Iberani 7 - ALA WENE HIVIS DIRUP WATUGWA

At Melkisedek ako ap imam ovagak welagagi wene

¹ Ap Melkisedek ako andi, avakwa o Salem menda enasin inis ombok vagenombogo ap imam dugwit, At Mondok Siyalek Adigat Agarik Ala ako, ake ogagya lagagi. Ndugwis ambi vaga ap Averakam aori inim ap ininis werek eneyave 4 inim ndup sumburi lagu lagagwarik, sovalogo bisiluk, enawinda mbalogo bagu lagagwarik, enangge-enangge hugul wogo wolok eneyami vaga enamwa wagusim, ap Melkisedek ako enadema lagya lagagirik, amunggat Averakam ovaga bagagi.

² Amunggat ovaga bagya lagagimu, Averakam en yi menda ndi menda hugul wolok wagagi ako, venak ambi sepersepuluh yendarogo ap Melkisedek wogogogi. Ap Melkisedek inis salek ako andi, adem mberen agarik. Ambi andi, “Avakwa enasin inis ombok sek adigat ogasiga,” yiluk, yugwi, eke, ambi, at inis ombok o Salem vagago welagagi atma, inis ambi, “Avakwa enasin inis ombok enendawi ugun adenggen seyalek okbisaliga,” yiluk, yugwi, yugu lagagwa.

³ At ap Melkisedek avok ako andi, isa-asin inim, eyave endago inis unggul inim, eyave o nggoma en endaklagagi inim, o ngga vaga hombagagi inim, mbilinogo dirup warekdek atma, At Ala abut ovagak ap imam mondok-mondok itok agarik helagwi.

⁴ At Averakam andi, nit avakwa Iserali menda nenombao ap ombogat welagagi ovara, at inim ndup menda sovalogo bisiluk, wagya lagagirik, hugul wolok wagagi ako, venak ambi sepersepuluh yendarogo ap Melkisedek wogogogi andi vaga, at Melkisedek ako andi, ap mondok ombogat higyo.

⁵ Ala en wene, “Yerogo ogarup, nderogo ogarup,” yiluk, avakwa Iserali menda yugirigya dugwit, “Henangge-henangge 10 agarik halok, ambi yendarogo An nake banunggu hiniselok, it ap imam-imam Lewi menda en adigat wugu dogopwak o,” yiluk, yugeragagi dirup warek ako andi, it Averakam ombawi en Ala ake belagwi ako, enaswei it Iserali menda en belagwi ovara hegek-at it Lewi ombawi akoen wugu dogopwak yiluk, yugeragagi.

⁶ Anderogo ovara, ap Melkisedek andi, inis unggul Lewi menda dek ovara, Averakam en hugul wolok wagagi ako sepersepuluh yendarogo wogugu lagagimu, Melkisedek en “Ala avok yugogogi akoat vagago agarik yi aro,” yiluk, wigya lagagirik, amunggat ovaga bagagi.

⁷ It ap enasini ininis werek akoen, enaori sovalek ininis dek menda enamunggat enovaga biselagwi ako nit ninilup. Anderogo ogasagwi atma,

⁸ it ap ininis unggul Lewi menda en, Ala ake bago wugu lagagwa ako andi, ap ambi hambigya hegek, avoloma ambi mondok okbagek ogasagwi, ovara, at Melkisedek ogagagi ako andi, “O ngga vaga hombagagi,” dirup warekdek atma, at mondok-mondok iluk dugwit, waliga menda ako ovagak helagwi.

^9-10 Eke, ap Melkisedek akoen Averakam adema lagya lagagimu, at Averakam akoen ombao Lewi menda ao endaklagatek endawima hegek Ala ake bago wogogogi atma, it Lewi menda Ala ake bago welagwi menda akoen Ala ake bago ap Melkisedek wogogogwa yup andi, sek aro.

¹¹ It ap Lewi menda ako, Ala en it imam-imam dugwit At ake ogagu dogopwak yiluk, mondok okbugu lagagimu, iren avakwa enake ogagu dugwit sek okbisapwak yiluk, “Yerogo ogarup nderogo ogarup,” Musa wene yugogogi ako, inim ogagu lagagwa. Anderogo ogagu dugwit ovara, it ogasagwi vaga avakwa Iserali menda sek okbigitek welagagwa. Sek okbisaup ndak duklipmu en, Ala en it ap Harun ombawi imam-imam menda ako hekbisiluk, ap Melkisedek ogagya lagagi ako hak, ap adik menda ambi mondok okbaup ombaklipuk.

¹² Eke, it ap imam-imam ogagu lagagwa ako, degerogo bisiluk enavoloma adik swi menda ambi ogagu dogopwak yiluk, mondok okbugu halok, it ogagu dogop wene modo swi menda inim yugeraliga.

¹³ At Melkisedek menda ambi ovagak mondok okbaup an yukhirigi ako andi, At Nenowa Inis Ombok Yesus en ogagya dogop atma yiluk, yukheraliga. At inis unggul Lewi menda dek inis unggul adik menda atma, At inis unggul menda ambien avakwa enake warogo hali hunisagwima akoma it imam-imam ogasagwi ako, ogagetek-at agarwik.

¹⁴ At Nenowa Inis Ombok andi, inis unggul Yakura menda nit ovok ninilup. Eke, Musa en, “Hivis ap Yakura menda ambi, ap imam Ala ake ogagya dogop,” yiluk, anderogo yegetek ovara,

¹⁵ ap inis unggul adik ambi Melkisedek ovagak, ap imam Ala ake ogagya dogopwak yiluk sigam agagi andi vaga, Ala en ininis unggul Lewi menda ako hekbaluk, ap inis unggul adik menda mondok okbaup yedok helagwi.

Ap Melkisedek imam welagagi hak, ap ambi dogop wene

¹⁶ Ap adik Melkisedek ovagak imam Ala ake ogagya dogopwak yiluk, mondok okbagagi adem ako andi, avakwa en, “Ap andi menda ambi endago halok imam Ala ake ogagya dogop o,” yiluk, wene hobalek ako vaga mondok okbagetek. Ata, At Yesus anye wisane atma, degerogo baup meyan At mondok itok iluk agarik andi vaga Ala en imam At ake ogagya dogop mondok okbagagi.

¹⁷ Ala en At mondok okbagya halok ogagya dogop wene yugugu dugwit: “Ap Melkisedek ogagya lagagi ako hak, Hat ap imam ovagak dugwit, mondok-mondok nake ogagya dogosogon o,” yiluk, yugogogi dirup warek ako wane-wane At mondok okbagagi.

^18-19 Musa wene ako, musek lagu dugwit, sek okhedasogom yiluk, ogagusigik ovara, sek okbigitek un enam warogo ogagu lagagwa. Halok, “Yerogo ogarup, nderogo ogarup,” wene endak yugeragagi ako, degerogo baluk, wene adik swi menda sigam okbagagi atma, “Wene yi, musek lendagwi vaga sek okbininaup avyarat higyo,” yiluk, nenape wenggelek dugwit, Ala adema horok ari wendagwi.

²⁰ It ap imam-imam endak menda ako, ogagu dogopwak yiluk, mondok okbugu dugwit, Ala inis hanum mbabaluk mondok okbugu lagagibuk ovara, imam swi menda ako mondok okbagya dugwit, hanum mbalogo yagagi.

²¹ Andi, At Ala en At Yesus mondok okbagya dugwit: “‘Hat ap imam ovagak dugwit, mondok-mondok nake ogagya dogosogon o,’ yiluk, Nenasin Inis Ombok hanum mbanggigirikmu, ane adik arisogonbuk o,” yiluk, yugogogi ako andi, At inis hanum mbanggigi andi vaga At Yesus ap imam ovagak dugwit nenake ogagya dogopwak yiluk enogo mondok okbagagi.

²² Hanum mbanggigi ako vaga, wene endak yovo iri lagagi ako hak, wene swi menda nggatuk erogo yukneragagi ako yovo yilayogonbuk. Ata, At Yesus mondok des erogoat ogarisogon umbutu dogosogom.

²³ Eke, ambi, it imam-imam endak ogagu lagagwa ako, mondok-mondok ogagu lagagwabuk. Ata, ambi hambigya halok avoloma ambi mondok okbagek ogagu lagagwa atma, eneyave wisane-at ogagu lagagwa ovara,

²⁴ Yesus andi, mondok iluk itok agarik atma, imam ambi At avoloma mondok yiluk ogagya dogosogonbuk. At adigat imam dugwit mondok-mondok ogagya dogosogon.

²⁵ Anderogo atma, nit avakwa nenendawi At ovaga vanggabaluk, Ala adema horok ari wagu niniselok, At nenake Ala yugirigiluk mondok iluk agarik atma, nenagap wendarogo mondok sek erogo bininaup andi, sek aro.

²⁶ At Nenowa ap Imam Inis Ombok nenake ogagya dugwit, sek erogo okbininapwak yiluk mondok okbaup sek andi, Keretus Arat. At andi, it avakwa weyak ogasagwi menda enanggelekma nagu lagagi ovara, At weyak ambi ogagetek, avakwa enane At ovaga agetek, At mondok sek adik enek welagagirikmu, mbogot ovaga dambuk hegek, eve winimen erogo horakba inggya lagagirik, nit avakwa nenake ogasiga.

²⁷ Nenake ogagya dugwit, it ap Lewi menda imam-imam enasini ininis ombok akoen ndugurek-ndagarek avakwa enake warogo Ala wogugu dugwit, endak it enadik weyak ogasagwi ako dek arupwak yiluk, Ala wogugwis, andien, hivis avakwa nin weyak ogasagwi ako dek arupwak yiluk enake wogugwis, ogasagwi ako hak, At Keretus anderogo ogasigadek. At Keretus andi, At eyave Ala wogugu lagagirik, nit weyak ogasagwi ako degerogo bininagiluk, At ndugwis ambiat mondok yunggwi ndendalek-at nenake hombagagi.

²⁸ Wene Musa yugogogi wane-wane ogagu dugwit, it ap enanyedek wen vaga menda hegek imam-imam enasini ininis ombok dogopwak yiluk, mondok okbugu lagagwa ovara, Ala en At Abut mondok okbagya dugwit, hanum mbalogo yugogogi ako andi, wene Musa yugogogi ako endak hegek hivis yugogogi atma, At Abut endawi mondok werek ap Imam Inis Ombok nenake mbup yegetek ogagya dogopwak yiluk, mondok okbagagi.