Iberani 5 - ALA WENE HIVIS DIRUP WATUGWA

¹ It ap imam-imam enasini ininis ombok ovok erogo ako andi, Ala en avakwa Ala aburi enanggelekma en enogo mondok okbigik ogasiga. Enogo mondok okbugu lagagirikmu, avakwa en Ala inis adup ogagu dugwit, yi menda ndi menda Ala ake ba wendagwi ako, Ala wogugwis, eke, weyak ogasagwi ako, it enake warogo hali hunggwis, ogagu dogopwak yiluk, mondok okbisaliga.

² It ap imam-imam enasin ombok ako, anyedek wen vaga menda atma, avakwa Ala wene dibagetek nomaliluk lagu dugwit, weyak ogaguselok, enabwa inimbita dugwit, enake endawi sagain vaga ogasiga.

³ Avakwa weyak ogasagwi ako, enake warogo Ala wogugu dugwit, at ogo ap wen vaga menda weyak ogasiga atma, at omaduk ogo degerogo bapwak yiluk, at adik ake ogo warogo Ala wogisiga.

⁴ Eke, it ap imam-imam enasini ombok ako umbutu dugwit, “An imam inis ombok enasin dogosogon o,” yiluk, it enapedimot mikhedelagwidek. Ata, Ala en ap Harun enogo mondok okbagagi ako hak, enogo mondok okbisaliga.

⁵ Anderogo wane-wane, At Keretus akoen, “An ap imam ninis ombok dogosogon o,” yiluk, siyabetegetek. Ata, At Ala en At yugugu dugwit: “Hat An Nabut, eke yogak An Hat Hasin agi o,” yiluk, yugogogi.

⁶ Eke, Ala wene dirup warek ambi iri dugwit: “Ap Melkisedek ogagya lagagi ako hak, Hat ap imam ovagak dugwit, mondok-mondok nake ogagya dogosogon o,” yiluk, yagagirikmu, Ala en At enogo mondok okbagagi helagwi.

⁷ O endak At Yesus ako ap-at agya lagagirik o wen vaga yoma nagu dugwit, hambup alon en Asin agap wendarupwak yiluk, yup aik sagi-rago erogo yagagi ako, At Asin ane adigat hobaluk ogagya lagagirikmu, Abut en samban ogagagi ako Ala aruk hunggigi.

⁸ Yesus ako eve Ala Abut-at ovara, idup-mbidup ovaga agagi ako vaga Asin Ala ane yugogogi ako aruk hobaluk ogarup mamulhedagagi.

⁹ Asin ane hobaluk ogagya dugwit, nit okninivisiga menda ako At eve mondok dikduk erogo mamulhidigya lagagirik, nit At ane wokbaluk, ogarit lendagwi ako, ovok erogo niniluk mondok-mondok dogoguluk, nenagap wendakninipu dogop adem Arat agagi.

¹⁰ Anderogo atma, Ala en, “Ap Melkisedek ogagya lagagi ako hak, ap Imam Hinis Ombok Harat,” yiluk, mondok okbagagi.

Ala wene hekbaluk wunggu hinisaoen yiluk, yugeragagi wene

¹¹ Wene yi menda eve wisane erogo yukheraup werek ovara, ambi inim henaruk hulup henanggon okhinipu hinigirikmu, des erogo mbilinogo yukheraup meyan okneraliga.

¹² Hit o endak erogo Ala wene henaruk hunggugup atma, vage it nin mamulerelagwi menda dogop sek ovara, hit meyan halok, wene adem endak menda ambi inim yukheraup ombasiga. It avyak nggebera ako erom modo menda naup meyan halok, inisa agaidak amok adigat nelagwi andi hak, hit andi, wene modo menda mamulheraup meyan en, wene adem endak henaruk hunggu lagagup ako menda ambi inim mamulheraup henombasiga.

¹³ Ap saen idak amok adigat naup hogop ombasiga ako andi, avyak nggebera ovagak atma, weyak ogarup sek ogarup elose yedok hegetek-at agarwik ovara,

¹⁴ modo menda nungguselok andi, ap enanggok enendawi werek dugwit, yi ogagek ndi ogagek enendawi mondok dibaluk ogasagwi vaga weyak ogarup sek ogarup elose yedok-at helagwi.