Iberani 4 - ALA WENE HIVIS DIRUP WATUGWA

¹ Anderogo atma, At ninim sat yanggal hedanungguguluk, “Omanes o,” yiluk, avok yukneragagi ako, dek agetek aoat agarik atma, hit ambi weyak ogarusogom vaga ninim sat yanggal hedanunggup ogo mondok dek agya haoen, hwalogo dogones.

² Sek wene ako o endak nenombawi yugeragagwa ako hak, nit ogo wane-wane Sek Wene yukneragagwa ovara, it wene yugeragagwa hunggugwa ako andi, enendawi avyarat embetetek dugwit wegetek atma, wene andi vaga ambi sek okhedegetek un enam warogo enaruk hunggugwa.

³ At Ala en, “‘An sat yanggal hedaligama, hit ninim sat yanggal hedanunggup mondok dek o,’ yiluk, naninis en hanum mbanggu dugwit wene andi yugeragagis o,” yiluk, yagagi dirup warek agarik ako andi, wen-mbogot ogagya dugwit, At ogarup imbitigi ako, ovok atok weralogo okbaluk, vage sat yanggal hidigya dugwit yagagirikmu, andi nggarogo yiluk yagagi ombasagwi? Dek o. Andi, nit avyarat ombasagwi menda ninim hivis sat yanggal hedanungguguluk yagagi helagwi.

⁴ Andien, ndugwis 6 dukluk, ndugwis 7 vaga ogarup Ala yagagi dirup warek ako, ap ambien iri dugwit: “At Ala en yi menda ndi menda ovok erogo ogagya lagagirik, ndugwis ambi 7 vaga sat yanggal hidigya mbuverek welagagi o,” yiluk, yagagi ako mbilinggigi.

⁵ Andien, ambi iri dugwit: “An sat yanggal hedaligama, it ninim sat yanggal hedanunggup mondok dek o,” yiluk, yagagi dirup warek agarik andi vaga

⁶ it endak Sek Wene yugeragagwa ako, wiyik-weyak erogo hekbagagwa vaga At Ala sat yanggal hedaligama nonggegetek atma, enavoloma avakwa hunogo menda sat yanggal hedanunggupwak yiluk yagagi helagwi.

⁷ Anderogo atma, wene, “O yogak yi vaga, hit Ala ane henaruk hunggip halok, ‘Nenanggon o,’ yiluk, henendawi anye arubuk o,” yagagi wene winimen endak mbilinogo yukhirigi akoat yi tahun ndi tahun okbaluk, o hivis ap Daut ako anderogoat yugogogi dirup watigi atma, wene, “Yogak o,” yiluk, Daut yugogogi ako andi, Ala en ndugwis adik ambi vaga avakwa adik hunogo menda sat yanggal hedanunggupwak yiluk, endawi wenggebaluk, yugogogi helagwi.

⁸ Ap Yosua en sat yanggal hedelagwima nenombawi wogonombolok bisa nunggulipmu en, At Ala ndugwis adik ambi vaga, sat yanggal hedaup yagagi wene ako andi, yilipuk ovara,

⁹ Ala en ndugwis 6 dukluk, ndugwis 7 vaga sat yanggal hidigya lagagi ako hak, yogak nit Ala aburi ogo sat yanggal hedaligama ambi enogo bagagi agarik.

¹⁰ Anderogo atma saen, Ala sat yanggal hedaligama ninim sat yanggal hedanunggup ombasagwi halok, Ala en yi menda ndi menda ovok erogo ogagya lagagirik, sat yanggal hedagagi ako hak, nit ogo wane-wane yavup ovok erogo okbaluk sat yanggal hidugu dogosogom.

¹¹ Anderogo atma, it Iserali menda endak Ala wene weyak erogo hekbagu lagagwama, sat yanggal hedelagwima nonggegetek ako hak, nit nin wane-wane nunggup dek agya haoen, nungguguluk, nenanye erogo walokhugu dogosogom.

¹² At Ala ane andi, mondok iluk dugwit, anye erogo nenendawima sapok yi nunggwisiga. Ndisugalit ovat venak-venak marek andi, horogat nininggis-ninisok agulikmu mondok ilim hetnaro sapok yi nunggwigya dugwit, nenowak nenamonggok vodo-vodo hanunggwisiga ovara, Ala wene yi andi, eve mondok ovat iya erogo atma, nenendawi-nenanggela mondok sapok yi nunggwigya dugwit, ogarup nenendawi wenggelisagwi inim, hogop ombasagwi inim, ovok erogo sigam okbininggu helagwi.

¹³ Nit avakwa inim, yi menda ndi menda werek ogagagi inim, ovok erogo At Ala il agarik atma, ambiat ogo At il haligadek yiluk, hwilak larup andi mondok meyan. At imu yi menda ndi menda ovok erogo sigam agarik atma, At ovok erogo il haliga. Anderogo atma, nit ogasagwi ako ambiat ogo hwilak basogombuk ovok erogo vagalogo At yugurusogom.

Ap Imam Inis Ombok Yesus avok wene

¹⁴ Ap Imam Inis Ombok Ala Abut Nenowa Yesus ako, mbogot vaga Ala adema inggya lagagirik, yogak nenake ogasiga atma, nit wene avyarat umbutu dugwit wagagup yagalagwi ako, mondok nggetok erogo vagago dogosogom.

¹⁵ At Nenowa ap Imam Inis Ombok akoen, nit ap wen vaga menda atma, nenovavut weyak ogarup okninipu halok, “Nanggon,” ninimbita dugwit nenake ugun-ugun ogasigadek. Ata, “An hagagis akoat oginivisiga o,” yiluk, endawi sagain vaga nenake ogasiga. Nit nenavut mbaligiluk, anggin-mbanggin nenovaga asiga ako, At ogo anderogoat ovaga agya hegek weyak ogagetek endawi wadokdek dugwit, wogogi ilup atma,

¹⁶ yogak anggin ambi nenovaga agya halok, nenabwa imbita dugwit, aigwak aberen okbininggu haguluk, nenalon embetetek At Ala nenabwa en okbininaligama akoma horok ari nunggugu dogosogom.