Kolose 1 - ALA WENE HIVIS DIRUP WATUGWA

¹ An Paulus, Ala imbitigi vaga Keretus Yesus ayonggo lakbigik menda okbaninggigi ako, nenaot Timotius niperen en

² hit nenaswei-nenarupwi Ala aburi ake enek Keretus hinim hunik dugwit des erogo ogasagwi o Kolose agipik ako, nit wene ambi yukherasogom. Nenasin Ala henabwa en okbigigu, hit henendawi ugun seyalek adenggen dogovovok yiluk, okhinipu, ogagya dogopwak o.

It ogasagwi vaga Paulus en Ala, “Wa!” yugogogi wene

^3-4 Hit Keretus Yesus avyarat umbutu dugwit, henendawi At ovaga vanggabelagwi inim, eke, it Ala aburi ake enek menda ovok erogo henendawi hunik oginivisagwi ako inim, henavok nenaruk hunggu lagurik, henake samban ogagu dugwit ndugurek-ndagarek Nenowa Inis Ombok Yesus Keretus Asin Ala, “Wa,” yugisagwi o.

⁵ Avyarat wene Sek Wene Yesus avok ako yukhirugu dugwit, “Hit avyarat umbutu hiniselok, henake ndugerek mbogot vaga agarik o,” yiluk, endak yukheragagwa ako hunggu lagagupik, mondok hedelaup henape wenggelek dugwit, henendawi avyarat umbutwi, henaswei henendawi hunik okbugwis, ogasagwi ako nenaruk hunggu lagurik, yukherelagwi.

⁶ Sek wene Keretus avok henaruk hobaluk, Ala avyarat endawi nenabwa en okbininaliga wene ako yedok hugu lagagupik, avyarat umbutu dugwit, wagagup hudien, yogak aoat henanggelekma en wigaliluk landiga atma, yo enggen sek yiliga hak, o yi awi ndi awi ovok erogo anderogoat wigaliluk lagya dugwit, enggen eve wisane erogo yilin landiga.

⁷ Sek wene Keretus avok ako, at Epaveras nenaswe ninim ogasagwi nenendawi hunik ako enat yukheragagi. At Keretus ayeloman dugwit, nit henake ogarup meyan halok nenavoloma arat des erogo ogasiga atma,

⁸ Averiniki en okbigigu hegek, nabwa-habwa ogasagwi wene ako, arenenat yuknera wagagi.

⁹ Hit anderogo ogarit lendagwi nenaruk hunggugup hudien mbup yegetek ndugurek-ndagarek henake samban ogagu dugwit, Ala en ogarup ombasiga ovok erogo Averiniki en hinilup okbugugu dugwit, yi wene ndi wene adem ovok erogo yedok hugwi, eke, henendawi werek okbugugu, ogagya dogopwak yiluk, Ala yugisagwi.

¹⁰ Henake samban ogasagwi andi, Nenowa Inis Ombok endawi sek henombarupwak yiluk, ndatak ogarit lagu dugwit, yo enggen eve sek adigat yiliga hak, sek adigat ogarit lagwi, eke, Ala ogasiga hinilup agu dugwit, henendawi modo agwi, ogarovovok yiluk, henake samban ogasagwi.

^11-12 It Ala aburi ake enek ako, Ala avema abinak adigat agarikmu dugwit, nano menda vipuk erogo bogogogi hedapwak yiluk, imbitigi ako, ninim wane-wane hedaguluk, endawi hologo bininggigirikmu, anggin-mbanggin henovaga agya halok, henendawi horaik wadokdek dugwit, henadenggen vaga, “Nenasin Ala wa,” yiluk, wugu dogovovok yiluk, samban ogasagwi. Hit henendawi horaik dugwit, wugu hinigik, At mondok winimen siyalek agarik anye vaga yi menda ndi menda ogasiga akoen, hit wane-wane anye okbugugu dogopwak yiluk, henake samban ogasagwi.

¹³ At o hwiserek andok akoen nit heda mago ovagak werekma, Ala en nenagap wendarogo At Abut endawi hunik ako avema binina wagya lagagimu,

¹⁴ At Abut akoen nenonggo mbabaluk, heda visilogo bininggu lagagarik, nenomaduk degerogo bininggigi.

Keretus mondok winimen siyalek agarik wene

¹⁵ Ala elese ninil helagudek ovara, At elese ndatak andi, Keretus Yesus atma, nit dibelagwi o. At Ala en yi menda ndi menda ovok erogo werek ogagagi ako, sovalek hegek, At Abut manggum endago Keretus ako adigat mondok winimen siyalek-at agarik.

¹⁶ At Ala en ogarup yugugu hegek, mbogot vaga menda inim, wen vaga menda inim, ninil helagwi menda inim, ninil helagudek menda inim, yi menda ndi menda ovok erogo Abut en adigat ogagagi. Ogagya dugwit, madis wen avema menda inim, yonggapma menda inim, mbogot avema o ilim yenam agarwik menda inim, enagayuk werek winimen menda inim, yi menda ndi menda ovok erogo, At adigat inis adup ogagu dogopwak yiluk, ogarogo bogogi.

¹⁷ Yi menda ndi menda ao ogagetek hegek At endak welagagi. Yogak yi menda ndi menda enavolomambo adigat agarwik andi, Arenat vagenombogo werekma enavoloma sek agarwik.

¹⁸ Ala aburi yi awi ndi awi homarisagwi ako, dambup erogo Keretus eyave ovagak niratma, ninunggul hak andi, Arat. Eke, yi ogasagwi ndi ogasagwi adem andok ako andi, At Adigatma, yi menda ndi menda ovok erogo wenamen sovalek hegek, At adigat winimen siyalek dogopwak yiluk, hambuluk lendagwima en endak Arat iluk erogo mendok okbagagi.

¹⁹ At Ala en, “An neyave nitok dikduk ogarek agirik hak, Nabut ogo mondok wane-wane-at dogopwak o,” yiluk, endawi sek imbita dugwit,

²⁰ “Nabut yo winik vaga hambigya dogomindik yi menda ndi menda ovok erogo An ninim ogorek agarwik ako, amuya vaga enonggo mbabaluk, An ninim dambubisa warisogon o,” yiluk, imbitigirikmu, At Keretus ogagagi vaga mbogot vaga menda inim, wen vaga menda inim, ovok erogo At amuya vaga nenonggo mbabaluk, Ala ninim dambulogo bininggigi.

²¹ Hit endak weyak ogarup adigat henape wenggebaluk, ogarit nagu dugwit, Ala hinim ndup ogorek o adumu ovagak welagagup ovara,

²² hit heneyave At Ala aburi ake enek dugwit, At ivaga wene anggin henovaga dek sek adigat dogopwak yiluk, At Keretus ap-at agya lagagirik, nenavoloma hombagagi ako vaga Ala inim dambulogo bininggigirikmu, yogak dambulik-at agurik o.

²³ Keretus andi ogagagi ako vaga, Ala hinim dambulogo bigigirikmu, Sek Wene Keretus avok hit hunggu lagagupik, avyarat umbutu dugwit, “Ala en anderogo okbininayogon higi,” yiluk, henape wenggelek agipik ako, hekbabuk. Ata, o owak ngguvulik hak Keretus vaga henendawi vanggabaluk, wene avyarat umbutugup ako, henendawi wadokdek dugwit, musek lagu dogones. Eke, Sek Wene yi awi ndi awi ovok erogo wigalit landiga ako andi, an Paulus ninimat yugirigya dogogiluk, Ala ayeloman ogarogo baninggigi.

Paulus idup-mbidup ovaga agya hegek ovara, Ala aburi enake ogagya lagagi wene

²⁴ An idup-mbidup okbanilagwi ako andi, “Hit henake-at okbanilagwi,” imbita dugwit, nendawi adenggen adigat agirik. Eke, “Ala aburi yi awi ndi awi homasagwi ako dambup erogo andi, Keretus eyave atma, enendawi wadokdek dogopwak yiluk, Keretus watusigik, wakhedagagi ako, nin hegetek menda avoloma an neyave hit henake idup-mbidup okbanup segat,” imbita dugwit, nendawi adenggen ombasiga.

²⁵ Ala aburi yi awi ndi awi homasagwi ako, an it enake ogagya dugwit, Ala wene ovok erogo yugeregek nagu dogogiluk, At Ala en andok okbaninggigi.

²⁶ Wene andi, o endak en yogak hudi mbauk hwilago hegek, avakwa endaklarit wulu wagu lagagwa ovara, yogak yiat, it Ala aburi At ake enek menda iniselok, sigam okbogogi.

²⁷ Wene adik hunogo mondok iya menda hwilago welagagi ako, At Ala en, “Hivis avakwa weram Yakuri dek menda inilup okbisayogon,” imbitigi ako, yogak yiat it At aburi inilup okbigas. Wene hwilago welagagi eyave ako andi, Keretus henendawima agarik akoat. Eke Keretus henendawima agarik halok, hivis At hinim winimen siyalek dogoguluk, okbigigaup henape wenggelek agipik ako, andi aro.

²⁸ Anderogo atma, naswei. Hit nenaburi ovok erogo Keretus hinim hunik dugwit, henendawi ovok hoda agep halok, “Ala adema wokhenombolok bigiga laup,” umbutu dugwit, Keretus ogagya lagagi wene yukhirugu dugwit, henaruk watwis, nenendawi mondok werek dugwit, yukhirugwi, ogarit lendagwi.

²⁹ Hit anderogo henendawi mondok hoda agu hinisaigen yiluk, Keretus anye mondok iya okbaninggya hegek, an mbup yegetek henake mondok musek-hasek ogasiga.