu lagagirik, Keretus hinim Ala endawima hwilakbigiluk werekma, henendawi wen vaga menda vanggabaluk dogobuk. Ata, henendawi mbogot vaga menda adigat vanggabaluk, henape wenggenggu dogones.

⁴ At niniluk okninivisiga menda Keretus ako, sigam ari warugwi vaga hit hinim ndatak winimen siyalek andoma-at hinisasogom o.

Nenandogon endak menda hekbaluk, swi menda oklarup wene

⁵ Anderogo atma, naswei. Henendawi weyak ogarup okhinivisiga ako, ovok erogo mondok degerogo bagu dogones. Akwa ugun oginivit lagwi, wanggis wugwi, henendawi ninggya ako ugun musek lagwi, weyak ogarup adigat hogop umbutwi, yi menda ndi menda hogop adigat umbutwi, ogarup andi moga. Henendawi yi menda ndi menda hedaup hogop adigat ombasagwi ako andi, huvuwak inis adup ogasagwi wane-wane aro.

⁶ It avakwa anderogo ogarit laguselok, Ala ane sagalisagwi atma, Ala aninis avyarat enovaga arisogon.

⁷ Hit endak weyak adigat ogarit lagu dugwit, andi menda ovok erogo ogarit lagu lagagup ako hekbagagup ovara,

⁸ yogak, mbet yugwi, naninis-haninis yugwi, weyak okbisaup henape wenggenggwis, wiyiknom-weyaknom erogo bugwis, wene yubuk menda hegek yugurugwi, ogasagwi andi menda ovok erogo hekbagu dogones.

^9-10 Nit nenendawi swi okninivisiga Ala akoen, At ogasiga hinilup arovovok yiluk, At endawi hak hit henendawi swi okbugugu hegek, hit henandogon endak menda vaga weyak ogagu lagagup ako, nggolalogo hekbaluk, henandogon swi menda okhedagagup atma, hikirat henane huluk yagalagwi andi moga.

¹¹ Nit nenendawi swi okbininaliga ako vaga ogarit lagu dugwit, “Yi Yakuri menda yi Yunani menda, yi enagamut mbalek menda, yi enagamut mbalekdek menda, yi ap huru enane adik yagalagwi menda, yi ap nelagwi menda, yi ap enayeloman onggo hunik menda, yi ap ugun agaruk menda,” yiluk, anderogo yugu dogobuk. Ata, At yi awi ndi awi ovok erogo anye werek agarik Keretus ako, nit ovok Nenowa Inis Ombok Arat agarik.

¹² Anderogo atma, At Ala en henabwa imbita dugwit, At aburi sek adik enek dogovovok yiluk, mikhinipigi atma, yum yikhedelagwi hak, henandogon swi menda okhidugu dugwit, avakwa enabwa umbutwi, henendawi sek vaga okbugwis, henendawi sovalek dugwit nagwis, henane sagain vaga yugurugwi, henovavut luvugerek welagwi, ogagu dogones.

¹³ Hikirat henendawi hora yiluk dugwit, at ambien at ambi omaduk degerogo bagek ogagu dogones. Hit henaswe ambien weyak okbugugu halok, Nenowa en hit henomaduk mondok degerogo bagagi ako wane-wane, hit ogo anderogoat weyak okhinivisiga ako omaduk degerogo bagu dogones.

¹⁴ Yukhirigi andi ovok erogo ogarit lagu dugwit, hit henendawi ambiat dambulik dugwit adenggen wisane dogop adem ako andi, yum yikbaluk mban nggetalogo yikhedelagwi hak nabwa-habwa vaga okbiselagwi ako atma, andi inimat ogarit lagu dogones.

¹⁵ Keretus hinim hunik heneyave ambiat akluk dambulik dugwit, henendawi ugun seyalek adenggen dogovovok yiluk, Ala en heneyanggup yagagirikmu, hiren yi menda ndi menda ogagu dugwit, henendawi Keretus en hinim dambubigigirikmu agipik atma, henape wenggenggu dugwit, ndatak-at ogarit lagu dogones. Anderogo ogagu dugwit, “Ala wa,” yugugu dogones.

¹⁶ Keretus iri lagagi wene ovok erogo henendawima mondok ambi inim hobo-hobo erogo hidugu dogones. Hidugu dogomundik, henendawi werek akluk, hikirat Ala wene mbilinggwis, mbilape vaga henaruk war-wat yugwi, eke, Ala hai watu dugwit, Daut ndawi bagagi ako inim, hiwene ndawi inim, Ala ogasiga ndawi inim, ovok erogo watu dogones.

¹⁷ Keretus henabwa en henake ogasiga atma, Henasin Ala, “Wa,” yiluk, hai watu dugwit, henane yagalagwi inim, ogarit lendagwi inim, ovok erogo Nenowa Yesus inis ombok arupwak yiluk, adigat ogarit lagu dogones.

Avyakwa inim dugwit ogagu dogop wene

¹⁸ Hit akwa yoma. Hit Nenowa Inis Ombok hinim hunik atma, Ala aburi ogasagwi hak, henaguni enavema dugwit, enane hunggu dogones.

¹⁹ Eke, hit ap ogo, henogwai enabwa umbutu dugwit, henane sidi-rede erogo yugurugu dogobuk. Ata, henane sagain erogo yugurugu dogones.

²⁰ Hit avivak-hwiyavivak yoma. Hit Henowa Inis Ombok endawi sek henombarupwak yiluk, hinisai-henasini enane yukherelagwi ako des erogo hobaluk, ogagu dogones.

²¹ Eke, hit ap henaburi werek menda yoma. Henaburi enendawi sali-vali mbanggu saoen, henane haro vaga mbiluvubuk.

²² Hit avakwa enayeloman onggo hunik menda yi ako, henasini enendawi sek henombarupwak yiluk, inil inigik adigat ogagu dogobuk. Ata, Nenowa agayuk wutu dugwit, it yukherelagwi ako ovok erogo “E o,” yiluk, henendawi sek vaga eneyavup ogarit lagu dogones.

²³ Yi menda ndi menda ovok erogo ogarit lagu dugwit, “Yi avakwa eneyavup ogasagudek. Ata, yi Nenowa eyavup-at ogasagwi o,” umbutu dugwit, henendawi enggen vaga eneyavup ogarit lagu dogones.

²⁴ Hit henasini eneyavup ogasagwi andi, Nenowa Inis Ombok eyavup wane-wane ogasagwi atma, henendawi en, “Nit yavup ogasagwi onggo andi, At Nenowa Inis Ombok Keretus en nduk okbininggigi agarik o,” yiluk, henendawi dibagu dogones.

²⁵ Ovara, At Ala en ap ambi iya, ap ambi meyan, nenombasigadek nit ogasagwi onggo wane-wane woknerayogon atma, saen weyak ogagya halok, Ala en anggin onggo wane-wane at ovaga bayogon.