Iberani 9 - ALA WENE HIVIS DIRUP WATUGWA

Wene endak nggatuk erogo yugeragagi ako ogagu dugwit, Ala inis siyabagu lagagwa wene

¹ Wene endak nggatuk erogo yugeragagi ako ogagu dugwit, Ala inis siyabagu dogop halok, “Anderogoat ogagu dogones o,” yiluk, yugeragagi wene hobalek inim, it Ala ake ogasagwima avakwa en vanggugwarikmu ako inim, welagagi.

² Ap imam-imam en ogagu dogopim eravo ovagak vanggu dugwit, kamar mberen higitugwa. Kamar weram ogarek andi, “Mogama,” yugu lagagwarikmu, hali yevedogo bagek werogarek inim, roti Ala ake bagu lagagwa yobak ndalek inim, andoma-at welagagi.

³ Eke, kamar weram ilim vikit andenam yum sivinik hegek, ambukmu kamar ilim milimu higirek ako andi, “Moga Adigat Agarikmu o,” yugu lagagwa.

⁴ O Moga Adigat Agarikmu andoma wulunggudi hali belagwima yuvuk amben sek menda mbusi emas vaga ogarek inim, yovisi “Ala ninim agarik” yiluk ovok erogo ilim weram mbusi emas vaga lombalek inim, o andoma-at welagagi. Eke, erom mana nin sogolowak mbusi emas vaga yidik inim, ap Harun owanggun vaga aruknuk mban yagagi ako inim, eke, Ala en wene helep vaga dirup warogo Musa wogogogi ako inim, ovok erogo yovisi elola akoma-at yidik welagagi.

⁵ Eke, malaikat ovagak kerub mberen enagut “Ala ninim agarik” yiluk, yovisi avakwa enomaduk degerogo bisaligama winimen vaga enamik wigabaluk, lovarek welagagwa. Wene andi menda nin ovok mbilinogo yukheraup ovara, meyan atma, nin agako higirek-at yukheraliga.

⁶ Eravo valek kamar higirek akoma anderogoat mondok adik-adik werogarekma, it ap imam-imam yavup ogasagwi ako ogagu dogoguluk, kamar weram akoma ndugurek-ndagarek nunggugu lagagwa.

⁷ Eke, kamar ilim higirek akoma andi, At ap imam inis ombok ako adigat tahun ambi ari wagya halok, ndugwis ambi vaga adigat nonggegek ogagya lagagi. Eke, nonggegek ogagya dugwit, un nunggwigya lagagibuk. Ata, at adik weyak ogagya lagagi menda ake inim, it avakwa Iserali menda inunggut dugwit weyak ogagu lagagwa menda enake inim, Ala en degerogo bapwak yiluk, enanggom warogo amuya hudilogo wolok nonggegek ogagya lagagi.

⁸ Anderogo ogagya lagagi vaga Ala Averiniki en sigam vagalogo yuknirigya dugwit, kamar weram vikit ogagu lagagwa ako dek agetek ao ogagusim, sup ilim Moga Adigat Agarikmu akoma sup hurogo bininggitek ao larik agarik ninilup arupwak yiluk, yuknirigya lagagi.

⁹ Eravo valekma ogagu lagagwa ako andi, eyave yogak sigam aga ogasagwi yi, agut wakhegek-at ogagu lagagwa. Andi, yi menda ndi menda Ala ake bagwi, Ala ake warogo wogugwis, ogagu lagagwa ovara, it wogori wendagwi andi vaga, “Weyak ogasigadek ovagak ogarogo benanggas o,” yiluk, enendawi ugun sek welagetek. Ata, weyak ogagu lagagwa ako vaga enape wenggelek-at welagagwa atma, un agut wakhegek-at ogagu lagagwa helagwi.

¹⁰ It yi menda ndi menda Ala wogori lagu lagagwa ako andi, eneyave sek dogoguluk, “Erom inim, is inim, anderogo okbaluk nunggwi, yi menda ndi menda anderogo hutwis, ogagu dogones o,” yiluk, wene hobalek hegek ogagu lagagwa ako, wene swi menda Ala en ao ogagetek hegek, wene endak menda ako un sidogat ogagu lagagwa.

Wene adik swi menda Keretus ogarigiluk wagagi wene

¹¹ Anderogo ovara, Keretus andi, Nenowa ap Imam Inis Ombok dugwit, Ala en mondok eve sek adigat okbininaup imbitigi ako, okbininagiluk wagya lagagirik, Ala en yi menda ndi menda sek okbagagi wen vaga agarik ako menda avakwa en wonggabaluk vanggugwarikmu akoma ogasigadek. Ata, At o mondok sek eve iya valekma akoma nunggwigya lagagirik, nenake ogasiga.

¹² Eke, At yum ilim sivinik hegek Moga Adigat Agarikmu nunggwigya dugwit, sapi inim, kambin inim, amuya wolok nonggegetek. Ata, At adik amuya ndugwis ambiat wolok nunggwigya lagagirik, nit mondok-mondok visilek dogoguluk, nenonggo mbalogo bagagi.

¹³ Adat avakwa Iserali menda ogagu dugwit, ap en moga menda vagatuselok, eneyave horogo sek arupwak yiluk kambin amuya inim, sapi amuya inim, sapi eyave warogo Ala ake hali hunisagwima owak hali baluk, wul asiga menda inim, wogogo enagamut vaga lisilogo buguselok, enagamut weram horinivisagwi hak,

¹⁴ Keretus amuya andi, mondok iya atma, nit nenomaduk horogo bininaup meyan ombasagwi? Dek o. At mondok itok agarik Averiniki en Keretus okbagya hegek, ndomba omap ambidek sek ako ovagak endawi en At eyave-at nit nenake Ala wogogogi. Anderogo atma, yogak nit Ala mondok iluk itok agarik ako, ake ogagu dogoguluk, wene endak enam warogo musek lagu ninigik, nenomaduk dek agetek nenape wenggelagek adigat ogasagwi ako, At amuya vaga degerogo baluk, mondok sek erogo bininaup segat umbutu dogosogom.

¹⁵ Anderogo atma wene endak nggatuk erogo yukneragagi ako, niren ogarit lagu dugwit, wane-wane ogagetek sovalogo baluk, weyak ogagu lagagumu, nit heda mago ovagak welagagup. Anderogo werekma, At Ala en Keretus hombagagi ako vaga nenonggo mbabaluk, heda visilogo bininggigirikmu, Aren nit “Mondok dogop menda wokherayogon o,” yiluk, neneyanggup yukneragagi ako vaga, wene adik swi menda nggatuk erogo yukneragagi ako waguluk, Keretus nenake ogasiga.

¹⁶ Ap ambi en, “An hambigya neyalok mavorangge it anderogo-anderogoat hedapwak o,” yiluk, dirup warogo baliga ovara, “Avyarat hombagas o,” yiluk, selekma yegetek halok, mavorangge man ogasagwidek.

¹⁷ At dirup warogo baliga ako ao iluk agarik hegek, “Anderogo hedaup o,” yiluk, dirup warek ako andi, man ogasagwidek. Eyave hambigya halok andi, man ogasagwi atma,

¹⁸ wene endak Ala en nggatuk erogo yugeragagi ako, ogagu dogopwak yiluk, amuya weralogo bagagi vaga atma agagi.

¹⁹ Andi, At Ala en, “Yerogo ogarup, nderogo ogarup,” yiluk, wene ako ovok erogo yugugu lagagimu, it Iserali menda en avyarat ogagu dogopwak yiluk, Musa en wene ako ovok erogo mbilinogo yugirigya lagagirik, sapi-kambin amuya is inim nokbaluk, ndomba iris saup mudu ovagak yo hisop elaklak vaga yomakbaluk, mbuku virik-verek vaga inim, avakwa eneyave vaga inim, ovok erogo weralogo bisilin lagagi.

²⁰ Weralogo bisilin lagya dugwit, “Hit, ‘Yu o,’ yiluk, ogagu dogovovok yiluk, Ala en wene nggatuk erogo yukheraga yi, ‘Avyarat ogarisogon,’ umbutu dogovovok yiluk, amuya yi, henovaga weralogo bigigis o,” yiluk, yugeragagi ako.

²¹ Andi okbagya lagagirik, eravo valek inim, Ala inis siyabagu dugwit, ogasagwi yi menda ndi menda inim, ovok erogo amuya ako weralogo bagagi.

²² Wene Musa yugeragagi ako wane-wane ogagu dugwit, yi menda ndi menda ovok erogo sek arupwak yiluk, amuya vaga adigat hurisagwi hak, amuya weralogo baup wene hobalek atma, amuya wulu wagetek halok andi, nenomaduk degerogo baup meyanat helagwi.

Keretus en nenomaduk degerogo bagagi wene

²³ Anderogo atma, mbogot vaga ogagu dogop agut walokhegek ogagu lagagwa yigi ako andi, sek arupwak yiluk amuya vaga anderogoat hokbaluk ogagu lagagwa ovara, mbogot vaga en ogagu dogop yi menda ndi menda halok andi, iya atma, sek arupwak yiluk, sapi-kambin amuya vaga hurup meyan. Ata, amuya anye adik menda vaga hurup andi sek.

²⁴ Anderogo atma, Keretus ako andi, o eyave valek agut walokhegek o Mogama avakwa en vanggugwarikmu akoma nonggegetek. Ata, At mbogot vaga adigat nunggwigya lagarik, Ala adema nenake ogasiga.

²⁵ Eke, ap imam-imam enasin ombok akoen Moga Adigat Agarikmu akoma nunggwigya dugwit, at adik amuya wolok nunggwigya lagetek. Ata, aren sapi-kambin amuya ako adigat wolok tahun ambi ogagya halok, ndugwis ambiat vaga nonggegek ogagya lagagi ovara, Keretus andi, “Enake hambisogon o,” yiluk, mbogot vaga andoma hunik winggik-nonggegek iri lagatek.

²⁶ At ap imam-imam enasin ombok akoen sapi-kambin amuya wolok tahun ambi ogagya halok, nonggegek ogagya lagagi hak, Keretus en At amuya vaga anderogo ogagya duklipmu en, At o wakhagagi hudien mbikit, yogak yi hudi yagan watik adigat ogagya duklip. Ovara, At amuya adigat vaga yi weyak ndi weyak ovok erogo degerogo bayogon yiluk, o hivis arup yogak vage ari wandiga yi vaga, “Enavoloma hambisogon o,” yiluk, wambu wagya lagagirik, ndugwis ambiat vaga nenake yagan warogo hombagagi.

²⁷ Nit ndugwis mberen vaga hambusogombuk. Ndugwis ambiat hambup enek atma, ndugwis ambiat hambugu niniselok, At Ala en nenowak dilisogon ako wane-wane

²⁸ Keretus ogo, nit yi avakwa ndi avakwa nenomaduk degerogo bagiluk, wagya lagagirik, ndugwis ambiat nenake hombagagi. Andien, At hivis wagya dogomindik, nenomaduk degerogo bininagiluk, warisogonbuk. Ata, nit ovok At warupwak yiluk, abyam agurik ako nenagap wendarogo bininagiluk warisogon.