Kolose 2 - ALA WENE HIVIS DIRUP WATUGWA

¹ It Laodikia menda inim, it nin an neyave inunggut menda inim, hinim ovok erogo sek adigat ogagu dogovovok yiluk, an anggin hegek ovara, henake musek-hasek ogasiga ako, hinilup arovovok yiluk, yukheraliga.

² Hit henendawi aik warek dugwit, henendawi ambiat akluk, nendawi-hendawi hunik okhidugu dogovovok yiluk, an henake ogasiga. Hit anderogo dugwit, “Wene andi avyarat,” yiluk, dibaluk, henendawi yunggup yegetek ambiat dugwit, Ala wene mbauk hwilago welagagi ako des erogo hinilup arusogom. Eke wene andi, Keretus aro.

³ Ala endawi werek dugwit, yi wene ndi wene mondok ilup andi, At endawi hwilago welagagi ovara, Keretus adigat en sigam erogo yukneraliga.

⁴ It avakwa en enane sek vaga huluk wene yagan wagu dugwit, nomalhiniviluk sup adik vaga lagu hinisaoen, wene andi yukheraliga.

⁵ An neyave hinim andoma agurikbuk ovara, nendawi andi, hinimat agirik atma, hit henendawi Keretus ovaga vanggabaluk, avyarat umbutugup ako wadokdek vagago dugwit, mondok ndatak ogarit lendagwi atma, an nendawi mondok adenggen ombasiga.

Keretus ninim hunik atma nenendawi dikduk erek agurik wene

⁶ Hit endak en, “Keretus Yesus andi, nit Nenowa Inis Ombok aro,” yiluk, wagagup atma, yogak At hinim hunik dugwit, ogarit lagu dogones.

⁷ Henomanggen anye erogo Yesus vaga yakbaluk, hinim hunik dugwit, henendawi hoda okhidugu dogones. Eke, avyarat umbutugup ako wadokdek vagago dogovovok yiluk mamulheragagwa ako, wane-wane wadokdek vagago dogones. Ogagu dugwit, henendawi mondok adenggen vaga, Ala, “Wa!” yugugu dogones.

⁸ It avakwa ambi okbisabuk hegek un enambukmu dagaguluk, enape wenggelogo yukherelagwi ako andi, Keretus wene dek. Andi, it enombawi enane mamulik menda inim, it madis o wema yoma vagago agarwik menda ako inim, enane mamulik-at yagan nelagwi atma, heda marek ovagak it enavema dugwit, enane adigat hunggu dogovovok yiluk, hit henambukmu unggu inisaoen, suam wakhidugu dogones.

⁹ At Ala eyave itok dikduk erek agarik ako ovok erogo, Keretus ovaga dugwit, avakwa hak endaklagya lagagirik, nagu lagagi.

¹⁰ Eke, hit Keretus hinim hunik agipik atma, hit ogo henendawi ovok dikduk okbigigirikmu, adik ambi inim okbigigaup mondok dek aro. Yi madis ndi madis mbogot avema o ilim yenam agarwik menda inim, malaikat enagayuk werek winimen menda inim, ovok erogo Keretus avema inigik, At adigat winimen siyalek agarik.

¹¹ Eke, At hinim hunik dugwit, henagamut mbalogo bogogogi ovagak agipik. Andi ogagagi ako andi, it avakwa en okbininggitek. Ata, avakwa enagamut mbalogo biselagwi hak, nenendawi endak menda en weyak ogarup okninivisiga adem ako, At Keretus en vage anyedek erogo sovalogo bagagi atma yiluk, yukheraliga.

¹² At Keretus hambigya lagagimu, wimu mabagagwa hak, hit ima wombabigigu dugwit, hinim hunigat wimu mabigigugwa. Eke, At hinim hunik warek werekma, “Ala anye vaga hambuluk lendagwima en iluk erogo mendok okbagagi,” yiluk, henendawi At anye vaga vanggabagagup andien, ima en yegedogo mendok okbigigusim, At hinim hunigat hiniluk erogo mendok okbogogogi.

¹³ Hit henendawi endak menda en weyak ogarup okhinivisiga adem ako, ao anyedek erogo bagetek hegek, yi weyak ndi weyak ogarit lagu lagagup vaga nggorak ovagak welagagup ovara, Ala en hit weyak ogagu lagep menda ovok degerogo bigigu dugwit, Keretus hinim hiniluk erogo mendok okbigigi.

¹⁴ Wene “Yerogo ogarup, nderogo ogarup,” dirup warek ako nit ogagetek niniselok, Ala en, “Weyak onggo anderogo okbisagiluk,” inggis dinggilogo dirup warek anggin henovaga welagagi ako, “Mondok hekbayogon,” yiluk, dirup warek ako Keretus inim yo winik vaga lobalogo baluk, mondok degerogo bagagi.

¹⁵ Anderogo ogagagi ako, At Keretus en, “An nayegen inis ombok aga ako neyapwak o,” yiluk, at Sile aori yi madis ndi madis inim, it enagayuk werek o ilim yenam agarwik menda inim, ovok erogo enanyedek erogo bisiluk, enanggadi arupwak yiluk, eneyave ombok vaga o ilim yenam wogonombolok lagya lagagi.

¹⁶ Hit yi menda ndi menda nunggwi, Musa wene dirup warek musek isogo isagwi, saut ambi nggao iri halok adenggen ogagwi, samban ogasagwi vaga nano ogagwi, ogasagwi menda ako, it ninen yukhirugusigik ovara, hit ugunat ogagusim, it wene anggin henovaga bigigaup andi mondok dek.

¹⁷ Ogasagwi ako andi, Keretus eyave ao wagetek hegek ovara, warisogon yiluk agur-agut ovagak un ogagu lagagwa. Ovara eyave mondok wagagi ako andi, Keretus aro.

¹⁸ It avakwa enendawi sovalek heda ogagu dugwit, malaikat ininis adup ogarit lendagwi ako, hit dibagu hiniselok, Ala en wokheraup ako degerogo batugu hinisaoen, enane hunggu dogobuk. It ako wen vaga menda adigat enape wenggelit lagwi, it ap iya erogo dek hegek enendawi wogobatugu dugwit, “Nogo heda nabi heda haliga atma, an eve iya,” yiluk, enabi hagao ako mbilinggwis, ogasagwi atma, enane hunggu dogobuk.

¹⁹ Nenomanggen vaga nininggis ninisok bagagi ovok erogo ninunggul yinik-kunik erek dugwit, neneyave ombok asagwi ako hak, nit ninunggul Keretus ninim anderogoat hunik atma, At Ala en, Keretus eyave ombok arupwak yiluk, okninivisiga. Hegek, it avakwa andi, inunggul Keretus ako hekbaluk, inim hunik dek ugun nelagwi atma, enane hunggu dogobuk.

Keretus ninim niniluk erogo bininggigi wene

²⁰ Hit Keretus hinim hunik dugwit, hambugu lagagupmu, yi madis ndi madis o wema yoma vagago agarwik menda enagayuk wutu dugwit, enane hunggu lagagup ako sovalogo baluk, visilogo bininggigi hegek, nggarogo yiluk visilogo bigigitek enane ao hulisagwi ovagak okhedegek lendagwi?

²¹ It akoen, “Yerogo ogarup nderogo ogarup,” yugu dugwit, “Andi vagarup moga. Andi naup moga. Andi vakhabuk,” yiluk, yukherelagwi ako, nggarogo yiluk, “Yi avyarat,” yiluk, enane hulisagwi?

²² It yukherelagwi ako andi, ogagu lagurik, vage dek asiga menda hegek nggarogo yiluk yagalagwi? It yagalagwi ako andi, avakwa un enendawi wenggebaluk, “Yerogo ogarup moga, anderogo ogarup moga,” yiluk, wene mamulik-at yukherelagwi.

²³ Enane anye vaga, “Malaikat inis siyabagu dogones o,” yiluk, yukhirugwi, enendawi sovalek ovageda ogarit nagwis, eke, “Ap yi, iya,” enombarupwak yiluk, eneyave vaga wakhidugwi, ogarit laguselok, “Yi enendawi werek en ogasagwi,” ombarusogom ovara, wene andi welagwi vaga henendawi ninggya halok musek laup okhinivisiga ako andi, sovalogo bagu dogosogombuk atma, musek lagu dogobuk.