Iberani 8 - ALA WENE HIVIS DIRUP WATUGWA

Yesus andi, Nenowa ap imam Inis Ombok winimen agarik wene

¹ Nit wene yagalagwi yi ako, adem des erogo yiat yukherayogon o. At ap imam Inis Ombok Nenowa andi, anderogoat agarik. At Nenasin Mondok Siyalek Agarik mbogot vaga wene yugeraligama inggis amotkan hora yi inggya lagagirik dugwit,

² it avakwa en eravo ovagak vanggugwarikmu akoma ogasigadek. Ata, At eve eravo Ala en vanggigirikmu Moga Adigat Agarikmu akoma dugwit nenake ogasiga.

³ It ap imam-imam enasini ininis ombok ako andi, yi menda ndi menda Ala ake bagwi, At ake warogo wogugwis, ogagu dogopwak yiluk, enogo mondok okbelagwi ako wane-wane, Nenowa Imam Inis Ombok Yesus ogo, nenake ogagya dugwit, At ugun ogagya dogop meyan. Ata, At ogo angge ambi Ala ake betaup-at agarik.

⁴ At ako andi, wen vaga yoma ninim duklipmu en, at Musa en, “Ala ake anderogo wogugu dogones o,” yiluk, yukheragagi ako wane-wane, wogugu dogopwak yiluk, ap imam-imam eneyave ovok enek agarwik atma, At Yesus andi ap imam yoma duklipuk.

⁵ At Musa en it ap imam-imam ako ogagu dogopim eravo ovagak valigiluk ogagyaim, Ala en, “Ndom vaga en walokhegek, ‘Yerogo ogarup o,’ yiluk, yukhigis yi, wane-wane-at ogagu dogopwak yiluk, yugeran,” yugogogirikmu, o eyave mbogot vaga valek hegek, it ap imam-imam enasini ininis ombok ako andi, un agut walokhegek eravo valek vaga ogagu selagwi.

⁶ Eke, yogak okbininaup nggatuk erogo yagagi wene ako andi, mondok iya atma, wene endak menda ako ogagu dugwit, okbininaup meyan halok, Yesus en Ala ninim dambubininaupwak yiluk, wene endak andi, ogagetek. Ata, wene adik swi menda nggatuk erogo yuknirigya lagagirik, yogak Nenowa Inis Ombok dugwit, mondok eve iya erogo nenake ogasiga.

⁷ Wene endak Ala en nggatuk erogo yugeragagi ako, sek okbugu duklipmu en, hivis okbisaup wene andi, nggatuk erogo yilipuk ovara,

⁸ Ala en wene endak nggatuk erogo yugeragagi hegek At aburi adik ogagwi inigu lagagirik, enaruk watya dugwit: “‘It avakwa Iserali menda inim, it Yakura menda inim, ninim wene swi nggatuk erogo baup vage horok ari warisogon o.

⁹ It enombawi o Mesir en wogonombolok wulu warigiluk, ninggis vaginiviluk wulu wagya dugwit, wene nggatuk erogo yugeragagis ako, it des erogo ogagetek iniselok, An Enasin Ala enat hekbogogis atma, wene andi menda An ambi inim yugerayogonbuk. Ata, wene adik swi menda ambi nggatuk erogo yugerayogon o,’ yiluk, An Henasin Ala enat yukheraliga.

¹⁰ Andi hudi ovogat ari wagya halok, it avakwa Iserali vaga wigalek wene swi menda nggatuk erogo yugeraup ako yiat: ‘Anen ogagu dogop wene enape wenggelek dogopwak yiluk wogirigya, it enendawima dirup ovagak warogo bagya, ogarisogon atma, An it Enasin Ala agya, eke, it An naburi agwi, ogarusogom.

¹¹ It ininis werek winimen inim, ininis sovalek inim, ovok erogo An neyave inilup arusogom atma, ap ambi at inim agarik en, “Ala anderogo,” yiluk, mamulirisogonbuk, eke, ap ambi aswe yugugu dugwit, “Ala eyave hilup aru,” yiluk, yugirisogonbuk.

¹² It enovavut weyak adigat dugwit ogasagwi ako, An enomaduk degerogo bugu, eke, it weyak ogasagwi ako, Anen nape wenggelek dogosogonbuk, enomaduk ninggut erogo bagya, ogarisogon o,’ yiluk, An Ala enat yagaliga,” yagagi ako andi,

¹³ “Wene adik swi menda nggatuk erogo yisogon,” yagagi andi vaga wene endak mamulik ako meyan ovagak agagi. Eke, yi menda ndi menda endak menda elese weyak lagya halok, mbo helagwi ako hak, wene endak menda ako vage dek arisogon.